Marka 16:15 - Tedim Bible Revision 2017

¹⁵ Tua khit ciangin amaute tungah, “Leitung khempeuh ah note pai kawikawi unla, mi khempeuh tungah Lungdamna Thu na hilh ta un.

Tedim Bible

¹⁵ “Note leitung khempeuh ah vak kawikawi un la, mi khempeuh kiangah Lungdamna Thu na hilh un.

Marka 16:15 Referans Kwoze

Mattiu 28:19

Tua ahih ciangin note pai unla, midang khempeuh, keima nungzui mi suaksakin, Pa min, Tapa min le Kha Siangtho min tawh tui sungah na phum un.

Marka 13:10

Ahi zongin hun beina a tun ma-in mi khempeuh tungah Lungdamna Thu kihilh masa phot ding hi.

Sawltak 1:8

Ahi zongin note tungah Kha Siangtho hong tun ciangin vangliatna tawh na kidim ding uh a, Jerusalem khua sung, Judea gam sung, Samaria gam sung le leimong dongin note in keima thu na gen ding uh hi,” ci-in a dawng hi.

Late 96:3

Ama minthanna minamte lakah gen unla, ama nalamdang septe mi khempeuh lakah pulak un.

1 JOHAN MASA 4:14

Pa Pasian in leitung mite a hon khia dingin a Tapa a hong paisakna thu kote in thei-in midang kiangah gen belin ka nei uh hi.

Johan 15:16

Note in kei na hong teel kei uh a, ahi zongin keimah in note ka hong teel a, note va pai-in a kimang tawntung ding gah a gah dingin ka hong seh hi. Tua ahih manin keima min suangin Pa kiangah na nget peuhpeuh uh hong pia ding hi.

Johan 20:21

Tua ciangin Jesu in amaute kiangah, “Note in nopna ngah ta un. Pa in kei a hong sawl bangin note zong ka hong sawl hi,” ci-in a vaikhak leuleu hi.

Kolose 1:23

Ahi zongin note in lungdamna thu na zak cil lai-un na neih uh lametna panin liing het loin, bulkip nei-in citakin na om paisuak ding uh ahi hi. Tua lungdamna thu mah keimah Paul in hilhin ka sepbel hi a, leitung mun khempeuh ah a kihilh lungdamna thu mah ahi hi.

ROM (Romans) 16:26

Ahi zongin mi khempeuh in Pasian umin a zuih theih nadingin tu-in kamsangteʼ laigelhnate le a nungta tawntung Pasianʼ thupiakna tawh tua thu ki-imcip pen a hong kipholak ta ahi hi.

ROM (Romans) 10:18

Tua ahihleh amaute in thu za lo uh ahi hiam? Lai Siangtho sungah, “Amauʼ awgingte leitung khempeuh ah kizel a, a thugente uh in mun khempeuh a ban hi,” ci-in a kigelh mah bangin amaute in thu za khinzo uh hi.

Late 22:27

Leitung mi khempeuh in phawkin Topaʼ lamah kihei ding uh a, minam khempeuh in ama mai ah bia ding uh hi.

Isaiah 45:22

“Leitung mi khempeuhte aw, kei lamah hong kihei unla hotkhiatna ngah un! Bang hang hiam cih leh kei pen Pasian ka hi a, kuamah dang om lo hi.

Mangmuhna 14:6

Tua ciangin leitungah a teeng mi namkim, pau namkim a zang mite tungah a tawntungin Lungdam nading Thu gen ding a nei vantungmi khat vankim lai ah a leeng ka mu hi.

Kolose 1:6

Note in Pasian hong hehpihna thu za-in, ahi bangbangin na theih hun uh a kipanin thupha na ngah uh bangin leitung midang khempeuh tungah zong lungdamna thu in thupha tunin, leitung khempeuh ah a kizel ahi hi.

Efesa 2:17

Tua hi a, Khris in Pasian tawh a kigamla no Gentail mite tung le Pasian tawh a kinai Jew mite tungah kilem nading Lungdamna Thuhoih a hong hilh hi.

Isaiah 49:6

Amah in, “Jakob minamte a laam to ding le a suakta lai Israel mite a ngei uh a bangsakkik dingin keima nasem na hihna pen a baih lua mahmah nasep ahi hi. Keima hotkhiatna in leimong dong a phak theih nadingin minam dangte tungah khuavak ahi dingin nang kong pia ding hi,” hong ci hi.

Late 98:3

Amah thutakin, it tawntungna nei ahih manin Israel-te tungah a thuciamna a tungsak hi. Leitung mi khempeuh in eiteʼ Pasianʼ gualzawhna mu khinta uh hi.

Isaiah 52:10

Topa in minam khempeuh mai ah a vangliatna siangtho zangin ama mite hon khia hi. Leitung mi khempeuh in i Pasianʼ hotkhiatna mu ding uh hi.