1 Chamué 7:12 - Tupanaarü Ore

¹² Yemawena ga Chamué rü wüxi ga nuta nayaxu, rü ĩane ga Mispá rü ĩane ga Chéü̃arü ngãxü̃gu nanaxǘ ga gumá nuta. Rü Ebéü̃-échegu nanaxüéga. Rü ñu̱xũchi ñanagürü: —Nüma ya Cori ya Tupana rü ñu̱xmarüta taguma nüxü̃ narüchau nax tüxü̃ nangü̃xẽẽxü̃ —ñanagürü.

1 Chamué 7:12 Referans Kwoze

2 Corintios 1:10

Rü Tupana rü toxü̃ ínanguxü̃xẽxẽ nawa ga yema guxchaxü̃ ga yuwa toxü̃ gagüchaü̃xü̃. Rü ngẽxgumarüxü̃ tá ta toxü̃ ínanguxü̃xẽxẽ nawa i ñaa taxü̃ i guxchaxü̃ i ñu̱xma toxü̃́ ngẽxmaxü̃. Rü aixcüma tayaxõgü nax nüma rü guxü̃gutáma ngẽmaãcü toxü̃ nangü̃xẽẽxü̃.

Yochué 4:9

Rü yexgumarüxü̃ ta ga nüma ga Yochué rü nai ga 12 ga nuta nanayaxu rü natütamagu nayanu ga yema chacherdótegü ga baú ingetaü̃güxü̃ íchigüxü̃gu. Rü yimá nutagü rü ñu̱xmarüta ngéma nangẽxmagü.

Ngechuchuarü ngúexü̃gü ga yamugüxü̃arü puracüchiga 26:22

Natürü Tupana choxü̃ narüngü̃xẽxẽ rü ngẽmaca̱x taguma íchayachaxãchi nax guxü̃ma i duü̃xü̃gümaxã nüxü̃ chixuxü̃ i Tupanaarü ore rü woo buxü̃ rü yáxü̃. Rü namaxã nüxü̃ chixu ga yema ore ga nũxcümaü̃güxü̃ ga Tupanaarü orearü uruü̃gü rü Moiché nüxü̃ ixugüxü̃ nax ngúxü̃ tá yangexü̃ ya Cristu rü tá nax nayuxü̃, natürü yemawena rü nüma tá yixĩxü̃ ga nüxíra yuwa ínadaxü̃ nax tatanüxü̃ i Yudíugümaxã rü ngẽma to i duü̃xü̃gü i tama Yudíugü ixĩgüxü̃maxã nüxü̃ yaxuxü̃ca̱x i ore i tüxü̃ maxẽxẽẽxü̃. Rü taguma tomare ga ore duü̃xü̃gümaxã chixu —ñanagürü ga Pauru.

Naanearü ügüchiga 22:14

Rü yemawena ga Abraáü̃ rü nanaxüéga ga yema nachica ñaxü̃maxã: —Cori ya Tupana rü tüxna nanaxã i ngẽma inaxwa̱xexü̃ —ñaxü̃maxã. Rü ngẽmaca̱x i ñu̱xma rü ta duü̃xü̃gü nüxü̃ nixu rü ñanagürügü: —Yima ma̱xpǘnewa Tupana tüxna nanaxã i ngẽma inaxwa̱xexü̃ —ñanagürügü.

1 Chamué 5:1

Rü yexguma marü yapugüãgu ga yema baú ga Tupanaarü mugüchixü̃, rü nüma ga Firitéugü rü ĩane ga Ebéü̃-échewa nanayauxgü rü norü ĩane ga Adúxwa nanangegü.

Ichaía 19:19

Rü ngẽma ngunexü̃gu i Equítuanewa rü tá nangẽxma i wüxi i ãmarearü guruxü̃ i Cori ya Tupanaca̱x ixĩxü̃. Rü Equítuanearü üyeanearü ngaixcamagu rü Cori ya Tupanaégagu tá nanaxügü i wüxi i cua̱xruxü̃ i nutanaxca̱x.

Wiyaegü 71:17

Pa Chorü Tupanax, yexguma changextü̱xügutama choxü̃ cungu̱xẽxẽ i curü ore, rü ñu̱xma rü ta nüxü̃ chixuama ga yema mexü̃ ga taxü̃ ga cuxüxü̃.

Wiyaegü 71:6

Rü yexguma chauéanüwa chayexmagu, rü cuxme̱xwa chayexma rü cuma nixĩ ga choxü̃ cubuxẽẽxü̃. Rü guxü̃gutáma cuxü̃ chicua̱xüxü̃.

1 Chamué 4:1

Rü nüma ga Chamué rü guxü̃ma ga Iraéanecüã̱xgümaxã nüxü̃ nixu ga yema Tupanaarü ore. Rü yexgumaü̃cüxü rü nüma ga Firitéugü rü nügü nanutaque̱xe nax Iraéanecüã̱xgümaxã nügü nada̱i̱xü̃ca̱x. Rü yemaca̱x ga nüma ga Iraéanecüã̱xgüarü churaragü rü naxca̱x nichoxü̃ nax nügü namaxã nada̱i̱xü̃ca̱x. Rü ĩane ga Ebéü̃-échexü̃tawa nangugü, rü yexma nügü ninu. Rü nüma ga Firitéugüarü churaragü rü ĩane ga Aféxwa nayexmagü.

Ínachoxü̃xü̃chiga 17:15

Rü nüma ga Moiché rü yexma nanaxü ga wüxi ga ãmarearü guruxü̃ rü “Cori ya Tupana rü chorü cua̱xruxü̃ nixĩ”, ñaxü̃gu nanaxüéga.

1 Chamué 7:11

Rü yexgumatama ga yema Iraétanüxü̃ rü Mispáwa inaxĩãchi. Rü Firitéugüwe nangegü ñu̱xmata Bex-cáxarü tuãchigu nayadaix.

1 Chamué 14:35

Rü nüma ga Chaú rü yexma Cori ya Tupanaaxü̃́ nanaxü ga wüxi ga ãmarearü guruxü̃. Rü yema nixĩ ga nüxíraxü̃xü̃ ga ãmarearü guruxü̃ ga Tupanaca̱x naxüxü̃.