Hebreos 13:3 - Nuevo Testamento Toba Sur

³ Qataq qauennachiÿa'a qome na ncoñitaguishicpi, 'eeta'am qanqashiñi da huo'otaq qancoñitaxauaipi namayipi, qataq nam sa ishit da qaÿauo'o ca nyacnataguec, cha'ayi qami' nataq'en qauaÿajñi da ishit da huo'o da nque'etaxanaxac da qad'oquiaxaqui.

Nuevo Testamento Toba Sombrero Negro

³ Anetoviñetaque gaa'me adaqayadi' jo'ne netedaue jaga'me coñetaĝanaĝaiqui, qama'le ena'am aueñi da'me uotaĝa ena'am ta'le anecoñetaĝa'udi' jogaa'me, nataq'aen da'me auenache'talo gaa'me jo'ne joote ja no'en da'me qo'yeteque, queda'me uotaĝa nach'e ena'am da'me ami qo'yeteque qomle.

La'aqtaqa Ñim Lo'onatac 'Enauacna 2013

³ Qataq qoviỹapegue' nam qarqaỹañicpi maye qaicoñettai' qataq nam sa qaiyacnapec. Da qarhuennataqai qome 'eeta'am qanqa'eñi da nataqa'en qoviitaigui damaye.

Hebreos 13:3 Referans Kwoze

Mateo 25:36

Qataq qaica ca ñapogoña, qalaq aÿim qauauo'oi ca ÿogoxot; qataq aÿim sa no'on, qalaq aÿim qanamaqaitega; qataq aÿim qaicoñittai', qalaq aÿim qanqo'oñiu'a.”

Hebreos 10:34

Qataq qami' ÿataqta huo'o da qadchoxonnataxanaxai nam qaicoñittai', qataq ivida'a da ÿataqta huo'o da qantonaxaqui da qan'añaxachiiguet da qaiuotaxanec na qadalamaxachiipi, cha'ayi qami' qauaÿajñiita da huo'o cam hueta'ague da piguem mayi ÿacteec da lyac qataq qaica ca loga't.

Romanos 12:15

Qataq qauamaitapegue' cam matapec, qataq qannoinaxauai cam noÿiitapec.

1 Corintios 12:26

Qaq ÿoqo'oyi da huo'o ca pa'aigue ne'ena nogoxoshitpi da huo'o ca iuet, nachi 'enauac na laÿipi daÿalli. Qaq da huo'o ca pa'aigue da ÿataqta qaÿi'oxoden, nachi 'enauac na laÿipi ntootapigui'.

Colosenses 4:18

Qaq aÿim Pablo maichi semapegue' da shiyiñi da iquinaxanaxac da qami' samaxalo. Qaq qauennachiÿa'a qome da aÿim qaicoñittai'. Qaq ñi Dios qami' ÿanema qome ca qanchoxonnataguiiqui. Aja', nachi 'eetec.

1 Pedro 3:8

Qataq iuen da 'enauac da qoñiita ÿataqta 'oonolec da qadhuennataqai, qataq qauchoxoyiñi ca huo'o ca huetapoigui qadÿai. Ñi 'oonolec ÿataqta ÿauotec ca lÿa, 'eeta'am naq'en ca maichi lqaÿa. Qataq ÿataqta qami' choxonnataxanaxaiqa, qataq sa ishit da qami' napagaqnaxaiqa.

Mateo 25:43

qataq 'eeta'am da ÿaqa'a ca sachigaqa'ague, qalaq sa qauauo'oi ca i'ochaqa'. Qataq qaica ca ÿogoxot, qalaq sa qauauo'oi ca ÿogoxot; qataq aÿim sa no'on qataq sootaigui aca ncoñitaxanaxaqui, qalaq sa ishit da aÿim qanamaqaitapegueu'a.”

Hechos 24:23

Nachi so nta'a Félix 'enapega som ilotague' na huataxanaqpi da ñaq 'eetalec da qaicoñittai' so Pablo, qalaxayi qoÿanem da saqalligueme da qailo'ogue qataq qaÿashiitem da ishit da qanamaqtapegueu'a, qataq da maichi qanayiuapegue' da qaitauan.

Efesios 4:1

Qaq ÿoqo'oyi aÿim, mayi aÿim qaicoñittai' souaxat da sasoilec so Cristo, nagui qami' ñachoxodeetoiguilo da ÿataqta qoquiitegue qome da lataxac cam iÿaxana ñi Dios, da 'eeta'am nataq'en da qoñiita.

Hechos 27:3

Qaq so lÿa na'a'q, nachi sovidaxa yi ñigaxasom l'enaxat Sidón. Qaq yimayi nachi huaña da so Julio da ÿataqta ÿaÿamaxatta so Pablo, nachi ÿanem somayi da yaqto' namaqtega na nauattonaxauapi da yaqto' qaitauan.

Hebreos 11:37

Qataq huo'o na qaÿalauat, qaidota'a na coma'. Qataq huo'o na qaiquesoxogui na lasot, qataq huo'o na ÿataqta qaÿi'iguen, qataq huo'o na qaidota'a na ÿilonec da qaÿalauat, qataq huo'o na chochi tateu'alo, ÿaatrañi naua anogo chigaqaiguilo na l'oc ana qagueta qataq na quetaq, ÿataqta huo'o da lachoxoyic qataq da nque'ejnaxac, qataq qaica ca nyacnataguec.