Marka 7:5 - Tedim Bible Revision 2017

⁵ Tua ahih manin Farisi mite le Thukham hilh siate in Jesu kiangah, “Bang hangin na nungzuite in, khanglui lai pek panin tu ni dongin a kizui pulepa ngeinate zui loin, khut sil loin an ne ahi uh hiam?” ci-in a dong uh hi.

Tedim Bible

⁵ Farisaite leh laitheite in, “Tanglai upate’ ngeina na nungzuite in zui loin, khut nin tawh bang hangin an ne ahi uh hiam?” ci-in a dong uh hi.

Marka 7:5 Referans Kwoze

2 THESALONIKA NIHNA 3:6

Sanggamte aw, i Topa Jesu Khris min tawh kong sawl nop uh thu panin: Note tungah ka hong hilh sa uh thute a zui lo, a thadah gamtat thu up pih mite tawh na kikhawl kei un.

Sawltak 21:21

Gentail mite lak a om Jew mi khempeuh tungah na thuhilhna, amaute in Moses thukham zui loin, Jew ngeina zui nawn loin, a tate uh zong vun a at loh nadingun na thugente khempeuh, hih lai-a om Jew mite tungah kigen hi.

Galati 1:14

le ka khangualte lakah Jew biakna lamah a makai pen ka hihna thu le ka pu ka pate uh tang ngeinate a nak kin mahmah ka hihna a kipanin ka pianzia ngeisate khempeuh na zak sa na theih sa uh ahi hi.

Sawltak 21:24

Tua mite tawh va kipawl inla, a kisiansuahna uh ah nang zong va kihelin, a sum bei teng khempeuh nangmah in sik in. A kisiansuah khit uh ciangin amaute in a sam uh met thei ta ding uh hi. Hih bangin gamta lecin a beisa huna nangma thu a kigente khempeuh a man khat zong om loin, nang mahmah zong Moses Thukham a zui na hihna thu mi khempeuh in hong thei ding uh hi.

Mattiu 15:2

“Bang hangin na nungzuite in tangtawng pek panin a hong kihilh suksuk i pupa ngeinate zui lo uh ahi hiam? Amaute in an a nek ma-un a ngeina ding bangin a khut uh sil masa lo uh hi,” a ci uh hi.

ROM (Romans) 4:12

A vun a ki-at ma-in i pupi Abraham a upna hangin a gamtat mah bangin a gamta, a vun a ki-at mite adingin zong Abraham pen pupi mah ahi hi. Tua pen vun ki-at lelna hang hi loin upna hang ahi hi.

2 THESALONIKA NIHNA 3:11

Hih bangin thu ka hong genna uh pen note lakah mi pawl khatte thadahin na sem nuam lo uh a, midangteʼ nasepna va nawngkaisak zawsop hi, ci-in ka zakna hang uh ahi hi.

Marka 7:8

Note in Pasianʼ thukham nawl khinin, mihingteʼ thuhilhna na zui zawsop uh hi,” a ci hi.

Marka 7:9

Tua ciangin Jesu in a thugen zom lai a, “Na khanglui ngeina uh na zuih theih nadingun Pasianʼ thukhamte a nawl khin zia na siam mahmah uh hi.

Marka 7:13

Hih bang danin mite thu na hilhna uh tawh Pasianʼ thu na pampaih uh hi. Hih bangzia-in na gamtatna uh a dang tampi zong om lai hi,” a ci hi.