Hebreos 12:2 - Nuevo Testamento Toba Sur

² Ÿataqta seloqchigui qome so Jesús, som chigoqo'ot da qadpi'iÿaxac, qataq nachiso so naloqchiichiguiñi. So Jesús ÿataqta n'añaxateguet da 'eetec co'ollaq qaiuaxaneuo, qalaxayi sa ishit da ÿoqocha'a da n'enaguec de'eda l-leuaxa. Cha'ayi somayi ÿaÿaten da huo'otaq mashi inoxonaqchitec de'eda nque'ejnaxac, nachi huo'o da ntonaxac qataq da lamaiquiaxac. Nachi somayi nso'ongue da aloic ñi Dios.

Nuevo Testamento Toba Sombrero Negro

² 'Noota qom nach'e eta't da'me jenataqatapega joñe'me Jesús, qa'a naqaeñe 'me chiyaqayi da'me qadepe'e, nataq'aen da'me yiyamaĝachiñe. Ñe'me Jesús yauana joca'li da'me 'uo qomle da'me lamaic let'adaic. Chane'eja napogaĝadeneguet joca'li jana'me sodoso, ja jetaque yoqochi'eguet da'me nepocoĝoc jo'ne chiyaqayi da'me neleuaĝa, qama'le da'me yem da'me jo'ne lachoĝodec qoyen, male na'ña ga'me yayaten ga'me lejaliaqa' joñe'me Dios.

La'aqtaqa Ñim Lo'onatac 'Enauacna 2013

² Qaq ỹataqta seloqchigui So Jesús, cha'aye nacheso so chegoqo'ot da qanaquitaxac, qataq nacheso som ỹo'ot da nquictasheguem da qarpi'iỹaxac. So Jesús ỹataqta na'añaxateguet da ne'enaguec co'ollaq qaiuaxaneguet so npe'enaxaqui, cha'aye ỹaỹaten da inoxonaqchetec da lta'araic nque'eenaxac, nache ỹaconeguet da lta'araic lamaicỹaxac. Qaq nagui Ñimaye mashe nso'ootañi, netaua'a na aloic añi nso'onaxaqui Ñim Lo'onatac 'Enauacna.

Hebreos 12:2 Referans Kwoze

1 Pedro 3:18

Cha'ayi so Cristo nataq'en mashi ime da qomi' ileualguete souaxat na qadasouaxashitpi. Somayi no'on da lataxac, qalaxayi huo'o da nque'ejnaxac, souaxat qomi' mayi qomi' qauemaiqa, da yaqto' qomi' ÿauegueu'alo ñi Dios. Somayi co'ollaxa ileu da yi'oqchigui l'oquiaxac, qalaxayi qaltaq ÿi'iguelaxalec da nca'aleec, qalaxayi saq cha'a.

Hebreos 1:3

Qaq somayi nachiso som lli'oxoyic da l'edaxa ñi Dios, qataq somayi nachiso som lqui'iÿaxac ñimayi, qataq somayi nachiso som nllitañi 'enauacna, nam l'aqtaqa mayi qaica ca ÿaqalana'pe. Qaq somayi co'ollaq imat da iÿouec 'enauac nam qadasouaxashitpi, nachi somayi nso'ongue da aloic ñi Dios mayi nso'ootangui aca nso'onaxaqui da nta'a mayi neta'ague da piguem.

Efesios 5:2

Qataq ÿataqta qami' soxodaiqa, yaqto' qoñiita'am so Cristo da ÿataqta qomi' ÿauoteque, qataq qomi' nañaalguete da qomi' ileualguete, 'eeta'am ca qagueta llalec da qaÿalauat, qataq qaÿavigaxat da qoÿanot ñi Dios. Qaq da alaitaÿaxac ÿataqta ÿaÿamaxadeeta ñimayi.

Filipenses 1:6

Qaq aÿim ÿataqta 'eesa ñaqshin da ñi Dios mayi chigoqchigui da qami' i'oteque da no'on dalaxaic qadataxaqui, ñimayi queto'ot da i'ottac damayi, chochi ividaxatta'a ca na'a'q qom ñi'iguelaq so Jesucristo.

Hebreos 9:28

qaq nachida da 'eetec nataq'en so Cristo da 'oonolec da qaÿi'iguelaxalec da qoÿaneuo da yaqto' nqat nam qalota nasouaxashitpi. Qaq da ime, nachi qaltaq ÿi'iguelaxalec da nachaxan, qalaxayi sa ishit da anaga da nqat na nasouaxashitpi, chaqdata da somayi anaga da nca'alaxateec nam iuattaique somayi.

Juan 6:40

Da 'eetapeguec ñim aÿim namaq, nshitaique da 'enauac nam ÿamato'ot na llalec ñi Dios qataq i'amaqten namayi, nachi huo'o da lca'alaxa chochaq tateec, qataq da ñica'alaxateec qom iviteuga ca pa'ateec na'a'q.

1 Pedro 3:22

som taigue da piguem, nachi nso'oota'ague da aloic ñi Dios da ÿamaqpec na namaxashicpi piguem l'ecpi qataq na damaxasoxonapecpi qataq na n'añaxacpi.

Hechos 5:31

Qalaxayi ñi Dios ÿaueegue somayi da piguem, nachi ÿana'ague naq'en da aloic, qataq ÿanagui da nta'a qataq nca'alaxaqui. Cha'ayi ñimayi nshitaique da na Israel llalaqpi da ñaq ca'aisalo naua n'onataxaco, nachi qaÿapalaxat na lasouaxashitpi.

Lucas 24:26

¿Sa qauaÿajñiÿo' peta'a da que'eca nta'a nca'alaxaqui hua'auñi qome da huo'o da nque'ejnaxac qom saxanaxa da inoxoneu'a ca lli'oxoyic?

Judas 1:21

Qataq sa ishit qome da qai'axañiiuec da lauotaxanaqtaic ñi Dios. Qataq qauachiÿa'aguet ca pa'ateec na'a'q qom so qadataxala' Jesucristo ÿachigoxotchigui da lchoxonnataxanaxa da qomi' ÿanema ca nca'alaxa mayi chochaq tateec.

Hebreos 8:1

Qaq 'eda da ÿoqta ÿacteec da ñanacto'ot da sa'axattac, 'eeta': 'Eda da 'eetec da lataxac som 'oonolec qadtaxaÿaxanaxanec. Qaq nagui somayi nso'oota'ague da aloic ñi Dios mayi neta'ague da piguem.

2 Timoteo 4:8

Qaq nagui aÿim iuatta'aguet da nshiitenaguec da ñachaalataxac qui'itta. Qaq de'eda aÿim ÿami' que'eca na'a'q so qadataxala' Jesús som sa depe'enaxan da nmit na shiÿaxauapi. Qalaxayi saqaÿimta da aÿim ÿami', nataq'en 'enauac na shiÿaxauapi mayi ÿayiita'aguet ca lli'iguelaxasoxoc.

Filipenses 3:20

Qalaxayi qomi' qadma' da piguem, qataq seuataqtaique da ñi'iguelaq so qadca'alaxaqui mayi qadataxala' Jesucristo qom chigoqtegue da piguem.

Marcos 14:36

Qaq co'ollaq nqouagaxaueetac, nachi 'eeta': –'Am ita'a, 'am qaica 'enauac ca 'auqalanapec. Qaq sa ishit qome da aÿim 'apagaqna'aguet de'eda que'ejnaxac mayi 'eeta'am da qanÿomgui ca deshinataxan. Qalaxayi sa ishit qome da 'au'ot ca maichi shiitapeguec, chaqcata ca maichi qonetapeguec.

Apocalipsis 2:8

Nataq'en 'auamaxa aca 'ede ñi namaxashic piguem l'ec mayi ilotague' na 'amqajnataxanaxaicpi mayi netaña yi Esmirna. Qoneta': “'Eeta' da l'aqtac na l'auaxanec co'ollaxa da huo'o, qataq nachina na pa'ateec, nam qaÿalauat co'ollaxa, qaltaq ÿi'iguelaxalec da nca'aleec, 'eeta':

Hebreos 13:13

Qaq ÿoqo'oyi ñoqo'onaxauga qome so Jesús mayi huetauga que'eca qaÿoqteuga se'eso qanayiutaña, da yaqto' nataq'en ñique'etaxanaxagui da sa qaÿauo'o ca qanyacnataguec, da shinaqta'am da nque'ejnaxac somayi.

Hebreos 5:9

Qaq cha'ayi somayi ÿataqta qanaloqchiichiguiñi da lataxac, qaq ÿoqo'oyi ishit da nachiso so chigoqchigui dam chochaq tateec nca'alaxa mayi taÿot 'enauac nam ÿalaxaguet somayi.

Lucas 17:5

Nachi soua lamaxa'shi 'enapegalo' so Jesús, 'eetra': –'Am qadataxala', 'anquigaxatshiguem qome da qadpi'iÿaxac.

Marcos 9:24

Nachi so lta'a so nsoq, somayi i'alaq, 'eeta': –¡Sa'amqajnataxan, aÿim 'autauan, yaqto' nquic da i'amqajnataxanaxa!

Hebreos 12:3

Qaq ÿoqo'oyi qami' qauennachiÿa'a da 'eetec da nque'ejnaxac so Jesús co'ollaq n'añaxateguet da lachoxonnataxanaxac na shiÿaxauapi 'itaxaloxoicpi, yaqto' da qan'añaxataxaqui nachi 'eetai' sa ishit da nlautapiguiñi.

Efesios 2:16

Qaq de'eda 'eetec so Cristo co'ollaq qaiuaxanguet so npe'enaxaqui. Huaña, nachi sa ishit da npa'aguena't ne'enaua dos mayi sa nhuo' lashi'. Qataq nmaneto naq'en ñi Dios, nachi naamayi 'eeta'am naq'en ca 'oonolec n'oquiaxac.

Hechos 5:41

Nachi se'esoua Jesús lamaxa'shi chigoqtoiguilo so nta'alpi ÿataqta huo'o da ntonaxa'c, cha'ayi ñi Dios ÿashiitegueta soomayi da huo'o da nque'ejnaxa'c, huasoidelec da l'enaxat so Jesús.

Juan 12:32

Qaq qom ivita da aÿim qananotshiguem ana 'alhua, nachi aÿim maichi ñaueguela't 'enauac na shiÿaxauapi.

1 Pedro 1:11

Qataq so n'Espíritu so Cristo nal'ena co'ollaxa ÿaÿajnaxanaxanec se'eso l'aqtaxanaxanecpi ñi Dios dam taÿa'a nque'ejnaxac so Cristo qataq da lli'oxoyic mayi nca'attauo. Nachi somayipi ÿauotaique da ÿataqta ÿauattoota chaq negue't que'eca shiÿaxaua qataq huotaique da ÿaÿaten ca na'a'q mayi huetoigui cam i'axatta'aguet so Espíritu Santo mayi hueta'aguet somayipi.

Hebreos 10:14

Cha'ayi ÿachigoxotchigui aso 'oonole lachitaqtaxanaqte da somayi chochaq tateec naq'en da nalochiguiñi da lataxac nam mashi iqui'itaxatta.

Juan 12:24

Qaq ÿataqta 'eesa de'eda qami' sa'axatema, da aca ala na trigo, da huo'otaq sa ishit da taigui na 'alhua da yaqto' ileu, nachi acamayi nachi 'eetai' da 'oonole. Qalaxayi acamayi da huo'otaq ileu, nachi ÿataqta qalota ana ala da qanqat.

Juan 8:56

Som Abraham mayi qadta'ai, somayi co'ollaxa ÿataqta huo'o da ntonaxac da ilogui ca na'a'q mayi ÿaloxoqui. Qaq co'ollaq ilogui, nachi somayi ÿataqta nlaqchigui da ntonaxac.

Juan 1:29

Qaq so lÿa na'a'q, nachi so Juan ila'aguet so Jesús da naÿaxaama somayi, nachi somayi 'eeta': –Ña qauloÿa, 'ena cha'aguet na qagueta llalec mayi chigoqo'ot ñi Dios, nam nqat qome 'enauac na nasouaxashitpi ana 'alhua.

Lucas 23:11

Nachi so nta'a Herodes qataq so nallippi ÿataqta qaÿi'inai' so Jesús, nachi qalapaxalec so npo' ÿataqta qaica ca 'en'am da lyac, 'eeta'am qanqoÿin ca nta'a. Qaq co'ollaq ime, qaltaq qaÿi'iguelaxata so Pilato.

Mateo 20:28

Qaq 'eeta'am na shiÿaxaua llalec da namayi sa ishit da anac da yaqto' qanayiutapegue'. Chaqdata da namayi anac da yaqto' huapec, qataq ÿan da nachaalataxac, da 'eeta'am naq'en aca lashiue da yaqto' qalota na qanca'alaxateec.

Mateo 16:21

Qaq huaña, nachi so Jesús ÿataqta da'aqtaxaatema soua lapaxaguenataqa, 'eeta': –Aÿim saigue da Jerusalén. Qaq huaña qome yimayi, nachi na nquedoxonecpi qataq na lataxala'pi na ltaxaÿaxanaxanecpi na shiÿaxauapi da qaitaxaÿapegue' ñi Dios, qataq nam dapaxaguenataxaatapeguec na lqataxacpi so Moisés, namayipi ÿataqta qalota qome naq'en da ñique'ejnaxac, qataq aÿim qaÿalauat. Qalaxayi qom mashi inoxoodeec caua tres na'axa'te, nachi qaltaq ñica'aleec.

Apocalipsis 1:17

Qaq co'ollaq sela'a, nachi souañi, 'eeta'am da seleu. Qalaxayi somayi ÿauota'a na lhuaq aloic da aÿim ipoteu'a. Nachi aÿim 'enapega, 'eeta': –Sa ishit qome da 'ayi'i. Aÿim mayi nachaÿim l'auaxanec, qataq aÿim mayi nachaÿim sepa'ateec.

Apocalipsis 1:11

Qaq aÿim 'enapega, 'eeta': –Nachaÿim mayi aÿim l'auaxanec qataq nachaÿim mayi sepa'ateec, shiita'am aca l'auaxana ana leetrapi qataq aca pa'ateec. Qaq 'am 'edelec qome aca nede 'enauac na 'auauaachigui. Ime, qaq 'auamaxalo qome naua siete 'ale'u mayi netalguete na 'amqajnataxanaxaicpi mayi netaigui yi 'alhua Asia: yim Éfeso, Esmirna, Pérgamo, Tiatira, Sardes, Filadelfia, qataq yi Laodicea.

Hebreos 7:19

Cha'ayi nam lqataxacpi so Moisés sa ishit da ÿañoxot da naloqchiichiguiñi da lataxac na shiÿaxauapi. Qalaxayi nmenguet qanqoÿin dam qanaquitaxac mayi qaica ca 'en'am, qaq nachida da chigoqchigui da huo'o mshi ñoqochinaxau'a ñi Dios.

Hebreos 1:13

Qataq ñi Dios sa ÿauango' da 'enapega ca 'oonolec nam lamaxashicpi da 'eeta': 'Anso'oota'ague qome da aÿoic, to' qom mashi sacho'oto naua 'adchil nam 'am ipa'agueetacpi.

Hechos 2:36

Ÿoqo'oyi 'enauac na llalaqpi so Israel iuen da ÿataqta ÿaÿateeta de'eda, da se'eso Jesús mayi qami' qauaxañiiuo co'ollaxa, nachiso som ÿanagui ñi Dios da qadataxala' qataq nta'a qadca'alaxaqui.

Marcos 9:12

Nachi somayi 'enapeco': –'Eesa ca Elías da hua'auñi da nvi' qome, da yaqto' ÿaÿamaxajñi 'enauac na lataxaguesat. Qalaxayi ¿huá'ago' ca 'eetec naua ñiyigui'shi l'aqtaqa ñi Dios yi nataq'en i'axat da 'eetec qome cam shiÿaxaua llalec? Da huo'o da nque'ejnaxac qanqoÿin qataq da n'otanaguec.

Apocalipsis 1:8

Qaq 'enapec ñi qadataxala' Dios: “Aÿim mayi nachaÿim l'atchiguiñi, qataq nachaÿim pa'ateec, shiita'am aca l'auaxana ana leetrapi qataq aca pa'ateec.” Qaq 'eda da 'enapec ñim qaica ca ÿaqalanapec, ñim nachi 'eetai' da huo'o, qataq ñim do'onataxaatac nagui, qataq naÿa'cna.

Hebreos 11:36

Qataq huo'o na laÿipi ÿataqta nque'etaxangui da n'enaguec, qataq da nhuaxanaguec, qataq da qaicoñida't naua lhua'q, qataq da qoÿanaigui ana ncoñitaxanaxaquipi.

Hebreos 10:33

Cha'ayi da qoñiita huo'o na qaishiueetac, qataq qaÿauana'a't da sa qaiyacnapec, qataq huo'o da qoñiita nam nhuanau'a da nque'ejnaxac nam nachi 'eetec de'eda da nque'ejnaxac qanqoÿin.

Marcos 16:19

Qaq co'ollaq imat da da'aqtaxaatapeguema soomayi, nachi so qadataxala' Jesús naÿoxotchiguem qanqoÿin da taigue da piguem, nachi nso'ongue da aloic ñi Dios.

Hechos 3:15

Qaq 'eda da 'eetec da qami' qaualauachi som chigoqo'ot da achaalataxac. Qalaxayi ñi Dios qaltaq nca'alaxateec somayi, qaq 'enauac de'eda qomi' sauanaqchigui.

1 Corintios 1:18

Cha'ayi da n'aqtaguec da l-leuaxa so Cristo co'ollaq qaiuaxaneuo, 'eeta'am da chochi 'oopashic da hua'axaÿa nam taÿa'a da qanlaxajñi. Qalaxayi qomi' mayi saqa'a da qomi' qanca'alaxatreec, de'eda n'aqtaxanaxac, damayi l'añaxac ñi Dios.

1 Corintios 1:23

Qalaxayi qomi' sa'axataqtac da n'aqtaguec so Cristo co'ollaq qaiuaxaneuo. Na judío l'ecpi da hua'axaÿa de'eda n'aqtaxanaxac, nachi ÿataqta da'aguelec. Qaq nam saq judío l'ecpi da hua'axaÿa, nachi 'eeta'am naq'en da chochi 'oopashic.

Santiago 2:1

Qami' ÿaqaÿa't, mayi qau'amaqchiñi som ÿi'oxodaic qadataxala' Jesucristo, sa ishito' qome da qalca'aitagui na shiÿaxauapi.

Marcos 15:28

Huaña, nachi ÿataqta ipacchigui dam 'enapec naua ñiyigui'shi l'aqtaqa ñi Dios, mayi 'eeta': “Camayi qaÿalecnoigui qome na qauemaicpi.”