Nüxíraxü̃xü̃ ga to ga popera ga ãẽ̱xgacügüchiga ümatüxü̃ 25:1 - Tupanaarü Ore1 Rü ñu̱xũchi nüma ga Dabí rü yema Tupanapatamaxã icua̱xgüxü̃ rü nüxü̃ naxuneta ga Achá nanegü rü Emáü̃ nanegü rü Yedutúü̃ nanegü nax paxetaruü̃gü ga árpagümaxã rü árpaxacügümaxã, rü platíyugümaxã napaxetagüãcüma nüxü̃ yaxugüxü̃ca̱x ga Tupanaarü ore. Rü ñaagü nixĩ ga naégagü ga yema Lebítanüxü̃ ga yema puracü ügüxü̃: Gade chapit la |
Nüxíraxü̃xü̃ ga to ga popera ga ãẽ̱xgacügüchiga ümatüxü̃ 25:1
46 Referans Kwoze
Rü ngẽmawena rü tá Guibeá ya Tupanaarü Ma̱xpǘnegu ãéganewa cungu i Firitéugüarü dauxü̃taechica íngẽxmaxü̃wa. Rü ngẽxguma yima ĩanegu cuxücuxgux, rü ngẽxma tá nüxü̃ cungau i ñuxre i Tupanaarü orearü uruü̃gü i Tupanaãxẽ ya Üünecü namaxã icuáxü̃ i Tupanaarü cua̱xüü̃wa ne ĩxü̃. Rü ngẽmape̱xegu tá naxĩ i duü̃xü̃gü i paxetatanüxü̃ i norü árpamaxã, rü árpaxacümaxã, rü paü̃derumaxã rü wowerumaxã.
Rü yexguma nawa nanguxgu ga yema ngunexü̃ ga Yerucharéü̃arü poxeguxü̃ nagu yaxãxü̃chigüxü̃, rü guxü̃nema ga guma ĩanegü ga Lebítanüxü̃ nawa maxẽnegu Lebítanüxü̃ca̱x nayadaugü. Rü ñu̱xũchi Yerucharéü̃wa nanagagü nax yemaacü taãẽãcü Tupanaxü̃ yacua̱xüü̃güxü̃ca̱x wiyaegümaxã rü norü platíyugümaxã rü árpagümaxã rü árpaxacügümaxã nax naxüchigagüãxü̃ca̱x ga yema Yerucharéü̃arü poxeguruü̃arü ãxü̃chichiga.
Rü yema yatügü rü aixcüma meama nanaxügü ga yema puracü. Rü yema namaxã icua̱xgüxü̃ nixĩ ga Lebítanüxü̃ ga Yáax rü Adía ga Merarítaagü, rü Chacaría rü Mechuráü̃ ga Queáxtaagü. Rü yemagü nixĩ ga namaxã icua̱xgüxü̃ ga yema nutagü rü naixmena̱xãgüarü nugüruxü̃ rü guxü̃ma ga yema togü ga puracütanüxü̃ ga Tupanapataarü mexẽẽwa puracüexü̃. Rü guxü̃ma ga yema Lebítanüxü̃ rü paxetaxü̃ nicua̱x. Rü ñuxre ga nümagü rü poperaarü ümatüruü̃gü nixĩgü, rü togü rü Tupanapataarü yemaxü̃güarü dauruü̃gü nixĩgü, rü togü rü ĩã̱xgüarü dauruü̃gü nixĩgü.
Rü Yoáxü̃ idau nax gumá caxta ga Tupanapataca̱x íxücuxü̃wa yexmanexü̃tagu nachixü̃. Rü yexgumarüxü̃ ta nüxü̃ idau ga yema churaragüerugü ga nacüwagu chigüxü̃ rü yema paxetatanüxü̃ ga nacüwawa yexmagüxü̃. Rü guxü̃ma ga yema duü̃xü̃gü rü nataãẽgü rü norü cornétagügu nicuegü. Rü yema wiyaetanüxü̃ rü norü paxetaruü̃gümaxã napaxetagü rü norü wiyaegümaxã Tupanaxü̃ nicua̱xüü̃gü. Rü yexguma yemaxü̃ nada̱u̱xgu ga ngĩma ga Ataría rü ngĩgü irügáutechiru rü aita ixü rü ngĩgürügü: —¡Taechitawa̱xegüxü̃. Taechitawa̱xegüxü̃! —ngĩgürügü.
Rü yema Lebítanüxü̃maxã icua̱xgüxü̃ rü ñaagü nixĩ: Achabía, rü Cherebía, rü Yochué ga Caxmié nane. Rü yexguma nawa nanguxgu nax nawiyaegüxü̃ rü nüma ga natanüxü̃ rü nape̱xegu nayachigü nax Cori ya Tupanaxü̃ yacua̱xüü̃güxü̃ca̱x rü moxẽ nüxna naxãgüxü̃, gumá Dabí ga Cori ya Tupanaarü duü̃ ixĩcü namugüxü̃ãcüma.
Rü yemawena ga Echequía rü nüxü̃ nayanu ga yema puracü ga nüxna ixüchigüxü̃ ga yema chacherdótegü rü Lebítanüxü̃. Rü yexgumarüxü̃ ta nüxü̃ nayanu ga norü ngunexü̃gü ga nagu tá naxügüãxü̃ ga norü puracü. Rü chacherdótegüna nanaxã ga puracü nax wüxichigü ga ngunexü̃gu ãmarearü guruü̃wa ãmaregü ínagugüxü̃, rü yexgumarüxü̃ ta nax yagugüãxü̃ ga yema ãmaregü ga Tupanaarü ngüxmüxẽẽruü̃gü. Rü yema Lebítanüxü̃na nanaxã ga norü puracü nax Tupanana moxẽ naxãgüxü̃ rü nüxü̃ yacua̱xüü̃güxü̃. Rü yema totücumü ga Lebítanüxü̃ rü nüxna nanaxã ga norü puracü nax Tupanapata ga taxü̃neaarü ĩã̱xgüna nadaugüxü̃.
Rü guxü̃ma ga yema Lebítanüxü̃ ga wiyaetanüxü̃ ga Achá rü Emáü̃ rü Yedutúü̃ rü nanegümaxã rü togü ga natanüxü̃maxã ãmarearü guruü̃arü ésteguama nachigü. Rü naxchiru ga línuchinaxca̱xgu nicu̱xgü. Rü nüxü̃́ nayexma ga norü platíyugü rü árpaxacügü rü árpagü. Rü namaxã nayexmagü ga 120 ga chacherdótegü ga cornétagu icuegüxü̃.
Rü yexgumarüxü̃ ta yema nanatü ga Dabí namaxã nüxü̃ ixuxü̃ãcü rü Charomóü̃ rü nüxü̃ nayanu ga norü puracü ga yema chacherdótegü. Rü nüxü̃ nayanu ga norü puracü ga yema Lebítanüxü̃ nax wüxichigü ga ngunexü̃gu rü chacherdótegüxü̃ nangü̃xẽẽgüxü̃ca̱x rü namaxã inacua̱xgüxü̃ca̱x ga Tupanaarü cua̱xüxü̃gü. Rü yexgumarüxü̃ ta nüxü̃ nayanu ga norü puracü ga yema ĩã̱xarü dauruü̃gü ga wüxichigü ga ĩã̱xwa, yerü yemaacü nixĩ ga nüxü̃ yaxuxü̃ ga Tupanaarü duü̃ ga Dabí.
Rü yemawena ga nüma ga Yoiadá rü Tupanapata ga taxü̃negu nanamugü ga churaragü nax nüxna nadaugüxü̃ca̱x. Rü yema churaragü rü chacherdótegüme̱xẽwa rü Lebítanüxü̃me̱xẽwa nayexmagü. Rü yema chacherdótegü rü Lebítanüxü̃ ga ü̃pa ga Dabí woetama marü nüxü̃ nayanuxũ ga norü ngunexü̃gü ga nagu tá Tupanaca̱x ínaguaxü̃ ga ãmaregü ga Moiché ümatüxü̃ ga mugüwa nüxü̃ yaxuxü̃rüxü̃. Rü Dabí rü yemaacü nanamu nax wiyaemaxã taãẽãcü Tupanaxü̃ yacua̱xüü̃güxü̃ca̱x.
Rü yema Lebítanüxü̃ muxraxü̃ ga namachi rü yema wiyaetanüxü̃ca̱x rü ĩã̱xarü dauruü̃ca̱x rü ta nixĩ. Rü yemaacü ga yema wiyaetanüxü̃ ga Achátaagü rü tama nachicana nixĩgachitanü yema Dabí rü Achá rü Emáü̃ rü Yedutúü̃ nüxü̃ ixuxü̃rüxü̃. Rü nüma ga Yedutúü̃ nixĩ ga ãẽ̱xgacümaxã nüxü̃ yaxuxü̃ ga Tupanaarü ĩnü. Rü yemaacü ga yema ĩã̱xgüarü dauruü̃gü rü ta tama nachicana nixĩgachitanü, yerü ga namücügü ga Lebítanüxü̃ rü marü nüxü̃́ nanaxügü ga yema namachi ga nüxna üxü̃.
Rü yema naa̱xtü ga aixepewa yexmaxü̃wa rü nayexma ga taxre ga ucapugü nacüwawa ga yema ücuchica ga aixepewa yexmagüxü̃. Rü yema ücuchica ga nórtewa üxü̃cüwawa nayexma ga wüxi ga yema ucapu. Rü yema rü súrguama nadawenü. Rü yema to ga ucapu rü yema ücuchica ga súrwa üxü̃cüwawa nayexma. Rü yema rü nórteguama nadawenü.
Rü nüma ga ãẽ̱xgacü rü yema naixpütawa nanade ga mürapewagü naxca̱x ga Tupanapata ga taxü̃nearü baráü̃da rü napataarü baráü̃da. Rü yexgumarüxü̃ ta yema naiwa nanaxü ga árpagü rü árpaxacügü naxca̱x ga norü paxetaruü̃gü. Rü ü̃paacü rü ñu̱xma rü ta rü taguma yéma nangugü rü bai ñuxgu nüxü̃ tadau ga yexgumaepü̱x ga nai ga cháü̃darupüta.
Rü to ga Lebítanüxü̃ rü Matanía nixĩ. Rü Matanía nanatü nixĩ ga Micaía, rü Micaía nanatü nixĩ ga Chadí, rü Chadí nanatü nixĩ ga Achá. Rü Matanía nixĩ ga namaxã icuáxü̃ ga yema wiyaetanüxü̃ ga Tupanaxü̃ icua̱xüü̃güxü̃ rü moxẽ ixãgüxü̃ ga yexguma yumüxẽarü orawa nanguxgu. Rü norü ngü̃xẽẽruxü̃ nixĩ ga Babuquía. Rü nüma nixĩ ga naenexẽ ga yacüxü̃ nabumaexü̃. Rü to ga Mataníaarü ngü̃xẽẽruxü̃ nixĩ ga Adá ga Chamúa nane. Rü Chamúa nanatü nixĩ ga Gará, rü Gará nanatü nixĩ ga Yedutúü̃.
Piblisite