1 Corintios 14:1 - Tupanaarü Ore

¹ ¡Rü naxca̱x peda̱u̱x nax duü̃xü̃güxü̃ pengechaü̃güxü̃! Rü ngẽxgumarüxü̃ ta name nixĩ i naxca̱x pedau i ngẽma cua̱xgü i Naãxẽ ya Üünexü̃wa ne ĩxü̃. Rü ngẽma cua̱x i yexeraãcü penaxwa̱xexü̃ nixĩ nax pexü̃́ natauxchaxü̃ nax nüxü̃ pixuxü̃ i Tupanaarü ore.

1 Corintios 14:1 Referans Kwoze

1 Corintios 14:39

¡Rü ngẽmaca̱x, Pa Chauenexẽgüx, rü Tupanana naxca̱x peca i cua̱x nax meama nüxü̃ pixuxü̃ca̱x i norü ore! ¡Rü tama penachu̱xu nax to i nagawa yadexagüxü̃ i duü̃xü̃gü!

Popera ga Yudíugü ga yaxõgüxü̃ca̱x ümatüxü̃ 12:14

¡Rü naxca̱x peda̱u̱xgü nax guxü̃ i duü̃xü̃gümaxã pemecümaxü̃! Rü ngẽxgumarüxü̃ ta name nixĩ i naxca̱x pedaugü nax Tupanape̱xewa pexüünegüxü̃ca̱x. Erü yíxema tama Tupanape̱xewa üünexe rü taxũtáma tórü Corixü̃ tadau.

Nüxíraxü̃xü̃ ga popera ga Timutéuca̱x naxümatüxü̃ ga Pauru 4:14

Rü tama name i nüxü̃ curüngü̃ma i ngẽma cua̱x ga Tupana cuxna ãxü̃ ga yexguma yema yaxõgüxü̃arü ãẽ̱xgacügü cuétü üxme̱xgüãcüma cumaxã nüxü̃ yaxugügu nax Tupana cuxna naxãxü̃ ga yema cua̱x.

1 Corintios 16:14

Rü guxü̃ma i ngẽma pexüxü̃, rü name nixĩ i pegü pengechaü̃güãcüma penaxü.

1 Corintios 12:1

Pa Chauenexẽgüx, chanaxwa̱xe i nüxü̃ pecua̱x nax ñuxãcü yixĩxü̃ i ngẽma cua̱x rü ngẽma tauxcha i Tupanaãxẽ ya Üünecü tüxna ãxü̃.

1 Corintios 13:13

Rü ñu̱xma rü nangẽxma i tomaepü̱x i nacümagü i guxü̃gutáma ngẽxmaxü̃. Rü wüxi nixĩ nax yaxõxü̃, rü ngẽma to nixĩ nax ínangu̱xẽẽxü̃ nax nataeguxü̃ ya Cristu, rü ngẽma to nixĩ nax tüxü̃́ ngẽxmaxü̃ i ngechaü̃. Natürü ngẽma tomaepü̱xtanüwa rü ngẽma guxü̃arü yexera rümemaexü̃ nixĩ i ngẽma ngechaü̃.

1 Tesalonicenses 5:20

Rü ngẽxguma norü orearü uruü̃wa pemaxã yadexaxgu ya Tupana rü tama name i nüxü̃ pexoe.

Ucu̱xẽgüchiga 15:9

Nüma ya Cori ya Tupana rü tama nacümamaxã nataãxẽ i ngẽma chixexü̃gu maxẽxü̃. Natürü tüxü̃ nangechaü̃ ya yíxema aixcüma mea nape̱xewa maxü̃́xẽ.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:11

Natürü cumax, Pa Timutéux, rü wüxi ya yatü ya Tupanaaxü̃́ yaxõcü quixĩ. ¡Rü ngẽmaca̱x nüxna ixũgachi i guxü̃ma i chixexü̃! ¡Rü mea Tupanape̱xewa namaxü̃, rü norü ngúchaü̃ naxü, rü mea nüxü̃́ yaxõ, rü nüxü̃ nangechaxü̃ i duü̃xü̃gü, rü cugü naporaxẽxẽ i ngẽxguma guxchaxü̃ cuxca̱x ínguxgu! Rü tama name i cugü quicua̱xüxü̃.

1 Corintios 14:37

Rü ngẽxguma chi texé tügügu rüxĩnügu nax Tupanaarü orearü uruxü̃ tixĩxü̃ rü ẽ̱xna tügügu tarüxĩnügu nax Tupanaãxẽ ya Üünecü tüxna naxãxü̃ i ta̱xacürü cua̱x, rü name nixĩ i nüxna tacua̱xãchi nax tórü Coriarü mu yixĩxü̃ i ñaa ore i pexca̱x chaxümatüxü̃.

Ichaía 51:1

Rü ñanagürü ga Tupana: —¡Choxü̃́ iperüxĩnüe i guxãma i pemax ya cha̱u̱xca̱x daugüxe rü nagu ĩxẽ i ngẽma aixcüma mexü̃! Pema rü Abraáü̃taxa rü Chárataxa pixĩgü.

Nüxíraxü̃xü̃ ga popera ga Timutéuca̱x naxümatüxü̃ ga Pauru 5:10

Rü tanaxwa̱xe i duü̃xü̃gü ngĩxü̃ nacua̱xgü nax wüxi i mexü̃ üxcü nax yixĩxü̃, rü mea ngĩxãcüxü̃ yaexẽẽcü iyixĩ, rü mea ngĩpatawa duü̃xü̃güxü̃ yaxucü iyixĩ, rü yaxõgüxü̃arü ngü̃xẽẽruxü̃ iyixĩ, rü da̱xaweexü̃arü ngü̃xẽẽruxü̃ iyixĩ. Rü ngẽmaãcü tanaxwa̱xe i guxü̃raxü̃xü̃ i mexü̃arü üruxü̃ iyixĩ.

Efesios 1:3

Rü name nixĩ i nüxü̃ ticua̱xüü̃gü ya Tanatü ya Tupana ya tórü Cori ya Ngechuchu ya Cristunatü ixĩcü. Erü nüma ya Tupana rü Cristugagu tüxna nanaxã i naguxü̃raü̃xü̃ i ngü̃xẽẽgü i üünexü̃ i daxũguxü̃ i naanewa taxca̱x ne namugüxü̃.

1 Corintios 12:31

Rü name nixĩ i yexera naxca̱x peda̱u̱xgü nax Tupana pexna naxãxü̃ca̱x i ngẽma cua̱x rü tauxchagü irümemaegüxü̃. Natürü i ñu̱xma rü tá pexü̃ changúexẽxẽ i ta̱xacü nixĩ i guxü̃ma i ngẽma pemaxã nüxü̃ chixuxü̃arü yexera rümemaexü̃.

Ucu̱xẽgüchiga 21:21

Yíxema naxca̱x dauxe nax mexü̃gu tamaxü̃xü̃, rü tixaixcümaxü̃, rü nüxü̃ itayangau i maxü̃, rü duü̃xü̃gü rü tümamaxã nataãxẽ.

Norü tomaepü̱x ga popera ga Cuáü̃ ümatüxü̃ 1:11

Pa Chauenexẽ i Cuxü̃ Changechaü̃xex, ¡Taxṹ i nüxü̃ cuyadauxü̃xü̃ i ngẽma chixexü̃ ügüxü̃! Natürü name nixĩ i nüxü̃ cuyadauxü̃ i ngẽma mexü̃ ügüxü̃. Erü yíxema mexü̃ ǘxe rü Tupanaxacü tixĩ. Natürü yíxema chixexü̃ ǘxe rü tama Tupanaxü̃ tacua̱x.

Norü taxre ga popera ga Pedru ümatüxü̃ 1:7

Rü ngẽma nax Tupanaga pexĩnüexü̃étüwa penaxwa̱xe nax peenexẽgüxü̃ pengechaü̃güxü̃. Rü ngẽma nax peenexẽgüxü̃ pengechaü̃güxü̃étüwa penaxwa̱xe nax guxü̃ma i duü̃xü̃güxü̃ pengechaü̃güxü̃.

Romanos 12:6

Rü wüxichigü i yixema, rü Tupana tüxna nanaxã i tórü cua̱x i nüma nanaxwa̱xexü̃ nax tüxü̃́ nangẽxmaxü̃. Rü tanaxwa̱xe i meama nagu taxĩ i ngẽma cua̱x ya Tupana tüxna ãxü̃. Rü ngẽxguma tüxna naxããgu i tórü cua̱x nax norü orearü uruxü̃ ixĩgüxü̃ca̱x, rü name nixĩ i ngẽma õ i tüxü̃́ ngẽxmaxü̃maxã tanaxü i ngẽma puracü.

Norü taxre ga popera ga Timutéuca̱x naxümatüxü̃ ga Pauru 2:22

¡Nüxü̃ rüxo i guxü̃ma i ngẽma chixexü̃ i ngextü̱xücügü nagu rüxĩnüexü̃! ¡Rü mea Tupanape̱xewa namaxü̃ rü nüxü̃́ yaxõ! ¡Rü duü̃xü̃güxü̃ nangechaü̃ rü taxṹ i namaxã cunuxü̃! ¡Rü Tupanape̱xewa mea namaxü̃ wüxigu namaxã i guxü̃ma i ngẽma yaxõgüxü̃ i aixcüma Cori ya Tupanape̱xewa imexü̃ rü mexü̃ i norü ĩnümaxã yumüxẽgüxü̃!

Romanos 9:30

¿Rü ñuxũ ñagüxü̃ i ñu̱xmax? Rü pemaxã nüxü̃ chixu rü ngẽma duü̃xü̃gü i tama Yudíugü ixĩgüxü̃ ga tama Tupanaca̱x daugüxü̃ ga noxrix, rü ngẽmatama duü̃xü̃gü nixĩ i ñu̱xma Tupanape̱xewa imexü̃ yerü nayaxõgü.

Romanos 14:19

Rü ngẽmaca̱x, ¡ngĩxã pora taxü nax yigü ingechaxügüxü̃ca̱x rü yigü rüngü̃xẽẽgüxü̃ca̱x nax yexeraãcü Cristuaxü̃́ yaxõgüxü̃ca̱x rü naxügüxü̃ca̱x i ngẽma norü ngúchaü̃ ixĩxü̃!

1 Chamué 10:5

Rü ngẽmawena rü tá Guibeá ya Tupanaarü Ma̱xpǘnegu ãéganewa cungu i Firitéugüarü dauxü̃taechica íngẽxmaxü̃wa. Rü ngẽxguma yima ĩanegu cuxücuxgux, rü ngẽxma tá nüxü̃ cungau i ñuxre i Tupanaarü orearü uruü̃gü i Tupanaãxẽ ya Üünecü namaxã icuáxü̃ i Tupanaarü cua̱xüü̃wa ne ĩxü̃. Rü ngẽmape̱xegu tá naxĩ i duü̃xü̃gü i paxetatanüxü̃ i norü árpamaxã, rü árpaxacümaxã, rü paü̃derumaxã rü wowerumaxã.

1 Corintios 13:2

Rü woo nüxü̃ chacua̱xgu nax mea duü̃xü̃gümaxã nüxü̃ chixuxü̃ i Tupanaarü ore, rü woo nüxü̃ chacua̱xgu i guxü̃ma i ta̱xacü i ẽxü̃guxü̃ i Tupanachiga, rü woo choxü̃́ natauxchagu nax chorü õmaxã chayaxĩgachixẽẽxü̃ ya ma̱xpǘnegü, natürü taxuwama chame ega tama choxü̃́ nangẽxmagu i ngechaü̃.

1 Corintios 14:22

Rü ngẽmaca̱x ngẽma nax to i nagawa idexaxü̃, rü wüxi i cua̱xruxü̃ nixĩ naxca̱x i ngẽma duü̃xü̃gü i tama yaxõgüxü̃. Rü tama duü̃xü̃gü i marü yaxõgüxü̃ca̱x nixĩ i ngẽma. Natürü ngẽma Tupanaarü orexü̃ nax ixuxü̃, rü duü̃xü̃gü i marü yaxõgüxü̃ca̱x nixĩ nax yexeraãcü mea Tupanaaxü̃́ yaxõgüãxü̃ca̱x. Rü tama duü̃xü̃gü i tama yaxõgüxü̃ca̱x nixĩ i ngẽma.