Sawltak 16:15 - Tedim Bible Revision 2017

¹⁵ Amah le a inn sunga om mi khempeuh tui kiphum uh a, “Topa thu a um mi taktak hi, ci-in na hong ngaihsut nak uh leh hong pai unla, ka inn ah hong tung un,” ci-in hong samin a hong zol hi.

Tedim Bible

¹⁵ Amah in a innkuanpihte tawh a kibaptaiz khit ciangin, “Keimah in Topa sungah thu-um mi khat ka hihna nong up uh leh, keima innah hong tung un la, tam un,” ci-in thuumin, hong kho hi.

Sawltak 16:15 Referans Kwoze

Sawltak 11:14

Amah in nang le na innkuan khempeuh un hotkhiatna na ngah nading uh thu hong gen ding hi,’ a cihna thu a hong gen hi.

Hebru 13:2

Khual mite hoihtakin zin na do ding uh na phawk un. Mi pawl khat in vantung mite zin do ahih lam a phawk lopi-in a do na hi gige uh hi.

Sawltak 16:33

Tua zankim lai takpi mahin thongcing pa in amauteʼ liammate sawp siangsak a, amah le a innkuan pih mi khempeuh a kituiphum pah uh hi.

Luka 24:29

ahi zongin amau tegel in kho-in, “Tu-in nitak lam hi ta a, ni tum dektak ahih manin ko tawh hong tam khawm in,” a ci uh hi. Tua ahih manin Jesu zong amaute tawh a tam hi.

Piancilna 19:3

Ahih hangin amah in amaute nakpi takin kun ahih manin ama lamah kihei uh a, ama inn ah a lut uh hi. Amah in amaute adingin an bawl a, silngo sawh loh anlum emsak a, amaute in a ne uh hi.

3 JOHAN THUMNA 1:8

Tua ahih manin Pasian thuman nasepna ah nasem khawm mite ihih theih nadingin ei Khristiante in hih bang mite i huh ding ahi hi.

3 JOHAN THUMNA 1:5

Ka hong it lawm Gaias aw, na theih ngei loh hi napi-in i Khristian mipihte lungsim takpi tawh na na huh hi.

1 PETER MASA 5:12

Thu upna sungah mi citakin ka ngaihsut Silasʼ huhna tawh hih lai tomno gelhin amah ka hong puasak hi. Hih thute pen Pasianʼ hong hehpihna taktak hi, ci-in teci pangin note ka hong hanthawn hi. Tua ahih manin hih thute ah kipin om un.

Filemon 1:17

Tua ahih manin nasepna ah pawl khat taktakin kei na hong ngaihsut nakleh kei na hong limbawl ding zahin amah na lim bawl in.

Filippi 1:7

Lungdamna thu hangin ka thongkiatna le lungdamna thu man hi, ci-in pangin ka kipsak nading hun ka ngahna ah kei tawh a hong pangkhawm na hih manun ka lungsim sungah note na om tawntung uh a, hih zahta-in note ka hong phawk ding a kilawm thu mah ahi hi.

Efesa 1:1

Pasianʼ sawlna tawh Jesu Khrisʼ sawltak ahi keimah Paul in, Efesa khua ah a om thu um mite tungah lai ka hong khak hi.

Galati 6:10

Tua ahih ciangin hunhoih i ngah simin midangte tungah a hoihin i gamta dinga, a diakdiakin thu upna sungah i innkuanpihte khempeuh tungah i hoih gamtat ding i phawk ding hi.

2 KORIN NIHNA 12:11

Note in kei a hong pakta ding hi napi-in hong pakta lo na hih manun noteʼ bawlin mihai bangin kisialin ka gamta hi. Bang hang hiam cih leh kei pen bangmah pi ka hih loh hangin sawltak thupi mahmah in na ngaihsutte uh sangin them khat zong ka neu zaw tuan het kei hi.

2 KORIN NIHNA 5:14

Mi khempeuh adingin mi khat si khin ahih manin mi khempeuh zong a ngeina lui uh ah si khinta hi, ci-in ka theihna hangun tua Khrisʼ itna in koteʼ nuntakna hong uk hi.

ROM (Romans) 16:23

Keima zintunna pa le pawlpiteʼ kikhopna inn nei pa zong ahi Gaias in zong hong hopih hi. Ka omna khuapi sumkem pa Erastas le i Khristian sanggam Kuartas in zong hong hopih uh hi.

2 JOHAN NIHNA 1:10

Tua ahih manin Khrisʼ hilh ahi hih thute a hilh lo midang khatpeuh note kiangah a hong pai leh na inn uh ah zong na tungsak kei unla, zong na hopih kei un.

Sawltak 18:8

Kikhopna inn ukpa Krispas le a inn sunga om mi khempeuh in Topa thu um uh a, Korin khua-a om midang tampite in zong thuhilhna ngai-in um uh a, tui a kiphum uh hi.

Sawltak 8:38

Tua ciangin a leeng a khawlsak nadingin mangpa in thu pia a, Filip tawh a nihun tui phualah pai-in Filip in amah a tuiphum hi.

Sawltak 8:12

Ahi zongin Pasianʼ Ukna Lungdamna Thu le Jesu Khris thu, Filip’ gente a up uh ciangin, numei pasal a um khempeuh tui a kiphum uh hi.

Luka 14:23

Tua ciangin a topa in a nasem pa kiangah, ‘Gam sung lam liante le lam neute ah va pai inla, ka inn ah mi a dim theih nadingin mi khempeuh hong paipih mang khin in.

Mattiu 10:41

Pasianʼ thugen ahihna hangin Pasianʼ thugen mi a sangte in Pasianʼ thugenteʼ thaman ngah dinga, mihoih hihna hangin mihoih a sang mite in mihoihteʼ thaman ngah ding uh hi.

2 KUMPI NIHNATE 4:8

Ni khat Shunem ah Elisha paisuak a, tua lai ah a hau numei khat teengin tua nu in an ne dingin amah a sam hi. Tua ahih ciangin amah in tua lam a nawk peuhpeuh ciangin an ne dingin tua lai ah baang zel hi.

1 SAMUEL MASA 28:23

Amah in nial a, “Ka ne kei ding hi,” a ci hi. Ahih hangin tua numei tawh kopin a nasemte in ci teitei uh ahih manin amauʼ cih bangin a mang hi. Tua ahih ciangin leilak panin amah tho-in lupna tungah a tu hi.

Piancilna 33:11

Nangʼ kiang a hong kipaipih ka letsong nong san nadingin hong thum ing. Bang hang hiam cih leh Pasian in kei hong hehpih mahmah a, a kicing ka nei hi,” a ci hi. Tua bangin amah in kun teitei ahih manin Esau in zong a sang hi.

Mattiu 3:6

Amaute in a mawhnate uh hong pulak uh a, Johan in Jordan Gun sungah amaute a tuiphum hi.

Sawltak 16:31

Amaute in, “Topa Jesu um in. Tua hileh nang le na innkuanpihte in hotkhiatna na ngah ding uh hi,” ci-in a dawng uh hi.

Sawltak 16:34

Tua ciangin a inn ah amaute ciah pihin an a pia hi. Tu-in Pasian thu um uh ahih manin amah a kipan a innkuan pih khempeuh a lungdam mahmah uh hi.