1 Chamué 12:23 - Tupanaarü Ore

²³ Rü ñu̱xma i choma rü tama chanaxwa̱xe i pecadu chaxü, rü ngẽmaca̱x taxũtáma nüxü̃ charüchau nax pexca̱x chayumüxẽxü̃. Rü tá pexü̃ changúexẽxẽama nax mea Cori ya Tupanaca̱x pemaxẽxü̃ rü mea nawe perüxĩxü̃ca̱x.

1 Chamué 12:23 Referans Kwoze

Colosenses 1:9

Rü ngẽmaca̱x i toma ga noxritama pexü̃ tacuáchigagu, rü taguma nüxü̃ tarüchau nax pexca̱x tayumüxẽgüxü̃. Rü guxü̃guma Tupanana naxca̱x tacagü nax mea pexü̃ nüxü̃ nacua̱xẽẽxü̃ca̱x i ngẽma norü ngúchaü̃ nax penaxüxü̃. Rü ngẽxgumarüxü̃ ta nüxna naxca̱x taca nax pexna naxããxü̃ca̱x i naguxü̃raü̃xü̃ i cua̱x i Naãxẽ ya Üünexü̃wa ne ũxü̃.

Romanos 1:9

Rü Tupanaaxü̃́ nixĩ i guxü̃ma i chorü ngúchaü̃maxã chapuracüxü̃ rü nüxü̃ chixuxü̃ i norü ore i mexü̃ i Nanechiga. Rü nüma ya Tupana choxü̃ nadau rü nüxü̃ nacua̱x nax guxü̃guma pexca̱x chayumüxẽxü̃.

Norü taxre ga popera ga Timutéuca̱x naxümatüxü̃ ga Pauru 1:3

Guxü̃guma i chütacü rü ngunecü rü cuxna chacua̱xãchixü̃ i chorü yumüxẽwa, rü poraãcü cuxca̱x moxẽ Tupanana chaxã. Rü nüxü̃́ nixĩ i chapuracüxü̃ i mexü̃ i chauãẽmaxã, yexgumarüxü̃ ga nũxcümaü̃güxü̃ ga chorü o̱xigü naxügüxü̃rüxü̃.

1 Tesalonicenses 3:10

Rü ngunecü rü chütacü rü tayumüxẽgü, rü Tupanana naxca̱x tacagü nax petanüwa toxü̃ nawoeguxẽẽxü̃ca̱x nax wena pexü̃ tadaugüxü̃ca̱x rü pexü̃ tarüngü̃xẽẽgüxü̃ca̱x nax yexeraãcü nüxü̃́ peyaxõgüxü̃ca̱x.

Ngechuchuarü ngúexü̃gü ga yamugüxü̃arü puracüchiga 12:5

Rü yemaacü ga Pedru rü poxcupataü̃wa nayexma rü churaragü rü meama nüxna nadaugü. Natürü ga yema yaxõgüxü̃ ga Yerucharéü̃cüã̱x rü poraãcü nayumüxẽgü, rü Tupanana naxca̱x nacagü.

Wiyaegü 34:11

Pa Chauxacügüx ¡nua pexĩ rü choxü̃́ iperüxĩnüe! Rü pexü̃ tá changúexẽxẽ nax Cori ya Tupanaxü̃ pemuü̃exü̃.

Yeremía 6:16

Cori ya Tupana rü norü duü̃xü̃güxü̃ ñanagürü: —¡Ẽcü namagügu peyachigü rü penadauanegü! ¡Rü naxca̱x ípeca̱x rü ngexü̃rüü̃xü̃ yixĩxü̃ i ngẽma nũxcümaü̃xü̃ i nama, rü ngextá yixĩxü̃ i nangẽxmaxü̃ i ngẽma nama i mexü̃! ¡Rü ngẽmagu pexĩ rü tá petaãẽgü! —ñanagürü. Natürü nümagü rü ñanagürügü: —Tama nagu taxĩchaxü̃ —ñanagürügü.

Colosenses 1:28

Rü ñu̱xma i toma rü Cristuchiga nixĩ i duü̃xü̃gümaxã nüxü̃ tixuxü̃. Rü toma rü nüxü̃ tacuáãcüma tayaxucu̱xẽgü rü tanangúexẽxẽ i guxü̃ma i duü̃xü̃gü nax Cristugagu yangearü chixexü̃ã́xü̃ca̱x, rü ngẽmaãcü Tupanape̱xewa tanagagüxü̃ca̱x.

Ngechuchuarü ngúexü̃gü ga yamugüxü̃arü puracüchiga 20:20

Rü taguma íchayachaxãchi ga pemaxã nüxü̃ nax chixuxü̃ ga guxü̃ma ga yema ore ga perü mexü̃ca̱x ixĩxü̃. Rü guxü̃ ga duü̃xü̃güpe̱xewa, rü pepatagüwa rü ta pexü̃ changúexẽxẽ ga yema ore.

Ngu̱xẽẽtaeruü̃arü ore 12:10

Rü nüma ya orearü uruxü̃ rü naxca̱x nadau nax nüxü̃ yangauxü̃ca̱x i ngẽma ore i aixcüma mexü̃ nax naxümatüaxü̃ca̱x i ngẽma ucu̱xẽgü i aixcüma we̱xguxü̃.

Ucu̱xẽgüchiga 4:11

Choma rü ngẽma nacüma i cua̱x nawa ngẽxmaxü̃wa tá cuxü̃ chaga, rü nagu tá cuxü̃ chixũxẽxẽ i ngẽma nacüma i mexü̃ i ngextá taxuxü̃ma cuxü̃ íchixexẽẽxü̃wa, rü taxuguma ícurüpucutüxü̃wa ega woo poraãcü icuñaãchigu.

1 Corintios 9:16

Rü ñu̱xma nax nüxü̃ chixuxü̃ i ngẽma ore i tüxü̃ maxẽxẽẽxü̃, rü taguma ngẽmaca̱x chaugü chicua̱xüxü̃. Erü woetama ngẽma nixĩ i chorü puracü ga Tupana choxna ãxü̃, rü ngẽmaca̱x taxucürüwama chanangexrü. Erü poraãcü chi chachixexü̃gu i ngẽxguma taxũchima nüxü̃ chixuxgu.

Ínachoxü̃xü̃chiga 32:30

Rü moxü̃ãcü ga Moiché rü duü̃xü̃güxü̃ ñanagürü: —Pema rü poraãcü chixexü̃ pexügü. Rü ñu̱xma rü tá wena dauxü̃ chaxĩ nawa ya yima ma̱xpǘne ya Tupana nawa ngẽxmane nax nüxna chayaca̱xaxü̃ca̱x rü marü pexü̃́ nüxü̃ iyanangüma i ngẽma chixexü̃ i pexüxü̃ —ñanagürü.

1 Chamué 12:19

Rü yemaca̱x guxü̃ma ga yema duü̃xü̃gü rü Chamuéxü̃ ñanagürügü: —¡Cori ya curü Tupanana toxca̱x naca nax tama tayuexü̃ca̱x! Erü ñu̱xma rü tanayexeraxẽxẽ i guxü̃ma i torü chixexü̃gü nagagu nax wüxi ya torü ãẽ̱xgacü i réica̱x nax ítaca̱xaxü̃ —ñanagürügü.

Yeremía 15:1

Nüma ya Cori ya Tupana rü ñanagürü choxü̃: —Rü woo chi Moiché rü Chamué nua chauxü̃tawa ĩxgu nax naétüwa yachogüexü̃ca̱x i ñaa duü̃xü̃gü, rü marü taxũchima nüxü̃́ ichaxĩnü nax choxü̃́ nangechaü̃tümüxü̃güxü̃ i ñaa duü̃xü̃gü. ¡Rü namaxã nüxü̃ ixu rü choxna yaxĩgachitanü!

Yeremía 27:18

Rü ngẽxguma aixcüma orearü uruü̃gü yaxĩgügu, rü ngẽxguma aixcüma nüxü̃́ nangẽxmagu i Tupanaarü ore, rü name nax Cori ya Tupana ya Guxãétüwa ngẽxmacümaxã nüxü̃ yaxugüxü̃ nax tama Babiróniaanewa nanaaxü̃ca̱x i ngẽma ngẽmaxü̃gü i Tupanapatawa yaxügüxü̃ rü ngẽma ngẽmaxü̃gü i Yudáanearü ãẽ̱xgacüpatawa yaxügüxü̃ i Yerucharéü̃wa”, ñanagürü.

Yeremía 42:4

Rü Yeremía nanangãxü̃ rü ñanagürü: —Marü name. Choma rü tá pexca̱x tórü Cori ya Tupanana chaca rü namaxã tá nüxü̃ chixu i ngẽma choxna naxca̱x pecaxü̃. Rü tá pemaxã nüxü̃ chixu i guxü̃ma i ngẽma chomaxã nüxü̃ yaxuxü̃. Rü taxũtáma ta̱xacü pexcha̱xwa ichicu̱x —ñanagürü.

1 Chamué 8:6

Rü yexguma ga nüma ga Chamué rü tama namaxã nataãxẽ yerü yema duü̃xü̃gü rü nanaxwa̱xegü nax nüxü̃́ nangẽxmaxü̃ ya wüxi ya ãẽ̱xgacü ya réi nax namaxã inacuáxü̃ca̱x. Rü yemaca̱x norü yumüxẽwa Cori ya Tupanamaxã nüxü̃ nixu.

Wiyaegü 34:12

¿Cunaxwa̱xexü̃ nax cutaãẽxü̃ rü nax namáxü̃ i curü maxü̃ i ñoma i naanewa?

Wiyaegü 122:6

¡Rü guxü̃nema ya perü maxü̃nemaxã Tupanana peca nax Yerucharéü̃wa nangẽxmaxü̃ca̱x i taãxẽ! Rü namaxã nüxü̃ pixu ya yima ĩane rü ñaperügü: —Tanaxwa̱xe i cuwa mea namaxẽ i ngẽma cuxü̃ ngechaü̃güxü̃ —ñapegürü.

Ichaía 30:21

Rü ngẽxguma namawa tügünewaama ícutüxgu rüe̱xna to̱xwewaama ícutüxgu, rü tá cuweama nüxü̃ cuxĩnü i wüxi i naga i cuxü̃ ñaxü̃: —Nuama nixĩ i nama. ¡Rü nuama naxũ! —ñaxü̃.