Nüxíraxü̃xü̃ ga popera ga Pedru ümatüxü̃ 4:17 - Tupanaarü Ore

¹⁷ Rü ñu̱xma rü marü nawa nangu nax Tupana tüxna ca̱xaxü̃ i yixema nax naxacügü ixĩgüxü̃. Rü ngẽxguma tawa inaxügüãgu, rü ¿ñuxãcü tá nüxü̃ naxüpetü i ngẽma duü̃xü̃gü i tama naga ĩnüexü̃ i Tupanaarü ore i mexü̃?

Nüxíraxü̃xü̃ ga popera ga Pedru ümatüxü̃ 4:17 Referans Kwoze

Yeremía 25:29

Rü tá ichanaxügü nax chorü ĩane ya Yerucharéü̃ca̱x íchananguxẽxẽxü̃ i poxcu. ¿Rü pema nagu perüxĩnüegu rü taxũtáma pexü̃ chapoxcue? Natürü aixcüma tá pepoxcue, erü guxü̃ma i ñoma i naanewa maxẽxü̃ i duü̃xü̃güca̱x tá íchananguxẽxẽ i dai. Rü chomatama ya Cori ya Tupana ya Guxãétüwa Ngẽxmacü nixĩ i nüxü̃ chixuxü̃ i ngẽma!’ ” ñanagürü.

2 Tesalonicenses 1:8

Rü núma tá naxũ i nüma ya tórü Cori ya Ngechuchu nax napoxcueãxü̃ca̱x i ngẽma duü̃xü̃gü i tama Tupanaxü̃ cua̱xgüchaü̃xü̃ rü tama naga ĩnüexü̃ i ngẽma ore i mexü̃ i tórü Cori ya Ngechuchu ya Cristuchiga.

Echequié 9:6

¡Rü chopata ya taxü̃newa tá ipenaxügü nax penadaixü̃ rü guxü̃táma pedai rü yaxguã̱xgü, rü ngextü̱xüxü̃gü, rü paxü̃gü, rü buxü̃gü, rü ngexü̃gü! ¡Natürü taxũtáma nüxü̃ pedau i ngẽma ãégacatüxü̃! —ñanagürü. Rü yemaacü inanaxügüe nax nadaiaxü̃ ga yema ãẽ̱xgacügü ga yaxguã̱xgü ga Iraétanüxü̃maxã icua̱xgüxü̃.

Nüxíraxü̃xü̃ ga popera ga Pedru ümatüxü̃ 2:8

Rü Tupanaarü ore rü ñanagürü ta: “Ngẽma tama yaxõgüxü̃ rü yimá nutagu tá nayarüpucutügü”, ñanagürü. Rü ngẽmaãcü i ngẽma tama yaxõgüxü̃ rü tá napoxcue, erü tama nanayauxgü i ngẽma ore ya Ngechuchu ya Cristuchiga ixĩxü̃.

Romanos 2:9

Rü guxü̃ma i ngẽma duü̃xü̃gü i chixexü̃ ügüxü̃ rü tá ngúxü̃ ningegü rü poraãcü tá guxchaxü̃wa nangẽxmagü. Rü ngẽma Yudíugü i chixexü̃ ügüxü̃xíra tá nixĩ ya Tupana poxcuexü̃. Rü ngẽxgumarüxü̃ tá ta napoxcue i ngẽma tama Yudíugü ixĩgüxü̃ i chixexü̃ ügüxü̃.

Ore i mexü̃ ga Luca ümatüxü̃ 23:31

Rü ñu̱xma nax ñaa chixexü̃ chomaxã naxügüxü̃ woo taxuxü̃ma i chixexü̃ chaxüchiréxü̃, ¿rü ñuxãcü tá namaxã nachopetü i ngẽma duü̃xü̃gü i aixcüma chixexü̃ ügüxü̃? —ñanagürü ga Ngechuchu.

Maraquía 3:5

Rü nüma ya Cori ya Tupana ya Guxãétüwa Ngẽxmacü rü ñanagürü: —Choma rü tá aixcüma pexna chaca i perü chixexü̃ca̱x. Rü chomatátama nüxü̃ chixugüe i ngẽma yuüexü̃, rü ngẽma nai i ngexü̃maxã maxẽxü̃, rü ngẽma doramaxã nügü ípoxü̃xü̃, rü ngẽma norü puracütanüxü̃maxã rü ngẽma yutegüxemaxã, rü ngẽma taxcutagümaxã chixri icua̱xgüxü̃. Rü ngẽxgumarüxü̃ tá ta nüxü̃ chixugüe i ngẽma chixri tümamaxã icua̱xgüxü̃ ya duü̃xẽgü ya to i nachixü̃anecüã̱xgü, rü ngẽma tama chauga ĩnüexü̃ —ñanagürü.

Amúx 3:2

Rü ñanagürü: —Dücax, rü natanüwa i guxü̃ma i duü̃xü̃gü i ñoma i naanewa maxẽxü̃ rü pexü̃xicatama nixĩ ga chaxunetaxü̃ nax chorü duü̃xü̃gü pixĩgüxü̃ca̱x. Rü ngẽmaca̱x yexeraãcü tá pexna naxca̱x chaca i guxü̃ma ga yema chixexü̃ ga pexügüxü̃.

Ichaía 10:12

Rü ngẽxguma Cori ya Tupana yanguxẽẽgu i ngẽma poxcu naxca̱x i ngẽma duxü̃xü̃gü i ma̱xpǘne ya Chióü̃wa maxẽxü̃ rü yima ĩane ya Yerucharéü̃wa maxẽxü̃, rü tá Achíriaanearü ãẽ̱xgacüxü̃ napoxcu naxca̱x nax nügü ínataxü̃ rü nügü yacua̱xüxü̃xü̃.

Popera ga Yudíugü ga yaxõgüxü̃ca̱x ümatüxü̃ 5:9

Rü yemaacü Tupanaga naxĩnü rü curuchagu nayu nax tümaarü maxẽxẽẽruxü̃ yixĩxü̃ca̱x ya guxãma ya yíxema naga ĩnüexe.

Popera ga Yudíugü ga yaxõgüxü̃ca̱x ümatüxü̃ 2:4

Rü nümatama ga Tupana rü ta taxca̱x nanango̱xẽxẽ nax aixcüma yixĩxü̃ i Cristugagu tüxü̃́ nangẽxmaxü̃ i ngẽma maxü̃. Yerü nüma ga Tupana rü Naãxẽ ya Üünexü̃wa tüxü̃ nanawe̱x ga naguxü̃raü̃xü̃ ga taxü̃ ga mexü̃gü rü cua̱xruxü̃gü ga norü poramaxã naxüxü̃ yema nüma nanaxwa̱xexü̃ãcüma.

Popera ga Yudíugü ga yaxõgüxü̃ca̱x ümatüxü̃ 2:2

Rü yexguma tauta Nane ya Cristuxü̃ núma namuxgu ga Tupana, rü norü orearü ngeruü̃gü ga daxũcüã̱xgüwa duü̃xü̃gümaxã nüxü̃ nixu ga norü mugü nax naga naxĩnüexü̃ca̱x. Rü yema mugü rü aixcüma napora yerü guxü̃ma ga yema tama naga ĩnüexü̃, rü yema mugü nüxü̃ ixuxü̃ãcüma Tupana nanapoxcue.

Gálatas 5:7

Pema rü meama ipenaxügü nax Cristuwe perüxĩxü̃. ¿Rü texé pexü̃́ nüxü̃ taxoo̱x nax tama naga pexĩnüexü̃ca̱x i ngẽma ore i aixcüma ixĩxü̃?

Popera ga Yudíugü ga yaxõgüxü̃ca̱x ümatüxü̃ 11:8

Rü gumá tórü o̱xi ga Abraáü̃, rü Tupanaaxü̃́ nayaxõ. Rü yexguma Tupana naxca̱x caxgux rü naga naxĩnü rü ínaxũxü̃ nawa ga yema naane ga nawa nayexmaxü̃ nax nawa naxũxü̃ca̱x ga yema naane ga Tupana nüxna ãxü̃ nax noxrü yixĩxü̃ca̱x. Rü yemaacü ga Abraáü̃ rü ínaxũxü̃ ga yema naane ga nawa nayexmaxü̃ woo tama nüxü̃ nax nacuáxü̃ ga ngextá tá nax naxũxü̃.

Gálatas 3:1

Pa Chauenexẽgü i Gárataanecüã̱x, pema rü tama peãẽxü̃ pecua̱x. Rü yexguma petanüwa tayexmagügu rü meama guxãpe̱xewa pemaxã nüxü̃ tixu nax curuchagu taxca̱x nayuxü̃ ga Ngechuchu ya Cristu. ¿Rü texé pexü̃ tawomüxẽxẽ i ñu̱xma nax tama naga pexĩnüexü̃ca̱x i ngẽma ore i aixcüma ixĩxü̃ ga pemaxã nüxü̃ tixuxü̃?

Yeremía 49:12

Erü choma ya Cori ya Tupana rü ñachagürü: “Nayexma ga duü̃xü̃gü ga tama poxcu namaxã chaxueguxü̃ natürü tá napoxcueama. ¿Rü ñuxãcü nagu perüxĩnüe nax ngẽma poxcuxcha̱xwa tá pibuxmüxü̃? Rü pemaxã nüxü̃ chixu rü aixcüma tá pepoxcue.

Romanos 1:1

Pa Chauenexẽgüx rü Pa Chaueya̱xgü ya Rómacüã̱xgüx, choma i Pauru nixĩ i pexca̱x chanaxümatüxü̃ i ñaa popera. Rü choma nixĩ ya Ngechuchu ya Cristuarü duü̃xü̃ chixĩxü̃. Rü choxü̃ nixĩ ga nayaxuxü̃ nax choxü̃ yamuxü̃ca̱x nax duü̃xü̃gümaxã nüxü̃ chixuxü̃ca̱x i norü ore i mexü̃.

Gálatas 6:10

Rü ngẽmaca̱x ngẽxguma tüxü̃́ natauxchagu nax ta̱xacümaxã togüxü̃ rüngü̃xẽẽxü̃, rü name nixĩ i guxãxü̃ma tarüngü̃xẽxẽ. Natürü yexera tanaxwa̱xegü nax nüxü̃ rüngü̃xẽẽgüxü̃ i ngẽma taenexẽgü rü taeya̱xgü i yaxõgüxü̃.

Popera ga Yudíugü ga yaxõgüxü̃ca̱x ümatüxü̃ 3:6

Natürü nüma ya Ngechuchu rü Moichéarü yexera nixĩ erü Tupana Nanexü̃chi nixĩ. Rü nüma nixĩ i nüxna nadauxü̃ i guxü̃ma i ngẽma Tupanaarü duü̃xü̃gü ixĩgüxü̃. Rü yixema rü ta rü Tupanaarü duü̃xü̃gü tixĩgü ega aixcüma Ngechuchuaxü̃́ yaxõgügu rü taguma nüxü̃ rüxoegu. Rü Tupana nanaxwa̱xe nax guxü̃guma Ngechuchumaxã itaãẽgüxü̃ erü nüxü̃ tacua̱x nax wüxi i ngunexü̃ rü tá taxca̱x nataeguxü̃ nax wüxiwa namaxã ingexmagüxü̃ca̱x.

Nüxíraxü̃xü̃ ga popera ga Pedru ümatüxü̃ 2:5

Rü ngẽxgumarüxü̃ ta i pemax, rü Tupana pexü̃ nade nax napataarü nutagü ya maxẽcü pixĩgüxü̃. Rü pema nixĩ i Tupanaarü ngü̃xẽẽruü̃gü i üünexü̃ ya Ngechuchu ya Cristuégagu Tupanana ãmare pexãgüxü̃. Rü ngẽma ãmare i nüxna pexãgüxü̃ i namaxã nataãẽxü̃ rü ngẽma nixĩ i perü maxü̃.