Paunak 5:21 - Tedim Bible Revision 2017

²¹ Bang hang hiam cih leh Pasian in na gamtatna khempeuh hong mu a, na paina khempeuh ah nang hong en kawikawi hi.

Tedim Bible

²¹ Bang hang hiam cih leh Pasian in na gamtatna khempeuh hong mu a, na paina khempeuh hong en kawikawi hi.

Paunak 5:21 Referans Kwoze

Hebru 4:13

Pasianʼ mai ah seelcip theih ding bangmah om lo hi. Eite khempeuh i din nading paʼ mai ah a kipiangsak na khempeuh a kiliah a ki-im thei om loin kimu sinsen hi.

Paunak 15:3

Topaʼ mit in mun khempeuh mu a, misia, mipha, hong encik kim hi.

Jeremiah 32:19

na ngimnate lian mahmah a, na sepnate thupi mahmah hi. Miteʼ nuntak zia khempeuh na mu a, amauʼ nuntak dan le a sepna tawh kizui-in mi khempeuh tungah thaman na pia kim hi.

JOB (Job) 34:21

Pasian in mihingteʼ gamtatna khempeuh hong encik a, i kalsuanna themno dongin hong mu khin hi.

Late 11:4

Topa a biakinn siangtho sungah om a, Topaʼ tokhom vantungah om hi. Amah in mihingte hong en a, mihingteʼ gamtatna khempeuh a thei tel hi.

JOB (Job) 31:4

Pasian in ka gamtatna khempeuh thei a, ka kalsuanna khempeuh a hong mu hi.

Hosea 7:2

Amauʼ gamtat siatna khempeuh ka phawk lamtak amaute in ngaihsutin nei kha lo uh hi. Amauʼ mawhna in amaute gakcip a, ka muhna mahmah ah om gige uh hi.

Jeremiah 23:24

Mi khat peuhpeuh keiʼ muh loh dingin busim thei ding ahi hiam, Topa in kong ci hi. Leitung, vantung, mun khempeuh ah ka om lamtak thei lo na hi uh hiam, Topa in kong ci hi.

Jeremiah 16:17

Bang hang hiam cih leh a om dan khempeuh uh ka mitin ka mu a, keiʼ kiang panin a kiseel bangmah om lo hi. A khialhna khempeuh uh zong ka mu hi.

Late 119:168

Na thuhilhnate le na ngeina kip omte khempeuh hoihtakin ka zui a, ka gamtatna khempeuh nangmah in na hong mu hi.

Late 17:3

Keima lungsim hong sin inla, zan hun sungin ka kiangah hong hawh inla, keimah hong ze-et lecin, ka sungah gitlohna na mu kei ding hi. Ka kampau-in zong bangmah ka khial kei hi.

JOB (Job) 14:16

Tua hun ciangin ka kalsuanna khempeuh nong en dinga, ahi zongin ka khialhnate nong sulzuih nawn kei ding hi.

2 KHANG TANGTHU NIHNATE 16:9

Bang hang hiam cih leh ama lamah a lungsim a paubaang lo miteʼ tangin ama vangliatna a lak dingin Topaʼ mit in leitung khempeuh en kawikawi hi. Hih thu ah na hai gamtat khin hi; bang hang hiam cih leh tu a kipan gal na do ding hi,” a ci hi.

Jeremiah 17:10

Keimah Topa in mi khempeuhʼ nuntak zia le a gamtatna tawh kizui-in a pia khia dingin ngaihsutna ka en tel a, lungsim ka sittel hi,” a ci hi.

Mangmuhna 2:23

Tua numeiʼ thu a zui mi khempeuh ka that ding hi. Tua hileh, mihingteʼ ngaihsutna le lungsim a kantel pa ka hihna thu pawlpi khempeuh in thei ding uh hi. Noteʼ gamtatna ciat tawh kizui-in ka hong thukkik ding hi.

Mangmuhna 2:18

“Thiatira khua pawlpi vantungmi kiangah lai gelh inla, meikuang tawh a kibang mittang nei-in sumngo kihalsan tawh a kibang khe a nei Pasianʼ Tapaʼ thugen in:

Paunak 4:26

Na khatpeuh na sepna thu thei tel in. Tua hileh na nasep peuhpeuh maavang ding hi.

Paunak 5:6

Nuntakna lampi ah amah om lo a, nang na phawk loh hangin amah lam pialin a vakvai ahi hi.

Jeremiah 29:23

Bang hang hiam cih leh amaute, Israel gamah hai gamtat uh hi: A inn veengteʼ zite mawhpih uh a, thu ka piak lohpi ka min tawh zuau thu a gen uh hi. Keimah Topa in ka mu a, teci ka hi hi, hong ci hi,” ci-in ka gelh hi.

JOB (Job) 24:23

Pasian in a lungnuamin amah nungtasak a, ahi zongin Pasian in amah encik tawntung hi.