Nüxíraxü̃xü̃ ga popera ga ãẽ̱xgacügüchiga 8:12 - Tupanaarü Ore

¹² Rü yexguma ga Charomóü̃ rü ñanagürü: —Pa Chorü Tupanax, cuma rü nüxü̃ quixu nax nawa cumaxü̃xü̃ i caixanexü̃ i pamüemaxü̃.

Nüxíraxü̃xü̃ ga popera ga ãẽ̱xgacügüchiga 8:12 Referans Kwoze

Wiyaegü 97:2

Rü pamüemaxü̃ i caixanexü̃maxã ínaxümaeguãchi. Rü nüma nixĩ i ãẽ̱xgacü i aixcüma mea nangugüxü̃ i wüxichigü i duü̃xü̃güarü maxü̃. Rü aixcüma nawe̱xgu i ngẽma namaxã naxueguxü̃ i wüxichigü.

Lebítanüxü̃arü puracüchiga 16:2

Rü Cori ya Tupana rü ñanagürü Moichéxü̃: —¡Namaxã nüxü̃ ixu ya cuenexẽ ya Aróü̃ rü tama name i ngexü̃rüüxü̃ i ngunexü̃gumare nagu naxücu i ngẽma naxmachiã i Üünexüchixü̃ i tüyemachiü̃ca̱xwena ngẽxmaxü̃ rü bai nüxna nangaicama i ngẽma baúátaü̃ nax tama nayuxü̃ca̱x! Erü choma rü tá ngẽma baúátaü̃étüwa caixanexü̃wa chaugü chango̱xẽxẽ.

Ichaía 45:15

Rü Ichaía rü ñanagürü: —Pa Tupanax, tama cuxü̃ tadau, natürü cuma nixĩ i ícunanguxü̃xẽẽxü̃ i Iraétanüxü̃.

Popera ga Yudíugü ga yaxõgüxü̃ca̱x ümatüxü̃ 12:18

Natürü i pemax, Pa Chauenexẽgüx, rü tama pexü̃ naxüpetü ga yema nüxü̃ üpetüxü̃ ga yema nũxcüma ga tórü o̱xigü ga Moichéwe rüxĩxü̃. Rü yema Iraétanüxü̃, rü nüxü̃ naxĩnüe ga Tupanaga ga yexguma nüxü̃ yangaicagügu ga guma ma̱xpǘne ga Chinaí. Rü nüxü̃ nadaugü ga nax yayauraxü̃ ga guma ma̱xpǘne rü poraãcü naxẽanexü̃ rü poraãcü buanecü ixüxü̃ rü naxãẽmacüanexü̃ rü yaduruanexü̃. Rü poraãcü namuü̃e ga yema duü̃xü̃gü, yerü nüxü̃ naxĩnüe ga guma cornéta ga tagane rü Tupana ga tagaãcü yéma ñacü: “Ngẽxguma chi wüxíe i petanüwa daa ma̱xpǘnewa ũxgu ¡rü noxtacüma nutamaxã tüxü̃ ípemuxũchiãcüma tüxü̃ pimá! Rü woo wüxi i pexü̃na yixĩxgu ¡rü ngẽxgumarüxü̃ ta ípenamuxũchiãcüma peyamá!” ñanagürü. Rü yexguma yadexaxgu ga Tupana, rü poraãcü namuü̃e ga yema duü̃xü̃gü. Rü norü muü̃maxã Tupanaxü̃ naca̱a̱xü̃gü nax íyachaxãchixü̃ca̱x ga namaxã nax yadexaxü̃. Rü yema nax poraãcü naxãũcümaxü̃chixü̃ ga yema nüxü̃ nadaugüxü̃, rü yemaca̱x nixĩ ga nümatama ga Moiché ga ñaxü̃: “Chorü muü̃maxã chidu̱xrux i ñu̱xmax”, ñaxü̃. Rü yemaacü nixĩ ga namaxã nangupetüxü̃ ga yema duü̃xü̃gü, natürü i pemax, Pa Chauenexẽgüx, rü tama yemaacü pexü̃ naxüpetü.

Wenaxarü naxümatü ga Tupanaarü mugü 5:22

Rü yemagü nixĩ ga norü mugü ga Cori ya Tupana tagaãcü guma üxüemawa rü yema caixanexü̃ ga pamüemaxü̃wa nüxü̃ ixuxü̃ ga yexguma guxãma ga pema guma ma̱xpǘnepechinügu pengutaque̱xegügu. Rü yemawena rü taxuxü̃ma ga toxü̃ nixu, rü taxre ga nutatachinügu nanaxümatü ga yema norü mugü rü ñu̱xũchi choxna nanaxã.

Wenaxarü naxümatü ga Tupanaarü mugü 4:11

Pemax rü pengutaque̱xegü napünegu ga guma ma̱xpǘne, rü guma ma̱xpǘnewa rü üxü nayagoemaxü̃ ga daxũwama nguemaxü̃. Rü yema naemawa rü nayanguxuchi ga caixanexü̃ ga pamüemaxü̃ ga waemaxü̃.

Ínachoxü̃xü̃chiga 20:21

Rü yexguma yema Iraétanüxü̃ rü guma ma̱xpǘnearü yáxü̃wa yachaxãchitanüyane, rü yoxni ga nüma ga Moiché rü yema waemaxü̃ ga caixanexü̃ca̱x nixũ ga Tupana nawa yexmaxü̃.

2 Chamué 22:10

Rü nüma ga Tupana rü nayangena ga daxũguxü̃ ga naane rü ñoma ga naanegu ínarüxĩ. Rü nacutütüxü̃wa nayexma ga taxüchixü̃ ga caixanexü̃ ga waemaxü̃.

Nüxíraxü̃xü̃ ga popera ga ãẽ̱xgacügüchiga 8:11

Rü nagagu ga yema caixanexü̃ rü nüma ga yema chacherdótegü rü taxuacüma yexma narücho nax Tupanaxü̃ yacua̱xüü̃güxü̃ca̱x, yerü Cori ya Tupanaarü üünemaxã nanapa ga guma Tupanapata ga taxü̃ne.

Neemía 8:5

Rü yexguma ga Édra rü nayawãxna ga yema popera ga mugüpane guxü̃ma ga duü̃xü̃güpe̱xewa. Rü guxü̃ma ga duü̃xü̃gü rü nüxü̃ nadaugü yerü dauxü̃gu namaxã nachinagü. Rü yexguma yawãxnaagu ga yema popera ga mugüpane rü guxü̃ma ga duü̃xü̃gü ga yexmagüxü̃ rü inachigü.