Nüxíraxü̃xü̃ ga popera ga Cuáü̃ ümatüxü̃ 2:25 - Tupanaarü Ore

²⁵ Rü nümatama ya Ngechuchu ya Cristu nixĩ i tamaxã inaxunetaxü̃ nax tüxna naxããxü̃ca̱x i maxü̃ i taguma gúxü̃.

Nüxíraxü̃xü̃ ga popera ga Cuáü̃ ümatüxü̃ 2:25 Referans Kwoze

Ore i mexü̃ ga Cuáü̃ ümatüxü̃ 10:28

Rü choma rü nüxna chanaxã i maxü̃ i taguma gúxü̃. Rü nümagü rü tagutáma inayarütauxe, rü taxúetama choxna tanapuxü̃ i cho̱xme̱xwa.

Popera ga Títoca̱x naxümatüxü̃ ga Pauru 3:7

Rü yemaacü tamaxã namecüma rü tüxü̃ narüngü̃xẽxẽ ga Tupana nax nape̱xewa imexü̃ca̱x rü nayauxgüxü̃ca̱x i ngẽma ãmare i maxü̃ i taguma gúxü̃ i írüngu̱xẽẽgüxü̃.

Popera ga Yúda ümatüxü̃ 1:21

¡Rü pegüna pedaugü nax guxü̃guma pewa nangẽxmaxü̃ca̱x i Tupanaarü ngechaü̃! ¡Rü mea ípenangu̱xẽxẽx i ngẽma ngunexü̃ i nagu tá núma naxũxü̃ ya tórü Cori ya Ngechuchu ya Cristu nax nüxü̃́ ingechaü̃tümüxü̃gügagu tüxna naxããxü̃ca̱x i maxü̃ i taguma gúxü̃!

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:12

¡Cugü naporaxẽxẽ nax mea cuyaxõõmaxü̃ca̱x rü cunaxüamaxü̃ca̱x i Tupanaarü puracü ega woo ta̱xacürü guxchaxü̃ cuxü̃ üpetügu! ¡Rü cugüna nadau nax taguma cuxna iyanaxoxü̃ca̱x i ngẽma maxü̃ i taguma gúxü̃, yerü yema maxü̃ca̱x nixĩ ga noxri Tupana cuxü̃ yaxuxü̃ ga yexguma muxü̃ma ga duü̃xü̃güpe̱xewa nüxü̃ quixuxgu nax Ngechuchu ya Cristuaxü̃́ cuyaxõxü̃!

Nüxíraxü̃xü̃ ga popera ga Cuáü̃ ümatüxü̃ 1:2

Rü yimá maxẽxẽxẽruxü̃ rü toxü̃ nügü nawe̱x. Rü nüxü̃ tadaugü rü ngẽmaca̱x pemaxã nüxü̃ tixuchiga ya yimá tüxna naxãcü i maxü̃ i taguma gúxü̃. Rü noxri rü Nanatüxü̃tawa nayexma, natürü ñoma ga naanewa nangu rü toxca̱x nango̱x.

Romanos 5:21

Rü ñu̱xma woo pecadugagu nax iyuexü̃, natürü guxü̃guma Tupanaaxü̃́ tangechaü̃tümüü̃gü. Rü ngẽmaãcü pecaduwa tüxü̃ ínanguxü̃xẽxẽ nax nape̱xewa imexü̃ca̱x rü tórü Cori ya Ngechuchu ya Cristugagu tüxü̃́ nangẽxmaxü̃ca̱x i maxü̃ i taguma gúxü̃.

Romanos 2:7

Rü maxü̃ i taguma guxü̃maxã Tupana tá tüxü̃́ nanaxütanü ya yíxema guxü̃guma mexü̃ taxügüãcüma naxca̱x daugüxe nax Tupana tümamaxã taãẽxü̃ rü naxca̱x daugüxe nax Tupanaxü̃tawa tangugüxü̃.

Ore i mexü̃ ga Cuáü̃ ümatüxü̃ 12:50

Rü nüxü̃ chacua̱x nax Chaunatüarü orewa nangẽxmaxü̃ i maxü̃ i taguma gúxü̃. Rü ngẽmaca̱x i ngẽma ore i nüxü̃ chixuxü̃, rü ngẽmatama ore nixĩ i Chaunatü choxü̃ muxü̃ nax nüxü̃ chixuxü̃ —ñanagürü ga Ngechuchu.

Ore i mexü̃ ga Cuáü̃ ümatüxü̃ 6:68

Natürü Chimóü̃ ga Pedru rü nanangãxü̃, rü ñanagürü: —Pa Corix, ¿Texéxü̃tawa chi taxĩxü̃ ega cuxna tixĩgachitanügu? Erü cuma rü cuxü̃́ nangẽxma i ore i nawa nangẽxmaxü̃ i maxü̃ i taguma gúxü̃.

Nüxíraxü̃xü̃ ga popera ga Cuáü̃ ümatüxü̃ 5:20

Rü nüxü̃ tacua̱x ta nax ñoma ga naanewa nanguxü̃ ga Tupana Nane. Rü nüma nixĩ i tüxna naxããxü̃ ga cua̱x nax nüxü̃ icua̱xgüxü̃ca̱x ya yimá aixcüma Tupana ixĩcü. Rü yixema rü norü duü̃xü̃gü tixĩgü ya yimá aixcüma Tupana ixĩcü, erü Nane ya Ngechuchu ya Cristuarü duü̃xü̃gü tixĩgü. Rü nüma ya Tupana Nane nixĩ i aixcüma Tupana ixĩcü, rü nüma nixĩ i tüxna naxããxü̃ i maxü̃ i taguma gúxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:19

Rü ngẽmaãcü tá nüxü̃́ nangẽxma i norü mexü̃gü i daxũguxü̃ i naanewa, rü tá nanayauxgü i maxü̃ i aixcüma ixĩxü̃ i taguma gúxü̃.

Ore i mexü̃ ga Cuáü̃ ümatüxü̃ 6:54

Texé ya chaxunemaxã ãwemüxẽ rü chaugüwa axexe rü tüxü̃́ nangẽxma i maxü̃ i taguma gúxü̃. Erü choma rü tá tüxü̃ chamaxẽxẽ ega naanearü gu̱xgu.

Ore i mexü̃ ga Cuáü̃ ümatüxü̃ 6:47

Aixcüma pemaxã nüxü̃ chixu rü yíxema choxü̃́ yaxṍxe rü tüxü̃́ nangẽxma i maxü̃ i taguma gúxü̃.

Ore i mexü̃ ga Cuáü̃ ümatüxü̃ 6:27

¡Taxṹ i naxca̱x pexoegaãẽgüxü̃ i õna i paxãma gúxü̃! Rü narümemae nixĩ i naxca̱x pexoegaãẽgü i ngẽma õna i maxü̃ i taguma gúxü̃ pexna ãxü̃. Rü ngẽma nixĩ i maxü̃ ya Tupana Nane ya duü̃xü̃xü̃ ixĩcü tá pexna ãxü̃, erü Chaunatü ya Tupana rü marü nanango̱xẽxẽ nax aixcüma Nane chixĩxü̃ —ñanagürü.

Ore i mexü̃ ga Cuáü̃ ümatüxü̃ 5:39

Pema meama nawa pengúe i Tupanaarü ore i ümatüxü̃, erü nagu perüxĩnüe rü ngẽmawa tá nüxü̃ ipeyangau i perü maxü̃ i taguma gúxü̃. Natürü woo ngẽmatama Tupanaarü ore i ümatüxü̃wa rü chauchiga mea nax yadexaxü̃, natürü i pemax, rü tama choxü̃́ peyaxõgüchaü̃ nax ngẽmaãcü penayauxgüxü̃ca̱x i ngẽma maxü̃.

Danié 12:2

Rü guxü̃ma i marü yuexü̃ rü tá ínarüdagü. Rü nümaxü̃ rü maxü̃ i taguma gúxü̃ca̱x tá ínarüdagü, rü togü rü ãneca̱x rü poxcuca̱x tá ínarüdagü.

Nüxíraxü̃xü̃ ga popera ga Timutéuca̱x naxümatüxü̃ ga Pauru 1:16

Natürü Tupanaaxü̃́ changechaü̃tümüxü̃ nax ngẽmaãcü chowa duü̃xü̃güxü̃ nawéaxü̃ca̱x ga ñuxãcü nüma ga Ngechuchu ya Cristu yáxna chomaxã nax naxĩnüxü̃. Rü ngẽmaãcü wüxi i cua̱xruxü̃ chixĩ naxca̱x i guxü̃ma i duü̃xü̃gü nax nümagü rü ta nayaxõgüãxü̃ca̱x rü nayauxgüãxü̃ca̱x i maxü̃ i taguma gúxü̃.

Gálatas 6:8

Rü yíxema tümaxü̃nearü ngúchaü̃ üxe, rü ngẽma tümaxü̃nearü ngúchaü̃ rü tá yuwa tüxü̃ naga. Natürü yíxema Tupanaãxẽ i Üünexü̃arü ngúchaü̃ üxe, rü ngẽma Tupanaãxẽ i Üünexü̃wa tá tanayaxu i maxü̃ i taguma gúxü̃.

Romanos 6:23

Rü natanü i ngẽma pecadu tüxna ãxü̃, rü yu nixĩ. Natürü ngẽma ãmare ya Tupana tüxna ãxü̃ rü maxü̃ i taguma guxü̃ nixĩ i ngẽxguma tórü Cori ya Ngechuchuaxü̃́ yaxõgügu.

Ore i mexü̃ ga Cuáü̃ ümatüxü̃ 6:40

Rü Chaunatü ya Tupanaarü ngúchaü̃ nixĩ nax guxãma ya texé ya Nanexü̃ daugüxe rü nüxü̃́ yaxõgüxe tüxü̃́ nangẽxmaxü̃ i maxü̃ i taguma gúxü̃. Erü choma tá nixĩ i tüxü̃ ícharüdagüxẽẽxü̃ i naanearü gu̱xgu —ñanagürü.