1 Chamué 18:21 - Tupanaarü Ore

²¹ Yerü nagu narüxĩnü ga Dabína ngĩxü̃ nax namuxü̃ nax Dabíma̱x yixĩxü̃ca̱x rü ngĩma Firitéugüme̱xẽgu nanguxẽẽãxü̃ca̱x. Rü yemaca̱x ga nüma ga Chaú rü wenaxarü Dabíxü̃ ñanagürü: —Rü ñu̱xmata waxi nixĩ i chauã̱xte quixĩxü̃ —ñanagürü.

1 Chamué 18:21 Referans Kwoze

1 Chamué 18:17

Rü nüma ga Chaú rü wüxi ga ngunexü̃ Dabíxü̃ ñanagürü: —Cuxna tá ngĩxü̃ chamu cuxma̱xü̃ i ngẽma chauxacü irüyamaecü i Meráx ega wüxi ya poracü quixĩxgu rü cunadaixgu i Cori ya Tupanaarü uanügü —ñanagürü. Rü nüma ga Chaú nagu narüxĩnü nax tama nümatama Dabíxü̃ yamáxü̃, natürü norü ĩnü nixĩ nax Firitéugü yamáxü̃ca̱x nagu i dai.

Yeremía 9:8

Rü yima norü conügü rü ñoma chuxchigü i ãũcümaxü̃rüxü̃ nixĩgü, rü yexü̃cürü doraxü̃ nixugüecha. Rü mea namücügüxü̃ narümoxẽgüneta, natürü naãẽwa nagu narüxĩnüe nax chixexü̃gu tüxü̃ nangu̱xẽẽgüxü̃.

1 Chamué 18:26

Rü nüma ga yema Chaúarü ngü̃xẽẽruü̃gü rü Dabímaxã nüxü̃ nayarüxugü ga yema Chaúarü ore. Rü nüma ga Dabí rü nataãxẽ namaxã ga yema Chaú naxca̱x íca̱xaxü̃, yerü yemaacü nüxü̃́ nanatauxchaxẽẽama nax naã̱xte yixĩxü̃ca̱x. Rü naxü̃pa ga yema ngunexü̃ ga Chaú namaxã ixunetaxü̃, rü nüma ga Dabí rü nananutaque̱xe ga norü churaragü rü inaxũãchi, rü 200 ga Firitéugü nayadai. Rü yema Firitéugücha̱xmüpe̱xechiraü̃gü rü Chaúna nayana nax yemaacü naã̱xte yixĩxü̃ca̱x. Rü yexguma ga nüma ga Chaú rü yema naxacü ga Micá Dabína ngĩxü̃ namu naxma̱xü̃.

Ínachoxü̃xü̃chiga 10:7

Rü yexguma ga Faraóü̃arü ngü̃xẽẽruü̃gü rü ñanagürügü nüxü̃: —Pa Ãẽ̱xgacüx ¿nidaamatama nax guxchaxü̃ nua tüxna naxãxü̃ i ngẽma yatü i Moiché? ¡Yange̱xgü i ngẽma duü̃xü̃gü nax norü Cori ya Tupanaxü̃ yanacua̱xüü̃güxü̃ca̱x! ¿Ẽ̱xna, tama nüxü̃ cudau, Pa Ãẽ̱xgacüx, nax ñaa Equítuane rü guxü̃wama marü nachixexü̃? —ñanagürügü.

Yeremía 5:26

Erü chorü duü̃xü̃gütanüwa rü nangẽxma i yatügü i chixexü̃ ügüxü̃. Rü ngẽma yatügü rü ñoma werigüca̱x yüta ixüxü̃rüxü̃ norü doramaxã chixexü̃gu nanayixẽxẽ i ngẽma togü i duü̃xü̃gü.

Ucu̱xẽgüchiga 29:5

Yíxema guxü̃guma tümamücüxü̃ icua̱xüxü̃netaxe rü ngẽmaãcü tümamücüxü̃ titoxyepe̱xe, rü guxchaxü̃ naxca̱x taxü.

Wiyaegü 38:12

Rü ngẽma choxü̃ ima̱xgüchaü̃xü̃ rü chope̱xegu nananu i norü yütagü. Rü ngẽma choxü̃ chixexẽẽgüchaü̃xü̃ rü nügümaxã nagu narüxĩnüe nax ñuxãcü tá chixexü̃gu choxü̃ nanguxẽẽgüxü̃. Rü guxü̃ i oragu rü chauchiga doraxü̃ nixugü.

1 Chamué 18:22

Rü yemawena rü nüma ga Chaú rü norü ngü̃xẽẽruü̃güxü̃ namu rü ñanagürü: —¡Pema rü pexicatama namaxã pidexagü i Dabí, rü namaxã nüxü̃ pixu rü choma i ãẽ̱xgacü nax chixĩxü̃ rü poraãcü nüxü̃ changechaü̃ rü guxãma i pema i chorü ngü̃xẽẽruü̃gü rü ta rü nüxü̃ nax pengechaü̃güxü̃ rü penaxwa̱xexü̃ nax nüma rü chauã̱xte yixĩxü̃, ñapegürü tá nüxü̃! —ñanagürü.