1 Corintios 1:9 - Tupanaarü Ore

⁹ Rü Tupana rü guxü̃guma nayanguxẽxẽ i norü uneta. Rü nüma nixĩ ga pexü̃ nadexü̃ nax wüxigu Nane ya tórü Cori ya Ngechuchu ya Cristumaxã pexãmücügüxü̃ca̱x.

1 Corintios 1:9 Referans Kwoze

2 Tesalonicenses 3:3

Rü nüma ya tórü Cori ya Ngechuchu rü aixcüma nayanguxẽxẽ i ngẽma tamaxã inaxunetaxü̃. Rü nüma tá pexü̃ naporaexẽxẽ rü pexna nadau nax tama chixexü̃gu peyixü̃ca̱x.

Popera ga Yudíugü ga yaxõgüxü̃ca̱x ümatüxü̃ 10:23

Rü ñu̱xma nax ínangu̱xẽẽxü̃ i ngẽma maxü̃ i taguma gúxü̃ ya Tupana tamaxã ixunetaxü̃ rü tanaxwa̱xe i aixcüma Cristuaxü̃́ yaxõgüechaxü̃ rü taguma nüxü̃ rüxoexü̃. Yerü Tupana ga tamaxã ixunetacü nax tüxü̃ nangü̃xẽẽxü̃, rü aixcümaxü̃chi tá nayanguxẽxẽ ga yema tamaxã nüxü̃ yaxuxü̃.

Wenaxarü naxümatü ga Tupanaarü mugü 7:9

Rü ngẽmaca̱x penaxwa̱xe nax nüxü̃ pecuáxü̃ nax nüma ya Cori ya Tupana rü aixcümaxü̃chi Tupana yixĩxü̃. Rü woo 1,000 e̱xpü̱xcüna yamuxgu i duü̃xü̃gü rü nüma ya Tupana rü guxü̃guma nayanguxẽxẽ i norü uneta i naxüxü̃ naxca̱x i ngẽma duü̃xü̃gü i ingóetanüxü̃ i nüxü̃ ngechaü̃güxü̃ rü yanguxẽẽgüxü̃ i norü mugü.

Nüxíraxü̃xü̃ ga popera ga Cuáü̃ ümatüxü̃ 1:3

Rü yema toma nüxü̃ tadaugüxü̃ rü nüxü̃ taxĩnüexü̃ rü ngẽma nixĩ i pemaxã nüxü̃ tixuxü̃ nax totanüxü̃ pixĩgüxü̃ca̱x, ngẽxgumarüxü̃ i tomax nax Tanatü ya Tupana rü Nane ya Ngechuchu ya Cristutanüxü̃ tixĩgüxü̃rüxü̃.

1 Corintios 10:13

Rü taguma pexca̱x ínangu i ta̱xacürü ngúchaü̃ i chixexü̃ i taxucürüwama duü̃xü̃ yáxna namaxã ĩnüxü̃. Rü name nixĩ i Tupanaaxü̃́ peyaxõ erü nüma rü taxũtáma nawa pexü̃ nawogü i ngúchaü̃gü i taxucürüwama yáxna namaxã pexĩnüexü̃. Natürü ngẽxguma tá ngúchaü̃gü i chixexü̃ pexca̱x ínguxgu, rü nüma rü tá pexü̃ ínapoxü̃ nax tama nagu peyixü̃ca̱x.

Ichaía 49:7

Rü nüma ya Iraétanüxü̃arü Tupana ya Üünecü ya nüxü̃ rüngü̃xẽẽcü rü ñanagürü ta: —Pa Iraétanüxü̃x, ñu̱xma rü ngẽma togü i nachixü̃anecüã̱xgü rü poraãcü pexü̃ nacugüe, rü pexchi naxaie rü nügüme̱xẽwa penangexmagüxẽxẽ rü norü ãẽ̱xgacügüarü puracütanüxü̃ pixĩgü. Natürü wüxi i ngunexü̃ rü wenatáxarü peporae rü ngẽxguma pexü̃ nadaugügu i ngẽma togü i nachixü̃anegüarü ãẽ̱xgacügü rü pepe̱xegu tá nacaxã́pü̱xügü erü choma ya perü Tupana ya üünecü nax chixĩxü̃ rü pexü̃ chaxuneta nax chorü duü̃xü̃gü pixĩgüxü̃ca̱x. Rü choma rü guxü̃guma chayanguxẽxẽ i ngẽma nüxü̃ chixuxü̃ —ñanagürü.

Romanos 8:28

Rü nüxü̃ tacua̱x rü tümaarü mexü̃ca̱x nixĩ ya Tupana ínangu̱xẽẽxü̃ i guxü̃ma i ngẽma tüxü̃ üpetüxü̃ ya yíxema nüxü̃ ngechaü̃güxe ga nüma nagu naxĩnüxü̃ca̱x tüxü̃ nadexe.

Wenaxarü naxümatü ga Tupanaarü mugü 32:4

Rü nüma nixĩ i torü dauruxü̃ nax yixĩxü̃. Rü guxü̃ma i ta̱xacü i naxüxü̃ rü meama nawe̱xgu. Rü guxü̃ma i nüxü̃ yaxuxü̃ rü aixcüma nixĩ. Rü nüma rü Tupana ya ixaixcümacü nixĩ. Rü nawa rü nataxuma i ta̱xacü i dora ixĩxü̃, erü nüma rü ixaixcümacü nixĩ!

Yema Cuáü̃ nüxü̃ dauxü̃ i yixcüra tá ngupetüxü̃chiga 19:11

Rü ñu̱xũchi nüxü̃ chadau ga daxũguxü̃ ga naane nax yawãxnaxü̃. Rü yéma nango̱x ga wüxi ga cowaru ga cómüxü̃. Rü gumá naétüwa rütocü rü naéga nixĩ i Aixcüma Yanguxẽẽcü rü Ixaixcümacü. Rü nüma rü tama inatü i ngẽxguma poxcu naxueguxgu rü ngẽxguma norü uanügümaxã nügü nadaixgu.

Nüxíraxü̃xü̃ ga popera ga Cuáü̃ ümatüxü̃ 1:7

Natürü ngẽxguma chi Tupanarüxü̃ ngóonexü̃wa imaxẽgu, rü yigütanüxü̃ tixĩgü, rü Tupana Nane ya Ngechuchu rü nagümaxã tüxü̃́ inayanaxoxẽxẽ i guxü̃ma i pecadugü.

Wiyaegü 100:5

Erü nüma ya Cori rü namecüma rü ngẽma norü ngechaü̃ rü guxü̃guma nangẽxmaecha. Rü ngẽma nax yaxaixcümaxü̃ rü taguma inayacua̱x.

Iraétanüxü̃arü muxchiga 23:19

Rü Tupana rü tama duü̃xü̃gü nagu rüxĩnüxü̃gu narüxĩnü, rü taguma nidora rü taguma nanaxüchicüxü i norü ĩnü. Rü ngẽxguma ta̱xacüxü̃ yaxuxgu rü aixcümama nanaxü. Rü ngẽxguma ta̱xacüca̱x inaxunetagu rü aixcümama nayanguxẽxẽ.

2 Corintios 1:18

Natürü Tupana toxü̃ nacua̱x nax aixcüma yixĩxü̃ i ngẽma nüxü̃ tixuxü̃. Rü toma rü tama “Ngü̃”, ñatagürü rü ngẽxgumatama “Tama”, ñatagürü.

Nüxíraxü̃xü̃ ga popera ga Pedru ümatüxü̃ 5:10

Natürü ngẽxguma paxaãchi ñoma i naanewa ngúxü̃ pingegüguwena, rü Tupana rü tá pexü̃ nimexẽxẽ nax aixcüma nape̱xewa pimexü̃ca̱x. Rü woo guxchaxü̃gü pexca̱x ínguxgu, rü tá pexü̃ narüngü̃xẽxẽ nax peyaxõgüamaxü̃ca̱x, rü tá pexü̃ naporaexẽxẽ nax ngẽmaãcü taxuca̱xma pemuü̃exü̃ca̱x. Rü nümatama ya Tupana nixĩ i norü ngechaü̃gagu pexü̃ nadexü̃ nax guxü̃guma naxü̃tawa pexü̃́ nangẽxmaxü̃ca̱x i pechica, erü Ngechuchu ya Cristuaxü̃́ peyaxõgü.

Nüxíraxü̃xü̃ ga popera ga Cuáü̃ ümatüxü̃ 4:13

Rü nüma rü marü tüxna nanamu ga Naãxẽ ya Üünexü̃. Rü ngẽmawa nüxü̃ tacua̱x nax aixcüma norü duü̃xü̃gü ixĩgüxü̃ rü nüma rü tawa nax namaxü̃xü̃.

Popera ga Yudíugü ga yaxõgüxü̃ca̱x ümatüxü̃ 11:11

Rü nüma ga Abráü̃ rü woo marü nax nayaxü̃ rü naxma̱x ga Chára rü ta nax nayaxü̃ rü taguma naxãxacüxü̃, natürü ngĩxü̃́ nayexma ga wüxi ga nane, yerü nüma ga Abráü̃ rü nayaxõ nax Tupana tá aixcüma yanguxẽẽxü̃ ga yema norü uneta.

Romanos 9:24

Rü ngẽmaãcü i yixema nax Yudíugü ixĩgüxü̃, rü tatanüwa Tupana tüxü̃ nidexechi ya ñuxre nax norü duü̃xü̃gü tixĩgüxü̃ca̱x. Rü ngẽxgumarüxü̃ ta i ngẽma tama Yudíugü ixĩgüxü̃tanüwa rü nayadexechi i togü.

Romanos 8:30

Rü guxema woetama nũxcümama Tupana tüxü̃ dexe, rü tümaca̱x naca nax noxrü tixĩgüxü̃ca̱x. Rü guxema tümaca̱x naca̱xaxe, rü nügüca̱x tüxü̃ nimexẽẽgü. Rü guxema nügüca̱x tüxü̃ yamexẽẽgüxe, rü tüxna nanaxã i tümachica i nügüxü̃tawa.

Ichaía 25:1

Pa Corix, cuma nixĩ i chorü Tupana quixĩxü̃. Rü choma rü cuxü̃ chicua̱xüxü̃ rü mexü̃maxã cuxü̃ chixuchiga, erü ngẽma nũxcümacürüwatama nagu curüxĩnüxü̃ rü aixcüma cuyanguxẽxẽ rü taguma cunaxüchicüxü i ngẽma nüxü̃ quixuxü̃.

Gálatas 2:20

Rü choma rü wüxigu Cristumaxã curuchawa chipota. Rü ñu̱xma rü marü tama chaugümaxãtama ichacua̱x, natürü Cristu nixĩ ya chomaxã icuácü erü chowa namaxü̃. Rü ñu̱xma rü Tupana Nane ya Cristuaxü̃́ chayaxõõcüma nixĩ i chamaxü̃xü̃. Rü nüma nixĩ ga choxü̃ nangechaü̃xü̃, rü nügü inaxãxü̃ nax cha̱u̱xca̱x nayuxü̃ca̱x.

Popera ga Yudíugü ga yaxõgüxü̃ca̱x ümatüxü̃ 3:14

Rü ñu̱xma rü Cristumaxã tüxü̃́ nangẽxma i maxü̃ i taguma gúxü̃ ega yaxõgüechagu rü noxrirüü̃tama naga ixĩnüegu ñu̱xmatata nawa nangu nax nataeguxü̃ i nüma.

2 Tesalonicenses 2:14

Rü yemaca̱x Tupana pexca̱x naca ga yexguma pemaxã nüxü̃ tixuxgu ga norü ore i mexü̃ i tüxü̃ maxẽxẽẽxü̃. Erü nüma nanaxwa̱xe nax pexü̃́ nangẽxmaxü̃ca̱x i pechica i tórü Cori ya Ngechuchu ya Cristuxü̃tawa i ngextá ínamexẽchixü̃wa.

Ore i mexü̃ ga Cuáü̃ ümatüxü̃ 17:21

Rü cuxna chaca nax guxü̃ma i ngẽma choxna cumugüxü̃ rü wüxitama yaxĩgüxü̃ca̱x ngẽma cuma rü choma nax wüxitama ixĩgüxü̃rüxü̃. Rü ngẽxgumarüxü̃ ta cuxna chaca nax nümagü rü wüxitama tamaxã yaxĩgüxü̃ nax ngẽmaãcü i ñoma i naanecüã̱x i duü̃xü̃gü yaxõgüxü̃ca̱x nax cuma núma choxü̃ cumuxü̃.

Ichaía 11:5

Rü nüma ya yimá ãẽ̱xgacü rü meama guxü̃ma i duü̃xü̃gümaxã tá inacua̱x. Rü aixcüma tá nayanguxẽxẽ i ngẽma ore i nüxü̃ yaxuxü̃.

Efesios 3:6

Rü ngẽma ĩnü ga noxri Tupanaxicatama nüxü̃ cuáxü̃ nixĩ nax ngẽma ore i mexü̃maxã Tupana nüxna uxü̃ i guxü̃ma i duü̃xü̃gü i tama Yudíugü ixĩgüxü̃ nax Ngechuchu ya Cristuaxü̃́ yaxõgüãxü̃ca̱x rü nayauxgüãxü̃ca̱x i maxü̃ i taguma gúxü̃. Rü ñu̱xma rü Cristugagu ngẽma duü̃xü̃gü i tama Yudíugü ixĩgüxü̃ rü Yudíugümaxã wüxitama i duü̃xü̃gü nixĩgü. Rü ngẽma tama Yudíugü ixĩgüxü̃ca̱x nixĩ i ngẽma Tupanaarü unetagü ga noxri Iraétanüxü̃maxã nüxü̃ yaxuxü̃.

Popera ga Yudíugü ga yaxõgüxü̃ca̱x ümatüxü̃ 6:18

Rü nüxü̃ tacua̱x rü ngẽxguma ta̱xacüca̱x nügüégagu inaxunetagu ya Tupana, rü taxucürüwama tüxü̃ nawomüxẽxẽ rü nanaxüchicüü i ngẽma. Rü ñu̱xma i guxãma i yixema nax Tupanaarü ngü̃xẽẽca̱x idauxü̃ nax tüxü̃ ínapoxü̃xü̃ca̱x, rü tüxü̃́ nangẽxma i taxü̃ i taãxẽ, erü nüxü̃ tacua̱x rü aixcüma tá tanayaxu i ngẽma maxü̃ i taguma gúxü̃ i tamaxã inaxunetaxü̃.

Popera ga Yudíugü ga yaxõgüxü̃ca̱x ümatüxü̃ 3:1

Rü ñu̱xma Pa Chauenexẽgü ya Tupanape̱xewa Üünegüxe, rü pexü̃ nixĩ ya Tupana i nadexü̃ nax norü duü̃xü̃gü pixĩgüxü̃ca̱x. Rü ngẽmaca̱x name nixĩ i mea nagu perüxĩnüe ya Ngechuchu ya Cristu ya Tupana núma namucü. Rü nüma ya Ngechuchu nixĩ i tórü chogüruxü̃ i Tupanape̱xewa tüxü̃ ixüünexẽẽcü. Rü yimáaxü̃́ nixĩ i yaxõgüxü̃.

Popera ga Yudíugü ga yaxõgüxü̃ca̱x ümatüxü̃ 2:17

Rü nüma ga Ngechuchu rü nanaxwa̱xe nax yixema i naenexẽgü ixĩgüxü̃rüü̃tama nügü yaxĩxẽẽxü̃ nax yemaacü tórü chogüruxü̃ ya mecümacü ya nüxü̃́ ingechaü̃tümüxü̃gücü yixĩxü̃ca̱x i Tupanape̱xewa. Rü yemaca̱x nixĩ ga nügü inaxãxü̃ rü nayuxü̃ nax yemaacü Tupana duü̃xü̃güaxü̃́ nüxü̃ irüngümaxü̃ca̱x ga norü pecadugü.

Norü taxre ga popera ga Timutéuca̱x naxümatüxü̃ ga Pauru 1:9

Rü Tupana tüxü̃ namaxẽxẽxẽ rü tüxü̃ nade nax naxca̱xicatama imaxẽxü̃ca̱x. Natürü tama ta̱xacürü mexü̃ nax ixügüxü̃gagu nixĩ ga yemaacü tamaxã namecümaxü̃ ga Tupana. Natürü tamaxã namecüma yerü woetama yema nixĩ ga norü ngúchaü̃ rü naxü̃pa nax naane naxüxü̃ rü Ngechuchu ya Cristugagu tüxü̃ nangechaxü̃.

Ore i mexü̃ ga Matéu ümatüxü̃ 24:35

Rü ñoma i naane rü ngẽma daxũwa nüxü̃ idauxü̃ rü tá nagu̱x. Natürü chorü ore rü tagutáma inayarüxo rü aixcüma tá ningu.

Gálatas 1:15

Natürü yexguma taxũta chabuxgu, rü woetama Tupana choxü̃ naxuneta nax choxü̃ namuxü̃ca̱x nax chanaxüxü̃ca̱x i norü puracü. Rü nüma rü cha̱u̱xca̱x naca nax noxrü chixĩxü̃ca̱x, yerü poraãcü choxü̃ nangechaü̃. Rü yexguma Tupana naxwa̱xegu, rü choxü̃ nüxü̃ nacua̱xẽxẽ ga Nane ya Cristu. Rü yemaacü nanaxü nax ngẽma duü̃xü̃gü i tama Yudíugü ixĩgüxü̃maxã nüxü̃ chixuxü̃ca̱x nax Ngechuchugagu tüxü̃́ nangẽxmaxü̃ i maxü̃ i taguma gúxü̃. Rü yexguma yemaacü Tupana choxü̃ nüxü̃ cua̱xẽẽgu ga Nane, rü taxúenama chayaca.

1 Corintios 10:16

Rü ngẽxguma õna i üünexü̃ca̱x ingutaque̱xegügu, rü yaxaxgügu ya yimá bínu ya üünecü rü moxẽ naxca̱x ixãgügu, rü ngẽmaãcü yigü tawe̱x nax Cristu ya nagü taxca̱x ibacüwe rüxĩxü̃. Rü ngẽxguma nangõ̱xgügu i ngẽma paũ i ibücuxü̃, rü ngẽmaãcü yigü tawe̱x nax nawe rüxĩxü̃ ya Cristu ya naxü̃ne taxca̱x ixãcü.

1 Corintios 1:30

Rü nümatama ga Tupana nixĩ ga Ngechuchu ya Cristuarü duü̃xü̃güxü̃ pexü̃ yaxĩgüxẽẽxü̃. Rü tatanüwa nanamu ga Cristu nax nüma rü Tupanaarü cua̱x taxca̱x yixĩxü̃ca̱x. Rü Cristugagu nixĩ nax Tupana tüxü̃ dexü̃ rü tüxü̃ yamexẽẽxü̃ nax nape̱xewa ixüünegüxü̃ca̱x rü pecaduwa ínguxü̃xü̃ca̱x.

Romanos 11:17

Tupana nüxü̃ naxo ga yema Yudíugü ga tama yaxõgüchaü̃xü̃. Rü ñoma wüxi i oribuchacüxü i idaexü̃rüxü̃ nixĩ ga yema Yudíugüxü̃ naxoxü̃. Natürü nachicüü Tupana pexü̃ nade woo tama Yudíugü nax pixĩgüxü̃. Rü wüxi i naixnecücüã̱x i oribuchacüxü rü oribu ítoxü̃wa yarüñaxcuchixü̃rüxü̃ pixĩgü. Rü ñu̱xma i pema rü ta pexü̃́ nangẽxma i pechica natanüwa i ngẽma duü̃xü̃gü i Tupanaarü ixĩgüxü̃. Erü Tupana rü pexü̃ narüngü̃xẽxẽ nax penayaxuxü̃ca̱x i maxü̃ i taguma gúxü̃.

1 Tesalonicenses 2:12

Rü ngẽxgumarüxü̃ ta nüxü̃ pecua̱xgü nax ñuxãcü pexü̃ taxucu̱xẽgüxü̃ nax mea Tupanape̱xewa pemaxẽxü̃ca̱x. Rü nüma nixĩ i pexca̱x nangemaxü̃ nax nüma ãẽ̱xgacü íyixĩxü̃wa pengugüxü̃ca̱x nax ngéma mexü̃wa pengẽxmagüxü̃ca̱x.

Colosenses 1:24

Rü ñu̱xma nax pexca̱x ngúxü̃ chingexü̃ rü chataãxẽ erü nüxü̃ chacua̱x rü ñaa chaxunemaxã choma rü ta chayanguxẽxẽ ga yema ngúxü̃ ga Cristu ingexü̃ naxca̱x i norü duü̃xü̃gü i yaxõgüxü̃.

Norü taxre ga popera ga Timutéuca̱x naxümatüxü̃ ga Pauru 2:13

Natürü woo muẽ̱xpü̱xcüna yixema tama aixcüma yanguxẽẽgu i ngẽma Tupanamaxã ixunetaxü̃, natürü nüma ya Tupana rü guxü̃guma nayanguxẽxẽ i ngẽma tamaxã inaxunetaxü̃, erü taxuacüma nügütama nawomüxẽxẽ.