Nüxíraxü̃xü̃ ga popera ga Timutéuca̱x naxümatüxü̃ ga Pauru 3:11 - Tupanaarü Ore

¹¹ Rü naxma̱xgü i ngẽma yatügü i diácunugü, rü name nax duü̃xü̃gü nüxü̃ ngechaü̃güxü̃ yaxĩgüxü̃. Rü tama name i oregüta̱xaxgüxü̃ nixĩgü, natürü tanaxwa̱xe i mea namaxẽ rü aixcüma nayanguxẽẽgü i guxü̃ma i ngẽma nüxü̃ yaxugüxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 3:11 Referans Kwoze

Popera ga Títoca̱x naxümatüxü̃ ga Pauru 2:3

Rü ngẽxgumarüxü̃ ta chanaxwa̱xe i mea cuyaxucu̱xẽgü i ngẽma ngexü̃gü i yáxü̃ nax mea Tupanape̱xewa namaxẽxü̃ca̱x. Rü tama name nax yaxoregüta̱a̱xgüxü̃, rü nangãxẽwa̱xegüxü̃. Rü name nixĩ i guxü̃ i duü̃xü̃güpe̱xewa mea namaxẽ.

Popera ga Títoca̱x naxümatüxü̃ ga Pauru 3:2

Rü tama name i texéchiga chixri nidexagü rü texémaxã nanue. Natürü name nixĩ i guxü̃ i duü̃xü̃gümaxã namecümagü, rü guxü̃ i duü̃xü̃güxü̃ nangechaü̃gü. Rü tama name i nügü nicua̱xüü̃gü.

Nüxíraxü̃xü̃ ga popera ga Timutéuca̱x naxümatüxü̃ ga Pauru 3:2

Rü yíxema yaxõgüxü̃arü ãẽ̱xgacü rü tanaxwa̱xe nax aixcüma mecü tixĩxü̃ nax taxúema tümachiga chixri idexaxü̃ca̱x. Rü tanaxwa̱xe i wüxixicatama tixĩ ya tümama̱x, rü aixcüma mea tamaxü̃, rü mexü̃gu tarüxĩnü, rü duü̃xü̃gü rü tüxü̃ nangechaü̃gü rü tümaga naxĩnüe. Rü tanaxwa̱xe i ítamemare nax duü̃xü̃güxü̃ tayaxuxü̃ i tümapatawa, rü ngẽxgumarüxü̃ ta ítamemare nax duü̃xü̃güxü̃ tangúexẽẽxü̃.

Nüxíraxü̃xü̃ ga popera ga Pedru ümatüxü̃ 5:8

Rü name nixĩ i guxü̃guma pegüna pedaugü rü ípexuãẽgü, erü perü uanü i Chataná rü ñoma wüxi ya leóü̃ ya idüraxüchicürüxü̃ nanañaane rü tümaca̱x nadau nax texéxü̃ tá chixexü̃gu nanguxẽẽxü̃.

Norü taxre ga popera ga Timutéuca̱x naxümatüxü̃ ga Pauru 3:3

Rü taxúexü̃ tá nangechaü̃gü, rü taxúe tá nüxü̃́ nangechaü̃tümüü̃gü. Rü tá naxoregüta̱a̱xgü, rü taxũtáma yáxna namaxã naxĩnüe i naxü̃nearü ngúchaü̃gü. Rü tá nichixecüma, rü tá naxchi naxaie i guxü̃ma i ngẽma mexü̃.

Ucu̱xẽgüchiga 10:18

Ngẽma idorata̱xáxü̃ rü tama nanango̱xẽxẽ ega ngẽxguma duü̃xẽchi naxaixgu, rü ngẽma tama naãẽxü̃ cuáxü̃ rü naxoregüta̱a̱x.

Norü taxre ga popera ga Timutéuca̱x naxümatüxü̃ ga Pauru 4:5

¡Natürü cuma rü mea cugüna nadau, rü ínaxuãxẽ! ¡Rü namaxã napora i ngẽxguma ngúxü̃ cuxca̱x ínguxgu! ¡Rü nüxü̃ ixuama i ngẽma ore i mexü̃ i tüxü̃ maxẽxẽxẽxü̃! ¡Rü mea yanguxẽxẽ i ngẽma puracü ya Tupana cuxna ãxü̃!

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:2

Rü ngẽxguma chi ngẽma mugüruü̃gü rü naxrüxü̃ yaxõgüxü̃maxã nacoriã̱xgügu, rü tama tanaxwa̱xe i ngẽma nax nügüenexẽgü yaxĩgüxü̃ca̱x nüxü̃ narüxoe nax nüxü̃ nangechaü̃güxü̃ i norü corigü. Natürü narümemae nax yexeraãcü mea naga naxĩnüexü̃ rü nüxü̃́ napuracüexü̃ erü norü corigü rü naxrüxü̃ yaxõgüxü̃ nixĩgü rü naenexẽgü ya Tupana nüxü̃ ngechaü̃güxü̃ nixĩgü. Pa Timutéux, chanaxwa̱xe i meama cunangúexẽxẽ i ngẽma cumaxã nüxü̃ chixuxü̃, rü guxü̃ma i yaxõgüxü̃pe̱xewa nüxü̃ quixu.

Nüxíraxü̃xü̃ ga popera ga Timutéuca̱x naxümatüxü̃ ga Pauru 1:12

Rü moxẽ nüxna chaxã ya Ngechuchu ya Cristu ya tórü Cori ya choxü̃ naporaxẽẽcü. Yerü choxü̃ nangugü nax norü duü̃xü̃ i mexü̃ chixĩxü̃. Rü yemaca̱x choxü̃ nayaxu nax nüxü̃́ chapuracüxü̃ca̱x.

Ore i mexü̃ ga Cuáü̃ ümatüxü̃ 6:70

Rü Ngechuchu nüxü̃ nangãxü̃, rü ñanagürü: —¿Taux ẽ̱xna choma yixĩxü̃ ga pexü̃ chidexechixü̃ ga pemax ga 12? Natürü petanüwa nangẽxma i wüxi i Chatanáarü duü̃xü̃ ixĩxü̃ —ñanagürü.

Ore i mexü̃ ga Matéu ümatüxü̃ 4:1

Rü yemawena rü Tupanaãxẽ ya Üünecü rü wüxi ga chianexü̃ ga ngextá taxúema íxãpataxü̃wa Ngechuchuxü̃ naga nax yéma Chataná nüxü̃ üxü̃ca̱x.

Echequié 44:22

Rü ngẽma chacherdótegü rü tama name nax wüxi i nge i yutecümaxã naxãmaxü̃ rüe̱xna wüxi i íta̱xtecümaxã. Natürü marü name i wüxi i nge i Iraétanüxü̃ i taguma yatüxü̃ cua̱xcümaxã naxãma rüe̱xna wüxi i nge i chacherdóte ngĩxna yucümaxã naxãma.

Yeremía 9:4

Rü wüxichigü i pema rü pegüna pedaugü nax tama pexü̃ nawomüxẽẽxü̃ca̱x i pemücü. Rü woo i peenexẽxü̃chi rü tama name i nüxü̃́ peyaxõgü. Erü guxü̃ma i ngẽma peenexẽgü rü nawomüxẽẽwa̱xegü. Rü guxü̃ma i pemücügü rü chixri pechiga nidexagü.

Ucu̱xẽgüchiga 25:13

Ngẽma orearü ngeruxü̃ i aixcüma norü coriga ĩnüxü̃, rü norü corixü̃ nataãẽxẽxẽ. Erü ngẽma orearü ngeruxü̃ rü ñoma wüxi ya buanecü nanaianeyane gáuxü̃maxã íngucürüxü̃ nixĩ.

Wiyaegü 101:5

Rü tá chayanangea̱xgüxẽxẽ i ngẽma duü̃xü̃gü i namücügüechita chixri tümachiga idexagüxü̃. Rü taxũtáma yáxna namaxã chaxĩnü i ngẽma duü̃xü̃gü i to̱xguã̱xétüwa nügü ügüxẽxẽchaü̃xü̃ rü ngẽma norü poramaxã nügü icua̱xüxü̃güxü̃.

Wiyaegü 50:20

Rü cuma rü chixri nachiga quidexa ya cumücü. Rü yimá cuenexẽxü̃chi rü namaxã cuguxchiga.

Wiyaegü 15:3

rü tama texéchiga chixri idexaxe, rü taxuxü̃ma chixexü̃ tümamücümaxã ǘxe, rü tama chixexü̃ i oremaxã tümamücüxü̃ nga̱xe,

Lebítanüxü̃arü puracüchiga 21:7

Rü ngẽma chacherdótegü rü tama name nax wüxi i ngexü̃ i naxü̃nemaxã taxexü̃maxã naxãmaxü̃, rü woo wüxi i ngecü i yatüxü̃ ngĩxü̃ yauxmareãcü ngĩxü̃ne cuáxcümaxã naxãmaxü̃, rüe̱xna wüxi i ngecü i íta̱xtecümaxã naxãmaxü̃, erü nümagü i ngẽma chacherdótegü rü Tupana nüxü̃ naxunetagü nax norü puracü naxügüxü̃ca̱x.

Romanos 1:29

Rü düxwa ga yema duü̃xü̃gü rü guxü̃raü̃xü̃ ga chixexü̃gu narüxĩnüe. Rü tama aixcüma mea naxma̱xmaxã rü natemaxã namaxẽ. Rü naxaü rü nügüna nananugüchaü̃ i guxü̃ma. Rü chixexü̃gu namaxẽ. Rü nixãũxãchiwa̱xegü, rü namáetagü, rü nanuewa̱xegü, rü nawomüxẽẽwa̱xegü, rü naxü̃nearü ngúchaü̃ nüxü̃ napora, rü Taxúegama naxĩnüe, rü nixoregüta̱a̱xgü.