2 Pedro 1:16 - Nuevo Testamento Toba Sur

¹⁶ De'eda qadapaxaguenataxanaxac mayi qami' sanaxama da sa'axataqtac da l'añaxac qataq ca lli'iguelaxasoxoc so qadataxala' Jesucristo, damayi sa ishit da sachigoxotaqchigui ca chochi qaÿachigoxotchiiya' n'aqtaxanaxac. Cha'ayi qomi' ÿataqta ñimaqa'ai' co'ollaxa da sauanaqchigui da l'amaqchic somayi.

Nuevo Testamento Toba Sombrero Negro

¹⁶ Joote ami japaĝaguenaĝaque da'me lañoqotaĝanaĝac ñe'me Qadejaliaĝanec Jesucristo nataq'aen da'me eeta da'me 'liyelaĝajoĝoc, qama'le jenjo' napaĝaguenataĝanaĝac jo'ne ami janemaĝam ja chiyaqayi ga'me 'naqataĝanaĝac jo'ne ch'e qoya'uo uotaĝa ga'me jo'ne ch'e qoyepetetapega, qa'a da'me qo'mi yataqata jauanaĝa ca'li ñe'me Jaliaĝanec da'me yataqachiñe let'adaic da'me lañoqotaĝanaĝac.

La'aqtaqa Ñim Lo'onatac 'Enauacna 2013

¹⁶ Co'ollaq qami' sapaxaguenaqtapegueeque da la'añaxac So Qarataxala' Jesucristo qataq da lle'eguelaxasoxoc, nache qomi' saishet da maiche so'otaq ca qara'aqtaxanaxac, nachaqrata da ỹataqta ñimaqa'ai' co'ollaxa da seloqtagui de'era lta'araic la'añaxac So Qarataxala'.

2 Pedro 1:16 Referans Kwoze

1 Juan 4:14

Qataq qomi' nataq'en ÿataqta sauanaqchigui ñi qadta'a Dios qataq sa'axataqtac da ñimayi namaq so llalec, da yaqto' nca'alaxateec 'enauac nam huetalec ana 'alhua.

Juan 1:14

Qaq se'eso l'enaxat l'aqtac ñi Dios, somayi nañigui da lataxac na yi'oqchigui shiÿaxaua. Nachi somayi qomi' hueta'agueta, qalaq ÿataqta nlaqchigui da lauotaxanaqtaic qataq dam 'eesa lataxac. Qaq qomi' sauanaqchigui da lli'oxoyic dam ñi'oxoyic mayi maichi lalamaxat lli'oxoyic som 'oonolec llalec ñim qadta'a Dios.

1 Timoteo 1:4

qataq nal'en sa ishit da ÿoqocha'a na chochi n'aqtaxanaxac n'ajnaxaic, nataq'en da n'aqtaguec da lliquiaxac so hua'au lta'alpi. Cha'ayi damayi ndota't da cotaxac mayi qaica ca naigui, qataq sa ishit da itauan ca shiÿaxaua da huapegue' da n'onataxanaxac mayi Dios qomi' ÿanema, souaxat da huo'o da qadpi'iÿaxac.

1 Timoteo 4:7

Qalaxayi sa ishit da 'auqocha'a na chochi n'aqtaxanaxac lma'na qataq qaica ca naigui. Chaqdata da 'anpa'ataxadeelec da qad'amqajnataxanaxac ñi Dios.

1 Corintios 2:4

Ÿoqo'oyi co'olla setaqtac da sa'axattac da n'aqtac, qalaq sa ishit da saconalo naua ltaxaÿaxaco ca shiÿaxaua ÿajnaxanaxaic, da yaqto' qau'amqajnataxañi. Chaqsota so Espíritu Santo qataq da l'añaxac ñi Dios dam huo'o mshi qau'amqajnataxañi co'ollaq qami' sa'aqtaxaatapeguema.

Efesios 4:14

Nachi sa ishit qome da shinaqta'am ca nogotolec mayi qaica ca lqalaic da qaÿashaxaneec, qataq chochi ÿachitac na 'ico' l'at mayi nachina na ÿaqa'a napaxaguenataxanaxacpi. Huaña, nachi ilamaxata'aguet na shiÿaxauapi mayi sa nqalaate' da latenataxanaxac mayi nshitaique da qomi' ÿaueca'alo da nsomaxac.

1 Corintios 1:17

Cha'ayi so Cristo sa ishit da aÿim ÿamaxalec da sachilaxanataxan. Chaqdata da aÿim ÿamaxalec da sa'axattac da nca'alaxa. Qalaxayi sa ishit da so'onataxana ca laÿajnec ca chochi shiÿaxaua, yaqto' sa ishit da huo'otaq saqca ca naigui da l-leuaxa so Cristo co'ollaq qaiuaxaneuo.

Apocalipsis 1:7

Qaq ¡ña qauloÿa, na Cristo nactaigui na l'oc! Qaq 'enauac qome da qaila'aguet, qaq ivida'a qome nam ique'emaqchit ishit da ila'a namayi. Qaq 'enauac qome na ÿotta'a't shiÿaxauapi mayi huetalec ana 'alhua ÿataqta noÿiitagui qome qaila'aguet. Aja', nachi 'eetec.

Tito 1:14

qataq nal'en da sa ÿoqocha'a na chochi n'aqtaxanaxacpi mayi chigaqaigui na judiopi, qataq da lamaxasoxonaxac nam mashi ca'ai da 'eesa lataxac.

Judas 1:14

Nataq'en so Henoc som huetoigui da siete nqochin na llalaqpi so Adán, somayi i'axata'a namayipi co'ollaq i'aqtaxanaxan ñi Dios, 'eeta': “Aÿim sauaateguet ñi qadataxala' nnaictague' som chalcata mil nam lalamaxatpi,

2 Ts 2:9

Da lvidaxac que'eca 'itaxaloxoic nactaigui da l'onataxanaxac so shiÿaxaua lma'na, l'enaxat Satanás. Ÿataqta lta'adaic da l'añaxac, ishit da i'ot na n'anecpi qataq ca sa qaÿauanapigui mayi depi'itaqtaxan.

2 Corintios 4:2

Qataq mashi sa ñashinaxaguet 'enauac na qoÿoxottañipi da qai'ot, qataq nam i'ot da n'aloxo. Qataq sa ishit da chochi satenataxanaqtac, qataq sa ishit da sashaxanaxaadeec naua l'aqtaqa ñi Dios. Chaqdata da 'eesoda naua sa'axata'q, qaq 'enauac na shiÿaxauapi ÿaÿaten da qomi' 'eesoda, qaq damayi ÿaÿateeta ñi Dios.

2 Corintios 2:17

Qalaxayi qomi' sa ishit da 'ico' qomi' nmenaxaiqa da semenaqta'pe naua l'aqtaqa ñi Dios, da huo'otaq shinaqta'am nam qalota mayi ÿashaxaadeec naua n'aqtaqa. Chaqdata da ÿataqta qomi' 'eesoda da sa'aqtaxanaqtac, qaq qomi' ÿaÿate'n ñi Dios, cha'ayi maichi qomi' lamaxa'shi, qataq qomi' l-lataqa so Cristo.

Mateo 28:18

Nachi so Jesús nquiga somayipi, nachi 'enapega, 'eeta': –Aÿim mashi aÿim qaipataxalec da samaqpec 'enauac na hueto'ot na piguem qataq na huetalec ana 'alhua.

1 Ts 2:19

Cha'ayi ¿negue'to' ca i'ot da qanaquitaxac, qataq da qantonaxac? qataq ¿negue'to' ca i'ot da qadamaiquiaxac da ñitonaqtapeguec? Taxaaso' nachida da qoñiita que'eca na'a'q qom ñi'iguelaq so qadataxala' Jesucristo.

Filipenses 3:21

Qaq somayi nadalaxat qome da qad'oquiaxac mayi taÿa'a da ileu, da yaqto' 'eeta'am naq'en dam l'oquiaxac mayi ÿi'oxodaic. Qaq nachida qome de'eda l'añaxac da ilo'ogue 'enauacna da do'onataxana.

1 Corintios 5:4

Qalapoñiÿa't qome da qanataÿigui da l'enaxat so qadataxala' Jesucristo. Qaq aÿim 'eeta'am da qami' ñachattaiguilo, qataq da l'añaxac so qadataxala' Jesús qami' hueta'agueta.

1 Corintios 2:1

Ÿoqo'oyi qami' ÿaqaÿa't, co'ollaq qami' ñoqo'onalo da qami' sa'aqtaxanema da 'eesa lataxac mayi chigoqo'ot ñi Dios, qalaq sa ishit da saconalo naua ltaxaÿaxaco na ÿajnaxanaxaicpi, huo'otaq naua pooco n'aqtaqa.

1 Corintios 1:23

Qalaxayi qomi' sa'axataqtac da n'aqtaguec so Cristo co'ollaq qaiuaxaneuo. Na judío l'ecpi da hua'axaÿa de'eda n'aqtaxanaxac, nachi ÿataqta da'aguelec. Qaq nam saq judío l'ecpi da hua'axaÿa, nachi 'eeta'am naq'en da chochi 'oopashic.

1 Corintios 1:7

Qaq 'eda da 'eetec da huo'o mshi qami' qaica ca qaviñiitac nam Dios qami' ÿanema, nagui da ña qauachiitaique ca na'a'q qom nachaxan so qadataxala' Jesucristo.

Romanos 1:4

Qalaxayi chigoqchigui so Espíritu Santo co'ollaq i'axat da somayi llalec ñi Dios qataq 'añaxaic co'ollaq ñi Dios nca'aleeguesop naq'en da nleuaxa.

Juan 17:2

Cha'ayi 'am 'ai'anem co'ollaxa da l'añaxac na 'ai'alec, da yaqto' ilo'ogue 'enauac na shiÿaxauapi, qataq da yaqto' ÿanem da lca'alaxa mayi chochaq tateec 'enauac nam 'ai'anempi namayi.

Mateo 24:27

Cha'ayi camayi 'eeta'am qome da qaila'a ca nqashilgaxa, da chigoqtegue da yi'oxoñi, nachi ividangui da avit, qaq 'eda qome da 'eetec da lvidaxac na shiÿaxaua llalec qom ñi'iguelaq.

Mateo 24:3

Nachi nqo'ooyishiguemec aso saqaÿoqotchiguemec 'alhua mayi nanqa' ana olivos. Nachi so Jesús co'ollaq nso'ootañi, nachi soua lapaxaguenataqa isoxoototo somayi da ina't, 'eetra': –Sauoqtaique da qomi' 'au'axatema chaq lagui qaq ivita de'eda. ¿Chaq négue't qome ca l'anaxat ca 'ayi'iguelaxasoxoc qataq cam loga't ana 'alhua?

Mateo 16:28

Qaq ÿataqta 'eesa de'eda qami' shinapegalo da huo'o nagui na ÿalectauo da sa ishit qome da ileu qom saxanaxa da ilogui na shiÿaxaua llalec qom mashi ñi'iguelaq da nactaigui da l'onataxanaxac da nta'a.

Mateo 16:27

Cha'ayi ne'ena shiÿaxaua llalec, qom ñi'iguelaq, nachi nactaigui da lli'oxoyic ñi lta'a qataq nam lamaxashic piguem l'ecpi. Huaña, nachi ishiiten ñi 'oonolec cam l'onataxanaxac.

Mateo 17:1

Qaq co'ollaq mashi inoxoodeec soua seis na'axa'te, nachi so Jesús ÿauec so Pedro qataq soua nqaÿa't Santiago qataq Juan. Nachi ndotreec soomayi, nnaicapegueto da nqo'ooshiguemque aso saqaÿoqotchiguemec 'alhua.

Marcos 13:26

Nachi qaila'aguet qome na shiÿaxaua llalec da nactaigui ca l'oc, ÿataqta qaica ca 'en'am da l'añaxac qataq da lli'oxoyic.

Marcos 14:62

Nachi so Jesús 'enapeco': –Aja', nachaÿim. Qaq qami' qome qauloiÿa'a ne'ena shiÿaxaua llalec da nso'oota'ague da aloic ñi Dios mayi 'añaxaic, qataq qom ñi'iguelaq, nactaigui na l'oc mayi hueto'ot na piguem.

Lucas 1:2

Qaq namayipi ÿiyiñi dam mashi qomi' i'axatema nam ÿauaachigui so chigoqchiguiña ne'ena qai'otpi, qata nataq'en i'axattac de'eda n'aqtac.

Lucas 9:43

Nachi 'enauac se'eso shiÿaxauapi ÿataqta huo'o da l'aalaxa da l'amaqchic ñi Dios. Qaq co'ollaq ñaq queta da qai'aalatapeguec 'enauac nam i'ot so Jesús, nachi somayi 'enapegalo soua lapaxaguenataqa, 'eeta':

2 Pedro 2:3

Qaq souaxat da lqopichi da nshiitenaguec, nachi namayipi qami' idolguete naua napaxaguenataxanaxaco saq 'en da yaqto' nqat añi qodomi. Qalaxayi namayipi sa ishit da ÿit de'eda nhuaxanaguec, cha'ayi mashi saqaÿoqtegue da qaÿaqataxaatapigui' damayi.