Zekhariah 9:9 - Tedim Bible Revision 2017

⁹ Zion mite aw, nakpi takin lungdam un. Jerusalem mite aw, lungdamin awng un. En un, na kumpipa uh hong pai hi. Amah, gualzawhna tawh hong pai hi. Ahi zongin kiniamkhiatna tawh hong pai a, sin nai loh la no tungah hong tuang hi.

Tedim Bible

⁹ Zion mite aw, nakpi takin lungdam un. Jerusalem mite aw, lungdamin awng un. En un, na kumpipa uh hong pai hi. Amah, dikna leh gupkhiatna tawh hong pai a, ahi zongin kiniamkhiatna tawh hong pai-in sin nai loh lano tungah hong tuang hi.

Zekhariah 9:9 Referans Kwoze

Zekhariah 2:10

Topa in hih bangin hong ci hi: “Jerusalem mite aw, lungdamin la sa un. Note tawh a hong om khawm ta ding ka hi hi,” ci hi.

Marka 11:7

Jesu kiangah a la no tunpih uh a, a la no tungah a puan uh phahin a tungah Jesu a tuang hi.

Isaiah 43:11

“Kei, keimah pen Topa ka hi a, kei sim loh honpa dang om lo hi.

Mattiu 11:29

Keima hakkol zamin kisuan unla, kei kiangah hong kisin dih un. Kei pen kiniamkhiatin nem hithiat ka hih manin ka kiangah na tawl uh a dam ding hi.

Isaiah 40:9

Jerusalem aw, mual sang dawnah kah to-in lungdamna thu kiko in. Zion aw, nakpi takin awng inla, lungdamna thu taangko in. Nakpi takin kiko inla, lau kei in. Judah gam khuapite tungah, “Na Pasian uh hong pai ta hi,” ci-in gen ta un.

Isaiah 62:11

Leimong dongah Topa taangko khin hi. Jerusalem mite tungah, “En un, no hong hon khia pa hong pai hi. Ama sep thaman a mite hong pua a, a gualzawhna thaman a mite hong masuan hi,” ci un.

Isaiah 43:3

Bang hang hiam cih leh kei pen Topa na Pasian, Israel-teʼ Siangtho Pa, nangmah hong honpa ka hi hi. Nangmah tat nadingin Egypt ka pia a, nangmah khek nadingin Ethiopia le Seba ka pia hi.

Isaiah 12:6

Zion-a teeng mite aw, nomauʼ lakah Israel-teʼ Siangtho Pa lianin om ahih manin lungdamin awng unla, lungdamin la sa un,” a cih hun uh hong tung ding hi.

Late 2:6

“Ka mual siangtho Zion tungah ka kumpi ka tusak khin hi,” ci hi.

Johan 1:49

Tua ciangin Nethanel in, “Sia aw, nang, Pasianʼ Tapa na hi hi. Israel miteʼ Kumpi zong na hi hi,” a cih ciangin

Mattiu 1:21

Amah in tapa khat hong nei dinga, tua tapa in ama mite a mawhna uh panin hon khia ding ahih manin ama min dingin Jesu na phuak ding hi,” ci-in thu a gen hi.

Jeremiah 30:9

Topa, amauʼ Pasianʼ na ahi a, amauteʼ kumpipa-in ka koih ding Davidʼ na ahi zongin a sem zaw ding uh hi.

Isaiah 45:21

Na thu uh sung unla, hong gen un. Na thu uh kikum khawm un! Hih thu sawtpekin kua in gen ahi hiam? Tanglai-in kua in pulak ahi hiam? Keimah Topa hi lo ka hi hiam? Thuman Pasian le Honpa ahi, kei sim loh pasian dang om lo a, kei sim loh kuamah dang om lo hi.

Late 45:1

Thubul hoih khat tawh ka lungsim hong dimletin, kumpipa la ka phuah a, ka leii pen lai thei paʼ laikung tawh hong kibang hi.

Johan 19:15

amaute in, “That in, that in, singlamteh tungah that in,” ci-in a kiko uh hi. Pilat in, “Na Kumpipa uh that mawk ding ka hi hiam?” a cih ciangin siampi liante in, “Rom gam khempeuh a uk Kumpipa sim loh kumpi dang ka nei kei uh hi,” ci-in a dawng uh hi.

Mattiu 2:2

“Jew miteʼ kumpi ding ahi naungek a hong suak pen koi lai ah om ahi hiam? Nisuahna lam pan ama aksi hong suah ciangin ka mu uh a, amah a bia dingin a hong pai ka hi uh hi,” hong ci uh hi.

Luka 24:27

Tua ciangin Jesu in Lai Siangtho sungah ama thu a kigennate khempeuh, Moses laibu a kipanin kamsangteʼ laibu khempeuh a khiatna a gen hi.

Thukhente 10:4

Amah in la sawm thum tungah a tuang tapa sawm thum a nei hi. Amaute in Gilead gam sunga om tu dongin Havvoth jair a kici khuapi sawm thum nei uh hi.

Late 149:2

Amah a Bawlpa tungah Israel lungdam henla, amauʼ Kumpipaʼ tungah Zion mite kipak tahen.

Isaiah 30:6

Negeb gam a om ganhingte tawh kisai thu hih bangin gen hi: Amaute in humpinelkai nu le humpinelkai pa, gul gunei le a leeng thei gulpi a omna, lungkhamna le gimna gam nawkin, amauʼ hauhnate la nungzang ah amauʼ sumte kalaoh tungah suanin, amaute tungah phattuamna bangmah a pia thei lo mite tungah a puak uh hi.

Isaiah 33:22

Bang hang hiam cih leh Topa pen eiteʼ thukhen, Topa pen eite hong ukpa, Topa pen eiteʼ kumpi ahi hi. Amah in eite hong hon khia ding hi.

Isaiah 57:15

Bang hang hiam cih leh a sang, a lian, a nungta tawntung Pa, ama min Siangtho ahi pa in hih bangin ci hi: “Kei pen a sangna mun le a siangtho munah ka om a, a kiniamkhiat miteʼ lungsim le a kisik miteʼ lungsim a thakhauhsakkik dingin kisikna le kiniamkhiatna lungsim a neite tawh zong kei ka om khawm hi.

Hosea 1:7

Ahi zongin Judah mite ka hehpih dinga, namsau le thal, sakol le sakol tung tuangte le galsimna tawh hi loin, amauteʼ Topa Pasian ahi kei mahmah in amaute ka hon khia ding hi,” a ci hi.

Micah 5:2

Bethlehem Efrathah khua aw, nang pen Judah gamah khua neu pen khat na hi a, ahi zongin nang sung panin Israel-te a uk ding khat ka piangsak ding hi. Ama gui pen tangtawng pek tawh kizom hi.

1 KUMPI MASATE 1:38

Tua ahih ciangin Zadok, kamsang Nathan, Jehoiadaʼ tapa Benaiah le Khereth mite le Peleth mite pai sukin Kumpi Davidʼ la-sakol tungah Solomon tuangsak uh a, Gihon ah amah paipih uh hi.

Isaiah 52:7

Thuhoih hong puak, kilemna thu a genzak, thuhoih thupha a hong puak, hotkhiatna thu a genzak, Zion tungah, “Na Pasian in uk hi,” ci-in mualte kantanin thu hong gen kamtai pa bangzahin hoih ahi hiam?

Ezekiel 21:32

Mei in note hong kaang tum dinga, noteʼ gam mahah na sisan uh luangin, kuamah in note hong phawk kha nawn lo ding hi, Topa in ci hi, ci-in gen in,” a hong ci hi.

Micah 4:8

Pasian in a mite a etna Jerusalem khuapi aw, nidang a na vangliatna na ngahkik dinga, kumpi khuapi na suakkik ding hi.