Luka 8:25 - Tedim Bible Revision 2017

²⁵ Tua ciangin Jesu in a nungzuite kiangah, “Na upna uh koi ah om khinta ahi hiam?” a ci hi. Ahi zongin amaute lau-in lamdang sa uh a, khatlekhat in, “Hih pa kua ahi hiam? Thu a piak ciangin huihpi le tuihualte nangawn in a thu mang uh hi,” a kici uh hi.

Tedim Bible

²⁵ Zeisu in, “Na upna uh koi-ah om hiam?” ci-in a dong hi. Amaute lau uh ahih ciangin, lamdang a sa uh a, “Hih mi in kua mi ahi hiam? Huih leh tui nangawn thu a piak ciangin a ngai tazen uh hi,” ci-in khat leh khat a kikum uh hi.

Luka 8:25 Referans Kwoze

Mattiu 8:26

Jesu in, “Bang hangin tua ci lau na hi uh hiam? Na upna uh neu mahmah hi,” a cih khit ciangin tho-in huihpi le tuihualte thu pia a, a dai dide pah hi.

Paunak 30:4

Vantungah kua kah to a, leitungah kua hong kum sukkik ahi hiam? Kua in a khut sungah huihte lomcip a, puan tawh tuite tuncip ahi hiam? Kua in leitung bulpite phut kip ahi hiam? Tua bang mi na theih ngei leh a tapaʼ min bang ahi hiam?

Mattiu 14:31

Jesu in zong a khut tawh Peter zamin len a, “Upna cingtaak lopa aw, bangci-a hong tua ci muanlah na hi hiam?” a ci hi.

Johan 11:40

Jesu in, “Na up nakleh Pasianʼ vangliatna na mu ding hi, ci-in hong gen khin hi lo ka hi hiam?” a ci hi.

Luka 12:28

Upna neu mite aw, tu ni-in om a, zing ciangin keutumin meikhuk sungah a kikhultum lopa kungte, Pasian in puansilh guan ahihleh note hong guan zaw kan ding hi lo ahi hiam?

Mattiu 17:20

Jesu in, “Na upna uh a cingtaak lohna hang ahi hi. Ahi taktakin note kiangah kong genin ah: Ankam tang cia bang upna na neih nak uh leh, hih mual kiangah, ‘Hih lai panin hua lai ah kin in,’ ci le-uhcin kin khia ding hi. Na hih theih loh uh khat zong om lo ding hi.

Paunak 8:29

tuipi tuite in ama cihna ban a khengin a luan loh nading thu a piak laitak ka om a, leitung bulpi a phuh laitak kei ka om hi.

Mattiu 6:30

Tua ahih ciangin tu ni-in hingin, a zing ciang mahin meikhuk ah a kikhultum lel hih gamlak lopate Pasian in puansilh guan ahihleh note hong lim guat zaw ding ahih manin na upna uh a neu mahmah ahi hi.

Mattiu 8:10

Jesu in hih bupa thugen a zak ciangin lamdang sa a, amah a zui mihonte kiangah, “A mantak a kong genin ah Israel mite lak nangawn ah hih bang upna a nei ka mu nai kei hi.

Marka 4:35

Tua ni mah a nitak ciangin Jesu in a nungzuite kiangah, “Tui kantanin gal khat lamah pai ni,” a ci hi.

Luka 8:24

Nungzuite in Jesu hong naihin phong uh a, “Topa aw, Topa aw, kote ka si dektak uh hi,” a ci uh hi. Jesu zong tho-in huihpi le tui kilok a daih nadingin thu pia a, a thupiak bangin hong dai dide pah hi.

Luka 8:26

Tua ciangin Galilee Tuili gal khat, Gadara gam a tung uh hi.