1 Corintios 15:4 - Tupanaarü Ore

⁴ Rü yexgumarüxü̃ ta pexü̃ changúexẽxẽ nax inata̱xgüãxü̃, rü norü tomaepü̱x ga ngunexü̃gu rü wena nax namaxü̃xü̃, ngẽma Tupanaarü ore i ümatüxü̃wa nüxü̃ yaxuxü̃rüxü̃.

1 Corintios 15:4 Referans Kwoze

Ochéa 6:2

Rü ngẽmaãcü paxa tá inayanaxoxẽxẽ i ngẽma ngúxü̃ i ingegüxü̃ rü tá tüxü̃ ínarüdagüxẽxẽ nax mea nape̱xewa imaxẽxü̃ca̱x.

Ore i mexü̃ ga Matéu ümatüxü̃ 12:40

Rü yexgumarüxü̃ ga Yoná ga tomaepü̱x ga ngunexü̃ rü tomaepü̱x ga chütaxü̃ choxni ga taxü̃ãnüwa nax nayexmaxü̃ rü ngẽxgumarüxü̃ tá ta nixĩ ya Tupana Nane ya duü̃xü̃xü̃ ixĩcü i tomaepü̱x i ngunexü̃ rü tomaepü̱x i chütaxü̃ naxma̱xü̃ i nagu yaxǘcuchixü̃wa nangẽxmaxü̃.

Yoná 1:17

Rü yoxni ga nüma ga Cori ya Tupana rü yéma nanamu ga wüxi ga choxni ga taxüchixü̃ nax Yonáxü̃ ínagaxü̃ca̱x. Rü nüma ga Yoná rü tomaepü̱x ga ngunexü̃ rü tomaepü̱x ga chütaxü̃ yema choxni ga taxüchixü̃ãnüwa nayexma.

Wiyaegü 2:7

Rü choma rü tá chanaxunagü i ngẽma Cori ya Tupana nagu rüxĩnüxü̃, rü chomaxã nüxü̃ yaxuxü̃ i ñaxü̃: —Cuma rü chaune quixĩ, rü choma rü Cunatü chixĩ i ñu̱xma.

Popera ga Yudíugü ga yaxõgüxü̃ca̱x ümatüxü̃ 13:20

Rü ñu̱xma chanaxwa̱xe i pexü̃ narüngü̃xẽxẽ ya Tupana ya tórü taãẽxẽẽruxü̃ rü tórü ngüxmüxẽẽruxü̃ ixĩcü. Rü nüma nixĩ ga yuwa ínadaxẽẽãxü̃ ga tórü Cori ya Ngechuchu ya Cristu ya yaxõgüxü̃arü dauruxü̃ ya guxãarü yexera ixĩcü. Rü yexguma curuchawa yapotagu rü nagü ibaxgu rü nayanguxẽxẽ ga norü uneta i taguma iyarüxoxü̃ i maxü̃ tüxna ãxü̃. Rü chanaxwa̱xe nax nüma ya Tupana pexü̃ nangü̃xẽẽxü̃ nax guxü̃wama pemexü̃ca̱x rü mea naga pexĩnüexü̃ca̱x. Rü ngẽxgumarüxü̃ ta tanaxwa̱xe nax Ngechuchu ya Cristugagu Tupana toxü̃ rüngü̃xẽẽxü̃ nax nüma nanaxwa̱xexü̃ãcüma tixĩgüxü̃ca̱x. Rü tanaxwa̱xe i guxü̃guma Cristuxü̃ ticua̱xüü̃gü. Rü ngẽmaãcü yixĩ.

Romanos 6:4

Rü yexguma íibaiü̃gu, rü Cristu yuxü̃rüxü̃ yexma nayu ga tacüma ga nũxcümaü̃xü̃, rü Cristu itáxü̃rüxü̃ inata̱x ga yema tacüma ga nũxcümaü̃xü̃. Rü yemaacü naxüpetü nax wena imaxẽxü̃ca̱x rü tüxü̃́ nangẽxmaxü̃ca̱x i maxü̃ i ngexwaca̱xü̃xü̃, yexgumarüxü̃ ga Ngechuchu nax yuwa írüdaxü̃ rü wena namaxü̃xü̃ ga yexguma Nanatü ga Tupana norü poramaxã ínadaxẽẽgu.

Ore i mexü̃ ga Luca ümatüxü̃ 24:46

Rü ñanagürü nüxü̃: —Tupanaarü ore i ümatüxü̃wa rü nüxü̃ nixu rü yimá Cristu rü tá nayu, rü tomaepü̱x i ngunexü̃gu rü tá wena namaxü̃.

Ore i mexü̃ ga Luca ümatüxü̃ 24:26

¿Rü tama ẽ̱xna nüxü̃ pecua̱x ga yema ngúxü̃ tá nax yangexü̃ ga Cristu naxü̃pa nax daxũguxü̃ i naanewa naxũxü̃, nax ngéma ãẽ̱xgacü yixĩxü̃ca̱x? —ñanagürü.

Ore i mexü̃ ga Luca ümatüxü̃ 9:22

Rü ñanagürü nüxü̃ ga norü ngúexü̃gü: —Tupana Nane ya duü̃xü̃xü̃ ixĩcü rü poraãcü ngúxü̃ tá ninge. Rü tá nüxü̃ naxõõ̱xgü i Yudíugüarü ãẽ̱xgacügü, rü chacherdótegüarü ãẽ̱xgacügü, rü ngẽma ngúexẽẽruü̃gü i Moichéarü mugüwa ngu̱xẽẽtaegüxü̃. Rü tá nayama̱xgü, natürü tomaepü̱x i ngunexü̃gu rü wena táxarü namaxü̃ —ñanagürü.

Colosenses 2:12

Rü yexguma ípebaiü̃gu, rü Cristu itáxü̃rüxü̃ yexma nata̱x ga nũxcümaü̃xü̃ ga perü maxü̃. Rü yema Cristu írüdaxü̃rüxü̃ rü pema rü ta penayaxu i maxü̃ i ngexwaca̱xü̃xü̃, yerü peyaxõgü ga Tupanaarü pora ga namaxã Cristuxü̃ yuwa ínadaxẽẽxü̃.

Ngechuchuarü ngúexü̃gü ga yamugüxü̃arü puracüchiga 17:31

Yerü nüma ga Tupana rü marü nüxü̃ naxuneta i wüxi i ngunexü̃ i nagu tá aixcüma guxü̃ i ñoma i naanecüã̱x i duü̃xü̃güna naca̱xaxü̃ i norü maxü̃chiga. Rü marü nüxü̃ naxuneta ya wüxi ya yatü ya Ngechuchu, rü yimá tá nixĩ ya duü̃xü̃güna cacü. Rü Tupana rü guxãxü̃ma nüxü̃ nacua̱xẽxẽ ga yema ga yexguma Ngechuchuxü̃ wena namaxẽẽgu —ñanagürü ga Pauru.

Ngechuchuarü ngúexü̃gü ga yamugüxü̃arü puracüchiga 1:3

Rü yexguma marü yuwa ínadaxguwena ga nüma ga Ngechuchu rü 40 ga ngunexü̃gu nügü nango̱xẽẽxü̃ naxca̱x ga norü ngúexü̃gü rü muxü̃ma ga togü ga nüxü̃́ yaxõgüxü̃ nax yemaacü nüxü̃ nacua̱xgüxü̃ca̱x nax aixcüma wena namaxü̃xü̃. Rü namaxã nüxü̃ nixu nachiga ya Tupana ãẽ̱xgacü íyixĩxü̃wa.

Ore i mexü̃ ga Matéu ümatüxü̃ 20:19

Rü tá to i nachixü̃anecüã̱xna nanamugü. Rü tá nüxü̃ nacugüe rü nanacua̱i̱xgü rü ñu̱xũchi tá curuchawa nayapotagü nax ngẽxma nayuxü̃ca̱x. Natürü tomaepü̱x i ngunexü̃guwena rü tá wenaxarü namaxü̃ —ñanagürü.

Ore i mexü̃ ga Matéu ümatüxü̃ 16:21

Rü yemawena inanaxügü nax norü ngúexü̃gümaxã nüxü̃ yaxuxü̃ ga yema tá nüxü̃ üpetüxü̃. Rü ñanagürü: —Choma rü Yerucharéü̃wa tá chaxũ. Rü ngéma poraãcü ngúxü̃ tá choxü̃ ningexẽẽgü i Yudíugüarü ãẽ̱xgacügü rü chacherdótegüarü ãẽ̱xgacügü rü ngẽma ngúexẽẽruü̃gü i mugüwa ngu̱xẽẽtaegüxü̃, rü tá choxü̃ nima̱xgü. Natürü ngẽma tomaepü̱x i ngunexü̃gu rü wena táxarü ícharüda —ñanagürü.

Nüxíraxü̃xü̃ ga popera ga Pedru ümatüxü̃ 1:11

Rü nümagü ga yema orearü uruü̃gü rü Tupanaarü poperawa nangúe nax nüxü̃ nacua̱xgüxü̃ca̱x nax ñuxãcü tá nax yixĩxü̃ rü ñuxguacü tá nax nangóxü̃ ga gumá maxẽxẽẽruxü̃ ga Cristu. Rü Cristuãxẽ i Üünexü̃ ga yema orearü uruü̃güwa yexmaxü̃, rü nüxü̃ nüxü̃ nacua̱xẽxẽ nax Cristu rü tá ngúxü̃ yangexü̃ rü tá nayuxü̃ rü yemawena rü wena tá namaxü̃xü̃ rü daxũguxü̃ i naanewa tá nax naxũxü̃.

Ore i mexü̃ ga Cuáü̃ ümatüxü̃ 19:38

Rü nayexma ga wüxi ga yatü ga Arimatéacüã̱x ga Yúchegu ãégacü. Rü nüma rü ta Ngechuchuaxü̃́ nayaxõ, natürü cúãcü nayaxõ yerü natanüxü̃ ga Yudíugüarü ãẽ̱xgacügüxü̃ namuü̃. Rü gumá nixĩ ga Pirátuna yacacü nax naya̱u̱xãxü̃ca̱x ga Ngechuchuxü̃ne. Rü Pirátu rü: —Ngü̃ —ñanagürü. Rü yexguma ga Yúche rü yéma naxũ ga curuchawa íyapotaxü̃wa, rü curuchawa nayayaxu ga naxü̃ne ga Ngechuchu.

Wiyaegü 16:8

Rü guxü̃guma nachauxü̃tagu ya Cori. Rü chorü tügünecüwawa nangẽxma rü ngẽmaca̱x taxuxü̃táma i ta̱xacü chixexü̃gu choxü̃ nanguxẽxẽ.