Zefaniah 3:15 - Tedim Bible Revision 2017

¹⁵ Topa in na galte hong phiatkhiatsak khin a, hong langpang khempeuh hong hawl khiatsak khin hi. Topa ahi Israel kumpipa nang tawh hong om a, na launa ding bangmah om nawn lo hi.

Tedim Bible

¹⁵ Topa in na galte hong paihkhiatsak khin a, hong langpang khempeuh hong hawlkhiatsak khin hi. Topa ahi Israel Kumpipa in nang tawh hong om a, na lau nading thu om nawn lo hi.

Zefaniah 3:15 Referans Kwoze

Isaiah 51:22

Ama mite adingin a thumsak Topa, Topa ahi noteʼ Pasian in hih bangin ci hi: “En un, noteʼ khut sung panin hoina hai ka la khia khin a, ka hehna haipi na dawn nawn kei ding uh hi.

Ezekiel 39:29

Israel mite tungah ka kha ka sung dinga, amaute ka nungngat nawn kei ding hi. Topa Pasian in hih thu ka gen khin hi,” hong ci hi.

Zefaniah 3:5

Ahi zongin tua khuapi sungah Topa omin, a thuman na bek sem a, a khialin gamta ngei lo hi. Zingsang simin mihingte tungah pelh ngei loin thutang lak hi. Ahi zongin tua lai-a mihing thuman lote, a sia-in gamta teitei uh a, maizumna mel theithei lo uh hi.

Amos 9:15

Amaute adingin ka piak gam sungah amaute ka koihkik dinga, tua ka piak sa gam panin kuamah in amaute la khiakik nawn lo ding hi, Topa, noteʼ Pasian in ci hi, a ci hi.

Johan 1:49

Tua ciangin Nethanel in, “Sia aw, nang, Pasianʼ Tapa na hi hi. Israel miteʼ Kumpi zong na hi hi,” a cih ciangin

Zekhariah 14:11

Tua khuapi sungah lungmuang takin mi teeng ding uh a, lauhuaina tuak kha nawn lo ding uh hi.

Zekhariah 12:3

Tua hun hong tun ciangin suangtumpi gik mahmah bangin Jerusalem khuapi ka bawl dinga, likkhiat a sawm minam khat peuhpeuh in liamlawh ding hi. Leitung minamdang khempeuh kipawlin Jerusalem a sim ding uh hi.

Isaiah 60:18

Na gam sungah ngongtatna thu kiza nawn lo dinga, na gam sungah siatmaina le suksiatna om nawn lo ding hi. Nangmah in na kulhte pen Hotkhiatna, na kulh kongpite pen Phatna, na ci ding hi.

Isaiah 33:22

Bang hang hiam cih leh Topa pen eiteʼ thukhen, Topa pen eite hong ukpa, Topa pen eiteʼ kumpi ahi hi. Amah in eite hong hon khia ding hi.

Late 85:3

Na hehna khempeuh na damsak a, na sinsona na daisak hi.

Mangmuhna 12:10

Tua ciangin vantungah nakpi takin awging khat ka za a, “Tu-in Pasian in hong hon khia khinta a, kumpi vangliatna a neihna hong lak khia khinta a, ama Khris in aana a neihna thu lak khia khinta hi. Bang hang hiam cih leh a sun a zanin eiteʼ Pasianʼ mai ah dingin i sanggamte mawhsakna a gen tawntung pa, tu-in vantung panin kilawn khia khinta hi.

Mangmuhna 7:15

Tua ahih manin Pasianʼ tokhom mai ah amaute ding uh a, sun le zanin a biakinn sungah ama na sem uh hi. Tokhom tungah a tupa in amaute ompihin a hu ding hi.

Johan 19:19

Pilat in lai khat gelhsakin, “Jew miteʼ Kumpipa, Nazareth khuami Jesu,” cisak a, singlamteh tungah a suangsak hi.

Zekhariah 9:9

Zion mite aw, nakpi takin lungdam un. Jerusalem mite aw, lungdamin awng un. En un, na kumpipa uh hong pai hi. Amah, gualzawhna tawh hong pai hi. Ahi zongin kiniamkhiatna tawh hong pai a, sin nai loh la no tungah hong tuang hi.

Zefaniah 3:17

Topa na Pasian un note hong ompih a, ama vangliatna in hong gualzosak hi. Note tungah Topa lungkim dinga, ama hong itna tawh hong thakbawl ding hi. Noteʼ hangin Topa lungdamin la sa dinga,

Habakkuk 2:17

Note in Lebanon gam singkungte phuk na hih manun note zong hong kiphuk dinga, a ganhingte zong that na hih manun tu-in ganhingte in note hong lausak ding uh hi. Gam sung khempeuh ah mi thatin na bawlsiatna hang uh le khuapite le a sunga teengte na suksiatna hangun note tungah hih bangin a hong piang ding ahi hi.

Micah 7:10

Tua hun ciangin ka galte in hih thu hong mu ding uh a, “Na Topa Pasian, koi ah om ahi hiam?” ci-in a hong tawng ka galte a maizum ding uh hi. Amaute guallel ding uh a, kongzing buannawng bangin a kisik gawp mu-in, kei ka nuam ding hi.

Joel 3:17

Tua ciangin Topa in, “Israel-te aw, ka mual siangtho Zion tungah a teeng keimah pen Topa noteʼ Pasian ka hihna na hong thei ding uh hi. Jerusalem pen a siangtho biakna khuapi hi dinga, gamdang mite in zokik nawn lo ding uh hi.

Ezekiel 48:35

Khuapi kimkot a sauna pi tul sawm thum za nih sawm li pha a, tu a kipanin hih khuapi min pen, ‘Hih lai ah Topa om hi,’ kici ding hi,” hong ci hi.

Isaiah 65:19

Jerusalemʼ hangin ka lungdam dinga, ka miteʼ hangin ka kipak ding hi. Tua khua sungah kahna aw le cimawhin kikona aw om nawn lo ding hi.

Isaiah 54:14

Thuman le thutang in nang hong thahatsak ding hi. Nenniamna tawh na kigamla dinga, nang na lau kei ding hi. Kihtakna tawh na kigamla dinga, nangma nai ah tuate hong pai lo ding hi.

Isaiah 25:8

Amah in sihna beisak mang dinga, maitang khempeuh panin khitui nul ding hi. Leitung khempeuh panin ama mite a kizahkona la khia ding hi. Bang hang hiam cih leh Topa in hih thu gen khinzo hi.

Piancilna 30:23

Amah gai-in tapa khat nei a, “Pasian in kei hong kikona teng la khia khinta hi,” a ci hi.

Mangmuhna 19:16

A puan tung le a phei tungah, “Kumpiteʼ Kumpi, topateʼ Topa,” ci-in a min kigelh hi.

Habakkuk 2:8

Note in minam dang tampiteʼ na na sut uh a, tu-in a om lai mite in noteʼ na hong sut ding uh hi. Bang hang hiam cih leh note in mi thatin, khuapite le a sunga teeng mite na bawlsia uh hi.

Isaiah 35:10

Topa’ hotkhiat sa mite hong ciahkikin, lungdam tawntungna mai pua-in la sa kawmin Jerusalem ah hong tung ding uh hi. Amaute in lungdamna le kipakna ngah ding uh a, dahna le khuisatna om nawn lo ding hi.

Johan 5:30

“Keima thu guak tawh ka hih theih bangmah om lo hi. Pasianʼ hong genna bang bekin thu ka khen hi. Keima ut bangin sem loin kei hong sawl paʼ deih bangin sem ka hih manin ka thukhenna thuman hi.

Mangmuhna 18:20

Vantung aw, ama siatna hangin lungdam in. Mi siangthote, sawltakte le kamsangte aw, note tungah hong gamtatna hangin Pasian in ama tungah thukhenna pia khinta ahih manin lungdam ta un,” a ci uh hi.

Late 19:9

Topa a kizahtakna siang a, kip tawntung hi. Topaʼ ngeina kipte thuman a, a vekin kituakin man kim hi.

Isaiah 12:6

Zion-a teeng mite aw, nomauʼ lakah Israel-teʼ Siangtho Pa lianin om ahih manin lungdamin awng unla, lungdamin la sa un,” a cih hun uh hong tung ding hi.

Ezekiel 35:10

“Kei pen Israel le Judah miteʼ Topa Pasian hi napi-in, hih minam nihte nangma aʼ in ngaihsunin a luah dingin na kigen hi.

Late 149:2

Amah a Bawlpa tungah Israel lungdam henla, amauʼ Kumpipaʼ tungah Zion mite kipak tahen.

Isaiah 52:9

A kisia Jerusalem munte aw, la sa-in kiko khawm un. Bang hang hiam cih leh Topa in ama mite hehnem ta a, Jerusalem hon khia khinta hi.

Jeremiah 8:19

Ngai un, gam sung mun khempeuh ah ka miteʼ tanute kap uh a, “Zion khua ah Topa om nawn lo ahi hiam? A kumpipa uh om nawn lo ahi hiam?” a ci uh hi. Topa in dawngkik a, “Bang hangin milim bawl tawmte le a gamdang milimte uh tawh kei hong hehsak ahi uh hiam?” a ci hi.

Ezekiel 36:15

Minam dangteʼ hong ko bawlna za nawn loin, a hong mindaisakna uh na thuak nawn kei ding uh a, na sung uh ah a teeng miteʼ tate zong no Israel mual tung gamte in na laksak nawn kei ding uh hi. Topa Pasian in hih thu ka gen khin hi,” hong ci hi.