Sawltak 7:5 - Tedim Bible Revision 2017

⁵ Pasian in Abraham tungah ama aituam dingin leitang khut peek cia nangawn pia lo napi-in, amah le a suan a khakte tungah hih gam a piak nading thu a ciam hi. Pasian in tua thuciamna a piak laitakin Abraham in ta nei nai lo hi.

Tedim Bible

⁵ Hih gamah khe sik nading nangawn luahna a piak loh hangin, ‘Nang akipan na tate na tute kiangah hih gam kong pia ding hi,’ ci-in ta khat beek a nei nai lopi-in thu a ciam hi.

Sawltak 7:5 Referans Kwoze

Piancilna 17:8

Nangma tung le nangʼ khit cianga na suanlekhakte tungah tawl khat na omna Kanaan leitang khempeuh na neih tawntung dingun kong pia dinga, kei pen amauteʼ Pasian ka hi ding hi,” a ci hi.

Piancilna 12:7

Tua ciangin Abramʼ tungah Topa kilang a, “Na suanlekhakte tungah hih leitang ka pia ding hi,” a ci hi. Tua ahih ciangin amah in ama tunga kilang Topa adingin biakna tau khat a bawl hi.

Piancilna 15:18

Tua ni-in Topa in Abram tawh thuciamna khat bawl a, “Na suanlekhakte tungah hih leitang, Egypt gun panin a lian gunpi ahi Eufratis gun ciang dong,

Piancilna 13:15

Bang hang hiam cih leh na muh gam khempeuh nang le na suanlekhakte kong pia paisuak ding hi.

Piancilna 26:3

Hih leitang ah tawl khat om in. Nang tawh kong om khawm dinga, thupha kong pia ding hi. Bang hang hiam cih leh nang le na suanlekhakte tungah hih leitangte kong pia dinga, na pa Abrahamʼ tungah ka thuciam ka tungsak ding hi.

Nehemiah 9:8

Nangma tungah amah a cihtakna na mu a, Kanaan mite gam, Hit mite gam, Amor mite gam, Perez mite gam le Girgash mite gam, amah le a suanlekhakte tungah piak dingin ama tungah thuciamna khat na bawl hi. Nang thuman na hih manin na thuciamna na tungsak hi.

Thu-hilhkikna 34:4

Tua ciangin Topa in ama kiangah, “Hih gam, Abraham, Isaac le Jakob tungah kiciamin, ‘Na suanlekhakte uh tungah ka pia ding hi,’ ka cih leitang ahi hi. Na mit tawh nang kong musak khin a, ahih hangin tua lai ah nang na pai kei ding hi,” a ci hi.

Thu-hilhkikna 10:11

Topa in kei kiangah, ‘Amaute tungah piak dingin a pu a pate uh tungah ka kiciam leitang ah pai-in a luah theih nadingun ding inla, na khualzin uh zomin mite mai ah pai in,’ hong ci hi.

Thu-hilhkikna 9:5

Na thumanna hang uh ahi a, na lungsim manna hang uh tawh ahi zongin amauʼ leitang a luah ding na hi kei uh hi. Topa na Pasian un na mai panun amaute a hawl khiatna pen hih minamteʼ gitlohna hang le Topa in na pu na pate uh Abraham, Isaac le Jakob tungah a thuciamna kammal a kipsak theih nading ahi hi.

Thu-hilhkikna 2:5

Amaute tawh kiseel kei un; bang hang hiam cih leh amauʼ leitang them khat zong no kong pia peuhmah kei ding hi. Esauʼ neih dingin ama tungah Seir Mual pia khin ka hih manin khe a ta khop zah zong no kong pia kei ding hi.

Piancilna 23:4

“Kei pen note lakah khualmi hi-in peemta ka hi hi. Ka zi ka vui theih nadingin noteʼ lakah vui nading mun leitang hong pia un,” a ci hi.

Piancilna 16:2

Sarai in Abramʼ kiangah, “Tu-in en in, Topa in ka ta neih ding hong khaktan hi. Ka sila numeiʼ kiangah lum in. Ama sung panin keimah in ta a nei ding ka hi kha ding hi,” a ci hi. Abram in Saraiʼ thu mang hi.

Ezekiel 33:24

“Mihing ahi Ezekiel aw, Israel gam khuapi siate sungah a teeng mite in, ‘Abraham, mi khat bek hi napi-in gambup kipia hi. Tu-in eite a tampi ihih ciangin hih gam pen eima aʼ hi taktak hi,’ ci uh hi.