1 Chamué 15:11 - Tupanaarü Ore

¹¹ —Choxü̃́ nangu̱x ya Chaú nax ãẽ̱xgacüxü̃ nüxü̃ chaxunetaxü̃ erü choxna nixũgachi rü tama nayanguxẽxẽ i ngẽma chanamuxü̃ —ñanagürü. Rü nüma ga Chamué rü poraãcü naãxẽwa nangu̱x ga yema. Rü Cori ya Tupanaxü̃ nachixewe ga guxü̃ma ga yema chütaxü̃gu.

1 Chamué 15:11 Referans Kwoze

1 Chamué 13:13

Rü Chamué nanangãxü̃ga rü ñanagürü: —Ngẽma cuxüxü̃ rü wüxi i ngeãẽmare nixĩ, erü tama naga cuxĩnü ya Cori ya Tupanaarü mu. Rü ngẽxguma chi naga cuxĩnügu i ngẽma Cori ya Tupana cumaxã nüxü̃ ixuxü̃, rü nüma rü guxü̃guchima Iraétanüxü̃arü ãẽ̱xgacü cuxü̃ nixĩxẽxẽ.

Naanearü ügüchiga 6:6

Rü yemaca̱x ga Tupana rü poraãcü nangechaü̃ rü nüxü̃́ nangu̱x ga nax naxüaxü̃ ga gumá duü̃.

Wiyaegü 119:136

Rü poraãcü chaxaxu erü ngẽma togü rü tama naga naxĩnüe i curü mugü. -18-

2 Chamué 24:16

Rü yexguma yema Tupanaarü orearü ngeruxü̃ ga daxũcüã̱x inaxügüchaü̃gu ga nax nadaiaxü̃ ga yema Yerucharéü̃cüã̱xgü ga duü̃xü̃gü, rü Cori ya Tupanaaxü̃́ nangu̱x ga yema chixexü̃. Rü nüxna nachogü ga yema norü orearü ngeruxü̃ ga daxũcüã̱x ga duü̃xü̃güxü̃ daixü̃, rü ñanagürü nüxü̃: —¡Marü ngẽxmatama yacua̱xẽxẽ, rü taxṹ i cuyadaxẽxẽxü̃! —ñanagürü. Rü yexguma ga yema Cori ya Tupanaarü orearü ngeruxü̃ ga daxũcüã̱x rü Aráuna ga Yebútanüxü̃ trigu íbuxuxü̃wa nayexma.

Yeremía 9:18

¡Rü paxãma nua naxĩ, rü taxca̱x nua yaxauxe nax ngẽmaãcü i yíxema rü ta ixauxexü̃ca̱x rü taxgüxü̃xetümaxã napaxü̃ca̱x ya taxetügü rü tachipaxetügü!

Wiyaegü 36:3

Rü ngẽma duü̃xü̃ i chixexü̃ rü ngẽxguma yadexagu rü taguma mexü̃ i orexü̃ nixu rü doraxü̃xicatama nixu. Rü wüxi i duü̃xü̃ i tama naãẽxü̃ cuáxü̃ nixĩ, rü taguma mexü̃ naxü.

1 Chamué 15:35

Rü nüma ga Chamué rü taguma wena Chaúxü̃ nadau, natürü naxca̱x naxauxecha, yerü Tupanaaxü̃́ nangu̱x nax Chaúxü̃ Iraéanecüã̱xgüarü ãẽ̱xgacüwa nanguxẽẽxü̃.

1 Chamué 15:9

Natürü nüma ga Chaú rü yema norü churaragü rü tama nayama̱xgü ga gumá Amaréxtanüxü̃arü ãẽ̱xgacü ga Agáx. Rü tama nanadai ga yema rümemaegüxü̃ ga carnérugü, rü wocagü, rü wocaxacügü. Rü tama ínanagu ga yema Amaréxtanüxü̃arü yemaxü̃gü ga itatanüxü̃. Rü yema yemaxü̃gü ga taxuwama imexü̃xicatama nixĩ ga yema ínaguxü̃.

1 Chamué 15:3

Rü ngẽmaca̱x ¡ngéma naxũ rü nadai i guxü̃ma i ngẽma Amaréxtanüxü̃ guxü̃ma i norü ngẽmaxü̃maxã, rü taxũtáma cuxü̃́ nangechaütümüxü̃gü! ¡Rü nadai i yatüxü̃gü, rü ngexü̃gü, rü buxü̃gü, rü õxchanagü! ¡Rü ngẽxgumarüxü̃ ta nadai i norü wocagü, rü carnérugü, rü caméyugü, rü búrugü! ¡Rü bai tá i wüxi ícuyaxüxẽẽxü̃!” ñanagürü ga Cori ya Tupana —ñanagürü ga Chamué.

Popera ga Yudíugü ga yaxõgüxü̃ca̱x ümatüxü̃ 10:38

Natürü yíxema tümaarü õgagu chope̱xewa mexẽ, rü name nixĩ i guxü̃guma tayaxõõcüma cha̱u̱xca̱x tamaxü̃. Natürü ngẽxguma nüxü̃ tarüxoxgu nax tayaxõxü̃, rü choma rü taxũtáma tümamaxã chataãxẽ”, ñanagürü.

Ore i mexü̃ ga Matéu ümatüxü̃ 5:44

Natürü i choma rü pemaxã nüxü̃ chixu rü: ¡Nüxü̃ pengechaü̃ i perü uanügü! ¡Rü naxca̱x peyumüxẽ i ngẽma duü̃xü̃gü i chixexü̃maxã pewe ingẽxü̃tanüxü̃!

Yeremía 13:17

Rü ngẽxguma taxũtáma ipexĩnüegu i ngẽma pemaxã nüxü̃ chixuxü̃, rü choma rü chaxica tátama chaxaxu nagagu nax pegü picua̱xüü̃güxü̃. Rü chauxetüwa tá inarüyaegü i ngẽma chauxgüxü̃etü, erü perü uanügü rü tá pexü̃ ínayauxü̃ rü tá pexü̃ nigagü i pemax nax Cori ya Tupanaarü duü̃xü̃gü pixĩgüxü̃ —ñanagürü ga Yeremía.

Yeremía 9:1

Choma rü ngunecü rü chütacü naxca̱x chaxauxecha i ngẽma chorü duü̃xü̃gü i yuexü̃. Rü chierü ñoma wüxi i dexá i íchuxchuechaxü̃rüxü̃ yixĩxgu i chauxgüxü̃etü.

Wiyaegü 125:5

Natürü ngẽma duü̃xü̃gü i chixexü̃ i nacümagu ĩxü̃ ¡rü poxcu namaxã naxuegu! Erü ngẽmatama nixĩ i woetama naxca̱x ixĩxü̃ i ngẽma chixexü̃ ügüxü̃. ¡Rü Iraétanüxü̃na naxã i taãxẽ!

Wiyaegü 110:4

Rü nüma ya Tupana rü cuxü̃ naxuneta nax Melquichedéxrüxü̃ guxü̃guma chacherdóte quixĩxü̃. Rü nüma rü taxũtáma inayanaxoxẽxẽ i ngẽma nüxü̃ yaxuxü̃.

Wiyaegü 109:4

Rü ngẽma chorü ngechaü̃ i ngẽma duü̃xü̃güca̱x ichaxãxü̃ rü chixexü̃maxã choxü̃́ nanaxütanügü. Natürü i chomax rü naxca̱x chayumüxẽama.

Wiyaegü 78:57

Rü yema norü o̱xigürüü̃tama nüxna nixĩgachitanü rü tama aixcüma nüxü̃́ nayaxõgü. Rü ñoma wüxi ya würa ya wü̃xü̃nerüxü̃ nixĩgü.

1 Chamué 12:23

Rü ñu̱xma i choma rü tama chanaxwa̱xe i pecadu chaxü, rü ngẽmaca̱x taxũtáma nüxü̃ charüchau nax pexca̱x chayumüxẽxü̃. Rü tá pexü̃ changúexẽxẽama nax mea Cori ya Tupanaca̱x pemaxẽxü̃ rü mea nawe perüxĩxü̃ca̱x.

Ore i mexü̃ ga Luca ümatüxü̃ 6:12

Rü yexguma ga Ngechuchu rü wüxi ga ma̱xpǘnewa naxũ nax yéma yayumüxẽxü̃ca̱x. Rü guxü̃ ga yema chütaxü̃gu rü norü yumüxẽwa Tupanamaxã nidexa.

Ore i mexü̃ ga Matéu ümatüxü̃ 24:13

Natürü yíxema naétüwa mea Tupanaaxü̃́ yaxõõmáxẽ rü yíxema tá tixĩ ya aixcüma nayaxúxe i maxü̃ i taguma gúxü̃.

Wiyaegü 78:41

Natürü wenaxarü nüxü̃ naxügüxü̃ rü yemaacü poraãcü nanangechaü̃xẽẽgü ya yimá Iraétanüxü̃arü Tupana ya Üünecü.

Chofonía 1:6

Rü ngẽxgumarüxü̃ tá ta ichayanaxoxẽxẽ i ngẽma duü̃xü̃gü i choxna ixĩgachixü̃, rü tama cha̱u̱xca̱x daugüxü̃ rü tama choxna cagüexü̃ ega ta̱xacü nanaxwa̱xegügu —ñanagürü tá.

Yoná 4:2

Rü yemaca̱x ñaãcü nayumüxẽ: —Dücax, Pa Cori Pa Tupanax, rü ngẽma ñu̱xma Nínibewa ngupetüxü̃ nixĩ ga yema nüxü̃ chixuxü̃ ga yexguma chauchixü̃anewatama chayexmagu. Rü yemaca̱x nixĩ ga cuxcha̱xwa chixũxü̃táa̱x nax Tárchixwa chaxũxü̃ca̱x, yerü nüxü̃ chacua̱x rü cuma rü wüxi ya Tupana ya mecümacü rü ngechaü̃wa̱xecü quixĩ rü tama paxa cunu. Rü ngẽma curü ngechaü̃ rü nataxüchi. Rü ngẽmaca̱x woo texémaxã poxcu cuxuegu̱xgu rü paxãma nagu curüxĩnü, rü tama tüxü̃ cupoxcu ega nüxü̃ tarüxoegu i tümacüma i chixexü̃.

Yoná 3:10

Rü Tupana rü nüxü̃ nadau ga yema Nínibecüã̱x ga duü̃xü̃gü ügüxü̃ nax ñuxãcü nüxü̃ naxoexü̃ ga nacüma ga chixexü̃. Rü yemaca̱x ga nüma ga Tupana rü ínayachaxãchi ga yema poxcu ga noxri namaxã naxueguxü̃.

Amúx 7:3

Rü yexguma nüma ga Cori ya Tupana rü nüxü̃́ nangechaxü̃tümüxü̃ ga yema duü̃xü̃gü. Rü tama nayanguxẽxẽ ya yema nagu naxĩnüxü̃, rü ñanagürü: —¡Ngẽma rü taxũtáma nangupetü! —ñanagürü.

Naanearü ügüchiga 6:7

Rü poraãcü nangechaü̃ãcüma ñanagürü: —Tá ichayanaxoxẽxẽ i ngẽma duü̃xü̃gü i chango̱xẽẽxü̃, rü ngẽxgumarüxü̃ tá ta ichayanaxoxẽxẽ i ngẽma naxü̃nagü, rü naeü̃gü, rü ngẽma naeü̃gü i waixü̃müanegu nügü itúgüxü̃, rü naeü̃gü i ixãxpe̱xatüxü̃ erü choxü̃́ nangu̱x nax chanango̱xẽẽxü̃ —ñanagürü.

Ínachoxü̃xü̃chiga 32:11

Natürü nüma ga Moiché rü ñaa dexamaxã Cori ya Tupanaxü̃ narüngüxmüxẽẽchaü̃: —Pa Corix, ¿tü̱xcüü̃ poraãcü namaxã cunu i ngẽma curü duü̃xü̃gü ga cumatama curü poramaxã ícunguxü̃xẽẽxü̃ ga Equítuanewa?

Ínachoxü̃xü̃chiga 32:14

Rü nüma ga Cori ya Tupana rü ínayachaxãchi nawa ga yema norü duü̃xü̃gümaxã naxueguxü̃ nax nadaixchaü̃xü̃.

1 Chamué 8:6

Rü yexguma ga nüma ga Chamué rü tama namaxã nataãxẽ yerü yema duü̃xü̃gü rü nanaxwa̱xegü nax nüxü̃́ nangẽxmaxü̃ ya wüxi ya ãẽ̱xgacü ya réi nax namaxã inacuáxü̃ca̱x. Rü yemaca̱x norü yumüxẽwa Cori ya Tupanamaxã nüxü̃ nixu.

1 Chamué 15:10

Rü yemawena ga Cori ya Tupana rü Chamuémaxã nidexa rü ñanagürü:

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 21:15

Rü nüma ga Tupana rü yema da̱xaweanemaxã yéma nanamu ga wüxi ga daxũcüã̱x ga norü orearü ngeruxü̃ nax yemamaxã Yerucharéü̃cüã̱xü̃ nada̱i̱xü̃ca̱x. Natürü yexguma marü Yerucharéü̃wa nanguxchaü̃gu nax duü̃xü̃güxü̃ nada̱i̱xü̃ ga yema daxũcüã̱x, rü nüma ga Cori ya Tupana rü nüxü̃́ nangechaü̃tümüxü̃ ga duü̃xü̃gü, rü yemaca̱x nüxna nachogü ga yema daxũcüã̱x rü ñanagürü nüxü̃: —¡Rü marütama nax cunada̱i̱xü̃! —ñanagürü nüxü̃. Rü nüma ga yema daxũcüã̱x rü marü guma Yebútanüxü̃ ga Onáü̃ trigu ipuxü̃wa nayexma ga yexguma Tupana nüxna chogügu.

Yox 34:27

Erü tama Tupanaga naxĩnüechaü̃, rü tama nanayauxgüchaü̃ i norü mugü rü norü ngu̱xẽẽtaegü.

Yeremía 11:10

Rü naxca̱x nawoegu ga yema pecadugü ga nũxcümaü̃güxü̃ ga norü o̱xigü ügüxü̃, rü yemaca̱x tama chauga naxĩnüechaü̃ rü tupananetachicüna̱xãgüwe narüxĩ rü nüxü̃ nicua̱xüü̃gü. Rü yemaacü ga yema duü̃xü̃gü ga Iraéanecüã̱xgü rü Yudáanecüã̱xgü rü nüxü̃ naxoe ga yema uneta ga nũxcümaü̃güxü̃ ga norü o̱xigümaxã nüxü̃ chixuxü̃.

Yeremía 34:16

Natürü i ñu̱xma rü marü nüxü̃ perüngümae ga yema uneta, rü penaxãũãchixẽxẽ i chauéga. Erü wena naxca̱x pedaugü i ngẽma mugüruü̃gü i yatüxü̃gü rü ngexü̃gü ga marü ípenguxü̃ẽẽchiréxü̃, rü wenaxarü pegüaxü̃́ penapuracüexẽxẽ.

Echequié 18:24

Natürü ngẽxguma chi wüxi i duü̃xü̃ i mea maxchiréxü̃ nüxü̃ rüxoxgu nax mea namaxü̃xü̃, rü naxüãxgu i guxü̃ma i chixexü̃ i tama namaxã chataãẽxü̃ ¿rü namexü̃ yixĩxü̃ nax tama napoxcuxü̃? Rü pemaxã nüxü̃ chixu rü tá napoxcu. Rü guxü̃ma ga yema mexü̃ ga noxri naxüxü̃ rü choma rü tá nüxü̃ icharüngüma. Rü nüma rü tá nayu nagagu i ngẽma norü chixexü̃gü. Rü choma ya Cori ya Tupana nixĩ i ngẽma ñachaxü̃.

1 Chamué 16:1

Rü yemawena ga Tupana rü Chamuéxü̃ ñanagürü: —Marütama nax Chaúca̱x nax cungechaü̃echaxü̃, erü marü tama chanaxwa̱xe nax Iraéanecüã̱xgüarü ãẽ̱xgacü nax yixĩxü̃. ¡Rü wüxi i carnéruchatacu̱xre nayaxu rü oribuarü chíxü̃maxã naxüãcu! ¡Rü Beréü̃wa naxũ rü ngẽxma naxca̱x yadau ya wüxi ya yatü ya Ichaxígu ãégacü! Erü wüxi ya nanexü̃ chayaxu nax Iraéanecüã̱xgüarü ãẽ̱xgacü yixĩxü̃ca̱x —ñanagürü.

Nüxíraxü̃xü̃ ga popera ga ãẽ̱xgacügüchiga 11:9

Rü nüma ga Cori ya Iraéanecüã̱xgüarü Tupana rü Charomóü̃maxã nanu yerü nüxna nixũgachi, woo taxree̱xpü̱xcüna naxca̱x nax nangóxü̃, rü namaxã nüxü̃ yaxuxü̃ nax tama togü ga duü̃xü̃güarü tupanachicüna̱xãxgüxü̃ yacua̱xüü̃xü̃ca̱x. Natürü ga nüma ga Charomóü̃ rü tama Cori ya Tupanaga naxĩnü.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 10:13

Rü yemaacü nixĩ ga nayuxü̃ ga Chaú nagagu ga yema chixexü̃ ga naxüxü̃. Yerü nüma ga Chaú rü tama Tupanaga naxĩnü rü ñu̱xũchi yuüxü̃ ga ẽxü̃guxü̃xü̃ cuáxü̃na nayaca. Rü tama nüxna naca ga Tupana. Rü yemagagu nixĩ ga nüma ga Tupana ga nayuxẽẽãxü̃ ga Chaú rü Ichaxí nane ga Dabíxü̃ naxunetaxü̃ nax nüma Iraéanecüã̱xgüarü ãẽ̱xgacü yixĩxü̃ca̱x.