1 Chamué 5:10 - Tupanaarü Ore

¹⁰ Rü yexguma ga nüma ga Firitéugü rü ĩane ga Ecróü̃waama nanangegü ga yema baú ga Tupanaarü mugüchixü̃. Natürü yexguma Ecróü̃wa nanguxgu ga yema baú, rü yema duü̃xü̃gü ga Ecróü̃cüã̱xgü rü nixaixcha rü ñanagürügü: —¿Tü̱xcüü̃ nua penange i ngẽma Iraéanecüã̱xgüarü Tupanaarü mugüchixü̃ nax toxü̃ nada̱i̱xü̃ca̱x ya guxãma? —ñanagürügü.

1 Chamué 5:10 Referans Kwoze

Amúx 1:8

Rü tá chayama̱x ya ĩane ya Adúxarü ãẽ̱xgacü, rü ngẽxgumarüxü̃ tá ta chayama̱x ya ĩane ya Acharóü̃arü ãẽ̱xgacü. Rü guxü̃ i chorü poramaxã tá ichayanaxoxẽxẽ ya yima Ecróü̃. Rü taxuxü̃táma i Firitéu íchayaxüxẽxẽ nax chanadaixü̃ —ñanagürü ya Cori ya Tupana.

Norü taxre ga popera ga ãẽ̱xgacügüchiga 1:2

Rü ĩane ga Chamáriawa rü wüxi ga ngunexü̃gu ga Iraéanearü ãẽ̱xgacü ga Ocochía rü nachiü̃arü daxũwa yexmaxü̃ ga beü̃tánawa narüngu. Rü poraãcüma nanapi̱x. Rü yexguma rü ĩane ga Ecróü̃wa nanamugü ga norü orearü ngeruü̃gü nax yema duü̃xü̃güarü tupana ga Baá-chebúna yacagüxü̃ca̱x rü naxca̱x tá yataane rüe̱xna tama.

Ãẽ̱xgacügü ga guxchaxü̃güarü mexẽxẽruü̃gü 1:18

Rü nanapugü ga guma ĩanegü ga Gácha rü Acharóü̃ rü Ecróü̃ namaxã ga norü naanegü.

Yochué 15:45

Rü oéstewaama nüxna naxü ga guma ĩane ga Ecróü̃ namaxã ya norü ĩanexacügü. Rü Ecróü̃wa ne nada rü ñu̱xmata Már Mediteráneuwa nangu. Rü namaxã nangau ga guxü̃ma ga yema naane ga Adúxna ngaicamaxü̃ namaxã ga norü ĩanexacügü.

1 Chamué 5:9

Natürü yexguma marü yéma nangegüãguwena, rü nüma ga Cori ya Tupana rü yema ĩanecüã̱xgüxü̃ nayaxĩ̱xãchiãẽxẽẽgü yerü taixnamaxã nayada̱xaweexẽxẽ ga guxü̃ma ga duü̃xü̃gü ga ibuxü̃ rü iyaxü̃.

1 Chamué 5:11

Rü guma ĩanewa rü guxü̃ma ga duü̃xü̃gü rü nanaxĩ̱xãchiãẽgü, yerü Tupana rü poraãcü nanapoxcue. Rü yemaca̱x ga yema ĩanecüã̱xgü rü guxü̃ma ga Firitéugüarü ãẽ̱xgacügüca̱x nangema rü ñanagürügü nüxü̃: —¡Nua torü ĩanewa ípenangexechi i ngẽma baú i Iraéanecüã̱xgüarü Tupanaarü mugüchixü̃, rü nachixü̃aneca̱xtama penataeguxẽxẽ nax tama toxü̃ nada̱i̱xü̃ca̱x i guxãma i tomax! —ñanagürügü.

2 Chamué 7:9

Rü cuxü̃ íchixümücü ga ngextá ícuxũxü̃wa, rü cuxü̃ nüxü̃ charüporamaexẽxẽ ga guxü̃ma ga curü uanügü ga cumaxã nügü daixü̃. Rü cuxü̃ chatachigaxẽxẽ naxrüxü̃ i ngẽma yatügü i tachigaxü̃ i ñoma i naanewa.

Yochué 15:11

Rü yéma rü inida rü ma̱xpǘne ga Ecróü̃arü tuãchi ga nórtewa yexmaxü̃wa nadapetü. Rü yéma rü ĩane ga Chicróü̃wa nada rü ma̱xpǘne ga Baaráwa nadapetü ñu̱xmata Yaxnéewa inarügo. Rü Már Mediteráneugu nayacua̱x ga norü üyeane.

1 Chamué 6:1

Rü yema baú ga Tupanaarü mugüchixü̃ rü 7 ga tauemacü Firitéugüarü naanewa nayexma.

1 Chamué 17:52

Rü yexguma ga Iraéanecüã̱xgüarü churaragü rü Yudátanüxü̃ ga churaragü rü aita naxüe yerü marü Firitéugüxü̃ narüporamaegü. Rü nawe nangẽgü ñu̱xmata ĩanegü ga Gáx rü Ecróü̃arü ũũchiwa. Rü yema Firitéugüarü churaragü ga yuexü̃ rü nanuquegü nawa ga yema nama ga Chaaraíü̃wa ne daxü̃ rü ñu̱xmata ĩanegü ga Gáx rü Ecróü̃wa nguxü̃.

Amúx 6:2

¡Rü ĩane ya Canéxwa pexĩ, rü ngéma nüxü̃ peda̱u̱x i ngẽma ngéma ngupetüxü̃! ¡Rü ĩane ya taxü̃ne ya Amáwa pexĩ rü ñu̱xũchi yima Firitéugüarü ĩane ya Gáxca̱x perüchoü̃! ¿Ẽ̱xna pema nagu perüxĩnüegu rü ngẽma nachixü̃anecüã̱xgüxü̃ perüporamaegü? ¿Ẽ̱xna pema nagu perüxĩnüegu rü ngẽma nachixü̃anegüxü̃ narütamae i perü naane?