1 Corintios 13:12 - Tupanaarü Ore

¹² Rü ngẽma ñu̱xma nüxü̃ idauxü̃ i Tupanachiga, rü ñoma wüxi i worua ya üxachametüxewa yigü idauxü̃rüxü̃ nixĩ nax taxca̱x naxẽxü̃. Natürü yixcüra rü tá aixcüma mea nüxü̃xüchi tadau ya Tupana. Rü ñu̱xma rü írarüwatama nüxü̃ chacua̱x i Tupanachiga. Natürü wüxi i ngunexü̃gu rü tá mea nüxü̃ chacua̱x i guxü̃ma i nachiga, ngẽma nüma ya Tupana choxü̃ nacuáxü̃rüxü̃.

1 Corintios 13:12 Referans Kwoze

Nüxíraxü̃xü̃ ga popera ga Cuáü̃ ümatüxü̃ 3:2

Pa Chauenexẽgü ya Pexü̃ Changechaü̃güxe, ñu̱xma rü marü Tupanaxacügü tixĩgü. Rü woo tama tüxü̃ nüxü̃ nacua̱xẽxẽ nax ñuxãcü tá ixĩgüxü̃ i yixcüra, natürü nüxü̃ tacua̱x nax Ngechuchurüxü̃ tá ixĩgüxü̃ i ngẽxguma nüma nango̱xgu, erü tá nüxü̃ tadau nax nañuxraü̃xü̃ i nüma.

2 Corintios 3:18

Rü ngẽmaca̱x guxãma i yixema nax Cristuaxü̃́ yaxõgüxü̃ rü ñoma woruarüxü̃ tixĩgü, rü tawa nango̱x nax ñuxãcü namexẽchixü̃ ya tórü Cori, rü ñu̱xma rü nataxuma i ta̱xacü i tüxü̃ idüxüxü̃ naxcha̱xwa. Rü nüma ya tórü Cori i Naãxẽ ya Üünexü̃ ixĩcü, rü guxü̃guma yexeraãcü tüxü̃ nimexẽẽchigü nax naxrüxü̃ imexü̃ca̱x.

Filipenses 3:12

Rü ñu̱xma rü tama chanaxwa̱xe i nagu perüxĩnüe nax guxü̃xü̃ chacuáxü̃ i Cristuchiga, rü ẽ̱xna guxü̃wama nax chamexü̃. Natürü naxca̱x chadauama nax Ngechuchu ya Cristuarü ngúchaü̃ chaxüxü̃ca̱x, yerü yemaca̱x nixĩ ga nüma ga cha̱u̱xca̱x nadauxü̃ ga noxrix.

Yema Cuáü̃ nüxü̃ dauxü̃ i yixcüra tá ngupetüxü̃chiga 22:4

Rü mea tá nachiwexüchixü̃ nadaugü, rü nacatügüwa tá nangẽxma i naéga.

Popera ga Chantiágu ümatüxü̃ 1:23

Rü yíxema irüxĩnümarexe i Tupanaarü ore natürü tama naxǘxe i ngẽma nüxü̃ yaxuxü̃, rü wüxi i yatü i daucüwa nügü dauchametüxü̃rüxü̃ tixĩ.

2 Corintios 5:7

Rü woo tama nüxü̃ tadaugügu ya yimá tórü Cori i ñu̱xmax, natürü tayaxõgü nax wüxi i ngunexü̃ rü tá nüxü̃ tadaugüxü̃.

Ore i mexü̃ ga Matéu ümatüxü̃ 5:8

Tataãẽgü ya yíxema tama chixexü̃gu rüxĩnüexe, erü yíxema tá tixĩgü ya Tupanaxü̃ daugüxe.

1 Corintios 8:3

Natürü ngẽxguma texé aixcüma Tupanaxü̃ ngechaü̃gu, rü Tupana rü tüxü̃ nacua̱x.

Romanos 8:18

Rü choma nagu charüxĩnü rü ngẽma ngúxü̃ i ñu̱xma ñoma i naanewa ingegüxü̃, rü taxuxü̃ma nixĩ i ngẽxguma nagu nanguxgu i ngẽma mexü̃ i yixcüra tá nüxü̃ idauxü̃ i ngẽxguma Cristumaxã ingẽxmagügu i daxũguxü̃ i naanewa.

Iraétanüxü̃arü muxchiga 12:8

Rü choma rü ngóxü̃wama Moichémaxã chidexa nawa i wüxi i naga i nüma meama nüxü̃ nacuáxü̃. ¿Rü ngẽmaca̱x i pema rü tü̱xcüü̃ tama pemuü̃e nax chixri nachiga pidexagüxü̃? —ñanagürü.

Naanearü ügüchiga 32:30

Rü yexguma ga Acóbu rü Penuégu nanaxüéga ga yema nachica yerü ñanagürü: —Woo Tupanachiwexü̃ chadau, natürü chamaxãma —ñanagürü.

Ore i mexü̃ ga Matéu ümatüxü̃ 18:10

Rü tama name i nüxü̃ pexoo̱x i wüxi i buxü̃ i ñaarüxü̃ choxü̃́ yaxõxü̃. Erü ngẽma norü dauruü̃gü i orearü ngeruü̃gü i daxũcüã̱x rü guxü̃guma Chaunatü ya daxũgucüpe̱xewa nangẽxmagü nax ngéma ngẽma buxü̃güétüwa nachogüxü̃ca̱x.

Ínachoxü̃xü̃chiga 33:11

Rü nüma ga Cori ya Tupana rü Moichémaxã nidexa, ñoma texé wüxi i tümamücümaxã ídexaxü̃rüxü̃. Rü yemawena ga Moiché rü yema Iraétanüxü̃ íyexmagüxü̃wa naxũ. Natürü gumá norü ngü̃xẽẽruxü̃ ga ngextü̱xücü ga Yochué ga Núü̃ nane rü taguma ínaxũxũ nawa ga guma tügümüne.

Yox 19:26

Rü woo i ñaa chauxune rü tá nua chanata̱x, natürü choma rü chauxetümaxã tá Tupanaxü̃ chadau.

Yox 36:26

Rü ngẽma nax guxü̃arü yexera yixĩxü̃ ya Tupana rü taxucürüwa nüxü̃ tacua̱xéga nax ñuxãcü yixĩxü̃. Rü taxucürüwa tayaxugü nax ñuxre yixĩxü̃ i norü taunecü.

1 Corintios 13:11

Yexguma chabuxgu ga chomax, rü wüxi ga buxü̃rüxü̃ chidexa, rü buxü̃ nagu rüxĩnüxü̃gu charüxĩnü, rü tama mea chauãẽxü̃ chacua̱x. Natürü yexguma marü chaya̱xgu, rü nüxü̃ charüxo ga guxü̃ma ga yema chorü bucüma.