1 Corintios 12:13 - Tupanaarü Ore13 Rü yexguma íibaiü̃gu rü Tupanaãxẽ ya Üünecü rü wüxitama i naxü̃ne tüxü̃ nixĩgüxẽxẽ. Rü woo Yudíugü nax ixĩgüxü̃, rüe̱xna tama Yudíugü nax ixĩgüxü̃, rü woo mugüruxü̃ ixĩgügu, rüẽ̱xna taxúxeme̱xẽwa ingẽxmagügu, natürü wüxitama i naxü̃ne tüxü̃ nixĩgüxẽxẽ i nümax i Naãxẽ ya Üünexü̃ i nüxicatama ixĩxü̃. Rü guxãma i yixema rü Tupana marü tüxna nananguxẽxẽ i ngẽma Naãxẽ ya Üünexü̃. Gade chapit la |
Rü ñu̱xma rü Tupanape̱xewa rü nüetama nixĩ ega Yudíu quixĩxgu rü ẽ̱xna tama. Rü nüetama nixĩ ega ícuwiecha̱xmüxü̃pe̱xechiraü̃gu rü ẽ̱xna tama. Rü nüetama nixĩ ega ta̱xacürü nachixü̃anecüã̱x i duü̃xü̃ quixĩxgu, rü ẽ̱xna duü̃xü̃ i tama poperaxü̃ icuáxü̃ quixĩxgu. Rü nüetama nixĩ ega wüxi i mugüruxü̃ quixĩxgu, rü ẽ̱xna taxúxearü duü̃xü̃ quixĩxgu. Erü ñu̱xma rü guxü̃arü yexera tüxü̃́ mexü̃ nixĩ nax Cristu rü guxü̃arü yora yixĩxü̃ rü guxü̃wa nangẽxmaxü̃.
Rü ñu̱xma rü Tupanape̱xewa rü nüetama nixĩ ega woo Yudíugü pixĩgügu rü ẽ̱xna tama. Rü nüetama ega woo wüxi i coriarü duü̃xü̃gü pixĩgügu rü ẽ̱xna taxúearü duü̃xü̃gü pixĩgügu. Rü nüetama ega woo piyatügu rü ẽ̱xna pingexgu. Erü ñu̱xma nax Ngechuchu ya Cristuarü duü̃xü̃gü nax pixĩgüxü̃, rü wüxitama i duü̃xü̃ pixĩgü i guxãma i pemax.
Rü ngẽma dexá rü wüxi i cua̱xruxü̃ nixĩ. Erü ngẽxguma ngẽma dexáwa íibaiegu, rü duü̃xü̃güxü̃ nüxü̃ tacua̱xẽxẽ nax Tupanaga taxĩnüexü̃ nax tüxü̃́ nangẽxmaxü̃ i maxü̃ i taguma gúxü̃. Rü tama taxü̃nearü düxétüwa nax imexü̃ca̱x nixĩ i íibaiexü̃, natürü ítabaie erü marü Tupanana naxca̱x taca nax tüxü̃́ iyanaxoxẽẽãxü̃ca̱x i tórü pecadugü rü Ngechuchu ya Cristu wena maxü̃xü̃gagu nape̱xewa imexü̃ca̱x rü mexü̃gu rüxĩnüexü̃ca̱x.
Natürü ga Cuáü̃ rü guxãxü̃ ñanagürü: —Aixcüma i choma rü dexáwamare pexü̃ íchabaiü̃xẽxẽ, natürü tá ínangu i to i Tupanaarü orearü uruxü̃, rü nüma tá pexna nananguxẽxẽ i Tupanaãxẽ ya Üünecü wüxi i üxüemarüxü̃. Erü nüma rü choxü̃ narüyexera nax naporaxü̃. Rü choma rü nape̱xewa rü taxuwama chame rü bai i norü chapatucunüarü wẽgüwa chame.
Rü ngẽma ĩnü ga noxri Tupanaxicatama nüxü̃ cuáxü̃ nixĩ nax ngẽma ore i mexü̃maxã Tupana nüxna uxü̃ i guxü̃ma i duü̃xü̃gü i tama Yudíugü ixĩgüxü̃ nax Ngechuchu ya Cristuaxü̃́ yaxõgüãxü̃ca̱x rü nayauxgüãxü̃ca̱x i maxü̃ i taguma gúxü̃. Rü ñu̱xma rü Cristugagu ngẽma duü̃xü̃gü i tama Yudíugü ixĩgüxü̃ rü Yudíugümaxã wüxitama i duü̃xü̃gü nixĩgü. Rü ngẽma tama Yudíugü ixĩgüxü̃ca̱x nixĩ i ngẽma Tupanaarü unetagü ga noxri Iraétanüxü̃maxã nüxü̃ yaxuxü̃.
Rü Tupana nayaxuxguwena nixĩ ga ínawíecha̱xmüü̃pe̱xechiraü̃xü̃ ga Abráü̃. Rü yema nixĩ ga norü cua̱xruxü̃ ga nawa nüxü̃ nacuáxü̃ nax aixcüma Tupana marü nayaxuxü̃ rü nüxü̃ nadauxü̃ nax namexü̃ yerü nüxü̃́ nayaxõ. Rü ngẽmaca̱x i ñu̱xma ya Abráü̃ rü tümanatü yixĩxü̃ ya guxãma ya yíxema yaxõgüxe woo tama ítawíecha̱xmüü̃pe̱xechiraü̃gügu. Rü ngẽmaãcü ya Tupana rü tüxü̃ nayaxu ya guxãma ya yíxema yaxõgüxe, rü tüxü̃ nadau nax timexü̃ erü tayaxõgü.
Rü marü nagu chaxücu i chorü putüranecü, Pa Pacü Pa Cho̱xma̱x, rü ngéma nüxü̃ chayangau i naguxü̃raü̃xü̃ i pumaragü i chi̱xemaxü̃chixü̃. Rü marü nüxü̃ chaweneta ya chorü berure ya naxchiãü̃wa ngẽxmane, rü marü chayaxaxü i chorü bínu rü lechi. Pa Tomücügü ya Pexü̃ Tangechaü̃güxex, ¡Rü pechibüe rü pexaxegü! ¡Rü mea pegüxü̃́ peyanguxẽxẽ i ngẽma penaxwa̱xexü̃!