1 Corintios 12:8 - Tupanaarü Ore

⁸ Rü Naãxẽ ya Üünexü̃ rü tümaxü̃ nanaxã i tauxcha nax ucu̱xẽxü̃ tacuáxü̃ca̱x. Rü ngẽmatama Naãxẽ ya Üünexü̃ rü toguxeaxü̃́ nanatauxchaxẽxẽ nax nüxü̃ tacuáxü̃ nax mea tangúexẽẽtaexü̃ i Tupanaarü ore.

1 Corintios 12:8 Referans Kwoze

Ucu̱xẽgüchiga 2:6

Erü nüma ya Cori ya Tupana nixĩ i cua̱x tüxna ãcü, rü naã̱xwa nixĩ i íyachoxü̃tanücüüxü̃ i guxü̃ma i cua̱x.

2 Corintios 8:7

Pema rü guxü̃wama mea ipexĩ erü mea peyaxõgü, rü pexü̃́ natauxcha nax mea nüxü̃ pixuxü̃ i Tupanaarü ore erü mea nüxü̃ pecua̱x nax ta̱xacüchiga yixĩxü̃. Rü aixcüma togüxü̃ perüngü̃xẽẽchaü̃, rü yema pexü̃ tangúexẽẽxü̃ãcüma pegü pengechaü̃gü. Rü ñu̱xma rü ngẽxgumarüxü̃ ta penaxwa̱xe nax aixcüma mea ipexĩxü̃ nawa i ngẽma mexü̃ i nacüma nax diẽru ngĩxü̃ ipexãxü̃ naxca̱x i ngẽma taenexẽgü i nüxü̃́ nataxuxü̃.

1 Corintios 1:5

Yerü Cristugagu Tupana pexna nanamu ga Naãxẽ ya Üünexü̃ nax pexü̃ nangü̃xẽẽxü̃ca̱x. Rü pexna nanaxã ga norü ore, rü naétü pexü̃́ nanatauxchaxẽxẽ nax nüxü̃ pecuáxü̃ca̱x nax ñuxü̃ ñaxü̃chiga yixĩxü̃ i ngẽma norü ore.

Wiyaegü 143:10

¡Rü choxü̃ nangu̱xẽxẽ nax chanaxüxü̃ca̱x i curü ngúchaü̃! Erü cuma nixĩ i chorü Tupana quixĩxü̃. Rü chanaxwa̱xe i cuãxẽ i üünexü̃ rü mexü̃ i nacümagu choxü̃ nixũxẽxẽ.

1 Corintios 1:30

Rü nümatama ga Tupana nixĩ ga Ngechuchu ya Cristuarü duü̃xü̃güxü̃ pexü̃ yaxĩgüxẽẽxü̃. Rü tatanüwa nanamu ga Cristu nax nüma rü Tupanaarü cua̱x taxca̱x yixĩxü̃ca̱x. Rü Cristugagu nixĩ nax Tupana tüxü̃ dexü̃ rü tüxü̃ yamexẽẽxü̃ nax nape̱xewa ixüünegüxü̃ca̱x rü pecaduwa ínguxü̃xü̃ca̱x.

Neemía 9:20

Rü ñu̱xũchi naxca̱x yéma cunamu ga Cuãxẽ ya Üünecü nax yaxucu̱xẽgüãxü̃ca̱x. Rü taguma nüxü̃́ nataxu ga yema paũ ga maná ga naxca̱x yéma cumugüxü̃, rü ñu̱xũchi taguma nüxü̃́ nataxu ga yema dexá ga nüxna cuxãxü̃ nax yemaacü tama yata̱xawaexü̃ca̱x.

1 Corintios 13:8

Rü ngẽma ngechaü̃ rü tagutáma inayacua̱x. Natürü ngẽma nax nüxü̃ ixuxü̃ i Tupanaarü ore rü wüxi i ngunexü̃gu tá inayacua̱x. Rü ngẽma tama nüxü̃ icuáxü̃ i nagawa nax idexaxü̃, rü tá ta inayacua̱x. Rü ngẽma cua̱x i ñu̱xma tüxü̃́ ngẽxmaxü̃ rü wüxi i ngunexü̃gu rü marü taxuwatáma tüxü̃́ name.

Ore i mexü̃ ga Matéu ümatüxü̃ 13:11

Rü Ngechuchu nanangãxü̃, rü ñanagürü nüxü̃: —Tupana rü pexü̃xicatama nüxü̃ nacua̱xẽxẽ i ngẽma ẽxü̃guxü̃ nax ñuxãcü ãẽ̱xgacü yixĩxü̃ i daxũguxü̃ i naanewa. Natürü ngẽma togü i duü̃xü̃gü rü tama nüxü̃ nüxü̃ nacua̱xẽxẽ i ngẽmachiga.

Ichaía 59:21

Rü nüma ya Tupana rü ñanagürü: —Ñaa nixĩ i chorü uneta i ngẽma duü̃xü̃gümaxã nüxü̃ chixuxü̃: “Rü ngẽma Chauãxẽ i cuwa ngẽxmaxü̃, rü ngẽma chorü ore i cua̱xwa ngẽxmaxü̃ rü tagutáma cuxna rü cunegüna rü cutaagüna nixũgachi” —ñanagürü ya Cori ya Tupana.

Ichaía 50:4

Rü choma i Ichaía rü ñachagürü: —Tupana rü choxü̃ nangu̱xẽxẽ nax norü ore i taãxẽ tüxna ãxü̃maxã chayaxucu̱xẽgüxü̃ nax naporaexü̃ca̱x i ngẽma ipaexü̃ rü ngúxü̃ ingegüxü̃. Rü guxü̃ i pa̱xmama rü Tupana choxü̃ ínarüdaxẽxẽ nax wüxi i ngúetanüxü̃ i mexü̃rüxü̃ nüxü̃ chaxĩnüxü̃ca̱x i norü ngu̱xẽẽtae.

Yox 32:8

Natürü tama ngẽma nax namuarü taunecüã́xü̃gagu nixĩ nax wüxi ya yatü cua̱x nüxü̃́ ngẽxmaxü̃. Erü yimá Tupana ya Guxãétüwa Ngẽxmacü nixĩ ya inaxãcü i wüxíechigüarü cua̱x.

Ínachoxü̃xü̃chiga 31:3

Rü marü nüxna chanamu i Chauãxẽ i Üünexü̃, rü nüxna chanaxã i cua̱x nax paxãma nüxü̃ nacuáxü̃ca̱x i ta̱xacüarü ü, rü nüxü̃́ natauxchaxü̃ca̱x nax guxü̃raxü̃xü̃ i meruü̃gü naxüxü̃ i úiruwa, rü diẽrumüwa, rü bróũchewa, rü naiwa. Rü nüxna chanaxã i cua̱x nax nüxü̃ nacuáxü̃ca̱x nax nuta ya nga̱xãẽruxü̃ namexẽẽãxü̃ rü nangoraxẽẽxü̃ rü chacherdótegüchiruwa nañaxcuãxü̃ rü naguxü̃raü̃xü̃ i meruü̃gü naxüxü̃ca̱x.

1 Corintios 13:2

Rü woo nüxü̃ chacua̱xgu nax mea duü̃xü̃gümaxã nüxü̃ chixuxü̃ i Tupanaarü ore, rü woo nüxü̃ chacua̱xgu i guxü̃ma i ta̱xacü i ẽxü̃guxü̃ i Tupanachiga, rü woo choxü̃́ natauxchagu nax chorü õmaxã chayaxĩgachixẽẽxü̃ ya ma̱xpǘnegü, natürü taxuwama chame ega tama choxü̃́ nangẽxmagu i ngechaü̃.

Danié 2:21

Rü nüma rü namaxã inacua̱x i guxü̃ma i ta̱xacü i ngupetüxü̃. Rü nüma nixĩ i yamucuchiaxü̃ rü ínamuxũchiaxü̃ i ãẽ̱xgacügü. Rü nüma nixĩ i cua̱x tüxna naxãxü̃ ya yíxema tümaãẽxü̃ icuáxe rü tüxü̃ nüxü̃ nacua̱xẽẽxü̃ ya yíxema idoeruxe.

Ngechuchuarü ngúexü̃gü ga yamugüxü̃arü puracüchiga 6:3

Rü ngẽmaca̱x, Pa Tomücügüx, rü ¡Naxca̱x peda̱u̱x i petanüwa ya 7 ya yatügü ya guxãma nüxü̃ ngechaü̃güxü̃, rü mea naãxẽxü̃ cuáxü̃, rü aixcüma Tupanaãxẽ ya Üünecü nawa ngẽxmagüxü̃! Rü toma tá nüxna tanaxã i ngẽma puracü nax nümagü õnamaxã inacua̱xgüxü̃ca̱x.

Romanos 15:14

Pa Chauenexẽgüx, meama nüxü̃ chacua̱x nax guxü̃ i duü̃xü̃gümaxã pemecümaxü̃, rü aixcüma Tupanaxü̃ nax pecuáxü̃. Rü nüxü̃ chacua̱x nax meama nüxü̃ pecuáxü̃ nax pegü pixucu̱xẽgüxü̃.

1 Corintios 2:11

Rü duü̃xü̃gütanüwa rü ¿texé nüxü̃ tacua̱x nax ta̱xacügu naxĩnüxü̃ i wüxichigü i duü̃xü̃? Rü ngẽma naãxẽ i wüxichigü i duü̃xü̃wa ngẽxmaxü̃xicatama nixĩ i nüxü̃ cuáxü̃ i ngẽma nagu naxĩnüxü̃. Rü ngẽxgumarüxü̃ ta Tupanaãxẽ i Üünexü̃xicatama nixĩ i nüxü̃ cuáxü̃ nax ta̱xacügu naxĩnüxü̃ ya Tupana.

1 Corintios 2:16

Rü Tupanaarü ore i ümatüxü̃wa rü ñanagürü: “¿Texé nüxü̃ tacua̱x nax ta̱xacügu naxĩnüxü̃ ya tórü Cori? ¿Rü texé nüxü̃ tacua̱x nax Tupanaxü̃ taxucu̱xẽxü̃?” ñanagürü. Natürü yixema nixĩ i aixcüma nüxü̃ icuáxü̃ i ngẽma Cristu nagu rüxĩnüxü̃.

1 Corintios 14:6

Rü dücax, Pa Chauenexẽgüx, rü ngẽxguma chi pexü̃tawa chaxũxgu, rü chi to i nagawa chidexagu, ¿rü ta̱xacüwa chi pexü̃́ namexü̃ i ngẽma? Natürü ngẽxguma chi pemaxã nüxü̃ chixuxgu i ngẽma Tupana tüxü̃ nüxü̃ cua̱xẽẽxü̃, rü ẽ̱xna ngẽma chomatama nüxü̃ chacuáxü̃ nax aixcüma yixĩxü̃, rüe̱xna ngẽma ẽxü̃guxü̃ i ñu̱xma Tupana tüxü̃ nüxü̃ cua̱xẽẽxü̃, rüe̱xna ta̱xacürü to i ngu̱xẽẽtae i Tupanachiga, rü ngẽmawaxi nixĩ i pexü̃́ mexü̃.

1 Corintios 14:26

Dücax, Pa Chauenexẽgüx, ñu̱xma tá pemaxã nüxü̃ chixu nax ñuxãcü tá penaxüxü̃ ega ngẽxguma pengutaque̱xegügu. Rü ñuxre i pema rü marü name nax Tupanaarü wiyaegu pewiyaegüxü̃, rü toguxe rü tangu̱xẽẽtaegüxü̃, rü toguxe rü nüxü̃ tixuxü̃ i ngẽma ore ya Tupana tüxü̃ nüxü̃ cua̱xẽẽxü̃, rü toguxe rü nawa tidexagüxü̃ i naga i tama nüxü̃ tacua̱xgüxü̃, rü toguxe rü tanango̱xẽẽgüxü̃ i ngẽma dexa i to i nagawa nüxü̃ yaxugüxü̃. Natürü guxü̃ma i ngẽma rü tanaxwa̱xe i ngẽma yaxõgüxü̃arü ngü̃xẽẽca̱x nax yixĩxü̃, nax yexeraãcü yaxõgüãxü̃ca̱x rü mea Tupanaca̱x namaxẽxü̃ca̱x.

2 Corintios 1:12

Rü ngẽma toxü̃ taãẽxẽẽxü̃ nixĩ nax toõxẽwa nüxü̃ tacuáxü̃ nax ñoma i naanewa rü aixcüma Tupana naxwa̱xexü̃ãcüma mea tamaxẽxü̃. Rü pepe̱xewa nixĩ ga guxü̃arü yexera yemaacü mea tamaxẽxü̃. Natürü tocüma rü tama ñoma i naanecüã̱xarü cua̱xwa ne naxũ, erü Tupana ya toxü̃ ngechaü̃cü nixĩ ya nüxü̃́ tayaxõcü.

2 Corintios 2:14

Rü Tupanana moxẽ taxãgü erü ñu̱xma nax Cristuarü duü̃xü̃gü tixĩgüxü̃, rü nüma ya Tupana rü guxü̃guma tomaxã nanaxũpe̱xe. Rü nüma nixĩ i towa duü̃xü̃güxü̃ nüxü̃ nacua̱xẽẽxü̃ i norü ore. Rü ngẽma norü ore rü guxü̃wama nangu, rü ñoma i naanewa rü ñoma wüxi i pumara i yixichixü̃rüxü̃ nixĩ.

2 Corintios 4:6

Erü nümatama ya Tupana ga noxri naane naxü̱xgux rü ẽanexü̃wa nanango̱xẽxẽ ga ngóonexü̃. Rü nümatama nixĩ i ñu̱xma i tüxü̃ yango̱xnaãẽxẽẽgüxü̃ nax ngẽmawa nüxü̃ icuáxü̃ca̱x nax nüma rü naxüünexü̃. Rü ngẽma norü üüne rü Ngechuchu ya Cristuchiwewa nixĩ i nangóxü̃.

2 Corintios 6:6

Rü ngẽxgumarüxü̃ ta duü̃xü̃güxü̃ nüxü̃ tadauxẽxẽ nax aixcüma mexü̃gu tarüxĩnüexü̃, rü mea nüxü̃ tacuáxü̃ i Tupanaarü ore i aixcüma ixĩxü̃, rü yáxna duü̃xü̃gümaxã taxĩnüexü̃, rü namaxã tamecümaxü̃. Rü duü̃xü̃güxü̃ nüxü̃ tadauxẽxẽ nax towa nangẽxmaxü̃ i Tupanaãxẽ ya Üünecü rü ngẽmaca̱x aixcüma guxü̃ i duü̃xü̃güxü̃ tangechaxü̃.

2 Corintios 11:6

Rü woo tama choxü̃́ nangẽxmagu i tauxcha nax duü̃xü̃güpe̱xewa chidexaxü̃, natürü aixcüma mea nüxü̃ chacua̱x i ngẽma nachiga chidexaxü̃. Rü guxü̃guma guxü̃ma i torü puracüwa marü pexü̃ tanawe̱x nax aixcüma mea nüxü̃ tacuáxü̃ i ngẽma nachiga tidexagüxü̃.