Sawltak 16:16 - Tedim Bible Revision 2017

¹⁶ Ni khat, thungetna mun a zuan dingin ka pai laitakun mailam thu a gen thei dawivei nasem numei khat in kote hong dawntuah hi. Tua numei in mailam thu a genna tawh a tote adingin sum tampi a ngahsak hi.

Tedim Bible

¹⁶ Tua nung ciangin thungetna mun lam ka pai lai takun aisanin ama tote ading summeet ngah thei, dawi-lut sila nungak khat in kote hong dawn hi.

Sawltak 16:16 Referans Kwoze

Siampi Laibu 19:31

“Vankahte le aisanna lamah kihei kei un. Amaute tawh a kininsak dingin amaute zong kei un; kei pen Topa na Pasian uh ka hi hi.

Isaiah 8:19

Amaute in note kiangah, “Phun suausuau-in a pau mualmual vankah theite le aisan theite kiangah thu dong un. Mite in amauʼ pasian-te thu dongin, mihingteʼ thu pen misite dot ding mah hi lo ahi hiam?” hong ci ding uh hi.

Galati 5:20

milim biakna, mi bumna, kilangbawlna, kitotna, hazatna, hehna, huaihamna, kikhenna, pawl tuam lungsim neihna,

1 KHANG TANGTHU MASATE 10:13

Tua ahih ciangin Saul a thuman lohna hangin a si hi. Amah in Topaʼ thupiakna a zuih lohna le vankah khat thu dongin a lamlah ding a zonna,

1 SAMUEL MASA 28:7

Tua ciangin Saul in a nasemte kiangah, “Ama kiangah pai-in ama tung pan thu ka dot theih nadingin vankah thei numei khat kei adingin hong zonsak un,” a ci hi. A nasemte in ama kiangah, “En in, Endor ah vankah thei khat om hi,” a ci uh hi.

1 TIMOTI MASA 6:10

Sum deih luatna in siatna namkim piangsak hi. Mi pawl khat in sum deih lua liang uh ahih manin a upna panun pial khia-in gimna lungkhamna tampi a thuak lawh uh hi.

2 TIMOTI NIHNA 3:8

Jannes le Jambres-te in Moses thu a nial mah bangin upna paizia a man lo hih thuhilh mite in zong thuman thutak a nial uh hi.

Sawltak 16:18

Tua bangin ni tampi sung awng ngitnget ahih manin a sawtna ciangin Paul in nawngkai sa ahih manin kihei-in a dawi kiangah, “Hih numei sung panin na paikhiat nadingin Jesu Khris min tawh thu kong pia hi,” a cih khit phetin, tua numei sung panin dawi a paikhia pah hi.

Sawltak 16:13

A Sabbath ni ciangin Jew miteʼ thungetna mun om ding hi, ci-in ka upna uh khua pualam a gun gei ah ka pai uh a, tua lai ah tu-in a kikhawm numeite tungah thu ka hilh uh hi.

1 SAMUEL MASA 28:3

Tu-in Samuel si khin a, Israel-te khempeuh ama hangin kapin, ama khuapi Ramah ah vui uh hi. Saul in vankahte le aisante a gam sung panin beisak hi.

2 PETER NIHNA 2:3

Hih sia man lote in a huaiham manun note kiang panin sum a ngah theih nadingun phuahtawm thu hong gen ding uh hi. Ahi zongin sawt pek a kipanin amauteʼ thu a Khen ding pa a kiging sa-in om niloh a, amaute a Susia ding pa in en gige hi.

Sawltak 19:24

Demetrias min nei ngunseek mipa khat in Artemis nusian biakna inn lim ngun tawh bawl a, tua nasepna in amah le a nasep pih mite adingin hauhna lianpi a piangsak hi.

Siampi Laibu 20:6

“Mi khat vankahna le aisan lamah kihei-in tuate thu a dot leh, keimah in tua mipa ka maisiat dinga, ama mite lak panin amah ka hawl khia ding hi.

Siampi Laibu 20:27

“Numei ahi a, pasal ahi zongin van a kah a, ai a saan leh kithat dinga, suang tawh amaute kidenglum ding hi. Amauʼ sihna amau mah ngawh ding ahi hi,” a ci hi.

2 KUMPI NIHNATE 21:6

Tua ciangin amah in biakna-in a tapa hal a, aisanna le mailam thugen kholhnate semin, vankah theite le aisante tawh nasem khawm hi. Topaʼ muhna ah amah a sia tampi gamta a, amah hehsak hi.

Sawltak 16:19

Tua numeiʼ tote in a sum ngah nading uh bei ta hi, ci-in a phawk uh ciangin Paul le Silas man uh a, thukhente omna sumbuk tual ah a kai uh hi.