1 Chamué 8:3 - Tupanaarü Ore

³ Natürü tama nanatürüxü̃ nixĩgü, yerü norü yemaxü̃güguama narüxĩnüe. Rü yexguma ta̱xacürü guxchaxü̃ namexẽẽgügu rü nanayauxtanügü, rü tama nawüxigu i norü ngü̃xẽxẽ i guxãmaxã.

1 Chamué 8:3 Referans Kwoze

Wenaxarü naxümatü ga Tupanaarü mugü 16:19

Rü pemax, Pa Ãẽ̱xgacügü i Guxchaxü̃güarü Mexẽẽruü̃güx, ¡rü taxṹ i peyatoxẽxẽxü̃ i ngẽma guxchaxü̃arü mexẽxẽ! Rü ngẽxguma penamexẽẽgu i ngẽma duü̃xü̃güarü guxchaxü̃gü rü name nax guxãxü̃ma mea penamexẽẽxü̃ i tümarü guxchaxü̃gü. ¡Rü taxũtáma penayaxu ega texé pexü̃́ naxütanüchaü̃gu nax nawaama pexüxü̃ca̱x! Erü ngẽma diẽru rü ñoma yangexetüxü̃rüxü̃ nayaxĩgüxẽxẽ i ngẽma nüxü̃ cua̱xüchixü̃ rü ínayatoxẽxẽ i ngẽma aixcümaxü̃ ixugüxü̃arü dexa.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:10

Erü ngẽma nax diẽruguama rüxĩnüxü̃ rü ngẽma nixĩ i guxü̃ma i chixexü̃güarü ügü. Rü nangẽxma i ñuxre i yaxõgüxü̃ i diẽruguama rüxĩnüexü̃ rü ngẽmaca̱x Tupanana nixĩgachi. Rü ngẽmaãcü nügünatama guxchaxü̃ naxãgü rü nügüxü̃tama ngechaü̃ nangu̱xẽẽgü.

Wiyaegü 15:5

rü tümaarü diẽru paxaãchi ngĩxü̃ ixãxẽ nax ngearü üétüãcüma tanatáeguxẽẽãxü̃ca̱x, rü tama diẽru yaxúxe ega texé naxütanügu nax napoxcuxü̃ca̱x i ngẽma taxuxü̃ma i chixexü̃ üxü̃. Rü yíxema ngẽmaãcü maxü̃́xẽ rü tagutáma ta̱xacürü chixexü̃gu tangu.

Ínachoxü̃xü̃chiga 23:8

Rü cuma nax ãẽ̱xgacü quixĩxü̃, rü tama name i wüxiaxü̃́ cunayauxtanü, nax naétüwaama cuxüxü̃ca̱x ega ta̱xacürü guxchaxü̃ cuxü̃tawa yamexẽẽgügu. Erü ngẽma ãẽ̱xgacü i nayauxtanüxü̃, rü inayacu̱x i ngẽma aixcüma ixĩxü̃, nax tama nüxü̃ nacuáxü̃ca̱x i duü̃xü̃gü, rü ngẽmaãcü ya yíxema duü̃xẽ ya taxuxü̃ma i chixexü̃ üchiréxe, rü nitümaguãchi i ngẽma chixexü̃.

Ínachoxü̃xü̃chiga 18:21

¡Rü Iraégütanüxü̃wa yadexechi i yatügü nax curü ngü̃xẽẽruü̃gü yaxĩgüxü̃ca̱x! ¡Rü naxca̱x nadau i duü̃xü̃gü i nüxü̃ cua̱xgüxü̃ rü Tupanaga ĩnüexü̃, rü tama idorata̱xagüxü̃, rü tama diẽruca̱xmare daugüxü̃! Rü nüxü̃ naxuneta i ñuxre nax 1,000 i duü̃xü̃gümaxã inacúachigüxü̃ca̱x, rü togü i 100 i duü̃xü̃gümaxã inacúachigüxü̃ca̱x, rü togü i 50 i duü̃xü̃gümaxã inacúachigüxü̃ca̱x, rü togü i 10 i duü̃xü̃gümaxã inacúachigüxü̃ca̱x.

Nüxíraxü̃xü̃ ga popera ga Timutéuca̱x naxümatüxü̃ ga Pauru 3:3

Rü tama name i wüxi i ngãxwa̱xexü̃ rü nuwa̱xexü̃ tixĩ. Rü tama name i tümaarü diẽruguama rüxĩnüxe tixĩ. Natürü name nixĩ i guxü̃ i duü̃xü̃gümaxã yáxna taxĩnü rü namaxã tamecüma.

Ichaía 33:15

Rü yíxema aixcüma mea maxü̃́xẽ, rü yíxema aixcümaxü̃ ixúxe, rü yíxema tama womüxẽẽãcü tügü muarü ngẽmaxü̃ã́xẽ, rü yíxema tama nayauxtanüxẽ i guxchaxü̃arü mexẽxẽ, rü yíxema tama naga ĩnüxe i ngẽma tümamaxã máetagüchaü̃xü̃, rü yíxema chixexü̃cha̱xwa ixũgachixe, rü yíxema tá tixĩ ya aixcüma maxü̃́xẽ rü tüxü̃́ nangẽxmaxẽ i tümaarü cu̱xchicaxü̃ i nutanaxca̱x, rü guxü̃gutáma taxãwemü rü tagutáma nataxu i tümaarü dexá.

2 Chamué 15:4

Rü ñanagürü ta: —Chierüx ñaa nachixü̃anewa ãẽ̱xgacü i guxchaxü̃arü mexẽẽruxü̃ chixĩxgu i choma nax ngẽmaãcü guxãma chauxü̃tawa naxĩxü̃ca̱x ya yíxema guxchaxü̃gü tüxü̃́ ngẽxmaxe nax tüxü̃́ chanamexẽẽxü̃ca̱x —ñanagürü.

Ngu̱xẽẽtaeruü̃arü ore 2:19

¿Texé nüxü̃ cuáxü̃ ya yima ãẽ̱xgacü ya chowena tá ixücucü, rü wüxi ya naãẽxü̃ cuácü yixĩ, rüe̱xna tama naãẽxü̃ cuácü yixĩ? Natürü nüma tá nixĩ i namaxã inacuáxü̃ i guxü̃ma i ngẽma ñoma i naanewa chorü cua̱xmaxã chaxüxü̃ rü taxü̃ i puracümaxã choxü̃́ ngẽxmaxü̃. Rü guxü̃ma i ngẽma rü ta rü natüca̱xmamare nixĩ.

Wiyaegü 26:10

Erü nümagü rü taxü̃ i chixexü̃ naxügü rü diẽruca̱x chixri duü̃xü̃gümaxã inacua̱xgü.

Ínachoxü̃xü̃chiga 23:6

Rü ngẽxguma wüxi i duü̃xü̃ i ngearü diẽruã́xü̃ ãẽ̱xgacüpe̱xewa guxchaxü̃ cumaxã mexẽẽgu, rü tama name i cunangexrü i ngẽma guxchaxü̃.

1 Chamué 2:35

Rü ngẽmawena i choma rü tá chayanguxuchixẽxẽ ya wüxi ya chacherdóte ya aixcüma chauga ĩnücü ya choma chanaxwa̱xexü̃ãcüma puracücü rü naxücü i chorü ngúchaü̃. Rü choma rü tá guxü̃gutáma nüxü̃ charüngü̃xẽxẽ nax yamuxü̃ca̱x i nataagü. Rü tá chanamu ya yimá chacherdóte nax guxü̃gutáma yimá choma nüxü̃ chaxunetacü ya ãẽ̱xgacüxü̃ nangü̃xẽẽxü̃.

1 Chamué 12:2

Daa nixĩ ya ãẽ̱xgacü ya pemaxã tá icuácü. Choma rü marü chaya rü chataueru, natürü chaunegü rü petanüwa nangẽxmagü. Choma nixĩ ga yexguma changextü̱xügucürüwatama pemaxã ichacuáxü̃ rü ñu̱xma rü ta.

Ichaía 1:23

Rü perü ãẽ̱xgacügü rü tama Tupanaga naxĩnüe rü namaxã naxãmücügü i duü̃xü̃gü i máxwa̱xegüxü̃. Rü diẽruca̱x rü ãmareca̱x ínacagü nax tama napoxcuexü̃ca̱x i ngẽma chixexü̃ ügüxü̃. Rü taxcutagü rü tama tüxü̃ narüngüxẽẽgü, rü tama tümagu narüxĩnüe ya yixema yutegüxe.

Miquéa 3:11

Rü daa ĩanearü guxchaxü̃arü mexẽẽruü̃gü rü ngẽma nüxü̃́ naxütanüxü̃ga nixĩ i naxĩnüexü̃. Rü ngẽma chacherdótegü rü ngẽxguma nüxü̃́ tanaxütanüguxicatama tüxü̃ nangúexẽxẽ. Rü ngẽma orearü uruü̃güneta rü ngẽxguma nüxü̃́ naxãtanüguxicatama tamaxã nüxü̃ nixu i ta̱xacü tá yixcüra naxüpetü. Rü nüxü̃ nixu nax Tupanaégagu yixĩxü̃ nax yadexagüxü̃, rü ñanagürügü: “Cori ya Tupana rü nataxü̃tagu rü taxuxü̃táma i chixexü̃ tüxü̃ nangupetü”, ñanagürügü.