Nüxíraxü̃xü̃ ga popera ga Pedru ümatüxü̃ 1:10 - Tupanaarü Ore

¹⁰ Rü nũxcüma ga yema Tupanaarü orearü uruü̃gü rü poraãcü nangúe rü naxca̱x nadaugü i ngẽma maxü̃ i taguma gúxü̃. Rü nüxü̃ nixugüe nax ñuxãcü Tupana norü ngechaü̃gagu tá pexna naxãxü̃ i ngẽma maxü̃ i taguma gúxü̃.

Nüxíraxü̃xü̃ ga popera ga Pedru ümatüxü̃ 1:10 Referans Kwoze

Ore i mexü̃ ga Matéu ümatüxü̃ 13:17

Rü aixcüma pemaxã nüxü̃ chixu rü muxũchixü̃ ga Tupanaarü orearü uruü̃gü rü muxũchixü̃ ga duü̃xü̃gü ga imecümaxü̃, rü nüxü̃ nadaugüchaü̃ i ngẽma ñu̱xma chauxü̃tawa nüxü̃ pedaugüxü̃. Natürü tama nüxü̃ nadaugü. Rü nüxü̃ naxĩnüechaü̃ i ngẽma ore i ñu̱xma chauxü̃tawa nüxü̃ pexĩnüexü̃. Natürü tama nüxü̃ naxĩnüe —ñanagürü.

Ore i mexü̃ ga Luca ümatüxü̃ 10:24

Erü pemaxã nüxü̃ chixu, rü muxü̃ma ga nũxcümaü̃güxü̃ ga Tupanaarü orearü uruü̃gü rü nachixü̃anegüarü ãẽ̱xgacügü, rü nüxü̃́ nangúchaü̃ nax nüxü̃ nadaugüxü̃ i ñaa ñu̱xma pema chauxü̃tawa nüxü̃ pedaugüxü̃. Natürü tama nüxü̃ nadaugü. Rü nüxü̃́ nangúchaü̃ nax nüxü̃ naxĩnüexü̃ i ñaa ñu̱xma pema chauxü̃tawa nüxü̃ pexĩnüexü̃. Natürü tama nüxü̃ naxĩnüe —ñanagürü.

Ngechuchuarü ngúexü̃gü ga yamugüxü̃arü puracüchiga 7:52

Rü perü o̱xigü rü chixri namaxã inacua̱xgü ga guxü̃ma ga Tupanaarü orearü uruü̃gü. Rü nanadai ga yema orearü uruü̃gü ga nüxü̃ ixuchigagüxü̃ nax núma tá naxũxü̃ ga gumá mecü ya Ngechuchu. Rü yexguma ínanguxgu ga gumá Ngechuchu rü pema rü Pirátupe̱xewa ípenaxuaxü̃ rü peyama̱x.

Ore i mexü̃ ga Cuáü̃ ümatüxü̃ 5:39

Pema meama nawa pengúe i Tupanaarü ore i ümatüxü̃, erü nagu perüxĩnüe rü ngẽmawa tá nüxü̃ ipeyangau i perü maxü̃ i taguma gúxü̃. Natürü woo ngẽmatama Tupanaarü ore i ümatüxü̃wa rü chauchiga mea nax yadexaxü̃, natürü i pemax, rü tama choxü̃́ peyaxõgüchaü̃ nax ngẽmaãcü penayauxgüxü̃ca̱x i ngẽma maxü̃.

Danié 2:44

Rü ngẽma ãẽ̱xgacügü rü ñoma i naanemaxã icua̱xgüguyane rü nüma ya Tupana ya daxũwa ngẽxmacü rü tá nayamucuchi i wüxi i ãẽ̱xgacü i tagutáma texé iyanaxoxẽẽcü rü tagutáma to i nachixü̃ane nüxü̃ rüyexeracü. Rü nüma rü tá inayanaxoxẽxẽ i guxü̃táma i ngẽma togü i ãẽ̱xgacügüarü ĩnü rü ngẽmaãcü i nüma rü guxü̃gutáma ãẽ̱xgacü nixĩ.

Popera ga Yudíugü ga yaxõgüxü̃ca̱x ümatüxü̃ 11:13

Natürü nümagü ga Abráü̃ rü Ichaá rü Acóbu rü nayue, rü tama nüxü̃ nadaugü ga guxü̃ma ga yema Tupana namaxã ixunetaxü̃. Natürü Tupanaaxü̃́ nayaxõgü, rü yemaca̱x yáxü̃wama nüxü̃ nadau nax Tupana yanguxẽẽxü̃ ga yema norü uneta. Rü yemaca̱x nataãẽgü woo nüxü̃ nacua̱xgü nax ñoma to i nachixü̃anecüã̱xrüxü̃ paxaãchimare ñoma ga naanewa nayexmagüxü̃.

Ngechuchuarü ngúexü̃gü ga yamugüxü̃arü puracüchiga 10:43

Rü guxü̃ma ga yema nũxcümaü̃güxü̃ ga Tupanaarü orearü uruü̃gü rü Ngechuchuchigaxü̃ nixugü nax yíxema nüxü̃́ yaxõgüxe rü Tupana tá tüxü̃́ nüxü̃ irüngümaxẽ i tümaarü pecadugü —ñanagürügü.

Chacaría 6:12

Rü Yochuémaxã nüxü̃ ixu rü ñacurügü nüxü̃: “Tupana ya Guxãétüwa Ngẽxmacü rü ñanagürü cuxü̃: ‘Choma rü tá nua nüxü̃ chaxuneta i wüxi i yatü nax wena naxüaxü̃ca̱x ya chopata ya taxü̃ne. Rü naéga i ngẽma yatü rü Wena Namexẽẽcü, tá nixĩ. Rü nüma rü tá ãẽ̱xgacü nixĩ rü nagu tá nicu̱x i ãẽ̱xgacüchiru. Rü norü tochicaxü̃wa tá narüto rü ngéma tá duü̃xü̃gümaxã inacua̱x. Rü nacüwawa tá narüto i wüxi i chacherdóte. Rü ngẽma taxre rü tá nügüga naxĩnüe rü tá nügümaxã nataãẽgü’ ” —ñacurügü nüxü̃.

Ore i mexü̃ ga Cuáü̃ ümatüxü̃ 7:52

Rü yexguma ga natanüxü̃ rü nanangãxü̃gü, rü ñanagürügü nüxü̃: —¿Ẽ̱xna cuma rü ta Gariréaanecüã̱x quixĩ? ¡Nawa nangu̱x i Tupanaarü ore i ümatüxü̃ rü ngéma tá nüxü̃ cudau rü taxuxü̃táma i Tupanaarü orearü uruxü̃ i Gariréaanewa ne ũxü̃! —ñanagürügü.

Ore i mexü̃ ga Luca ümatüxü̃ 24:44

Rü ñu̱xũchi ñanagürü nüxü̃: —Rü yema choxü̃ ngupetüxü̃ rü yema nixĩ ga pemaxã nüxü̃ chixuxü̃ ga yexguma tauta chayu̱xgu rü petanüwa chayexmagu. Yerü yexguma rü pemaxã nüxü̃ chixu rü ñacharügü: “Aixcüma tá ningu i guxü̃ma i Tupanaarü ore i chauchiga ümatüxü̃ i wiyaegüarü poperawa, rü Moiché ümatüxü̃ i mugüwa, rü ore i nũxcümaü̃güxü̃ ga Tupanaarü orearü uruü̃gü ümatüxü̃wa” —ñacharügüchire̱x pexü̃.

Ore i mexü̃ ga Matéu ümatüxü̃ 26:24

Rü Tupana Nane ya duü̃xü̃xü̃ ixĩcü rü tá nayu ngẽxgumarüxü̃ i Tupanaarü ore i ümatüxü̃ nüxü̃ ixuxü̃rüxü̃. Natürü wüxi i ngechaü̃xü̃chi nixĩ naxca̱x i ngẽma yatü i ínaxuaxü̃xü̃. Rü narümemae chi nixĩ ga noxtacüma taxũchima nax nabuxü̃ —ñanagürü.

Ucu̱xẽgüchiga 2:4

¡Rü noxtacüma cugü inaxã nax naxca̱x cudauxü̃ i ngẽma cua̱x ñoma wüxi i diẽru rüe̱xna wüxi i ta̱xacü i tatanüxü̃ i icúxü̃ca̱x cudauxü̃rüxü̃!

Naanearü ügüchiga 49:10

Rü nüma ya Yudá rü taxúetama nüxna tanayaxu i ngẽma norü pora. Rü yimá naixmena̱xã ya norü poraarü cua̱xruxü̃ ya naxme̱xwa ngẽxmane rü taxúetama nüxna tanayaxu ñu̱xmatáta ínangu ya yimá naixmena̱xãarü yora ya guxü̃arü ãẽ̱xgacü ixĩcü. Rü yimága tá nixĩ i naxĩnüexü̃ i guxü̃ma i duü̃xü̃gü.

Nüxíraxü̃xü̃ ga popera ga Pedru ümatüxü̃ 1:11

Rü nümagü ga yema orearü uruü̃gü rü Tupanaarü poperawa nangúe nax nüxü̃ nacua̱xgüxü̃ca̱x nax ñuxãcü tá nax yixĩxü̃ rü ñuxguacü tá nax nangóxü̃ ga gumá maxẽxẽẽruxü̃ ga Cristu. Rü Cristuãxẽ i Üünexü̃ ga yema orearü uruü̃güwa yexmaxü̃, rü nüxü̃ nüxü̃ nacua̱xẽxẽ nax Cristu rü tá ngúxü̃ yangexü̃ rü tá nayuxü̃ rü yemawena rü wena tá namaxü̃xü̃ rü daxũguxü̃ i naanewa tá nax naxũxü̃.

Ngechuchuarü ngúexü̃gü ga yamugüxü̃arü puracüchiga 17:11

Rü yema togü ga Yudíugü ga Techarónicawa yexmagüxü̃arü yexera narümemaegü ga yema Yudíugü ga Beréacüã̱x. Rü norü ngúchaü̃maxã meama nanayauxgü ga yema ore. Rü guxü̃ ga ngunexü̃gu rü Tupanaarü ore ga ümatüxü̃wa nangúe nax mea nüxü̃ nacua̱xgüxü̃ca̱x rü aixcüma yixĩ ga yema ore ga Pauru rü Chíra namaxã nüxü̃ ixugüxü̃.

Popera ga Yudíugü ga yaxõgüxü̃ca̱x ümatüxü̃ 11:40

Rü yemaacü namaxã nangupetü ga yema duü̃xü̃gü, yerü ga Tupana rü tagu narüxĩnü rü tama nanaxwa̱xe nax yema nũxcümaü̃güxü̃ ga duü̃xü̃güxíra nüxica yamexẽẽgüãxü̃, natürü nanaxwa̱xe nax tamaxã wüxigu yamexẽẽgüãxü̃. Rü yemaacü ga Tupana rü taxca̱x nanamexẽxẽ ga wüxi ga ngü̃xẽxẽ ga yexera rümemaexü̃.

Danié 9:3

Rü yemaca̱x chayumüxẽ rü Cori ya Tupanana chaca nax toxü̃ ínanguxü̃xẽẽxü̃ca̱x naxme̱xwa i torü uanügü rü wena torü naanewa toxü̃ nawoeguxẽẽxü̃ca̱x. Rü yemaacü tama chachibüãcüma chayumüxẽ rü témüxü̃ ga naxchirugu chicu̱x rü tanimacate̱xewa charüto.

Ngechuchuarü ngúexü̃gü ga yamugüxü̃arü puracüchiga 28:23

Rü yexguma Paurumaxã inaxunetagü ga wüxi ga ngunexü̃, rü napatawa naxĩ ga muxü̃ma ga duü̃xü̃gü. Rü Pauru namaxã nüxü̃ nixu ga Tupanaarü ore ga ñuxãcü ãẽ̱xgacü nax yixĩxü̃ ya Tupana. Rü pa̱xmama inanaxügü, rü ñu̱xmata nachütaxü̃ rü nüxü̃́ nanangúchaü̃xẽxẽ ga yema duü̃xü̃gü nax Ngechuchuaxü̃́ yaxõgüãxü̃ca̱x. Rü yemaca̱x Moiché ümatüxü̃ ga mugüwa rü nũxcümaü̃güxü̃ ga Tupanaarü orearü uruü̃gü ümatüxü̃ ga orewa namaxã nüxü̃ nixu ga Ngechuchuchiga.

Nüxíraxü̃xü̃ ga popera ga Pedru ümatüxü̃ 1:13

Rü ñu̱xma nax Cristuarü duü̃xü̃gü pixĩgüxü̃, rü penaxwa̱xe nax pexuãẽgüxü̃ rü ípememarexü̃ nax penaxüxü̃ i norü ngúchaü̃. Rü name nixĩ i aixcüma ípenangu̱xẽxẽ i guxü̃ma i ngẽma mexü̃gü ya Tupana tá pexna ãxü̃ i ngẽxguma Ngechuchu ya Cristu núma ũxgu.