Titu 3:5 - Tedim Bible Revision 2017

⁵ amah in eite hong hon khia hi. Eite in na hoih i sep zawhna hangin hong hon khia hi loin eite tungah suahtakna le nuntakna thak a hong pia Kha Siangtho in hong sawp siangna hangin a hong hehpihna tawh a hong hon khia ahi hi.

Tedim Bible

⁵ eite gamtatna pha hang hi loin ama hehpihna bangin nihvei suahna tawh kipawl sawp siangna tawh ahi zongin, Kha Siangtho’ hong bawlphat thakna tawh hong gum hi.

Titu 3:5 Referans Kwoze

2 TIMOTI NIHNA 1:9

Eiteʼ sep zawhna hang hi loin ama ngimna sa bang leh a dikna hangin Pasian in eite hong hon khia-in ama mi dingin a hong sam hi. Pasian in leitung a pianmapekin Khris Jesu tungtawnin tua dikna a hong piak hi a,

1 KORIN MASA 6:11

Note pawl khat, tua bangin na gamta uh hi. Ahi zongin note pen i Topa Jesu Khris le i Pasianʼ Kha Siangtho hangin mawhna panin a hong kisiangsak khin sa, Pasianʼ tungah a kipia sa, Pasian tawh a kipawl sa mite na hi uh hi.

1 PETER MASA 3:21

Tui pen note a hong hon khia tuiphumna lim hi a, pumpi panin nin sawp khiatna lim hi loin, Jesu Khris thawhkikna hangin lungsim siantho nadingin Pasianʼ tungah kamciamna lim ahi hi. Tua Jesu thawhkikna in note hong hon khia ahi hi.

1 PETER MASA 1:3

I Topa Jesu Khrisʼ Pa Pasian tungah lungdam ni. Ama hong hehpih mahmahna hangin sihna panin Jesu Khris a thawhkiksakna tawh eite tungah nuntakna thak a hong pia hi. Tua ahih manin i lametna kiam ngei lo a,

ROM (Romans) 12:2

Leitung mihingteʼ gamtat bangin gamta kei unla, na lungsim uh kikheelin Pasian kipuahphasak un. Tua hileh a hoih nate bang hi a, bangte in amah lungkimsakin, bangte a kicing hiam ci-in thei-in Pasianʼ deihna na phawk thei ding uh hi.

Efesa 2:4

Tua bang hi napi-in Pasianʼ hong hehpihna le eite hong itna lian mahmah ahih manin,

Efesa 5:26

Pawlpi pen paubaanna a om het lo, a siangtho mahmah in Khris kiangah a kipiak theih nadingin Pasian thu tawh tui ah a silsiang khit ciangin Pasian kiangah a ap theih nadingin pawlpi adingin Khris a kipia ahi hi.

Late 51:10

Pasian aw, keima sungah lungsim siangtho hong piangsak inla, a thak a man ngaihsutna ka sungah hong guan in.

ROM (Romans) 11:6

A teelna ah miteʼ nasepna bulphuhin a teel hi loin ama dikna hangin a teel hizaw hi. Pasian in mihingteʼ nasepna bulphuhin a teel hileh Pasianʼ dikna pen dikna kici thei lo ding hi.

Hebru 4:16

Tua ahih manin a kisap hunin, eite a hong huh dingin hehpihna le dikna thupha i ngah theih nadingin, kimuanna lungsim tawh hehpihna tokhom va zuan ciat ni.

Kolose 3:10

ngeina thak tawh kituakin gamta un. Eite a hong piangsak Pasian a kicing takin i theih semsem nadingin amah a sun dingin a hong thakbawl tawntung ahi hi.

Late 86:15

Ahih hangin Topa aw, nang pen a hehpih thei, a dik Pasian na hi a, heh hak mahmah in, itna kip le thumanna tawh a kidim na hi hi.

Galati 2:16

Ahi zongin Jesu Khris upna hang bek tawh Pasian tawh kipawl theihna kingahin, Thukham zuihna hang tawh kingah ngei lo hi, ci-in ka thei uh hi. Kote mahmah in zong, Khris hangin Pasian tawh ka kipawl theih nadingun Jesu Khris ka um uh a, Thukham deihna ka zuihna hang uh tawh hi lo hi. Bang hang hiam cih leh Thukham zuihna hang tawh kuamah in Pasian tawh kipawl theihna ngah zo lo hi.

ROM (Romans) 3:20

Thukham in mihingte a mawhna kilangsak thei bek ahih manin thukham zuihna hangin kuamah in Pasian tawh kipawl theihna ngah zo lo hi.

1 PETER MASA 2:10

Nidangin Pasianʼ mi na hih loh uh hangin tu-in ama mi na hi uh a, nidangin Pasianʼ hehpihna na theih loh uh hangin tu-in ama hehpihna na ngah uh hi.

Efesa 4:23

na lungsim uh le na ngaihsutna uh thaksuaksak un.

ROM (Romans) 3:28

Bang hang hiam cih leh mi khatpeuh Pasian tawh a kipawl theihna pen Thukham zuih zawhna hang hi loin upna hang hi, ci-in i gen zo hi.

ROM (Romans) 9:11

Pasianʼ teelna pen a teel miteʼ nasepna hang hi loin Pasianʼ sapna tawh kisai zaw hi, ci-in a kilat nadingin a tate a sia a pha a gamtat theih ma, a suah ma pek mahin

Luka 1:78

I Pasian lungnem mahmah a, hehpihna hong nei hi. Eite tungah hotkhiatna khuavak hong taangsak dinga,

Luka 1:54

I pu i pate tungah a kiciamna tungsak a, a nasem pa Israel a huh hi.

Luka 1:50

amah a zahtak mite tungah a khangkhangin hehpihna a lak hi.

Micah 7:18

Topa aw, nang tawh a kibang Pasian dang om lo a, a om lai na miteʼ mawhna nangmah in na maisak hi. Nang na heh paisuak kei a, na itna kip nong lak hi.

Late 143:2

Na nasem pa, thu hong sit kei in. Bang hang hiam cih leh nangma mai ah mihing a dik zo kuamah om lo hi.

Late 130:7

Israel aw, Topa muang in. Bang hang hiam cih leh Topaʼ itna kip tawntungin, hong hon khia nuam tawntung hi.

JOB (Job) 25:4

Pasianʼ muhna ah kua dik zo dinga, siangtho zo ding ahi hiam?

Titu 3:4

Ahi zongin eite hong Honpa ahi Pasianʼ itna le a migitna thu hong kilat ciangin,

ROM (Romans) 9:30

Tua ahihleh Pasian tawh kipawl theih nading hanciamna a nei lo Gentail mite pen upna hangin Pasian tawh kipawl thei a,

ROM (Romans) 9:16

Tua ahih ciangin miteʼ utna le sepna tawh kisai lo a, Pasianʼ hehpihna bek tawh kisai zaw hi.

ROM (Romans) 4:5

Ahi zongin Pasianʼ maipha ngah nadingin nasepna suang loin upna a suang mipa pen Pasian in mimawh kimlai midik hi, ci-in sang ahih manin, amah tawh a kipawl theih nadingin Pasian in tua mipaʼ upna thupi san hi.

Luka 1:72

I pu i pate a hehpih nading le ama thuciam siangtho hong mangngilh loh nading, amah in hong gen hi.

Isaiah 57:12

Nangma gamtatna a manin na ngaihsun kha hi. Ahih hangin na gamtatnate ka pholak dinga, na milimte in nang hong huh zo lo ding hi.

Hebru 6:6

amaute a tawpkik leh, amau utthu tawh singlamteh tungah Pasianʼ Tapa thatkikin a zumhuai dingin a pholak kikkik suak uh ahih manin a kisik theih nading uh lampi om nawn lo hi.

Late 86:5

Bang hang hiam cih leh Topa aw, nangmah hoihin mawhna na maisak a, hong ngente khempeuh tungah itna kip tampi na nei hi.

Late 62:12

Topa aw, itna kip nangma aʼ ahi hi. Bang hang hiam cih leh a sepna bang ciatin mite na thuk hi.

JOB (Job) 15:14

“Mihing a a piang peuhmah paubaang het loin siangtho taktak zo ding ahi hiam? Pasianʼ tungah a thuman zo kua om ding ahi hiam?

JOB (Job) 9:20

Kei ka dik hangin keima kam mah siksanin kei hong man dinga, mawhbaang lo ka hih hangin keima kampau hong leh heisak ding hi.

Thu-hilhkikna 9:5

Na thumanna hang uh ahi a, na lungsim manna hang uh tawh ahi zongin amauʼ leitang a luah ding na hi kei uh hi. Topa na Pasian un na mai panun amaute a hawl khiatna pen hih minamteʼ gitlohna hang le Topa in na pu na pate uh Abraham, Isaac le Jakob tungah a thuciamna kammal a kipsak theih nading ahi hi.

Ezekiel 36:25

Note tungah tui siangtho kong theh dinga, na milim biakna uh le note hong ninsak na dang khempeuh panin kong siangsak ding hi.

Mattiu 3:11

Na kisikkik khitna uh a kilat nadingin tui sungah note ka hong phum a, ahi zongin kei nungah a hong pai pa in Kha Siangtho le mei sungah note hong phum ding hi. Tua a hong pai ding pa pen kei sangin nakpi takin lian zaw a, ama khedap a tawisak ding nangawnin ka kilawm zo nai kei hi.

ROM (Romans) 11:14

Bang hang hiam cih leh ka mipihte in note hong en theih nading uh piangsak thei-in, tua manin amaute pawl khat in hotkhiatna a ngah nading uh piangsak zo kha dingin ka kilamen hi.

Hebru 10:22

Tua ahih manin mawhna thu ah kisuanna lungsim om nawn loin, tui siangtho tawh i pumpi a kisawp sa-in muanna le lungsim takpi tawh Pasian kiang zuan ni.