Marcos 3:7 - Nuevo Testamento Toba Sur

⁷ Qalaxayi so Jesús jec, nnaicapegueto soua lapaxaguenataqa da tadaxaama ca loigue aso lapel. Nachi ÿataqta qalota na shiÿaxauapi na ca'ategue somayi, chigoqchiguiña yi Galilea.

Nuevo Testamento Toba Sombrero Negro

⁷ Jesús nataq'aen jogaa'me lapaĝaguenataqa yec'adeta ga'me lae jaga'me qa'em lat'edai, qama'le jalcote joga'me Galilea laje'pi nataq'aen quetegue joñe'me Jesús.

La'aqtaqa Ñim Lo'onatac 'Enauacna 2013

^7-8 So Jesús jec, nnaicapegueto soua lapaxaguenataqa da taraxaama so loigue aso lapel. Nache qalota so ca'ategue shiỹaxauapi som hua'aqtapeguelec nam ỹo'otpi Somaye. Somayepi huo'o na chegaqa'a ye 'alhua Galilea, qataq ye Judea qataq ye nỹecpi ye Jerusalén, qataq ye Idumea. Qataq huo'o na chegaqa'atague da le'ego so tala Jordán, qataq huo'o na shiỹaxauapi maye chegaqa'a ye saqaỹapeque ye 'alhua Tiro, qataq ye Sidón.

Marcos 3:7 Referans Kwoze

Lucas 6:17

Nachi so Jesús huenoteeguesop aso saqaÿoqotchiguemec 'alhua, lÿata'pe soomayi. Qaq co'ollaq qanviyiña aso lcomadaxalate, nachi somayi qataq soua lapaxaguenataqa nachi vi'iigueta. Qaq nataq'en ÿataqta qalota na shiÿaxauapi chigaqaña 'enauac yim 'alhua l'enaxat Judea, qataq yi Jerusalén, qataq na loigue yi Tiro qataq yi Sidón. Namayipi anac da huotaique da n'axaÿaxana so Jesús, qataq da qanataden da lalolaxa.

Mateo 4:25

Nachi ÿataqta qalota na shiÿaxauapi ca'attague' somayi, nam chigaqaña yi Galilea, qataq yiua diez pueblo mayi qaÿamata'ac Decápolis, qataq yi Jerusalén, qataq yi 'alhua Judea, qataq na pa'aigue da nala' lliguishiguem yi tala Jordán.

Mateo 12:15

Qaq so Jesús co'ollaq ÿaÿaten de'eda, nachi ca'ai yi'iyi hueta'a. Nachi ÿataqta qalota som shiÿaxauapi mayi ca'ategue somayi. Nachi somayi nataden 'enauac nam sa no'onpi.

Lucas 23:5

Qalaxayi somayipi ÿi'iguelaxalec da l'aqtac ÿataqta n'axannec, 'eeta': –Namayi ÿasouaxattega't na shiÿaxauapi mayi netaña yi Judea, souaxat da lapaxaguenataxanaxac. Chigoqchiguiña yi Galilea, qaq nagui qataq nvitta'a ne'ena souaqta'a.

Lucas 6:12

Qaq huo'o so na'a'q nachi so Jesús tashiguemec aso saqaÿoqotchiguemec 'alhua da natamen, nachi imatteec se'eso pe da natameetacot ñi Dios.

Marcos 1:39

Nachi so Jesús coleetapeguelec yi 'alhua Galilea, dapaxaguenataxaatapoigui ana laponaxaqui na judiopi, qataq i'ottapeguec na l'ec leguemaxaicpi na shiÿaxauapi.

Mateo 10:23

Qaq da huo'otaq qami' qaicana'pe da huo'otaq qoviita'a ca pueblo, qalaq qananeltaxañiÿa ca lÿa. Cha'ayi aÿim qami' shinapegalo da ne'ena shiÿaxaua llalec mashi nvi' qom saxanaxa da qaumachi da qauconñiigui 'enauac nam pueblopi mayi lma' na llalaqpi so Israel.

Hechos 17:14

Qalaxayi so nqaÿañicpi sa ÿaÿaloxonai' somayi da qaÿamaq, da yaqto' taxaama so loigue aso auaxai. Qaq nda'a't so Silas qataq so Timoteo n'oidaña yi Berea.

Hechos 17:10

Qaq so nqaÿañicpi nachi ÿataqta sa qaÿaÿaloxon da so Pablo qataq so Silas qaÿamaxadegue da Berea se'eso pe. Qaq co'ollaq ivilyi', nachi nqo'oodeu'a aso laponaxaqui na judiopi.

Juan 7:52

Nachi qoÿinapego' somayi, qoÿiita': –¿'Am peta'a nataq'en 'am Galilea l'ec? Ña 'anapaxaguenalo qome naua nanettrañi l'aqtaqa ñi Dios, yaqto' ishit da 'aula'a da qaica ca l'aqtaxanaxanec ñi Dios da huo'otaq chigoqchiguiña co'ollaxa yi Galilea.

Juan 7:41

Qataq huo'o na laÿipi 'eeta': –Damayi nachida da nta'a nca'alaxaqui. Qalaxayi huo'o na laÿipi 'eeta': –¿Táloxochiyo' da chigoqchiguiña yi Galilea cam nta'a nca'alaxaqui?

Mateo 12:16

Nachi ÿanem da l'aqtac, da yaqto' sa ishit da qai'axat da chaq negue'tso somayi.

Marcos 1:45

Qalaxayi se'eso shiÿaxaua co'ollaq jec, nachi quetot da da'aqtaxanem 'enauac na shiÿaxauapi dam huaigui co'ollaxa. Qaq ÿoqo'oyi so Jesús nachi sa ishit da nachaxaneu'a na pueblopi. Chaqdata da huetaugalo naua tojleguete 'ale'u. Qalaxayi nachi 'en'am chigoqteguelo na anac da anaÿa somayi.

Marcos 3:20

Nachi qaltaq qalota so laponeu'a shiÿaxauapi, ivitta'a da sa ishit da chochi deque'e somayipi.

Marcos 4:1

So Jesús qaltaq huetaxaama na loigue aso lapel da dapaxaguenataxaatac, nachi ÿataqta qalota so anac shiÿaxauapi da anaÿa somayi. Qaq co'ollaq ÿapacteec da qalota somayipi, nachi somayi huenojñigui aso barco mayi neto'ot na loigue aso lapel, qaq 'enauac so shiÿaxauapi hueto'ot so loigue.