2 Corintios 7:10 - Nuevo Testamento Toba Sur

¹⁰ Cha'ayi de'eda naquicoxo mayi ÿaÿamaxadeeta ñi Dios, damayi i'ot da qoÿaxaadeec naua 'onataxaco qataq naigui da nca'alaxa. Qaq ÿoqo'oyi sa ishit da qanayictega. Qaq dam laquicoxo nam sa da'amqajnataxanpi, damayi naigui da nleuaxa.

Nuevo Testamento Toba Sombrero Negro

¹⁰ Qom Dios ami e'n totelo'te q'ae'n, ena'te ami nejalidiñe, qa'a da'me totelo'te ami 'yeteque da'me qaedi anejouoqoeñi nataq'aen anachoĝodeñiyot joñe'me qaedi yapalaĝa't da'me adaviyaĝacodi' qama'le adec'aliyegue. Qalaĝaja qom ami totelo'te jo'ne chiyaqayilo gaa'me laqalaico jena'me aleua, ami yovidaĝateda'a da'me adeleuaqai.

La'aqtaqa Ñim Lo'onatac 'Enauacna 2013

¹⁰ Da Ñim Lo'onatac 'Enauacna da qami' ỹaquicoqche't, nache saishet qome da qoquiitega, cha'aye de'era qaraquicoqoi damaye qami' ỹo'otegueta da qanaralaxache da qarataxaqui qataq qauỹaxañiỹaique da qami' qaichoxore'n qataq qami' qanca'alaxatre'c. Qalaxaye da naquicoxo maye chegaqaigui nam qauem maye huetalec ana 'alhua, nachaqrata maye ishet da dalaataxan.

2 Corintios 7:10 Referans Kwoze

Hechos 3:19

Qaq ÿoqo'oyi qaualachi' qome naua qan'onataxacolli', nachi qavi'iguelaqÿa ñi Dios, yaqto' qaÿapalaxa't naua qadasouaxashi'chilli'. Nachi ñi qadataxala' Dios ishit da qami' ÿanema caua na'axa'te da qaulaquiitapiguiñi.

Hechos 11:18

Nachi som nqaÿañicpi mayi netaña yi Jerusalén, co'ollaq hua'axaÿa de'eda, nachi nañaxaañi da ltaxaÿaxac, nachi ÿi'oxodeetac ñi Dios, 'eeta': –¡Aja', qachi nachi 'eeteco' ñi Dios da nataq'en ÿanem na saq judiopi, da yaqto' ca'aisalo naua n'onataxaco, qaq yi ishit da huo'o da lca'alaxa mayi chochaq tateec!

Lucas 18:13

Qaq som ÿacootapeeguet ana nshiitenaqte ca nta'a, qalaq nachi qaÿata'a ca hueta'a, qataq sa ishit da ÿamato'ot na piguem. Chaqdata da iuaxaalec ana ltogue, nachi 'eeta': “¡'Am ita'a Dios, aÿim 'auchoxoden qome, cha'ayi aÿim huo'oi naua sasouaxa't!”

Lucas 15:10

Qaq aÿim shinapec nataq'en da ÿataqta huo'o da ntonaxac nam Dios lamaxashicpi piguem l'ecpi, da huo'otaq ÿaxaadeec naua n'onataxaco ca shiÿaxaua 'itaxaloxoic.

Hebreos 12:17

Qaq qami' qauaÿajñi da co'ollaq imat da imen, nachi co'ollaq ivita so na'a'q da so Esaú nshitaique da ÿaconguet da no'on lliquiaxac mayi ÿami' so lta'a, nachi somayi qaimaqa'aguet. Nai'ctaxa da ÿataqta noÿiitac, qalaxayi mashi sa ishit da nadalaxat ca 'eetec dam mashi i'ot.

2 Corintios 12:21

Qataq ÿataqta huo'o da itelaxa da qom ivita da qami' ñamaqtegalo, qalaq ñi ita'a Dios ÿataqta huo'o naq'en da i'aloxo souaxat da qoñiita, qataq da ÿataqta lta'adaic da ñinoinaxac souaxat nam qalota da qoñiita mayi mashi qaÿoqtegue da huo'o na lasouaxashitpi, qalaq sa ishit da ÿaxaneec ca ishipaxanaqchit da nachaalataxac, qataq dam quishiguetaxac, qataq nam nqopitaxanaqtaiguesat mayi qai'ottac.

Mateo 26:75

Nachi so Pedro tachigui yi lauel da l'aqtac so Jesús co'ollaq 'eeta': “Qom yaqta'a da noÿin ca 'olgaxa, qaq 'am mashi sogote qome da tres 'avi'iguelaxalec da qonetega da aÿim sa 'auauatton.” Nachi so Pedro pa'auec, nachi ÿataqta noÿiitac.

2 Corintios 7:9

Qaq nagui ÿataqta huo'o da ñitonaxac, qalaxayi damayi sa ishit da souaxat da qami' qauaquicoita. Mayi souaxat da de'eda qadaquicoqoi. Damayi chigoqchigui da qai'axañiideec naua qan'onataxacolli'. Cha'ayi huo'o da qadaquicoqoi mayi ÿaÿamaxadeeta ñi Dios, qaq sa ishit da huo'o ca 'ico' qadasouaqtac da qoñiita.