Marka 14:21 - Tedim Bible Revision 2017

²¹ A kigelh sa mah bangin Mihing Tapa ahihleh si dinga, ahi zongin a lehhek paʼ thuakna nasia mahmah ding hi. Tua mipa a piang ngei het lo hileh ama adingin hoih zaw tham ding hi,” a ci hi.

Tedim Bible

²¹ Mihing Tapa in Lai Siangtho sungah a kigelh mah bangin a pai ding hi. Ahih hangin Mihing Tapa a lehheekpa in gimna a thuak ding hi. Tua mipa in a nu sung pan suak kei leh, ama adingin a hoihzaw ding hi,” a ci hi.

Marka 14:21 Referans Kwoze

Johan 19:28

Tua hun ciangin Jesu in na khempeuh kicing ta hi, ci-in thei ahih manin Lai Siangtho sungah a kigelh thu a tun theih nadingin, “Ka dangtak hi,” a ci hi.

Daniel 9:24

“Na mite le khuapi siangtho, a mawhna le a gamtat khialhnate a beina ding hun kum sawm sagih mun sagih sung a kiseh zo hi. Tua ciangin mawhna kimaisak dinga, a tawntung thutang thu a hong tung ding hi. Gen kholhna le maangmuhna thu a mantakin hong tangtung dinga, a Siangtho Pen Mun biakinnpi kisiansuah ding hi.

Piancilna 3:15

Nang le numei kikal na suanlekhakte le ama suanlekhakte kikalah kilangneihna ka omsak ding hi. Amah in na lutang hong sunim dinga, nang in ama khetul na sunim ding hi,” a ci hi.

Sawltak 4:27

A cih mah bangin Herod le Pontias Pilat in hih khuapi sung teek mahah Gentail mite le Israel mite tawh kikupna nei uh a, nangmah in Khris dingin na bawl, a siangtho na Nasem pa Jesu thah dingin a vaihawm uh hi.

Sawltak 2:23

Pasian in thu a ma-theih kholhna le a ma-geelna tawh kizui-in noteʼ khut sungah tua Jesu a hong piak ding a ngaihsut sa hi a, note in singlamteh tungah khai-in migiloteʼ khut tawh amah na that uh hi.

Mattiu 26:56

Ahi zongin Lai Siangtho sungah kamsangteʼ thugente a tun theih nadingin hih bangin a hong gamta na hi uh hi,” a ci hi. Tua ciangin a nungzuite khempeuh in Jesu nusia-in a taisan uh hi.

Mattiu 26:54

Tua bangin kivaikhak hi zenzen leh Lai Siangtho in tu-a bangin a pian nading a gen pen bangci tun theih ding ahi hiam?” a ci hi.

Zekhariah 13:7

“Namsau aw, ka tuucingpa a su dingin kipan inla, kei tawh nasem khawm pa langpang in. Tuucingpa sat in. Tuute kithehthang dinga, ka tuute gim ka pia ding hi.

Daniel 9:26

Tua hun a bei khit ciangin sathau kinilh pa thuman lopi-in a kithat ding hi. Galsim dingin a hong pai galkap maang lianpa in khuapi le biakinnpi a susia ding hi. A beina pen tuiciin tun bang hi dinga, a tawp dongin galdona le kisiatna vive ahi dingin Pasian in thu a khen zo hi.

Isaiah 52:14

Mi tampite in amah lamdang sa uh hi. Mihing a bang nawn lo zah dongin nakpi takin a mai sia a, mihing a sun nawn lo zah dongin a mel a sia hi.

Late 55:15

Amauʼ tungah sihna tungsak in. Leinuai ah a hingtangin amaute pai suksak inla, amaute launa lianpi tawh a han uh ah paisak in.

Luka 24:44

Tua ciangin Jesu in amaute kiangah, “Tu-a thupiang khempeuh pen note tawh kong om khawm lai-a ka gengen thute mah ahi hi. Moses Thukham laibu sung, kamsangte laibu sung le Late sungah a kigelh thu khempeuh a tung ding ahi hi,” a ci hi.

Luka 22:22

Bang hang hiam cih leh Pasianʼ seh sa bangin Mihing Tapa si dinga, ahi zongin amah a lehhek pa in gimna thuak ding hi,” a ci hi.

Marka 14:49

Nisim nisimin biakinn sungah thuhilhin note tawh ka om khawm a, ahi zongin nong man kei uh hi. Ahi zongin hih thu pen Lai Siangtho sunga a kigelh thu a tun nading ahi hi,” a ci hi.

Marka 14:20

Jesu in amaute kiangah, “No sawm le nihte sung, kei tawh ankuang a sawk khawmte mah sung pan ahi hi.

Marka 14:22

Tua bangin an a nek laitakun Jesu in anlum la-in lungdamna a koh khit ciangin balnenin a nungzuite tungah pia a, “Ne un; hih pen keima pumpi ahi hi,” a ci hi.