1 Chamué 22:2 - Tupanaarü Ore

² Rü yexgumarüxü̃ ta naxü̃tawa naxĩ ga yema duü̃xü̃gü ga ãẽ̱xgacü ngetanüãcü puracüexẽẽxü̃ rü yema duü̃xü̃gü ga nangetanügüxü̃ rü yema duü̃xü̃gü ga tama ãẽ̱xgacümaxã taãẽgüxü̃. Rü nüma ga Dabí rü yema duü̃xü̃güeru nixĩ. Rü yema duü̃xü̃gü ga Dabíwe rüxĩxü̃ rü 400 ga yatügüwa nangu.

1 Chamué 22:2 Referans Kwoze

Ore i mexü̃ ga Matéu ümatüxü̃ 11:28

¡Rü nua chauxü̃tawa pexĩ i guxãma i pema ya ipaexe nagagu i perü guxchaxü̃gü rü perü ĩ̱xãchiãẽgü! Rü choma rü tá pexü̃ icharüngü̃güxẽxẽ.

1 Chamué 30:6

Rü nüma ga Dabí rü naxoegaãẽ yerü ga yema norü duü̃xü̃gü rü nagu narüxĩnüe nax Dabíxü̃ nutamaxã ínamuxũchigüxü̃ yerü poraãcüma naxacügüca̱x nanue. Natürü nüma ga Dabí rü Cori ya Tupanana narüyoe rü nayaxõ nax Tupana tá nüxü̃ rüngü̃xẽẽxü̃.

1 Chamué 25:13

Rü yexguma nüma ga Dabí rü norü duü̃xü̃güxü̃ namu rü ñanagürü: —¡Guxãma penade i pexne! —ñanagürü. Rü yexguma nüma ga Dabí rü ñu̱xũchi 400 ga norü duü̃xü̃gü rü nananucu ga norü taragü rü inaxĩãchi. Rü yema togü ga 200 ga duü̃xü̃gü rü yema ínapegüxü̃gutama narücho, rü nüxna nadaugü ga norü yemaxü̃gü.

1 Chamué 23:13

Rü yexguma ga Dabí rü ñu̱xũchi norü duü̃xü̃gü ga 600 ga norü mu rü ĩane ga Queiráwa ínachoxü̃, rü inaxĩ tama nüxü̃ nacua̱xgüãcü nax ngextá tá naxĩxü̃. Rü yexguma Chaú nüxü̃ cuáchigagu ga Dabí rü marü nax yañaxü̃ ga ĩane ga Queiráwa, rü ínayachaxãchi nax nawe nangexü̃.

1 Chamué 1:10

Rü ngĩma ga Ána rü poraãcü ixaxu, rü ngĩgümaxã ingechaü̃, rü yemaacü iyumüxẽ, rü Tupanana ica.

Ãẽ̱xgacügü ga guxchaxü̃güarü mexẽxẽruü̃gü 11:3

Rü yemaca̱x ga Yeté rü naenexẽgüna nixũ rü Tóxanegu nayaxãchiü̃. Rü yéma nananutaque̱xe ga wüxitücumü ga duü̃xü̃gü ga chixexü̃gu maxẽxü̃. Rü yema duü̃xü̃gü ga ngĩ́xta̱xagüxü̃maxã duü̃xẽgü tüxü̃ nibuxmüxẽxẽ rü nangĩ́xẽ.

Popera ga Yudíugü ga yaxõgüxü̃ca̱x ümatüxü̃ 2:10

Rü nümatama ga Tupana nixĩ ga naxüaxü̃ ga guxü̃ma i ñu̱xma ngẽxmaxü̃ rü naxme̱xwa nangẽxma i guxü̃ma nax nüma nanaxwa̱xexü̃ãcüma namaxã inacuáxü̃ca̱x. Rü nüma ga Tupana rü nanaxwa̱xe nax guxü̃ma i naxacügü nüxü̃́ nangẽxmaxü̃ca̱x i nachica i mexü̃ i naxü̃tawa. Rü yemaca̱x ñoma ga naanewa nanamu ga Ngechuchu ya Cristu nax ngúxü̃ yangexü̃ca̱x rü duü̃xü̃güca̱x nayuxü̃ca̱x nax nüxü̃́ nangẽxmaxü̃ca̱x i maxü̃ i taguma gúxü̃.

Ore i mexü̃ ga Matéu ümatüxü̃ 11:12

Rü yexguma noxri Cuáü̃ ya báiü̃xẽẽruxü̃ ínguxgu ñu̱xmata ñoma i ngunexü̃wa nangu rü woo nangẽxmagu i guxchaxü̃gü, natürü Tupana ya daxũwa ãẽ̱xgacü ixĩcüarü ore rü nüxü̃ nixugüeama rü muxü̃ma i duü̃xü̃gu pora naxüe nax nayauxgüãxü̃ca̱x.

Ucu̱xẽgüchiga 31:6

¡Nüxü̃ rüxo nax cuyaxaxüxü̃ ya bínu ya ngúcü rü ngúxü̃ i a̱xchixü. Rü nüe yaxaxgüã i ngẽma naechita maxẽxü̃, rü ngẽma ngechaü̃güxü̃ nax ngẽmagu nüxü̃ yanangümaexü̃ca̱x nax nangearü diẽruã̱xgüxü̃ rü ngúxü̃ yangegüxü̃!

Norü taxre ga popera ga ãẽ̱xgacügüchiga 20:5

—¡Wena íyadau ya Echequía ya chorü duü̃xü̃güarü ãẽ̱xgacü ixĩcü! ¡Rü namaxã nüxü̃ ixu: “Choma ya nũxcümaü̃cü ga curü o̱xi ga Dabíarü Tupana rü marü cuxü̃́ nüxü̃ chaxĩnü i curü yumüxẽ, rü nüxü̃ chadau i cu̱xgüxü̃etü nax cuxaxuxü̃! Rü choma rü tá cuxca̱x chayataanexẽxẽ rü tomaepü̱x i ngunexü̃guwena rü tá marü ícurüda rü tá chopata ya taxü̃newa cuxũ.

2 Chamué 17:8

Cuma rü nüxü̃ cucua̱x ya cunatü rü ngẽma norü duü̃xü̃gü rü nax naporaexü̃. Rü ñu̱xma rü ñoma wüxi i osu i naixnecücüã̱x i düraxü̃ naxacü nüxna tüxü̃ ipuxü̃xü̃rüxü̃ nanue. Rü ñu̱xũchi cunatü rü wüxi i yatü i marü daixü̃ cuáxü̃ nixĩ rü ñaa chütaxü̃ rü taxũtáma norü duü̃xü̃gütanüwa nangẽxma.

2 Chamué 5:2

Rü woo yexguma Chaú Iraéanearü ãẽ̱xgacü ixĩxgu, rü cuma nixĩ ga aixcüma daiwa tomaxã icucuáxü̃. Rü ñu̱xũchi nüma ga Cori ya Tupana rü nüxü̃ nixu nax cuma tá quixĩxü̃ i tomaxã icucuáxü̃ rü guxü̃ma i Iraéanecüã̱xgüarü ãẽ̱xgacü tá quixĩxü̃ —ñanagürügü.

Ãẽ̱xgacügü ga guxchaxü̃güarü mexẽxẽruü̃gü 18:25

Natürü nümagü ga Dáü̃tanüxü̃ rü nanangãxü̃gü rü ñanagürügü: —¡Taxṹ i toétü quidexaxü̃! Erü ngürüãchi totanüwa nangẽxma i duü̃xü̃gü i tama yáxna cumaxã ĩnüexü̃ rü düxwa tá pexü̃ nadai. Rü ngẽmaãcü tá cuyu wüxigu namaxã i cutanüxü̃ —ñanagürügü.

1 Chamué 22:3

Rü yéma inaxũãchi ga Dabí rü Mispáwa naxũ ga Moáanewa. Rü Moáarü ãẽ̱xgacüxü̃ ñanagürü: —Rü cuxna chaca, Pa Ãẽ̱xgacüx, nax chaunatü rü chaué napexü̃tawa tangexmagüxü̃ca̱x ñu̱xmatáta Cori ya Tupana choxü̃ nawé i ngẽma chomaxã nanaxwa̱xexü̃ —ñanagürü.

Norü taxre ga popera ga ãẽ̱xgacügüchiga 4:1

Rü iyexma ga wüxi ga nge ga orearü uruxü̃ naxma̱x, rü ngĩma ga yema nge rü Erichéuxü̃tawa ixũ rü yéma nüxü̃ iyarüxu rü ngĩgürügü: —Chaute rü marü nayu rü cuma rü nüxü̃ cucua̱x ga nüma rü aixcüma Tupanaxü̃ nax nangechaü̃xü̃. Natürü i ñu̱xmax i ngẽma duü̃xü̃ ga diẽru naxü̃tawa ngĩxü̃ nayaxuxü̃ ga chaute, rü chauxü̃tawa naxũ nax nüxü̃́ chanaxütanüxü̃ca̱x. Rü ngẽmaca̱x tüxü̃ nigagüchaü̃ ya yíxema taxre ya chaune norü puracütanüxü̃ruxü̃ —ngĩgürügü.