2 Pedro 2:1 - Nuevo Testamento Toba Sur

¹ Qalaxayi nataq'en som llalaqpi so Israel co'olloxochiyi huo'o so 'eetega da l'aqtaxanaxanecpi ñi Dios, qalaxayi saq 'en. Qaq nachi 'eetec nataq'en nagui da qoñiita huo'o na dapaxaguenataxaatapeguec da sa lataxac. Namayipi n'otaxaateuo na lapaxaguenataxanaxacpi mayi ishit da deque'emaqtaxan, ivida'a da nqolguete' so qadataxala' mayi nca'alaxateec namayipi. Nachi namayipi maichi quetau'a da saqaÿaloq ca nhuaxanaguec.

Nuevo Testamento Toba Sombrero Negro

¹ Nach'e ena'am uo'oe joca'li jogaa'me laqaya' netedaue ga'me noic jo'ne Israel jo'ne enapela'ajalo 'laqataĝanaĝanaqa ñe'me Dios, qalaĝaja ja eja. Qama'le nach'e ena'am da'me ami netedaue qomle jogaa'me paĝaguenataĝanaĝayaqa jo'ne qovinaĝanaĝayaqa. Jogaa'me dapaĝaguenataĝa'n qalaĝaja naa'me mach'e lelnataĝaco yoĝochidiñe queda'me jetaque yapalaĝa't ena'uac, chayovida'a da'me nematedapec da'me 'loyaĝac ñe'me mach'e Lejaliaĝane'j jo'ne yachiyoĝotedaue da'me ne'uaĝanague'j, jenjo' jo'ne chiyaqayi da'me paja'a 'uo da'me lachoĝode'j qoyen jo'ne ne'uaĝanague'j let'adaic.

La'aqtaqa Ñim Lo'onatac 'Enauacna 2013

¹ So Israel le'ecpi huo'o co'ollaxa na 'eetega da lamaxayec Ñim Lo'onatac 'Enauacna, qalaxaye saishet da 'en. Qaq nache 'eetec nataqa'en da qoñiita da huo'o na napaxaguenataxanaq da 'eetega lamaxashec Ñim Lo'onatac 'Enauacna, qalaxaye saq 'en. Namayepi ỹan da napaxaguenataxanaxac maye saq 'en qataq huo'o da lchec, qalaxaye saishet da qananomiỹa, ivira'a da 'eetega So Jesucristo da saishet da deca'alaqtaxan. Qaq ỹoqo'oye namayepi ishet da nque'elaxatta da qailaxachigui.

2 Pedro 2:1 Referans Kwoze

Mateo 7:15

Qavichiÿa'aguet qome nam tenataxanaxaicpi mayi 'eetega da l'aqtaxanaxanecpi ñi Dios. Namayipi qami' naÿalo, nachi ÿataqta i'enaxat da lataxac ana qagueta, qalaxayi na pa'atauo 'eeta'am da lataxac na shiguiÿac mayi dequi'iÿapec.

Judas 1:4

Cha'ayi huo'o na shiÿaxauapi quetaigui da latenataxanaxac da qami' taiguilo. Namayipi nal'ena co'ollaxa da i'axa't naua ñiyigui'shi l'aqtaqa ñi Dios da taÿa'a da 'itchiguiñi nhuaxanaguec. Namayipi ÿataqta qauemaicpi, cha'ayi ÿaconguet da lqouagaxanaqtaic ñi qadta'a Dios da chochi da'ashiÿoigui da i'o't naua n'onataxaco da lapachiyaxac, qataq nqolguete' ñi Dios ñim qomi' lalamqa'te qataq so qadataxala' Jesucristo.

2 Pedro 2:3

Qaq souaxat da lqopichi da nshiitenaguec, nachi namayipi qami' idolguete naua napaxaguenataxanaxaco saq 'en da yaqto' nqat añi qodomi. Qalaxayi namayipi sa ishit da ÿit de'eda nhuaxanaguec, cha'ayi mashi saqaÿoqtegue da qaÿaqataxaatapigui' damayi.

2 Timoteo 4:3

Cha'ayi huo'o qome ca na'a'q da na shiÿaxauapi sa ishit da ishiteguet da napaxaguenataxanaxac no'oita. Chaqdata da n'axaÿaxaata'a ca maichi lqopitaxanaqtaic, qataq nmitta'a da ÿotta'a't naq'en na napaxaguenaxala' da qaÿapaxaguenec cam n'axaÿaxaata'ai.

Mateo 24:11

Qataq qalota qome na tenataxanaxaicpi na nachaxan, 'eetega da l'aqtaxanaxanecpi ñi Dios, nachi ÿataqta qalota qome na ÿatenachit shiÿaxauapi.

Gálatas 2:4

Qaq ÿoqta 'eesa da huo'o na n'enaqchingui da 'eetega qadqaÿañicpi. Namayipi nqañoxottañi da chochi qomi' ÿalectaiguilo da nshitaique da qaÿauo'o ca n'anaxashit somayi. Qaq namayipi chochi 'axaÿaxanaxanecpi, da yaqto' imeten da qadataxac mayi huesochiguiñi da ñi'adaqtau'a so Cristo Jesús, cha'ayi nshitaique da qaltaq qomi' l-lataqa naq'en na nqataxacpi.

1 Corintios 11:19

Cha'ayi ¡qami' iuen da qaucolaqaigui da ÿotta'a't na qauatailec shiÿaxauapi, yaqto' yi'oq na ÿoqta 'eesa 'amqajnataxanaxaic!

1 Juan 4:1

Qami' ÿaqaÿañicpi, sa ishito' qome da qau'amaqchiñi 'enauac nam 'eetega da i'aqtaxanaxac ñi Dios. Chaqdato' da qauchimaxachiÿa camayi, yaqto' qauaÿajñiita da naua lhuennataxaco ÿataqta chigoqo'oto ñi Dios, huo'otaq sa ishit. Cha'ayi ana 'alhua mashi huotaique da nlaxalec na tenataxanaxaicpi mayi 'eetega da i'aqtaxanaxan ñi Dios.

Colosenses 2:8

Qaq maxatchaxa qome, sa ishit da qoquiigue nam nshitaique da qami' ÿatenachi't da qami' idolguete nam naÿajnec lma'na qataq nam nhuennataxacpi mayi saq 'en. Cha'ayi namayipi sa ishit da chigoqchigui so Cristo; chaqnata nam n'onataxacpi na shiÿaxauapi qataq nam lhuennataxacpi da tatapigui lauel na chochi yi'oqchigui.

Tito 3:10

Da huo'o ca sa nhuojna't naq'en na 'amqajnataxanaxaicpi, camayi ÿataqta 'autaxaÿot. Qaq da 'am sa ÿalaxaguet da mashi dos 'avi'iguelaxalec da qonapega, camayi nal'en da 'auÿotauga.

Tito 1:11

Namayipi iuen da qaÿapoguilo naua ala'pi, cha'ayi ÿataqta saq maÿa't naq'en na nhuo' l'ecpi, souaxat da dapaxaguenataxaatapeguec na sa lataxac, cha'ayi chochi nshitaique da nauec añi plata.

Filipenses 3:19

Qaq cam loga't qom ivita namayipi, qalaq qanlaxajñi. Cha'ayi namayipi chochi do'onataxaatacot da lamanaxanaqtaic da l'oquiaxac, qataq ñi'oxodeetapigui nam ishíttaxa da i'ot da l'aloxo, qataq ndoteec da iuennatapega nam huetalec ana 'alhua.

1 Corintios 6:20

cha'ayi ñi Dios co'olla qami' deshijnaxanalo, qalaq ÿataqta sa nalañi da qadashiichiÿaxaqui. Ÿoqo'oyi ÿataqta qaumachiÿo'ot ñi Dios da lli'oxonnataxanaxac da qad'oquiaxaqui qataq ñi qoquiÿapegue' qadqui'ii, cha'ayi naamayi lalamqa'te ñi Dios.

Marcos 13:22

Cha'ayi qalota qome na tenataxanaxaicpi anac, 'eetega da nta'a nca'alaxaqui, huo'otaq da l'aqtaxanaxanec ñi Dios. Nachi namayipi qome i'ot na lta'adaic n'anecpi qataq nam sa qaÿauanapigui, da yaqto' datenataxan. Qaq sa iuena'a qome da nataq'en ishit da ÿatenachit na maichi lca'aguishicpi ñi Dios.

Apocalipsis 5:9

Qaq somayipi i'ootac da dalaxaic n'onec, 'eeta': 'Am ÿataqta 'itchiguiñi da 'auacona ana nede qataq da 'anqa't naua qaiuaxaatalguete n'anaxanaqte; cha'ayi 'am qaÿalauat co'ollaxa, qaq soua 'adtago'q nachi lashiue da qomi' 'aushijnaxanalo, qomi' 'auachigoxottoiguilo na ÿotta'a't shiÿaxauapi mayi ÿotta'a't naua l'aqtaqa, da yaqto' 'enauac qomi' lalamqa'te ñi Dios.

Apocalipsis 2:9

Aÿim saÿaten 'enauac nam 'au'ottacpi qataq 'enauac na 'anque'ejnaxaguesat qataq dam 'adachoxoyic, nai'ctaxa da ÿataqta 'am sallaxanec. Qataq saÿaten da ÿataqta qauema naua ltaxaÿaxaco da 'am detaxaÿa nam 'eetega da judiopi, qalaxayi sa ishit da 'en. Chaqdata da namayipi i'amaqteetac so Satanás.

Hebreos 10:29

Qaq ¿táloxochiyictoxo' da saq taÿapigui yi qadvilli qami' da ÿataqta 'itchiguiñi da ÿacteec qome da nhuaxanaguec cam 'ico' petapigui so llalec ñi Dios, qataq ÿataqta saqca ca ÿanaiguilo soua ltago'q, qataq da ishiuen so n'Espíritu ñi Dios mayi ÿauotec camayi? Cha'ayi se'esoua ltago'q nachisoua soua ÿataqta 'itchiyiñi naq'en dam aÿamaxataxac dam chigoqchigui da qui'itta qanqoÿin namayipi.

Colosenses 2:18

Qaq sa ishit qome da qauauaqaita'a da sa qami' talguete naq'en ca qanshiitenaxachi nam shiÿaxauapi mayi chochi huomoigui da 'ico' qaica ca n'amqajnaxac qataq natameetacot na namaxashic piguem l'ecpi. Cha'ayi namayipi taigui da i'ot cam sa ishit da ÿoqta ÿauaachigui, qataq chochi ÿashittagui da ñi'oxonnaxac, souaxat naua maichi lhuennataxaco da lapachiyaxac.

Efesios 4:14

Nachi sa ishit qome da shinaqta'am ca nogotolec mayi qaica ca lqalaic da qaÿashaxaneec, qataq chochi ÿachitac na 'ico' l'at mayi nachina na ÿaqa'a napaxaguenataxanaxacpi. Huaña, nachi ilamaxata'aguet na shiÿaxauapi mayi sa nqalaate' da latenataxanaxac mayi nshitaique da qomi' ÿaueca'alo da nsomaxac.

Mateo 24:24

Cha'ayi ÿataqta qalota qome na anac da 'eetega nta'a nca'alaxaqui, huo'otaq 'eetega da l'aqtaxanaxanecpi ñi Dios. Nachi namayipi i'ot qome na lta'adaic n'anecpi qataq nam sa qaÿauanapega, da yaqto' datenataxan. Qaq sa iuena'a da ishit nataq'en qome da ÿañoxot da ÿatenachit nam lca'aguishicpi ñi Dios.

Mateo 10:33

Qalaxayi cam sa ishit da i'axatem na shiÿaxauapi da aÿim quetague', qaq aÿim nataq'en sa ishit da sa'axatem qome camayi ñi ita'a mayi neta'ague da piguem.

Apocalipsis 13:14

Qaq chigoqchigui ne'ena i'ot n'anecpi mayi i'ot da n'aalaxa mayi qaÿashiitem da i'ot da ÿauaachigui naq'en som hua'auchiguiñi shiguiÿac, da yaqto' ÿatenachit 'enauac nam huetalec ana 'alhua. Nachi damaxasoxoolec da qai'ot ca n'enaqtac lqui'i se'eso shiguiÿac mayi huo'o co'ollaxa so lque'emaxa ÿiilonec lliguiñi, qalaxayi ñaqaiyita ishit da nca'aleec.

Apocalipsis 2:13

Aÿim ÿataqta saÿateeta 'enauac nam 'au'ottacpi, qataq saÿaten da qonetangui nam ilotague' so Satanás. Qalaxayi ñaqaiyita 'am ÿataqta aÿim qoquetelec, qaq ÿataqta sa ishit da 'axaañi da aÿim 'au'amaqteetac, nai'ctaxa da co'ollaq qaÿalauat so i'aqtaxanaxanec Antipas, som 'oonolec da qoñiita, mayi huaña yim hueta'a so Satanás.

Judas 1:18

da i'axattrac de'eda 'eeta': “Caua pa'atreec na'axa'te, qaq huo'o qome na shiÿaxauapi mayi ÿataqta ÿi'inai' da n'amqajnataxanaxac, qataq chochi quetague' nam maichi 'eetapeguecpi mayi qauem.”

1 Juan 2:26

Qaq shiyiñi de'eda da qami' souaxat nam nshitaique da qami' ÿatenachi't.

1 Pedro 1:8

Cha'ayi qami' ÿataqta qauauochiic so Jesucristo, nai'ctaxa da sa qauauañiigui; qataq da qau'amaqchiñi nagui, nai'ctaxa da saxanaxa da qauloÿo'ot, qataq ÿataqta huo'o da lli'oxoyic da lta'adaic qadamaxayiqui. Qaq damayi sa ishit da qaivi' da qai'axategue.

Efesios 1:7

Cha'ayi ÿataqta lta'adaic da lauotaxanaqtaic ñi Dios, ÿoqo'oyi qomi' nca'alaxatreec, ÿachigoxotchigui da l-leuaxa so llalec da ÿapalaxat 'enauac nam qadasouaxashitpi.

Gálatas 5:20

qataq da qanatameetacot na nqolacpi, qataq da qaÿi'en ca nÿa, qataq da nquiÿaxanaqtaic, loquiaxac, qataq da nca'alaxanaxac, saq ÿoxonguit da nalemataic, qataq da chochi huo'o ca qanaquittaique da huo'o ca qai'ot, qataq da ÿotaxac da qoÿida't na shiÿaxauapi.

Gálatas 4:17

Cha'ayi ne'ena shiÿaxauapi ÿataqta qalota da naquitaxac da qoñiita, qalaxayi sa ishit da no'on ca naquittaique. Cha'ayi namayipi chochi nshitaique da qomi' qoquiÿa'aisalo. Qaq da ime, nachi qami' qauatailec ca 'eetapeguec namayipi.

Romanos 16:18

Cha'ayi ne'ena shiÿaxauapi sa ishit da do'onataxaatacot so qadataxala' Jesucristo, chaqdata da maichi lsoxo. Qataq namayipi ÿatenachit da lquiyaqteÿaxac nam shiÿaxauapi mayi qaica ca ÿaÿajnapec, idolguete naua l'aqtaqa isotta'pe qataq amai'.

Lucas 21:8

Nachi so Jesús 'enapeco': –Maxatchaxa qome, qadvichiÿai'. Qataq sa ishit qome da huo'o ca chochi qami' ÿatenachi't. Cha'ayi qalota qome na anac da anactaigui da i'enaxat, nachi 'eeta': “Aÿim mayi nachaÿim nta'a nca'alaxaqui;” huo'otaq 'eeta': “Nagui mashi ivita yi naloqnec.” Qalaxayi sa ishit qome da qauca'achiigue.

Lucas 6:26

Qataq choxodaxasodo' qami' qom no'on 'enauac da qan'aqtaguiiqui, cha'ayi nachida da 'eetec som hua'au lta'alpi namayipi, som tenataxanaxaicpi mayi 'enapec da l'aqtaxanaxanec ñi Dios.

Mateo 24:5

Cha'ayi ÿataqta qalota qome na chochi n'enaqchingui da i'enaxat, 'eeta': “Aÿim mayi nachaÿim qadta'ai qadca'alaxaquii,” nachi ÿataqta qalota qome na ÿatenachit.

Gálatas 3:13

Qaq so Cristo qomi' nca'alaxateeguesopa dam lta'adaic qanhuaxanaguec mayi chigoqchigui na nqataxacpi, cha'ayi somayi nañanguet da lta'adaic nhuaxanaguec souaxat qomi'. Cha'ayi naua ñiyigui'shi l'aqtaqa ñi Dios 'eeta': “Ÿataqta sa qaichoxonnai' qome da qaÿauo'o da nhuaxanaguec ca qaicoñida'aguet cam qo'ipaq.”

1 Corintios 7:23

Cha'ayi ÿataqta lta'adaic da lashiichiÿaxac co'olla qami' deshijnaxanalo ñi Dios, ÿoqo'oyi sa ishit da qanashiñiita da qami' l-lataqa ca chochi shiÿaxaua.

Apocalipsis 3:8

Aÿim saÿaten 'enauac nam 'au'ottacpi. Qaq aÿim 'am sanem ñi 'ico' lasom ÿauattaigui mayi sa ishit da huo'o ca ÿapogui. Cha'ayi nai'ctaxa da saqalligueme da 'ad'añaxac, qalaxayi ÿataqta 'aualaxalec da i'aqtac, qataq sa ishit da aÿim 'ancoqtapeguelec.

Lucas 12:9

Qaq ca sa ishit da da'aqtaxanoigui na shiÿaxauapi da aÿim quetague', qaq camayi nataq'en sa ishit da sa'axat da ÿalamaxat qom sootaigui na lamaxashic piguem l'ecpi ñi Dios.

1 Timoteo 5:8

Cha'ayi ca shiÿaxaua da sa ishit da huapegue' na maichi lauo' l'ecpi, que'eca shiÿaxaua sa natenguet da 'eetega lpi'iÿaxac. Lamaaxa da huo'otaq sa ishit da huapegue' ca maichi lalamaxat llalaqpi. Camayi ÿoqta napaquejlec ca saxanaxa da da'amqajnataxan.

Apocalipsis 6:10

Nachi somayipi ÿataqta nlamaxaden, 'eeta': –'Am qadataxala' Dios mayi ÿataqta 'am qui'itta qataq 'aupactelec cam 'auachaxanapec, ¿chaq laguio', qaq ivita ca laloqo' da 'anmit qataq 'auauo'o ca nhuaxanaguec nam i'ot da qanalaataguec mayi huetalec ana 'alhua?