Sawltak 15:9 - Tedim Bible Revision 2017

⁹ Pasian in eite le Gentail mite deidanna hong nei lo a, amaute in zong a up manun mi siangtho-in a bawl hi.

Tedim Bible

⁹ amaute leh eimaute atuam atuam khen loin upna tawh, amaute lung sungah siangthosakin amau ading teci a pang hi.

Sawltak 15:9 Referans Kwoze

Efesa 3:6

Tua thusim pen: Lungdamna thu a kihilhna hangin Gentail mite in Jew mite tawh Pasianʼ thupha ngahkhawm thei a, amaute tawh pawl khat suakin, Pasian in piak dingin a ciam thute, Khris hangin a ngah khop theihna uh ahi hi.

Sawltak 10:28

amaute kiangah, “Note mahmah in zong limtakin na theih ciat uh mah bangin Jew mite pen minam dangte kiangah hawhin a kikholh ding a ngeina hi lo hi. Ahi zongin mi khat peuhpeuh a nin hi, ci-in ka ngaihsut loh nadingin Pasian in kei tungah a thu hong lak khinzo hi.

Kolose 3:11

Tua ahih manin Gentail mi le Jew mi, vun at mi le vun at loh mi, khuapi mi le khua neu mi, sila le sila ahi lo, cih bangin a kilamdanna om lo a, Khris pen mi khempeuh ading hi thei a, thu khempeuh ading hi thei a, thu khempeuh ah amah bek ahi hi.

Galati 5:6

Bang hang hiam cih leh Jesu Khris tawh i kipawl ciangin vun atna le vun at lohna a thupi tuan om lo a, Khris i upna hangin midangte i itna a thupi hi bek hi.

Galati 3:28

Tua ahih manin Jew mi le Gentail mi, sila le sila ahi lo, numei le pasal cih bangin kideidanna om nawn lo a, note khempeuh Khris tawh na kipawlna hangun pawl khat hi-in, a kibang kim na hi uh hi.

1 KORIN MASA 1:2

Jesu Khris tawh kipawlna hangin Pasianʼ mi suakin, Pasianʼ mi siangtho cihna a ngah, Korin khua-a om Pasianʼ pawlpi mite le eiteʼ Topa bek hi loin, amauteʼ Topa zong ahi, i Topa Jesu Khris tungah thu a ngen, mun khempeuh ah a om mite tungah lai ka hong khak uh hi.

ROM (Romans) 3:22

Tua thu in: Jew mi le Gentail mi kuamah a kilamdanna om loin Jesu Khris upna hangin mi khempeuh in Pasian tawh kipawl theihna a ngah hi.

Sawltak 11:12

Lunghiang loin amaute ka zuih pah nadingin Kha Siangtho in kei tungah hong gen khinzo hi. Joppa khua panin hih i sanggam gukte in zong Sisaria khua ah hong zui uh a, ka vekpi-un Kornelias inn ah ka lut uh hi.

1 PETER MASA 1:22

Tu-in lungdamna thuman na zuihna hangun note kisiansuah khinin, na thu up pih mite uh lungsim tak tawh it thei khinta na hih manun na lungsim khempeuh uh tawh limtakin na ki-it un.

Sawltak 10:34

Tua ciangin Peter a kam ka-in thu hilh ding kipan a, “Pasian in kuamah angvan tuam nei loin,

1 KORIN MASA 7:18

Vun ki-at sa mi khat Pasian in a sap leh, a vun ki-atna lim phiat tuan kei tahen.

ROM (Romans) 9:24

Tua bangin a hong sap eite pen Jew mite sung bek pan hi loin Gentail mite sung panin zong ahi hi.

ROM (Romans) 3:9

Tua ahihleh Gentail mite sangin ko Jew mite hampha zaw ka hi uh hiam? Bangmah hamphatna nei tuan lo hi ung. Jew mite le Gentail mite a kibangin mawhna khut sungah om uh hi, ci-in ka gen khinzo hi.

Sawltak 14:27

Antiok khua a tun uh ciangin amaute in pawlpi mite khawm uh a, a khualzinna uh ah Pasian in na a seppihna khempeuh le Gentail mite in zong thu a up theih nadingun Pasian in lam a honsaknate khempeuh a gen uh hi.

Sawltak 14:1

Ikonium khua a tun uh ciangin Paul le Barnabas zong Jew mite kikhopna inn ah pai uh a, amauteʼ thuhilhna hangin Jew mi le Gentail mi tampi tak in Pasian thu um uh hi.

Sawltak 10:15

A awging in ama kiangah, “Pasian in a siangin a gen sa khat peuhpeuh a ninin ngaihsun kei in,” a ci leuleu hi.

Late 51:10

Pasian aw, keima sungah lungsim siangtho hong piangsak inla, a thak a man ngaihsutna ka sungah hong guan in.

Ezekiel 47:22

Note adingin na neih kip tawntung ding uh gamh hi ding hi. Hih leitang na hawm uh ciangin note lakah hong teengin ta a nei khin sa minam dangte zong note mah bangin tanh na pia ding uh hi. Amaute pen Israel minam taktakte mah bangin na ngaihsun ding uh a, Israel minam dangte mah bangin leitang hawmna ah ai sawk thei ding uh hi.