Nahum 1:12 - Tedim Bible Revision 2017

¹² Topa in ama mite tungah hih bangin thu gen a, “Assiria mite thahatin a tam mahmah hangin, amaute kisusia-in maimang ding uh hi. No ka mite na hih uh leh, khatvei lai-in kong gimsak khit hangin tu-in note kong gimsakkik nawn kei ding hi.

Tedim Bible

¹² Topa in ama mite tungah hih bangin thu gen a, “Assiria mite thahat-in a tam mahmah hangin, amaute kisusia-in maimang ding hi. No ka mite na hih uh leh, khat vei kong gimsak khit hangin, kong gimsak kik nawn kei ding hi.

Nahum 1:12 Referans Kwoze

Joel 2:19

Topa in ama miteʼ thungetna dawng a, “Tu-in note tungah an, leenggahzu le sathau kong pia a, na kham takun na ne ding uh hi. Minam dangteʼ simmawhin na om nawn kei ding uh hi.

Mangmuhna 7:16

Amaute gilkial cih om nawn lo dinga, a dang uh zong taak nawn lo ding hi. Nisa zong thuak kha nawn lo ding uh a, a sa in zong kaang kha nawn lo ding hi.

Nahum 1:15

En un, mual tungah kamtai pa hong tai a, gualzawh nading thupha hong gen ding ahi hi. Judah mite aw, pawi bawl unla, Pasianʼ tungah na ciam bangun gamta un. Bang hang hiam cih leh migilote kisusiacip khin a, na gam uh hong simkik nawn lo ding hi.

Daniel 11:10

“Syria kumpipaʼ tate, galsim dingin kithawi-in galkap ding mi tampi a kaikhawm ding uh hi. Tua galkap maangte khat thahat diakin tuikhang bang dinga, galteʼ kulhpi a luh zo ding hi.

Isaiah 51:22

Ama mite adingin a thumsak Topa, Topa ahi noteʼ Pasian in hih bangin ci hi: “En un, noteʼ khut sung panin hoina hai ka la khia khin a, ka hehna haipi na dawn nawn kei ding uh hi.

Isaiah 37:36

Tua ciangin Topa’ vantungmi kuan khia-in Assiria miteʼ giahphual ah mihing tul za le tul sawm giat le tul nga a that hi. Zingsangin mite a thawh ciangin hihte khempeuh misi luang bekbek na hi hi.

Isaiah 31:8

“Assiria pen mihingʼ namsau ahi lo, namsau khat tawh puk dinga, mihingʼ namsau ahi lo, namsau khat in susia ding hi. Namsau panin tai ding uh a, a tangvalte uh zawhthawh thu tawh nasem dingin kikoih ding hi.

Isaiah 30:19

Jerusalem khua sunga a teeng, Zion sunga om mite aw, note na kap nawn kei ding uh hi. Noteʼ kahna aw hangin Topa in hong hehpih taktak dinga, amah in a zak ciangin note hong dawng ding hi.

Isaiah 17:14

En un, nitakin hong lausak a, zingsang ma-in amaute bei ta! Hih bang thute pen eite hong susia-in eite a hong luh gawpte in a thuak ding uh ahi hi.

Isaiah 8:8

Judah gam dong hong nawt suk dinga, dimletin paisuakin, ngawng ciang dong tum ding hi,” hong ci hi. Ahih hangin Pasian in eite hong ompih a, a kizal ama khate in i gam hong hu ding hi.

Isaiah 7:20

“Tua ni ciangin Topa in Gun gal khat panin a kikawm temta ahi Assiria kumpipa tawh sam le khemul mettol dinga, khamul zong met khia ding hi.

2 KUMPI NIHNATE 19:37

Tua ciangin amah in ama pasian Nisrokʼ biakinn sungah bia-in a om laitakin, ama tapate Adrammelek le Sharezer in namsau tawh amah thatin Ararat gamah a tai uh hi. Tua ciangin ama tangin a tapa Esar-haddon in a uk hi.

2 KUMPI NIHNATE 19:35

Tua zanin Topaʼ vantungmi paikhia a, Assiria-te giahphual ah galkap tul za khat le tul sawm giat le tul nga a that hi. Zingsang tungin mite a thawh ciangin, hihte khempeuh si luanghawm na hi hi.

Paikhiatna 12:12

“Bang hang hiam cih leh keimah in tua zanin Egypt gam ka nawk dinga, Egypt leitang tungah mihing hitaleh ganhing hitaleh tacil khempeuh ka vatlum dinga, Egypt pasian-te khempeuh tungah thu ka khen ding hi. Kei pen Topa ka hi hi.

Isaiah 10:16

Tua ahih ciangin Topa, Vanglian Topa in ama mi thaute lakah natna lianpi tungsak dinga, tua natna pen amaute sungah mei bangin kuang niloh ding hi.