1 Corintios 10:7 - Tupanaarü Ore

⁷ Rü ngẽmaca̱x tama name i nüxü̃ picua̱xüü̃gü i ta̱xacürü tupananetachicüna̱xãgü, yexgumarüxü̃ ga ñuxre ga nümagü naxügüxü̃rüxü̃. Erü Tupanaarü ore i ümatüxü̃wa rü tórü o̱xigüchigaxü̃ nixu rü ñanagürü: “Duü̃xü̃gü ínarütogü nax nachibüexü̃ca̱x rü nax naxaxegüxü̃ca̱x, rü ngẽmawena rü inachigü nax norü ngúchaü̃ naxügüxü̃ca̱x”, ñanagürü i ngẽma ore.

1 Corintios 10:7 Referans Kwoze

1 Corintios 6:9

¿Tama ẽ̱xna nüxü̃ pecua̱x nax ngẽma duü̃xü̃gü i chixexü̃ ügüxü̃ rü nataxuxü̃táma i nachica i Tupana ãẽ̱xgacü íyixĩxü̃wa? ¡Rü tama name i pegütama pewomüxẽxẽgü! Erü Tupana ãẽ̱xgacü íyixĩxü̃wa rü nataxutama i nachica i ngẽma duü̃xü̃gü i nai i ngexü̃maxã ipexü̃, rü ngẽma duü̃xü̃gü i tupananetachicüna̱xãxü̃ icua̱xüü̃güxü̃, rü ngẽma duü̃xü̃gü i naxma̱xẽchita rüe̱xna nateechita ngeãẽxü̃, rü ngẽma yatügü i naxrüxü̃ yatüxü̃maxã ngeãẽxü̃, rü ngẽma ngexü̃gü i naxrüxü̃ ngexü̃gümaxã ngeãẽxü̃, rü ngẽma ngĩ́ta̱xagüxü̃, rü ngẽma aüwa̱xegüxü̃, rü ngẽma ngãxẽwa̱xegüxü̃, rü ngẽma oregüta̱a̱xgüxü̃, rü ngẽma womüxẽẽwa̱xegüxü̃. Rü guxü̃ma i ngẽmagü rü nataxutama i nachica i Tupana ãẽ̱xgacü íyixĩxü̃wa.

1 Corintios 10:14

Rü ngẽmaca̱x, Pa Chauenexẽgü ya Pexü̃ Changechaü̃güxe, ¡rü nüxü̃ perüxoe i ngẽma nacümagü i tupananetachicüna̱xãgüca̱x naxügüxü̃ i ngẽma duü̃xü̃gü i tama yaxõgüxü̃!

Wenaxarü naxümatü ga Tupanaarü mugü 9:12

Rü yexguma rü choxü̃ ñanagürü: “¡Nataegu, rü paxãma irüxĩ i nua! Erü ngẽma duü̃xü̃gü i Equítuanewa ícugaxü̃xü̃ rü poraãcü chixexü̃ naxügü. Rü paxãma nüxü̃ narüxoe ga yema mugü ga namaxã nüxü̃ chixuxü̃, rü ñu̱xũchi nügüca̱x úiruwa nanaxügü i wüxi i naxchicüna̱xã nax nüxü̃ yacua̱xüü̃güxü̃ca̱x”, ñanagürü.

1 Corintios 5:11

Natürü yexguma pemaxã nüxü̃ chixuxgu nax tama namaxã pexãmücügüxü̃ i ngẽma duü̃xü̃gü i chixexü̃gu maxẽxü̃, rü nachiga chidexa i ngẽma duü̃xü̃ i nügü ixuxü̃ nax peenexẽgü i yaxõxü̃ nax yixĩxü̃, natürü nai i ngexü̃maxã maxü̃xü̃, rüe̱xna aüxü̃, rüe̱xna tupananetachicüna̱xãxü̃ icua̱xüü̃xü̃, rüe̱xna oregüta̱a̱xü̃, rüe̱xna ngãxẽwa̱xexü̃, rüe̱xna ngĩ́ta̱xaxü̃. Rü ngẽma duü̃xü̃gü nixĩ i pemaxã nüxü̃ chixuxü̃ nax tama namexü̃ nax namaxã pexãmücügüxü̃ rü bai i namaxã nax pechibüexü̃.

Nüxíraxü̃xü̃ ga popera ga Cuáü̃ ümatüxü̃ 5:21

Pa Chauxacügüx, ¡Pegüna pedaugü nax tama nüxü̃́ peyaxõgüxü̃ca̱x i ngẽma tupananetachicüna̱xãgü!

Ínachoxü̃xü̃chiga 32:19

Rü yexguma nüma ga Moiché yema duü̃xü̃gü ípegüxü̃wa nanguxgu, rü nüxü̃ nadau ga yema wocaxacüchicüna̱xã, rü nüxü̃ nadau ga nax ínapetaegüxü̃ rü íyaxü̃ãchitanüxü̃ ga duü̃xü̃gü. Rü yemaca̱x nanuxũchi ga Moiché rü norü numaxã inayachi̱x ga yema taxre ga nutatachinü ga Tupanaarü mugü nagu ümatüxü̃. Rü ma̱xpǘnepechinügu nawoonetüchimare.

Ínachoxü̃xü̃chiga 32:17

Rü gumá Yochué ga Moichémücü ga namaxã ma̱xpǘnegu naxĩnagücü, rü yexguma duü̃xü̃güxü̃ naxĩnügu ga nax íyaxáixchaü̃, rü Moichéxü̃ ñanagürü: —Nüxü̃ chaxĩnü i duü̃xü̃gü nax íyaxáixchaü̃ ñoma nügü nada̱i̱xü̃rüxü̃ ixĩgüxü̃ i ngẽma ínapegüxü̃wa —ñanagürü.

Ínachoxü̃xü̃chiga 32:4

Rü nüma ga Aróü̃ rü nananutaque̱xe rü nanadexẽxẽ ga yema naxmachinügü ga úirunaxca̱x. Rü yemawa purumúü̃maxã nanaxüxüchi ga wüxi ga wocaxacüchicüna̱xã. Rü guxü̃ma ga duü̃xü̃gü rü tagaãcü ñanagürügü: —Pa Iraétanüxü̃x, rü daa nixĩ ya curü tupana ga Equítuanewa cuxü̃ ínguxuchixẽxẽcü —ñanagürügü.

1 Corintios 8:7

Natürü tama guxü̃ma i yaxõgüxü̃ nüxü̃ nacua̱x i ngẽmachiga. Rü ñuxre i nümagü rü namaxã nixü nax nangõ̱xgüãxü̃ i namachi i ngẽma tupananetachicüna̱xãgüca̱x daixü̃. Natürü naãxẽwa nagu narüxĩnüe nax chixexü̃ naxügüxü̃ i ngẽxguma nangõ̱xgüãgu i ngẽma naxü̃namachi i togü i duü̃xü̃gü norü tupananetachicüna̱xãgüca̱x daixü̃ nax nüxü̃ namaxã yacua̱xüü̃güxü̃ca̱x.

Ngechuchuarü ngúexü̃gü ga yamugüxü̃arü puracüchiga 15:20

Rü narümemae nixĩ i naxca̱x tanaxümatü i popera, rü ngẽmawa namaxã nüxü̃ tixu: – Tama name nax nangõ̱xgüãxü̃ i naxü̃nagümachi i duü̃xü̃gü norü tupananetachicüna̱xãgüca̱x daixü̃. – Rü tama name nax nai i ngexü̃maxã rü ẽ̱xna nai ya yatümaxã inapexü̃. – Rü tama name nax nangõ̱xgüãxü̃ i namachi i ngẽma naeü̃ rüe̱xna naxü̃na i wẽxnaxãxü̃ rüe̱xna natügu nguxü̃. – Rü tama name nax nangõ̱xgüãxü̃ ya nagü. Rü ngexicatama nixĩ i inaxwa̱xexü̃ nax naxca̱x naxümatüxü̃ i ngẽma yaxõgüxü̃ i Antioquíawa ngẽxmagüxü̃.