Marka 10:33 - Tedim Bible Revision 2017

³³ “Na ngai un. Tu-in Jerusalem khua ah a pai to ding ihi hi; tua lai mun panin siampi liante le Thukham hilh siateʼ khut sungah Mihing Tapa kipia ding hi. Amaute in a sih nadingin thu a khen khit uh ciangin Gentail miteʼ khut sungah a ap ding uh hi.

Tedim Bible

³³ Tua lai takin Zeisu in sawm-le-nihte sam kik a, “En un, eite Jerusalem khuapi ah i pai ding hi. Mihing Tapa in siampi liante leh laitheite’ khut tungah a kipia ding hi. Amaute in ama sih nadingin thu a khen khit uh ciangin, Gentailte’ khut tungah a pia ding uh hi.

Marka 10:33 Referans Kwoze

Mattiu 27:2

Sikkhau tawh khihin paipih uh a, tua gam sungteng a uk Pilat mangpa khut sungah a ap uh hi.

Marka 8:31

Tua ciangin Jesu in, “Mihing Tapa in tampi tak thuak ding hi; upate, siampi liante le Thukham hilh siate in amah nial ding uh hi. Amah kithat dinga, ni thum khit ciangin hingkik ding hi,” ci-in a nungzuite hilh ding a kipan hi.

Mattiu 26:66

Note in tu-in bangci ngaihsut na hi uh hiam?” ci-in a dot ciangin amaute in, “Thah dingin a kilawm hi,” ci-in a dawng uh hi.

Mattiu 16:21

Tua hun a kipanin Jesu in a nungzuite kiangah, “Jerusalem khua ah ka pai ding hi. Upate, siampi liante le Thukham hilh siate tung panin gimna tampi ka thuak ding hi. Kei hong kithat dinga, ni thum ni-in hong kihingkiksak ding hi,” ci-in teltakin gen a kipan hi.

Jeim 5:6

A thuman mite mawhsakin na that uh a, amaute in na thu uh hong nial zo lo uh hi.

Sawltak 20:22

Tu-in ahihleh Kha Siangthoʼ hong sawlna mangin, kei tungah bang thu hong piang ding hiam, cih thei lopi-in Jerusalem khua ah a pai ding ka hi hi.

Sawltak 13:27

Jerusalem khua-a a teeng mite le a makaite un Jesu pen Honpa ahih lamtak na thei lo uh a, Sabbath nisimin a kisim niloh kamsangteʼ thu zong na tel lo uh hi. Amaute in Jesu na mawhsak uh ahih manin kamsangteʼ thugente a manin hong tung hi.

Johan 19:11

Jesu in, “Pasian in nang tungah hong pia lo hileh kei tungah thu na nei het kei ding hi. Tua ahih manin nangma khut sungah kei hong apteʼ mawhna lian zaw hi,” ci-in a dawng hi.

Johan 18:28

Tua ciangin Kaiafasʼ inn panin gam ukpa Pilatʼ omna kumpi inn ah Jesu a paipih uh hi. Tua hun pen zingsang tung ahi hi. Jew mite ahihleh Paisan Pawi annekna sungah kihel nuam uh ahih manin biakna vai-in a siang a suah theih nadingun kumpi inn huang sungah lut lo uh hi.

Luka 23:21

Ahi zongin mihonpite in, “Singlamteh tungah that in, singlamteh tungah that in,” ci-in a kiko uh hi.

Luka 9:22

Tua ciangin Jesu in a nungzuite kiangah, “Mihing Tapa in tampi tak thuak dinga, upate, siampi liante le Thukham hilh siate in amah nial ding uh hi. Amah kithat dinga, a ni thum ni-in kihingkiksak ding hi,” a ci hi.

Marka 15:1

A zingsang ciangin siampi liante in upate, Thukham hilh siate le ulian dang khempeuh tawh thu kikupna khat nei uh a, Jesu a hen khit uh ciangin paikhiat pihin Pilat tungah a ap uh hi.

Marka 14:64

Pasianʼ tungah a paukhialhna na za zo uh hi. Bangci ngaihsut na hi uh hiam?” a ci hi. Hih mipa thah dingin kilawm hi, ci-in amaute khempeuh in thu a khen uh hi.

Marka 9:31

Bang hang hiam cih leh a nungzuite kiangah thu hilh a, “Mihing Tapa, mihingteʼ khut sungah kipia-in amaute in that ding uh a, ahi zongin ni thum khit ciangin hingkik ding hi,” a ci hi.

Isaiah 53:3

Amah pen mite in simmawhin nusia a, gimna le natna a thuak ahi hi. Mite in en nuam loin a mai uh a hum san uh mipa bangin amah kisimmawh a, eite in amah i thusim kei hi.

Marka 9:12

Jesu in, “Na khempeuh a bawl khol dingin Elijah hong pai masa takpi hi. Mihing Tapa in gimna tampi thuakin simmawhna ngah ding hi, ci-in Lai Siangtho in gen hi lo ahi hiam?

Johan 18:32

(Jesu in ama sihna ding zia a gen sa thu a tun theih nadingin hih bangin a piang ahi hi.)