Nüxíraxü̃xü̃ ga popera ga Pedru ümatüxü̃ 2:24 - Tupanaarü Ore

²⁴ Rü nümatama ga Cristu rü nügüxü̃negu nayange ga tórü pecadugü ga yexguma curuchagu nayu̱xgu. Rü yemaacü nanaxü nax nüxü̃ rüxoexü̃ca̱x i tórü chixexü̃ rü naxca̱xicatama imaxẽxü̃ca̱x. Nüma rü pexca̱x nanapi̱x nax yemaacü pexü̃ nameexẽẽxü̃ca̱x.

Nüxíraxü̃xü̃ ga popera ga Pedru ümatüxü̃ 2:24 Referans Kwoze

Ore i mexü̃ ga Matéu ümatüxü̃ 8:17

Rü yemaacü Ngechuchu nayanguxẽxẽ ga yema ore ga nũxcümaü̃cü ga Tupanaarü orearü uruxü̃ ga Ichaía nüxü̃ ixuxü̃ ga ñaxü̃: “Nüma rü tüxü̃ naporaexẽxẽ i ngẽxguma ituraegu, rü tüxü̃ narümeexẽxẽ i ngẽxguma ida̱xaweegu”, ñaxü̃.

Romanos 6:11

Rü ngẽxgumarüxü̃ ta i pema rü name nixĩ i pegügu perüxĩnüe nax marü pecaducha̱xwa peyuexü̃ rü Tupanaca̱x pemaxẽxü̃, erü Ngechuchu ya Cristuarü duü̃xü̃gü pixĩgü.

Yema Cuáü̃ nüxü̃ dauxü̃ i yixcüra tá ngupetüxü̃chiga 22:2

Rü guma ĩanearü ngãxü̃gu idaxü̃ ga namaarü ngãxü̃gu nida ga yema natü. Rü nacutügüwa narüxü ga yima nai ga maxẽẽruxü̃. Rü yema nai rü wüxichigü ga tauemacügu naxo, rü yemaacü 12 e̱xpü̱xcüna naxo ga wüxichigü ga taunecügu. Rü naatügü ga yema nai, rü guxü̃ i nachixü̃anegüca̱x üxüxü̃ruxü̃ nixĩ.

Nüxíraxü̃xü̃ ga popera ga Cuáü̃ ümatüxü̃ 2:29

Pema nüxü̃ pecua̱x nax Cristu rü aixcüma mecü yixĩxü̃. Rü ngẽxgumarüxü̃ ta name nixĩ nax nüxü̃ pecuáxü̃ nax guxü̃ma i duü̃xü̃gü i aixcüma mexü̃ ügüxü̃ rü Tupanaxacügü nax yixĩgüxü̃.

Popera ga Chantiágu ümatüxü̃ 5:16

Rü ngẽmaca̱x name nixĩ i pegümaxã nüxü̃ pixu i perü pecadugü rü pegüca̱x peyumüxẽgü nax pexca̱x yataanegüxü̃ca̱x. Rü yimá mecü ya yatüarü yumüxẽ rü aixcüma napora rü taxü̃ i mexü̃ nawa ínanguxuchi.

Gálatas 3:13

Natürü ga Cristu rü nawa tüxü̃ ínanguxü̃xẽxẽ ga yema mugü ga chixexü̃gu tüxü̃ yixẽẽxü̃. Rü nüma ga Cristu rü chixexü̃wa nügü nayexmaxẽxẽ ga yexguma curuchagu nayu̱xgu. Erü Tupanaarü ore i ümatüxü̃wa, rü ñanagürü: “Rü guxãma ya yíxema wüxi i naiwa tüxü̃ natuxẽẽgüãcüma yuxe, rü chixexü̃wa tangexma”, ñanagürü.

Romanos 6:2

Rü dücax, tama ngẽmaãcü nixĩ. Erü ñu̱xma pecaducha̱xwa rü ñoma iyuexü̃rüxü̃ tixĩgü, erü marü tama naga taxĩnüe. Rü ngẽmaca̱x tama name i yeü̃cürü pecadu taxügüecha.

Ichaía 53:11

Natürü nawena nax ngúxü̃ yangexü̃, rü tá nataãxẽ erü nüxü̃ nacua̱x nax norü yugagu muxü̃ma i duü̃xü̃gü tá nanayauxgü i maxü̃ i taguma gúxü̃. Rü nüma ya Cori ya Tupanaarü duü̃ ya mecü rü tá Tupanape̱xewa nayamexẽxẽ i muxü̃ma i duü̃xü̃gü rü tá nayange i norü pecadugü.

Colosenses 3:3

Yerü yema nũxcümaü̃xü̃ ga perü maxü̃ rü marü nayu. Rü ñu̱xma rü Cristugagu Tupana pexna nanaxã i maxü̃ i ngexwaca̱xü̃xü̃.

Romanos 6:13

Rü tama name i pecaduna penaxãgü i pexene nax ngẽmamaxã chixexü̃ pexügüxü̃ca̱x. Rü name nixĩ i Tupanana pegü pexãgü, erü ñoma duü̃xü̃gü i yuexü̃ rü wena maxẽxü̃rüxü̃ pixĩgü. Rü ngẽmaca̱x name nixĩ i Tupanana penaxãgü i pexene nax ngẽmamaxã nape̱xewa mexü̃ pexügüxü̃ca̱x.

Ore i mexü̃ ga Cuáü̃ ümatüxü̃ 1:29

Rü moxü̃ãcü ga Cuáü̃ rü Ngechuchuxü̃ nadau ga naxca̱x nax yaxũxü̃. Rü ñanagürü ga Cuáü̃: —¡Dücax! Daa nixĩ ya yimá Tupanaarü Carnéruxacü ya núma namuãcü nax yanaxoxẽẽãxü̃ca̱x i ñoma i naanecüã̱x i duü̃xü̃güarü pecadugü.

Romanos 7:6

Natürü i ñu̱xma rü marü tama ngẽma mugütüü̃wa tangexmagü, erü Tupana rü marü nüxna tüxü̃ ínanguxü̃xẽxẽ. Rü ngẽmaca̱x i ñu̱xma rü ñoma duü̃xü̃gü i iyuexü̃rüxü̃ tixĩgü nape̱xewa i ngẽma mugü, erü marü tama tamaxã inacua̱x. Rü ñu̱xma rü marü nüxna ítanguxü̃ i ngẽma mugü nax Tupanaarü ngúchaü̃ ixügüxü̃ca̱x rü naxca̱x nax imaxẽxü̃ca̱x namaxã i tórü maxü̃ i ngexwaca̱xü̃xü̃ i Naãxẽ ya Üünexü̃ tüxna ãxü̃.

Nüxíraxü̃xü̃ ga popera ga Cuáü̃ ümatüxü̃ 3:7

Pa Chauxacügüx, ¡taxṹ i naga pexĩnüexü̃ i ngẽma duü̃xü̃gü i pexü̃ womüxẽẽgüchaü̃xü̃! Yíxema mexü̃ ǘxe rü aixcüma mecü tixĩ, ngẽxgumarüxü̃ ya Cristu nax aixcüma mecü yixĩxü̃rüxü̃.

Wiyaegü 147:3

Rü nüma rü tüxü̃ nataãẽxẽxẽ ya yíxema poraãcü ngechaü̃ ingegüxe rü tüxü̃́ nayana̱i̱xgü i tümaarü o̱xrigü.

Romanos 6:7

Erü yíxema yuxe rü marü tama pecadutüü̃wa tangexma nax yeü̃cürü pecadu taxüechaxü̃ca̱x.

Romanos 6:16

Rü pema rü meama nüxü̃ pecua̱x rü ngẽxguma wüxi i corime̱xẽwa pegü pengẽxmagüxẽẽgu nax naga pexĩnüexü̃ca̱x rü pema rü norü mugüruxü̃ tá pixĩgü i ngẽma cori i naga pexĩnüexü̃. Rü ngẽxgumarüxü̃ ta nixĩ ega naga pexĩnüegu i ngẽma pecadu i yuwa pexü̃ gagüxü̃ rüe̱xna naga pexĩnüegu ya Tupana nax nape̱xewa pimexü̃ca̱x.

2 Corintios 6:17

Rü yemaca̱x ñanagürü ta ga tórü Cori: “¡Ípechoxü̃ i natanüwa i ngẽma duü̃xü̃gü i tama chorü duü̃xü̃gü ixĩgüxü̃! ¡Rü taxṹ i nüxü̃ pingógüxü̃ i ngẽma chope̱xewa ãũãchixü̃! Rü choma rü tá pexü̃ chayaxu.

Ngechuchuarü ngúexü̃gü ga yamugüxü̃arü puracüchiga 5:30

Gumá Tupana ga nũxcümaü̃güxü̃ ga tórü o̱xigü nüxü̃́ yaxõgücü, rü gumá nixĩ ga wena namaxẽxẽcü ga Ngechuchu ga pema peyamácü ga yexguma curuchawa peyapotagügu.

Ore i mexü̃ ga Luca ümatüxü̃ 4:18

“Cori ya Tupanaãxẽ rü chowa nangẽxma. Rü nüma rü choxü̃ naxuneta nax nüxü̃ chixuxü̃ca̱x i ore i mexü̃ namaxã i ngẽma duü̃xü̃gü i ngearü diẽruã̱xgüxü̃. Rü choxü̃ namu nax yema duü̃xü̃gü ga norü uanügü to ga nachixü̃anewa gagüxü̃maxã nüxü̃ chixuxü̃ca̱x rü tá nax ínanguxü̃xü̃. Rü choxü̃ namu nax ngẽma ingexetügüxü̃ chidauuchixẽẽxü̃ca̱x rü nax íchananguxü̃xẽẽxü̃ca̱x i ngẽma duü̃xü̃gü i togüme̱xẽwa ngẽxmagüxü̃.

Ore i mexü̃ ga Matéu ümatüxü̃ 5:20

Rü pemaxã nüxü̃ chixu, rü ngẽxguma tama Parichéugüxü̃ perüyexeragu rü tama mugüwa ngu̱xẽẽtaegüxü̃xü̃ perüyexeragu nax Tupanaga pexĩnüexü̃, rü tagutáma Tupana íngẽxmaxü̃wa pichocu.

Maraquía 4:2

Natürü i pemax nax aixcüma choxü̃ pengechaü̃güxü̃ rü chaucüma tá meama pewa nango̱x ñoma üa̱xcü nangóanexẽẽxü̃rüxü̃ rü taãxẽ ixãxü̃rüxü̃. Rü pemax rü taãẽmaxã tá piyuxnagütanü ñoma wocaxacügü naxpüü̃wa iyayi̱xü̃rüxü̃.

Popera ga Yudíugü ga yaxõgüxü̃ca̱x ümatüxü̃ 12:13

Rü name nixĩ i naxca̱x pedaugü i ngẽma maxü̃ i meama iwéxü̃ nax pema i ñu̱xma tama mea yaxõgüxe tama nüxna ípechocuxü̃ca̱x i ngẽma nama i mexü̃wa pexü̃ gagüxü̃.

Ngechuchuarü ngúexü̃gü ga yamugüxü̃arü puracüchiga 13:29

Rü yexguma yanguxgu ga guxü̃ma ga yema ore ga Tupanaarü orearü uruü̃gü ümatüxü̃ ga Ngechuchuchiga, rü nanayauxgü ga naxü̃ne ga curuchawa, rü wüxi ga naxmaxü̃gu nayanaxücuchigü.

Ngechuchuarü ngúexü̃gü ga yamugüxü̃arü puracüchiga 10:35

Rü nüma rü wüxichigü i nachixü̃anewa nanade i ngẽma duü̃xü̃gü i naga ĩnüexü̃ rü mexü̃ ügüxü̃.

Popera ga Yudíugü ga yaxõgüxü̃ca̱x ümatüxü̃ 7:26

Rü ñu̱xma rü Ngechuchu rü Chacherdóte ya Guxü̃étüwa Ngẽxmacü nixĩ ya inaxwa̱xecü. Erü nüma rü aixcüma naxüüne, rü nawa nataxuma i chixexü̃, rü nangearü pecaduã̱x, rü taguma duü̃xü̃gürüxü̃ pecadu naxü. Rü nüma nixĩ i daxũguxü̃ i naaneétüwa ngẽxmaxü̃ rü namaxã inacuáxü̃.

Colosenses 2:20

Rü pema rü ñu̱xma nax Cristuaxü̃́ peyaxõgüxü̃ rü marü tama name nax naga pexĩnüexü̃ i ngẽma Yudíugüarü mugü. ¿Rü tü̱xcüü̃ nixĩ i ñoma i naanecüã̱xrüxü̃ nagu pemaxẽxü̃ i ngẽma Yudíugücümagü?

Romanos 6:22

Natürü ñu̱xma nax ngẽma pecaduna ípenguxü̃xü̃ rü marü Tupanaarü duü̃xü̃gü pixĩgü rü naxca̱x nixĩ i pemaxẽxü̃. Rü ngẽma nixĩ i aixcüma pexü̃́ mexü̃ erü ngẽmagagu penayaxu i maxü̃ i üünexü̃ i ñu̱xma, rü ngẽmawena tá penayaxu i maxü̃ i taguma gúxü̃.

Ngechuchuarü ngúexü̃gü ga yamugüxü̃arü puracüchiga 10:39

Rü toma nixĩ ga nüxü̃ tadaugüxü̃ rü nüxü̃ tixuchigaxü̃ i guxü̃ma ga yema naxüxü̃ ga Ngechuchu ga Yudéaanewa rü Yerucharéü̃arü ĩanewa. Rü yemawena rü curuchawa nayapotagü rü nayama̱xgü.

Ore i mexü̃ ga Matéu ümatüxü̃ 27:26

Rü yexguma ga Pirátu rü Barabáxü̃ ínanguxuchixẽxẽ. Rü ñu̱xũchi norü churaragüxü̃ namu nax Ngechuchuxü̃ nacua̱i̱xgüxü̃ca̱x, rü yemawena curuchawa nax yanapotagüãxü̃ca̱x.

Wiyaegü 38:4

Rü ngẽma chorü pecadugü rü nayaxüchi rü chauétügu nangu rü tama namaxã chapora.

Lebítanüxü̃arü puracüchiga 16:22

Rü ngẽma chianexü̃gu tá inayarütaxu i ngẽma chíbu namaxã i guxü̃ma i Iraétanüxü̃arü chixexü̃gü.

Ínachoxü̃xü̃chiga 28:38

Rü ngẽmaãcü guxü̃gutáma Aróü̃catüwa nangẽxma. Rü Aróü̃ tá nayange i ngẽma Iraétanüxü̃arü pecadugü i chope̱xewa naxügüxü̃. Natürü ngẽxguma Iraétanüxü̃arü pecadugüca̱x ãmaregü choxna naxãxgu i Aróü̃, rü choma rü tá nüxü̃ chadau i ngẽma úirutachinü rü tá chanayaxu i norü ãmaregü rü tá nüxü̃ icharüngüma i norü pecadugü.

Efesios 5:9

Erü ngẽma ngóonexü̃ nixĩ i nango̱xẽẽxü̃ i ngẽma mecüma, rü ngẽma we̱xguxü̃, rü ngẽma aixcüma ixĩxü̃.

Ore i mexü̃ ga Cuáü̃ ümatüxü̃ 19:1

Rü yexguma ga Pirátu rü churaragüxü̃ namu nax Ngechuchuxü̃ nacua̱i̱xgüxü̃ca̱x.

Iraétanüxü̃arü muxchiga 18:22

Rü ngẽma togümare i Iraétanüxü̃ rü tama name nax chopatana nangaicamagüxü̃ erü ngẽxguma nüxna nangaicamagügu rü pecadu naxügü erü tama chauga naxĩnüe. Rü tá nayue.

Lebítanüxü̃arü puracüchiga 22:9

Rü namaxã nüxü̃ ixu i ngẽma chacherdótegü nax yanguxẽẽgüãxü̃ca̱x i chorü mugü. Rü ngẽxguma mea naga naxĩnüegu rü taxuxü̃táma nayue nagagu nax naxãũãchixẽẽãxü̃ i chorü ãmaregü. Erü choma ya Cori ya Tupana nixĩ i chorü puracü i üünexü̃ca̱x nüxü̃ chaxunetaxü̃ i chacherdótegü.

Filipenses 1:11

Rü naxca̱x íchaca nax Ngechuchu ya Cristu pexü̃ rüngü̃xẽẽxü̃ca̱x nax aixcüma namexü̃ca̱x i perü maxü̃ rü aixcüma penaxüxü̃ca̱x i ngẽma Tupanape̱xewa mexü̃ nax ngẽmaãcü Tupanaga pexĩnüexü̃ca̱x rü nüxü̃ picua̱xüü̃güxü̃ca̱x.

Ore i mexü̃ ga Márcu ümatüxü̃ 15:15

Rü yexguma ga Pirátu rü Barabáxü̃ ínanguxuchixẽxẽ, yerü duü̃xü̃güxü̃ nataãẽxẽẽchaü̃. Rü ñu̱xũchi norü churaragüxü̃ namu nax Ngechuchuxü̃ nacua̱i̱xgüxü̃ca̱x rü ñu̱xũchi curuchawa yanapotagüãxü̃ca̱x.

Ucu̱xẽgüchiga 20:30

Ngẽma chixexü̃ i nacüma rü cuaxi i nawa rüpíxü̃maxã inarüwe̱xãchi. Rü ngẽma cua̱xi rü naxca̱x nayataanexẽxẽ i norü maxü̃.

1 Corintios 15:3

Rü yexguma noxri petanüwa changuxgu, rü yema nüxíra pexü̃ changu̱xẽẽxü̃ nixĩ ga yema ngu̱xẽẽtae ga choxü̃ namaxã nangu̱xẽẽgüxü̃ nax Cristu rü tórü pecaduca̱x nayuxü̃, ngẽma Tupanaarü ore i ümatüxü̃wa nüxü̃ yaxuxü̃rüxü̃.

Colosenses 2:14

Rü yexguma Cristu curuchagu yu̱xgu nixĩ ga Tupana yexma yanaxoxẽẽxü̃ ga yema mugü ga Moiché ümatüxü̃ ga guxchaxü̃ tamaxã üxü̃. Rü Tupana rü yemaacü nayanaxoxẽxẽ ga yema mugü ga yexguma curuchawa yapotagüãgu

Popera ga Yudíugü ga yaxõgüxü̃ca̱x ümatüxü̃ 10:5

Rü yemaca̱x ga Cristu ga yexguma ñoma ga naanewa naxũxgu, rü Tupanaxü̃ ñanagürü: “Tama cunaxwa̱xe nax ãmaregü i naxü̃nagü cuxca̱x nada̱i̱xü̃ nax naxütanügüãxü̃ca̱x i pecadugü. Natürü choxna cunaxã i wüxi i chaxune nax ngẽma ichaxãxü̃ca̱x.

Popera ga Yudíugü ga yaxõgüxü̃ca̱x ümatüxü̃ 10:10

Rü ñu̱xma rü Cristugagu Tupanape̱xewa time, yerü nüma ga Cristu rü Tupanaarü ngúchaü̃ naxü ga yexguma nügü inaxãxgu nax curuchagu nayuxü̃ca̱x. Rü nüma rü wüxicanatama pecaduarü ütanüca̱x nayu rü taxuca̱xma tü̱xcüü̃ wena nügü inaxã.

Naanearü ügüchiga 22:6

Rü Abraáü̃ nanayauxcüta ga üxü ga Tupanaca̱x ãmare tá nawa yaguxü̃ rü Ichaáétügu nanaxǘnagücüta. Rü ñu̱xũchi ngĩxü̃ nayaxu ga cüxchi rü wüxi ga üxü ga naixü̃ne. Rü wüxigu guma ma̱xpǘnewa naxĩ.

Iraétanüxü̃arü muxchiga 7:15

Rü inanamu ta ga wüxi ga wocaxacü ga yatüxü̃, rü wüxi ga carnéru ga yatüxü̃, rü wüxi ga carnéruxacü ga yatüxü̃ ga wüxi ga taunecü nüxü̃́ yexmaxü̃ nax Tupanaarü ãmarexü̃ ínaguãxü̃ca̱x.