Solomon la 5:16 - Tedim Bible Revision 2017

¹⁶ A kampaute khum zungzung a, a vekin, deih loh ding khat zong om lo hi. Ka ngaihno, hih bang teng hi, Jerusalem nungakte aw.

Tedim Bible

¹⁶ A kampaute, khum zungzung a, a vekpi-in, deih loh ding, khat zong om lo hi. Ka ngaihno, hih bang teng hi. Jerusalem nungakte aw.

Solomon la 5:16 Referans Kwoze

Late 45:2

Mihingte lakah nangmah na hoih pen a, thugen na siam a, na kam khum zungzung hi. Tua ahih manin Pasian in nang thupha hong pia tawntung hi.

Solomon la 7:9

Na kam, leenggahzu bangin khum zungzung hi. Ka ngaihno tungah leenggahzu khum luang henla, a muk a ha tawk kim hen.

Jeim 4:4

A citak lo mite aw, leitung tawh kipawlna pen Pasian tawh kigal neihna ahih lamtak thei lo na hi uh hiam? Leitung tawh a kipawl mite pen Pasian tawh a kigal neih dingin a kibawlbawl ahi uh hi.

Jeim 2:23

Lai Siangtho in, “Abraham in Pasian um a, a upna hangin Pasian in mihoihin a sang hi,” ci-in a genna thumanin tung takpi a, Abraham pen Pasianʼ lawmpa kici hi.

Filippi 3:8

Hih bang nate bek hi loin, ka Topa Jesu Khris ka theihna manpha zaw lua sa ka hih manin na dang khempeuh ka sum ngam zaw lai hi. Khris hangin na dang khempeuh ka nusia khin a, Khris tawh ka kipawl theih nadingin na dang khempeuh ninneng bang lelin ka ngaihsun hi.

Galati 2:20

Tua ahih manin tu hun a ka nuntakna zia pen kei hang hi nawn loin ka sungah a hong om Khris hang ahi hi. Tua hi a, keimah hong itin, keima adingin a nuntakna a hong pia Pasianʼ Tapa ka muanna tawh tu laitakin a nungta ka hi hi.

Hosea 3:1

Topa in kei kiangah thu hong genkik a, “Lawm a ngai khin sa, pasal tawh a lum khawm sa numei khat tawh va kingai in. Israel mite, pasian dangte kiangah pai uh a, leenggahkeu tawh a va biak uh hangin, amaute ka it lai veve mah bangin tua numei va it in,” hong ci hi.

Jeremiah 15:16

Na thute in kei hong kem a, an bangin ka ne hi. Na thute kei adingin kipahna le lungdamna ahi hi. Bang hang hiam cih leh nangma minin kei hong kilo hi, aw, Topa, Vanglian Pasian aw.

Jeremiah 3:20

Ahih hangin a thuman lo zi in a pasal a nusiat bangin Israel mite aw, Topa in kong cih in ah, no zong kei tungah nong thuman kei uh hi,’ ci-in va taangko in,” hong ci hi.

Solomon la 6:3

Ka ngaihno kei aʼ hi a, kei zong ama aʼ hiʼng. Amah in unok pak lakah a tuute gamtasak hi.

Solomon la 2:16

Ka ngaihno keima aʼ hi; kei zong ama aʼ hiʼng. Amah in unok paakte lakah a tuu cing a,

Solomon la 2:3

Ka ngaihno tangval dang tawh teh lehang gamlak singkung lak a a om epel kung tawh kibang hi. Ama liim ah ka tu nuam a, a gahte lim ka sa hi.

Solomon la 2:1

Kei pen Sharon gam sunga a om gamlak pak, mualkuam sunga a om unok pak bang ka hi lel hi.

Solomon la 1:16

Ngaihno ngingei aw, na etlawm a, na ngaihhuai hi.

Solomon la 1:2

Na muk tawh nong tawp a, na hong itna leenggahzu sangin khum zaw hi.

Late 148:13

Topaʼ min phat un. Bang hang hiam cih leh amah bek a min lian hi a, ama minthanna pen leitung le vantung sangin sang zaw lai hi.

Late 119:103

Nangma thute khum mahmah a, khuaizu sangin khum zaw hi.

Late 89:6

Bang hang hiam cih leh Topa pen vantung a kua tawh kiteh thei ding ahi hiam? Mi siangthoteʼ kikhopna sungah a kizahtak Pasian, a kiim a omte khempeuh tungah lianin a zahtakhuai Topa pen van miteʼ lakah kua pen tawh kibang ahi hiam?

Late 19:10

Kham sangin ahi zongin kham hoih pen sang ahi zongin tuate deihhuai zaw a, khuaizu le khuailuzu taakte sangin zong khum zaw lai hi.

2 SAMUEL NIHNA 1:23

“Saul le Jonathan, ki-it uh a, it-huai uh! A sih a hinin amaute kikhen lo a, muvanlai sangin zaptel zaw uh a, humpinelkai sangin thahat zaw uh hi.

Solomon la 1:5

Jerusalem nungakte aw, ka vom hangin ngaihbaang ing. Savun puanbuk bangin ang hiuhiau ing a, Solomonʼ puankhaite tawh kei ka kibang hi.

Solomon la 4:3

Na mukte puansan tawh kibang a, na kampau ngaihnop-huai hi. Na lu khuhna puan sung panin na kho hong san lihleh hi.