1 Pedro 5:10 - Nuevo Testamento Toba Sur

¹⁰ Qalaxayi qom ime da qami' cada'ac da huo'o da qanque'ejnaxaqui, nachi ñi Dios ÿataqta qami' nalochiyiñi naq'en, qataq qami' qadamchiyiñi, qataq qami' 'añaxaiqa, qataq qaica ca qami' ÿayigo't. Cha'ayi nachiñi ñi Dios ñim qomi' ÿanema da qanchoxonnataguec, qataq qomi' iÿaxanalo da ñiuanaqhua'a naq'en da lli'oxoyic mayi chochaq tateec, qataq da ñi'adaqtau'a so Jesucristo.

Nuevo Testamento Toba Sombrero Negro

¹⁰ Qalaĝaja qom yenoĝodegue jogaa'me noloqo'ote da'me 'uo da'me adachoĝodequi qama'le joñe'me Dios male ami 'yañaqateneque, nataq'aen da'me en ami 'uañaĝayaqa choqoda'me ami yanema da'me jo'ne yataqatelegue. Qa'a nach'eñe ñe'me Dios 'uo da'me loqopich'i let'adaic chane'eja ami yiyaĝanalo qaedi ademii'teguet joñe'me Jesucristo qama'le ovitaue da'me jo'ne mach'e 'lonaĝa jo'ne qaya'te loiquiaqa'.

La'aqtaqa Ñim Lo'onatac 'Enauacna 2013

¹⁰ Qalaxaye qom ime da qami' cara'ac da huo'o da qanque'eenaxaqui, nache Ñim Lo'onatac 'Enauacna qami' ỹe'eguelaxatalo da qaica camachaqca da qoñiita. Qaq ỹoqo'oye qami' saishet da qaỹa'axañiiuec da qarpi'iỹaxaqui Ñimaye; qaq Ñimaye qami' ỹanema da qara'añaxaqui da yaqto' saishet da qauqalvi qataq qami' ỹo'oteque da nache 'eetai' da huo'o da qarpi'iỹaxaqui. Qataq qantooñita'ac da Ñim Lo'onatac 'Enauacna maiche qomi' lca'agui'she, chegoqchigui naqa'en So Jesucristo da yaqto' ña'araxaua'a da qaica ca 'ena'am llo'oxoyec lo'onataxanaxac.

1 Pedro 5:10 Referans Kwoze

2 Corintios 4:17

Cha'ayi nam qanque'ejnaxaco nagui de'eda qanachaalataxac, naamayi saq 'amaqtachi qataq saqaÿaloq da inoxoodeec, qaq nachinaua na qomi' i'otegueta cam ÿataqta lta'adaic ñi'oxoyic mayi qaica ca loga't, qaq saq 'en'am na qanque'ejnaxacpi.

2 Ts 3:3

Qalaxayi so qadataxala' mayi sa ÿatenachit ca l'aqtac qami' itauanque da qami' 'añaxaiqa, qataq qami' ntelaqna'agueta na sa ÿaÿamaxañisat.

Judas 1:24

Qaq ñi qadta'a Dios mayi qaica ca lÿa qataq ÿajnaxanaxaic, ñim qadca'alaxaqui, ñimayi ÿataqta 'añaxaic da qami' ntela'alo, da yaqto' sa ishit da qoviÿañi, qataq da yaqto' qami' nachaalataxaneu'alo cam hueta'a mayi qaica ca 'en'am da lli'oxoyic, qalaq ÿataqta qami' qui'itte' qataq qauamaichiguiñi. Qaq ñimayi nachi 'eetai' qome da ñi'oxonnataguec, l'amaqchic, l'añaxac, qataq da 'enec, souaxat so qadataxala' Jesucristo. Qaq damayi nachi 'eetai' da chigoqta'ague, qataq nagui, qataq dam taÿa'ague. Aja', nachi 'eetec.

1 Timoteo 6:12

'An'añaxajleco' qome da 'adpi'iÿaxac, yaqto' ishit da 'anauec da achaalataxac mayi chochi tateec. Cha'ayi de'eda achaalataxac nachida da huo'o mshi Dios 'am iÿaxana, qataq mashi ime da 'anachaachisop da 'au'axat da 'adpi'iÿaxac, qataq saqalota na 'am ÿauaachigui.

2 Ts 2:17

ñiimayi i'añaqchi't qome naua qadquiyaqchilli', qataq qami' itauanque da qami' 'añaxaiqa da qau'axachi qataq qau'ochi 'enauac na ÿaÿamaqchiguiñisat.

2 Corintios 13:11

Qaq nagui qami' ÿaqaÿa't, ÿataqta no'on qome ca qoyiquiaxaqui. Ÿataqta qanpogoxoiñiÿapegue' qome da nalochiguiñi da qanachaalataxaqui, qataq ÿataqta qauamaichiguiñi, qataq 'oonolec ca qadhuennataxaqui, qataq qaulaquiitapiguiñi. Qaq yaqto' qami' hueta'agueta ñi Dios mayi chigoqo'ot da nlagaxayic qataq da nsoxoyic.

1 Corintios 1:9

Ñi Dios ÿataqta ipactelguete naua l'aqtaqa, ñimayi nachiñi ñi qami' iÿaxanalo da qanhuañiÿau'a da nachaalataxac so llalec Jesucristo mayi qadataxala'.

1 Ts 2:12

Qataq saqataqtapeguelec 'enauac da qoñiita da ÿataqta qoquiitelec da lataxac ca shiÿaxaua da quetague' ñi Dios mayi qami' iÿaxanalo da qoviito'ot naq'en da l'onataxanaxac da ilo'ogue 'enauacna qataq da lli'oxoyic.

Romanos 16:25

Qaq ÿoqo'oyi nagui shi'oxodenaq qome ñi Dios ñim ishit da ÿataqta da'añi naq'en da qadpi'iÿaxaqui, da yaqto' nateeteguet naq'en dam sa'axattac n'aqtac mayi chigaqaigui da nca'alaxa qataq da napaxaguenataxanaxac mayi n'aqtaguec so Jesucristo. Cha'ayi damayi ÿataqta nateeteguet dam saq cha'a 'eetapeguec ñi Dios mayi qomi' ÿaÿajnaxanaxanque. Damayi chochi saq cha'a naq'en ñimayi co'ollaq saxanaqaca ana 'alhua.

2 Pedro 1:3

Ñi Dios maichi ÿachigoxotchigui da l'añaxac da qomi' ÿanema 'enauac nam iueetac da qanachaalataxac qataq da no'on qadataxac da qolaxague ñimayi co'ollaq qomi' ÿauattonaxanaxanque so Cristo mayi qomi' iÿaxanalo, ÿachigoxotchigui da l'amaqchic qataq dam l'onataxanaxac mayi qaica ca 'en'am da lli'oxoyic.

1 Pedro 1:15

Chaqdato' qome da qoviitaigui da achaalataxac mayi ÿataqta qui'itta, cha'ayi ñim Dios mayi qami' iÿaxanalo, ñimayi ÿataqta qui'itta.

Filipenses 4:13

Aÿim ishit da ñala'aguet 'enauac na chochaqna, cha'ayi so Cristo aÿim ÿanem da i'añaxac.

2 Timoteo 2:10

Ÿoqo'oyi ñi'añaxateguet 'enauac na chochina, cha'ayi ñishitaique da na Dios lca'aguishicpi ividauga da nca'alaxa mayi ÿapac da lyaquiaxac qataq chochi tateec. De'eda nca'alaxa qomi' taÿoto, cha'ayi mashi ñi'adaqtau'a so Cristo Jesús.

2 Ts 2:14

Qaq nachida da huo'o mshi qami' iÿaxanalo ñi Dios, nshitaique da qauacoñiiguet da nca'alaxa mayi chigaqaigui da n'aqtac dam sa'axataqtac. Nataq'en nshitaique da qanhuañiÿau'a da lli'oxoyic so qadataxala' Jesucristo.

Lucas 22:32

Qalaxayi aÿim 'am ñoqouagaxaueetapeguelec, da yaqto' sa ishit da saqca da 'adpi'iÿaxac. Qaq 'am qom ivita da aÿim 'añi'iguelqot, nachi 'autauan qome na 'adqaÿañicpi da yaqto' nachi 'eetai' da lpi'iÿaxac.

2 Timoteo 1:9

Ñim Dios mayi qomi' nca'alaxatreec, qataq iÿaxana da qanachaalataxac da yaqto' sanqot. Qaq de'eda qomi' i'oteque, damayi nachi 'eetai' da lhuennataxa. Sa ishit da huo'otaq chochi nqopita'a ca qadataxac no'on. Mayi souaxat da qomi' ÿauoteque, cha'ayi mashi ñi'adaqtau'a so Cristo Jesús. Qataq nal'eno' da qomi' ÿauoteque co'ollaq saxanaqaca ana 'alhua.

Colosenses 2:7

cam lpa'a'q da qanachaalataxaqui n'attalec somayi, qataq n'oxootalec somayi da qadpi'iÿaxaqui. Cha'ayi nachida da qami' qaÿapaxaguenque co'ollaxa, yaqto' nachi 'eetai' da qai'añiitacot da qan'achiquiaxaqui ñi Dios.

Romanos 15:5

Qaq ñim Dios mayi ÿan da nhualaxavic qataq da n'añaxac itauan qome ñi 'oonolec da qoñiita, da ÿataqta 'oonolec ca qadhuennataxaqui mayi chigoqo'ot so Cristo Jesús,

1 Juan 2:25

Qaq som Jesucristo qomi' ÿachaxanapeguema co'ollaxa da achaalataxac mayi chochaq tateec.

Hebreos 9:15

Qaq ÿoqo'oyi so Jesucristo nachiso som qomi' detaqleguete nagui dam dalaxaic aÿamaxataxac. Qaq de'eda l-leuaxa so Cristo, damayi naigui da yaqto' qaÿapalaxat nam nasouaxashitpi mayi huaigui so hua'auchiguiñi aÿamaxataxac, qataq yaqto' nam iÿaxana ñimayi ishit da ÿaconguet ca ÿachaxanapec mayi chochaq tateec.

Romanos 15:13

Qaq ñi Dios mayi qomi' ÿanema da qanaquitaxac qami' nlaxatchiguilo qome da qantonaxaqui qataq da qadlagaxayiqui souaxat da qau'amaqchiñi ñimayi, da yaqto' chochaq huañi da qanaquitaxaqui souaxat da l'añaxac so Espíritu Santo.

Romanos 9:11

Cha'ayi soomayi co'ollaq saxanaxa da ñiyiñi, qataq saxanaxa da huo'otaq huo'o ca i'ot ca no'on huo'otaq ca qauem, qalaq ñi Dios 'enapega aso Rebeca, 'eeta': “Yim ÿi yiua 'ai'alqa, nachiyi qome yi l-latac yim n'asa.” Qaq damayi nateeteguet da 'enapec naua ñiyigui'shi l'aqtaqa ñi Dios mayi 'eeta': “Ÿauotaxat so Jacob, qaq so Esaú qalaxayi sa ishit.” Huaña, nachi ÿoqta yi'oqteec da 'eetec ñi Dios da maichi lca'ateu'a cam tajlec yi lavilÿaxac da iÿaxana, qaq sa ishit da ilotagui ca 'eetec ca i'ottac.

1 Pedro 4:11

Da huo'o ca qoÿanem da da'aqtaxan, qalaq naua l'aqtaqa ÿataqta nachinaua naua l'aqtaqa ñi Dios. Qataq ca qoÿanem da l'onataxanaxac, qalaq nachida da n'añaxac mayi ÿanem ñi Dios. Qaq 'enauac nam qaÿacoolec da qai'ot, namayi naigui da yaqto' qaÿi'oxoden ñi Dios, chigoqchigui so Jesucristo. Somayi mayi lalamaxat da lli'oxoyic qataq da l'añaxac mayi qaica ca loga't. Aja', nachi 'eetec.

Romanos 9:24

Cha'ayi ñi Dios da qomi' iÿaxanalo, qalaq huo'o na chigoqtoigui naq'en na judiopi, qataq na laÿipi huo'o na chigoqtoigui naq'en na saq judiopi.

1 Corintios 1:10

Qami' ÿaqaÿa't, qami' sedolguete da l'enaxat so qadataxala' Jesucristo da qami' saqatalo da ÿataqta 'oonolec da qadtaxaÿaxaqui. Sa ishit da qaucolaqaitagui. Chaqdata da qaica ca ÿaqpeuga, 'oonolec da qadhuennataqai qataq ca qoñiitapeguec.

1 Pedro 4:10

Qataq ñi 'oonolec ÿataqta iloteguet ca nshitaxat mayi ÿanem ñi Dios da do'onataxaalec na laÿipi, qoñiita'am ca ÿataqta ÿaÿaten da ilo'ogue na ÿotta'a't lachitaqtaxanaxatpi ñi Dios.