Nüxíraxü̃xü̃ ga to ga popera ga ãẽ̱xgacügüchiga ümatüxü̃ 21:15 - Tupanaarü Ore

¹⁵ Rü nüma ga Tupana rü yema da̱xaweanemaxã yéma nanamu ga wüxi ga daxũcüã̱x ga norü orearü ngeruxü̃ nax yemamaxã Yerucharéü̃cüã̱xü̃ nada̱i̱xü̃ca̱x. Natürü yexguma marü Yerucharéü̃wa nanguxchaü̃gu nax duü̃xü̃güxü̃ nada̱i̱xü̃ ga yema daxũcüã̱x, rü nüma ga Cori ya Tupana rü nüxü̃́ nangechaü̃tümüxü̃ ga duü̃xü̃gü, rü yemaca̱x nüxna nachogü ga yema daxũcüã̱x rü ñanagürü nüxü̃: —¡Rü marütama nax cunada̱i̱xü̃! —ñanagürü nüxü̃. Rü nüma ga yema daxũcüã̱x rü marü guma Yebútanüxü̃ ga Onáü̃ trigu ipuxü̃wa nayexma ga yexguma Tupana nüxna chogügu.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 21:15 Referans Kwoze

Naanearü ügüchiga 6:6

Rü yemaca̱x ga Tupana rü poraãcü nangechaü̃ rü nüxü̃́ nangu̱x ga nax naxüaxü̃ ga gumá duü̃.

Ínachoxü̃xü̃chiga 32:14

Rü nüma ga Cori ya Tupana rü ínayachaxãchi nawa ga yema norü duü̃xü̃gümaxã naxueguxü̃ nax nadaixchaü̃xü̃.

Ore i mexü̃ ga Márcu ümatüxü̃ 14:41

Rü norü tomaepü̱xcüna wenaxarü norü ngúexü̃güca̱x nataegu, rü ñanagürü nüxü̃: —¿Ñu̱xma rü ta ẽ̱xna ípepeeama rü iperüngüeama? ¡Rü marütama! Erü Tupana Nane nax duü̃xü̃xü̃ ixĩcü rü marü nawa nangu i ora nax yayauxgüãxü̃ nax pecaduã̱xgüxü̃na namugüãxü̃.

Yeremía 7:12

Rü dücax, ípeyadau i nachica ga guma chopata ga Chilówa yexmane. Rü yema nixĩ ga nachica ga nüxíra nüxü̃ chaxunetaxü̃ nax yéma chayexmaxü̃ca̱x. ¡Rü dücax, nüxü̃ peda̱u̱x ga yema namaxã chaxüxü̃ ga yema nachica nagagu ga yema chixexü̃ ga chorü duü̃xü̃gü ga Iraétanüxü̃ ügüxü̃!

Wiyaegü 90:13

Pa Corix ¡toxca̱x nataegu! ¡Rü taxṹ i cuyamáchigüxẽxẽxü̃ nax toxca̱x cutaeguxü̃! Rü toma nax curü duü̃xü̃gü tixĩgüxü̃ rü ¡cuxü̃́ tangechaxü̃tümüxü̃gü!

Wiyaegü 78:38

Natürü woo nax yemaacü nax yixĩgüxü̃, rü nüma ga Tupana rü nüxü̃́ nangechaxü̃tümüxü̃güama. Rü nüxü̃́ nüxü̃ inarüngüma ga norü chixexü̃gü rü tama guxü̃xü̃ nadai. Rü mue̱xpü̱xcüna ga yexguma namaxã nanuxgu rü yáxna namaxã naxĩnü rü tama naga naxĩnü ga norü nu.

Norü taxre ga to ga popera ga ãẽ̱xgacügüchiga ümatüxü̃ 3:1

Rü nüma ga Charomóü̃ rü inanaxügü nax naxüaxü̃ ya Cori ya Tupanapata ga taxü̃ne ga Yerucharéü̃wa nagu ga nachica ga Yebuchéutanüxü̃ ga Onáü̃ trigu nawa púxü̃ ga ma̱xpǘne ga Moríawa. Rü guma ma̱xpǘnewa nixĩ ga Charomóü̃ nanatü ga Dabíca̱x nangóxü̃ ga Cori ya Tupana. Rü yema nixĩ ga nachica ga Dabí nüxü̃ unetaxü̃ nax nagu tá naxüxü̃ ya Tupanapata ya taxü̃ne.

Nüxíraxü̃xü̃ ga popera ga ãẽ̱xgacügüchiga 19:4

Rü yemawena rü taxúema íxãpataxü̃wa naxũ. Rü wüxi ga ngunexü̃ inixũ, rü wüxi ga naixtüü̃wa nayarütoõchi. Rü nügügu naxĩnügu rü nayuxchaü̃. Rü yemaca̱x Cori ya Tupanaxü̃ ñanagürü: —¡Marütama, Pa Corix, rü choxna nayaxu i ñaa chorü maxü̃! Erü woetátama chayu rü narümemae nax ñu̱xmatama chayuxü̃ —ñanagürü.

2 Chamué 24:18

Rü yematama ngunexü̃gu rü Dabíxü̃tawa naxũ ga Gáx, rü namaxã nüxü̃ nixu nax Cori ya Tupanaca̱x naxüaxü̃ i wüxi i ãmarearü guruxü̃ nagu ga yema nachica ga Aráuna ga Yebútanüxü̃ trigu nawa púxü̃.

2 Chamué 24:16

Rü yexguma yema Tupanaarü orearü ngeruxü̃ ga daxũcüã̱x inaxügüchaü̃gu ga nax nadaiaxü̃ ga yema Yerucharéü̃cüã̱xgü ga duü̃xü̃gü, rü Cori ya Tupanaaxü̃́ nangu̱x ga yema chixexü̃. Rü nüxna nachogü ga yema norü orearü ngeruxü̃ ga daxũcüã̱x ga duü̃xü̃güxü̃ daixü̃, rü ñanagürü nüxü̃: —¡Marü ngẽxmatama yacua̱xẽxẽ, rü taxṹ i cuyadaxẽxẽxü̃! —ñanagürü. Rü yexguma ga yema Cori ya Tupanaarü orearü ngeruxü̃ ga daxũcüã̱x rü Aráuna ga Yebútanüxü̃ trigu íbuxuxü̃wa nayexma.

Ãẽ̱xgacügü ga guxchaxü̃güarü mexẽxẽruü̃gü 10:16

Rü nüma ga Iraétanüxü̃ rü nüxna nixĩgachi ga yema togü ga nachixü̃anegüarü tupananetagü rü wenaxarü Cori ga Tupanaxü̃ nicua̱xüü̃gü. Rü nüma ga Cori ya Tupana rü marü tama yáxna namaxã naxĩnü nax poraãcü ngúxü̃ yangegüxü̃ ga Iraétanüxü̃, rü wenaxarü nüxü̃ narüngü̃xẽxẽ.

Ãẽ̱xgacügü ga guxchaxü̃güarü mexẽxẽruü̃gü 2:18

Rü yexguma Cori ya Tupana yamucuchixü̃gu ga ãẽ̱xgacü ga namaxã icuáxü̃, rü nüma ga Tupana rü nüxü̃ narüngü̃xẽxẽ ga yema ãẽ̱xgacü, rü yema Iraétanüxü̃xü̃ ínanguxü̃xẽxẽ naxme̱xwa ga norü uanügü. Yerü nüma ga Tupana rü yexguma nüxü̃ naxĩnügu ga nax naxauxexü̃ ga yema duü̃xü̃gü nagagu ga yema guxchaxü̃gü ga yangegüxü̃, rü nüxü̃́ nangechaü̃tümüxü̃gü.

Ínachoxü̃xü̃chiga 9:28

¡Rü ngẽmaca̱x Tupanana naxca̱x peca nax yanaxoxẽẽãxü̃ca̱x ya ãẽmacügü rü ngẽma gáuxü̃pütagü, erü marü tama namaxã taporae! Rü marü tá pexü̃ íchamuxü̃ —ñanagürü.

Yoná 4:2

Rü yemaca̱x ñaãcü nayumüxẽ: —Dücax, Pa Cori Pa Tupanax, rü ngẽma ñu̱xma Nínibewa ngupetüxü̃ nixĩ ga yema nüxü̃ chixuxü̃ ga yexguma chauchixü̃anewatama chayexmagu. Rü yemaca̱x nixĩ ga cuxcha̱xwa chixũxü̃táa̱x nax Tárchixwa chaxũxü̃ca̱x, yerü nüxü̃ chacua̱x rü cuma rü wüxi ya Tupana ya mecümacü rü ngechaü̃wa̱xecü quixĩ rü tama paxa cunu. Rü ngẽma curü ngechaü̃ rü nataxüchi. Rü ngẽmaca̱x woo texémaxã poxcu cuxuegu̱xgu rü paxãma nagu curüxĩnü, rü tama tüxü̃ cupoxcu ega nüxü̃ tarüxoegu i tümacüma i chixexü̃.

Yeremía 26:9

¿Rü ta̱xacüca̱x Cori ya Tupanaégagu nüxü̃ quixu nax daa Tupanapata rü guma Chilówa yexmanerüxü̃ tá nagu napogüexü̃, rü nüxü̃ quixu rü daa ĩane rü tá nagu napogüexü̃ rü taxuxü̃táma i duü̃xü̃gü marü nawa maxẽxü̃? —ñanagürügü nüxü̃. Rü guxü̃ma ga duü̃xü̃gü rü Yeremíaca̱x nibuxmü ga guma Tupanapatawa.

1 Corintios 10:10

Rü tama name i chixri Tupanachiga pidexagü yema ñuxre ga nũxcümaü̃güxü̃ ga tórü o̱xigü ügüxü̃rüxü̃. Rü yemaca̱x ga Tupanaarü orearü ngeruxü̃ ga daxũcüã̱x rü nanadai.

Naanearü ügüchiga 19:13

Erü tá tayagu ya daa ĩane. Erü Cori ya Tupana rü marü tama yáxna namaxã naxĩnü i ñaa duü̃xü̃gü i daa ĩanewa maxẽxü̃, rü ngẽmaca̱x toxü̃ namu nax tayaguxü̃ca̱x —ñanagürügü.

1 Chamué 15:11

—Choxü̃́ nangu̱x ya Chaú nax ãẽ̱xgacüxü̃ nüxü̃ chaxunetaxü̃ erü choxna nixũgachi rü tama nayanguxẽxẽ i ngẽma chanamuxü̃ —ñanagürü. Rü nüma ga Chamué rü poraãcü naãxẽwa nangu̱x ga yema. Rü Cori ya Tupanaxü̃ nachixewe ga guxü̃ma ga yema chütaxü̃gu.

Yoná 3:10

Rü Tupana rü nüxü̃ nadau ga yema Nínibecüã̱x ga duü̃xü̃gü ügüxü̃ nax ñuxãcü nüxü̃ naxoexü̃ ga nacüma ga chixexü̃. Rü yemaca̱x ga nüma ga Tupana rü ínayachaxãchi ga yema poxcu ga noxri namaxã naxueguxü̃.

Amúx 7:3

Rü yexguma nüma ga Cori ya Tupana rü nüxü̃́ nangechaxü̃tümüxü̃ ga yema duü̃xü̃gü. Rü tama nayanguxẽxẽ ya yema nagu naxĩnüxü̃, rü ñanagürü: —¡Ngẽma rü taxũtáma nangupetü! —ñanagürü.

Amúx 7:6

Rü yexguma nüma ga Cori ya Tupana rü nüxü̃́ nangechaxü̃tümüxü̃ ga yema duü̃xü̃gü. Rü tama nayanguxẽxẽ ga yema nagu naxĩnüxü̃, rü ñanagürü: —¡Ngẽma rü ta rü taxũtáma nangupetü! —ñanagürü.