1 Chamué 14:6 - Tupanaarü Ore

⁶ Rü nüma ga Yonatáü̃ rü norü ngü̃xẽẽruxü̃xü̃ ñanagürü: —Ngĩxã, rü tocutüwa taxĩ, ñu̱xmatáta ngẽma Firitéugüarü churaragütücumü i tama Tupanaaxü̃́ yaxõgüxü̃ íngẽxmaxü̃wa ingugü. Bexmana nüma ya Cori ya Tupana rü tá tüxü̃ narüngü̃xẽxẽ, erü taxuxü̃ma nüxü̃́ naguxcha nax tüxü̃ naporamaexẽẽxü̃ woo imuxgu rüe̱xna inoxregu —ñanagürü.

1 Chamué 14:6 Referans Kwoze

Ore i mexü̃ ga Matéu ümatüxü̃ 19:26

Rü Ngechuchu nüxü̃ nadawenü rü ñanagürü nüxü̃: —Duü̃xü̃gü rü taxuacüma nügü namaxẽxẽ, natürü Tupanaaxü̃́ rü guxü̃ma natauxcha —ñanagürü.

Romanos 8:31

¿Rü ñuxũ ñagüxü̃ tá i ñu̱xma i ngẽmachiga? Rü ngẽxguma Tupana taétüwa üxgu, ¿rü texé tá nüxü̃ tarüyexera nax chixexü̃ tamaxã taxüxü̃ca̱x?

Chacaría 4:6

Rü nüma ga daxũcüã̱x rü nayadaxẽxẽ ga nax yadexaxü̃ rü ñanagürü: —Rü ñaa nixĩ i Cori ya Tupanaarü ore i Chorobabéca̱x ixĩxü̃ i ñaxü̃: “Tama churaragüarü poramaxã rü bai i ta̱xacürü to i poramaxã, natürü Chauãẽarü poramaxã tá naxü ya chopata ya taxü̃ne” —ñanagürü ya Cori ya Tupana ya Guxãétüwa Ngẽxmacü.

Wenaxarü naxümatü ga Tupanaarü mugü 32:30

Rü choma nax Iraétanüxü̃arü poxü̃ruxü̃chire̱x chixĩxü̃ rü ñu̱xma rü norü uanügüaxü̃́ chanatauxchaxẽxẽ nax ngẽmame̱xẽgu nayixü̃ca̱x i ngẽma Iraétanüxü̃. Rü ngẽmaca̱x wüxitama i uanü rü 1,000 i Iraétanüxü̃xü̃ nibuxmüxẽxẽ, rü taxretama i uanügü rü 10,000 i Iraétanüxü̃xü̃ nibuxmüxẽxẽ.

Norü taxre ga to ga popera ga ãẽ̱xgacügüchiga ümatüxü̃ 14:11

Rü naxü̃pa ga nax nügü nada̱i̱xü̃ rü nüma ga Achá rü nayumüxẽ rü Tupanamaxã nidexa rü ñanagürü: —Pa torü Tupanax, namaxã tá togü tadai i ñaa muxũchixü̃ i churaragü i torü uanü ixĩgüxü̃. Rü ngẽmaca̱x curü ngü̃xẽẽca̱x ítaca erü cuxü̃́ tayaxõgü. Rü nataxuma i to i cuxrüxü̃ nüxü̃ rüngü̃xẽẽxü̃ i ngẽma rüturamaexü̃ nax ngẽma rüporamaexü̃me̱xẽwa ínanguxuchixü̃ca̱x. Rü cuma nixĩ i torü Tupana quixĩxü̃. Rü nüxü̃ tacua̱x nax taxúema cuxü̃ rüporamaexü̃ —ñanagürü ga Achá.

Yeremía 9:26

Rü ngẽmaãcü tá chanapoxcue i ngẽma Equítuanecüã̱xgü, rü Yudátanüxü̃, rü Edóü̃tanüxü̃, rü Amóü̃tanüxü̃, rü Moátanüxü̃, rü ñu̱xũchi guxü̃ma i ngẽma duü̃xü̃gü i ínachianexü̃wa maxẽxü̃ rü nügü idüerugüxü̃ i nügü iwiü̃cha̱xmüü̃pe̱xechiraü̃gümarexü̃ natürü tama chauga ĩnüexü̃. Rü tá chanapoxcue i guxü̃ma i ngẽma Iraétanüxü̃ erü chixexü̃gu namaxẽ rü tama chauga naxĩnüe —ñanagürü.

2 Chamué 16:12

Natürü ngẽxguma Cori ya Tupana choxü̃ da̱u̱xgu nax ngúxü̃ chingexü̃, rü bexmana mexü̃maxã tá choxü̃́ nanaxüchicüxü i ñaa chixexü̃ i ñu̱xma nüxü̃ chaxĩnüxü̃ —ñanagürü.

Chofonía 2:3

Rü ngẽmaca̱x name nixĩ i Cori ya Tupanaca̱x pedaugü, Pa Guxãma i Aixcüma Nape̱xewa Mecümagüxe rü Naga Ĩnüexe i Norü Mugüx. ¡Rü nape̱xewa pixaixcümagü rü tama pegü picua̱xüü̃gü! Rü bexmana ngẽmaãcü nüma ya Cori ya Tupana rü tá pexü̃ ínapoxü̃ i ngẽma ngunexü̃ i nagu norü numaxã poxcu ínangu̱xẽẽxü̃.

Amúx 5:15

¡Rü naxchi pexaie i ngẽma chixexü̃! ¡Rü nüxü̃ pengechaxü̃ i ngẽma mexü̃! ¡Rü aixcüma mea penamexẽxẽ i tümaarü guxchaxü̃ i ngẽxguma texé pepe̱xewa tayamexẽxẽchaü̃gu! Rü bexmana ngẽmaãcü tá nixĩ ya Cori ya Tupana ya Guxãétüwa Ngẽxmacü rü tümamaxã yaxãũxãchixü̃ ya yíxema Iraétanüxü̃ ya íyaxügüxe.

Yeremía 9:23

Rü nüma ya Cori ya Tupana rü ñanagürü: —Yíxema cua̱x tüxü̃́ ngẽxmaxe rü tama name i tügü namaxã ticua̱xüxü̃ i ngẽma tümaarü cua̱x. Rü woo yíxema nüxü̃ cuáxe nax duü̃xü̃gümaxã itacuáxü̃ rü tama name i ngẽmamaxã tügü ticua̱xüxü̃. Rü woo ya yíxema diẽruã́xẽ rü tama name i tümaarü diẽrumaxã tügü ticua̱xüxü̃.

Norü taxre ga popera ga ãẽ̱xgacügüchiga 19:4

Chierüx nüma ya Cori ya curü Tupana rü marü nüxü̃ naxĩnügu i ngẽma ore i nüxü̃ yaxuxü̃ i ngẽma Achíriaanearü churaragüeru nax namaxã naguxchigaxü̃. Rü chierüna napoxcuãgu ya curü Cori ya Tupana naxca̱x i ngẽma ore i nümatama nüxü̃ naxĩnüxü̃. Rü ngẽmaca̱x chanaxwa̱xe i toxca̱x cuyumüxẽ nax ítayaxǘgüxü̃ —ñanagürü ga ãẽ̱xgacü.

2 Chamué 1:20

¡Taxṹ i Gáxwa nüxü̃ peyarüxuxü̃, rü taxṹ i Acharóü̃arü ĩanearü namagüwa nüxü̃ peyarüxuxü̃ nax tama nataãẽgüxü̃ca̱x i ngẽma ngexü̃gü i Firitéugü, rü tama taãẽmaxã nayunagütanüxü̃ca̱x i ngẽma ngexü̃gü i tama Tupanaaxü̃́ yaxõgüxü̃!

1 Chamué 17:36

Rü choma i curü duü̃xü̃, Pa Ãẽ̱xgacüx, rü woo leóü̃ yixĩxgu rüe̱xna osu i düraxü̃ yixĩxgu rü chayama̱x. Rü ñaa Firitéu i tama Tupanaxü̃ cuáxü̃ rü ngẽmaãcü tá namaxã chanaxü, erü Tupana ya Maxü̃cüarü churaragüxü̃ naxãũxũne.

1 Chamué 17:26

Rü yexguma ga Dabí rü yema naxü̃tawa yexmagüxü̃na naca rü ñanagürü: —¿Ta̱xacümaxã tá nüxü̃́ naxãtanü ya yimá yatü ya ñaa Firitéuxü̃ imácü rü naxoxẽẽcü nax ngẽma Iraéanecüã̱xgümaxã ta̱xacü nax yaxugüxü̃? ¿Erü ta̱xacü nixĩ i ñaa Firitéu i tama Tupanaxü̃ cuáxü̃ rü ngẽmaca̱x Tupana ya Maxü̃cüarü churaragüxü̃ naxãũxũnexü̃? —ñanagürü.

Ãẽ̱xgacügü ga guxchaxü̃güarü mexẽxẽruü̃gü 15:18

Rü nüma ga Chanchóü̃ rü poraãcüma nita̱xawa rü yemaca̱x Tupanamaxã nidexa rü ñanagürü: —Ñu̱xma nax poraãcü choxü̃ nüxü̃ curüporamaexẽẽxü̃ i chorü uanügü rü ¿Tü̱xcüü̃ ta̱xawamaxã tá choxü̃ cuyuxẽxẽxü̃? ¿Ẽ̱xna naxme̱xgu tá choxü̃ cunguxẽxẽ i ñaa Firitéugü i tama cuxü̃́ yaxõgüxü̃? —ñanagürü.

Filipenses 3:3

Natürü yíxema aixcüma Tupanape̱xewa imexe, rü yixema tixĩgü. Rü Tupanaxü̃ ticua̱xüü̃gü i Naãxẽ ya Üünexü̃arü ngü̃xẽẽmaxã. Rü tataãẽgü erü Ngechuchu ya Cristuarü duü̃xü̃gü tixĩgü. Rü tama tayaxõgü nax ngẽma yigü íiwíecha̱xmüxü̃pe̱xechiraü̃xü̃ca̱x Tupanape̱xewa imexü̃.

1 Chamué 14:7

Rü namücü rü nanangãxü̃ rü ñanagürü: —¡Ẽcü naxü i guxü̃ma i ngẽma cuãẽwa nagu curüxĩnüxü̃! Rü choma rü íchamemare nax cuxü̃ charüngü̃xẽẽxü̃ i ngẽma cuma cuxüxchaü̃xü̃wa —ñanagürü.

1 Chamué 17:46

Rü ñu̱xma ya Cori ya Tupana rü tá cho̱xme̱xgu cunangu̱xẽxẽ nax cuxü̃ chimáxü̃ca̱x. Rü tá cuxü̃ íchadaeeru rü ngẽma curü churaragü i yuexü̃ rü tá ngurucugüna rü ngo̱xogüna chanana. Rü ngẽmaãcü tá guxü̃ i naanewa nüxü̃ nacua̱xgü nax Iraéanewa nangẽxmaxü̃ ya Tupana.

1 Chamué 17:47

Rü guxãma ya yíxema núma ngẽxmagüxe rü tá nüxü̃ tacua̱xgü ya Cori ya Tupana rü tama taramaxã, rüe̱xna wocaemaxã nixĩ i naxüaxü̃ i ngẽma nüma nagu naxĩnüxü̃. Erü nüma ya Tupana rü tama duü̃xü̃gürüxü̃ ãxneãcü texémaxã nügü nadai. Rü nüma tátama nixĩ i toxme̱xgu pexü̃ nayixẽẽxü̃ i ñu̱xmax —ñanagürü.

Wiyaegü 135:6

Rü nüma ya Cori ya Tupana rü nanaxü i guxü̃ma i ta̱xacü i nüma nanaxwa̱xexü̃ i daxũguxü̃ i naanewa rü ñoma i naanewa. Rü ngẽxgumarüxü̃ ta nanaxü i ngẽma nüma nanaxwa̱xexü̃ i márwa rü natamawa.

Yeremía 9:25

Rü nüma ya Cori ya Tupana rü nüxü̃ nixu rü ñanagürü: —Tá inangu i ngunexü̃ i nagu chanapoxcuexü̃ i guxü̃ma i duü̃xü̃gü i nügü iwiü̃cha̱xmüü̃pe̱xechiraü̃gümarexü̃ natürü tama chauga ĩnüexü̃.

Iraétanüxü̃arü muxchiga 10:32

Rü ngẽxguma towe curüxũxgu rü tá cumaxã tangau i ngẽma mexü̃gü i Cori ya Tupana toxna ãxü̃ —ñanagürü.

Iraétanüxü̃arü muxchiga 31:4

Rü ngẽmaca̱x i pema rü petücumüwachigü tá ngéma penamugü i 1,000 chigü i churaragü i daiwa ĩxü̃ —ñanagürü.

Yochué 14:12

Rü ngẽmaca̱x i ñu̱xmax rü cuxna naxca̱x chaca nax choxna cunaxãxü̃ca̱x i ngẽma naane i ma̱xpǘneã́xü̃ ga nümatama ga Cori ya Tupana chomaxã namaxã ixunetaxü̃ nax choxna naxããxü̃ca̱x. Rü cumax, Pa Yochuéx, rü meama nüxü̃ cucua̱x nax ñu̱xma rü ta nangẽxmagüxü̃ i ngẽma nataagü ga gumá Anáx ga taxüchicü rü máchanexü̃chicütanüxü̃. Rü ngẽma norü ĩanegü rü nita rü meama ínapoxegugü. Natürü i chomax rü nüxü̃ chacua̱x nax Cori ya Tupana rü tá choxü̃ nangü̃xẽẽxü̃ nax ngéma ínawoxü̃ãxü̃ca̱x, yema chomaxã nüxü̃ yaxuxü̃rüü̃tama —ñanagürü ga Caréx.

Norü taxre ga to ga popera ga ãẽ̱xgacügüchiga ümatüxü̃ 14:10

Rü yexguma nüma ga Achá rü inaxũachi namaxã ga norü churaragü. Rü Marecháarü ngaicamawa yexmaxü̃ ga Chepátaarü doxonexü̃wa nangugü. Rü yexma nügü ininu nax yexma nügü nada̱i̱xü̃ca̱x.