Luka 24:44 - Tedim Bible Revision 2017

⁴⁴ Tua ciangin Jesu in amaute kiangah, “Tu-a thupiang khempeuh pen note tawh kong om khawm lai-a ka gengen thute mah ahi hi. Moses Thukham laibu sung, kamsangte laibu sung le Late sungah a kigelh thu khempeuh a tung ding ahi hi,” a ci hi.

Tedim Bible

⁴⁴ Khatvei Zeisu in, “Moses’ Thukhamna ahi zongin, kamsangte’ gelhna thu ahi zongin, Lai Siangtho sungah a kigelh thu ahi zongin keima thu a kigelhsa khempeuh a tangtung ding hi ci-in ke’n note tawh ka om khop lai takin kong gen khempeuhte in hih thu ahi hi,” a ci hi.

Luka 24:44 Referans Kwoze

Zekhariah 12:10

“Davidʼ suanlekhakte le Jerusalem khua miteʼ tungah hehpihna lungsim le thungetna lungsim ka guan ding hi. Amaute in a sut lup uh mipa enin, ta khat neihsun a sihsuah mite bangin kap ding uh a, tacil a khuaisuahte bangin nakpi takin kapin thum ding uh hi.

Zekhariah 9:9

Zion mite aw, nakpi takin lungdam un. Jerusalem mite aw, lungdamin awng un. En un, na kumpipa uh hong pai hi. Amah, gualzawhna tawh hong pai hi. Ahi zongin kiniamkhiatna tawh hong pai a, sin nai loh la no tungah hong tuang hi.

Luka 9:22

Tua ciangin Jesu in a nungzuite kiangah, “Mihing Tapa in tampi tak thuak dinga, upate, siampi liante le Thukham hilh siate in amah nial ding uh hi. Amah kithat dinga, a ni thum ni-in kihingkiksak ding hi,” a ci hi.

Isaiah 7:14

Tua ahih ciangin Topa mahmah in note tungah lim khat hong pia ding hi. En un, nungak khat gai-in tapa khat nei dinga, ama min Immanuel kici ding hi.

Mangmuhna 19:10

Tua ciangin amah a bia dingin a khe phung ah ka kun suk a, ahi zongin amah in, “Kei hong bia kei in. Kei pen Jesuʼ hong thugente a lenkip nang le na sanggamte khempeuh tawh nasem khawm khat ka hi hi. Pasian bia in!” hong ci hi. Jesuʼ thugen in kamsang nasep sepnop nading lungsim a guan ahi hi.

Hebru 10:1

Jew Thukham pen mailam hunah a taktak a hong tung ding lim lah kholhna hi bek ahih manin tua Thukham tawh kizui-in a kum a kumin a kipia biakpiakna in Pasian kiang a zuan mite mi cingtaak suah zo ngei lo hi.

Johan 5:46

Moses in keima thu gen belin nei ahih manin Moses um taktak hi le-uhcin kei zong na hong um ding uh hi.

Zekhariah 6:12

Ama kiangah, ‘Vanglian Topa in hih bangin ci hi: “Hih mipa pen sing bangin A Sel a kici mipa ahi hi. A omna peuhpeuh ah amah cithei dinga, Topaʼ biakinn lamkik ding hi.

Isaiah 9:6

Bang hang hiam cih leh eite adingin naungek khat hong suak a, eiteʼ tungah tapa khat hong kipia hi. Amah pen eite hong ukpa hi dinga, ama min pen “Lamdang Thulak pa, Vanglian Pasian, Tawntung Pa, Nopsakna Kumpi,” kici ding hi.

Isaiah 28:16

Tua ahih ciangin Topa Pasian in, “En un, keimah in Zion sungah bulpi ding khat, suang, a kize-et sa suang, a manpha innkiu suang, bulpi muanhuai khat ka koih hi. Tua suang tungah, ‘Hih a um mi in lungkhamna tuak lo ding hi,’ ci-in kigelh hi.

Late 118:22

Innlamte in a nilkhiat suang pen innkiu suang bulpi suak khinta hi.

Zekhariah 13:7

“Namsau aw, ka tuucingpa a su dingin kipan inla, kei tawh nasem khawm pa langpang in. Tuucingpa sat in. Tuute kithehthang dinga, ka tuute gim ka pia ding hi.

Hosea 3:5

Tua khit ciangin Israel mite in Topa amauʼ Pasian le a kumpipa uh David lamah hong kiheikik ding uh hi. Tua hun ciangin amaute in Topa zahtakin, ama letsongte a ngah ding uh hi.

Ezekiel 34:23

Amaute a cing dingin ka nasem pa David ka koih dinga, amah in amaute hoihtakin an vakin a kem ding hi.

Isaiah 52:13

Topa in, “En un; ka nasem pa a dau pai-in, amah a lianin kikoihin kilaam to dinga, sang mahmah ding hi.

Piancilna 22:18

na suanlekhakte thupha ka piak bangin, leitung minam khempeuh in thupha a ngah nadingun hong ngen ding uh hi. Bang hang hiam cih leh nang in ka thu na mang hi,” a ci hi.

Hebru 9:8

A pua nung inn dei a om lai teng a sung nung ahi, a Siangtho Pen Mun a kihong nai lo ahihna thu Kha Siangtho in hong kilangsak hi.

Johan 5:39

Nuntak tawntung ngah theih nading lametna tawh Lai Siangtho sung na lim sim mahmah uh a, tua na sim uh Lai Siangtho in keima thu mah genin teci pang napi-in,

Zekhariah 14:4

Tua ciangin Jerusalem nisuahna lamah a om Oliv Mual tungah Topa a ding ding hi. Tua ciangin nisuahna lam pan nitumna lamah Oliv Mual kitamin phel nih suak dinga, a kikalah kuampi om ding hi. A mual kim khat leilu lamah kikhiinin, kim khat leitaw lamah kikhiin ding hi.

Daniel 7:13

Zan ka maangmuh hun sungin ka khuadak leh mihing tawh a kibang mi khat meii tungah a hong pai ka mu hi. A nungta tawntung mipa kiangah pai-in, ama kiangah a kipia hi.

Daniel 2:44

Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo zo lo dinga, tua gam in gamdang khempeuhte zo gawpin a kip tawntung ding hi.

Ezekiel 17:22

Tua ciangin Topa Pasian in, “Keimah in taamtak sangpi a dawn khat la-in, a dawnngek khat ka sat khia dinga, mual sangpi dawn khat ah ka suan ding hi.

Jeremiah 23:5

“En un, Topa in kong cih in ah, keimah in Davidʼ suan lak panin kumpi dingin a dik tat mi khat ka khan khiatsak ni hong tung ding hi. Amah gam uk siam mahmah dinga, gam sungah thuman thutang tawh thu hong khen ding hi.

Gamlak-vakna 35:25

A phula paʼ khut sung panin mihonpi in mi that pa hon khia-in, mihonpi in amah a va taina, bukna khuapi ah amah puakkik dinga, sathau siangtho a kinilh siampi lianpen pa a sih matengin tua khua ah a teeng ding hi.

Gamlak-vakna 21:8

Topa in Moses kiangah, “Gul gupha tawh a kibang sumngo gul khat bawl inla, khuam khat tungah khai in. Gul in a tuk mi peuhmah in tua gul a et ciangin hing ding hi,” a ci hi.

Piancilna 3:15

Nang le numei kikal na suanlekhakte le ama suanlekhakte kikalah kilangneihna ka omsak ding hi. Amah in na lutang hong sunim dinga, nang in ama khetul na sunim ding hi,” a ci hi.

Johan 3:14

Moses in gamlak khuam tungah sumngo gul a khai mah bangin Mihing Tapa zong hong kikhai dinga,

Luka 24:46

amaute kiangah, “Khris in sihna thuakin, a ni thum ni-in sihna panin hingkik dinga,

Jeremiah 33:14

“En un, Topa in kong cih in ah: Israel mite le Judah mite tungah ka khap sa thu ka tangtunsak hun hong tung ding hi.

Piancilna 49:10

Judah in kumpi ciangkhut len tawntung dinga, a suan a khakte in zong ukna aana nei tawntung ding hi. Minam dangte in ama tungah siah puak dinga, zahtakna tawh ama mai ah kun ding uh hi.

Piancilna 14:18

Tua ciangin Jerusalem kumpipa Melkhizedek in an le leenggahzu hong pusuah hi. Amah pen Sangpen Pasianʼ siampi zong ahi hi.

Hebru 7:1

Abraham in a galsimna ah kumpite thatin gualzo-in a hong ciah ciangin A Lianpen Pasianʼ siampi ahih banah Jerusalem khua kumpi zong ahi Melkhizedek in Abraham na dawnin thupha a pia hi.

Hebru 3:5

Moses pen nasem khat hihna tawh Pasianʼ inn sungah thu khempeuh ah citak a, mailam hunah Pasian in a gen ding thute a gen hi.

Sawltak 7:37

Hih Moses pen Israel mite tungah, ‘Pasian in kei hong sawl mah bangin, i mipihte sung mah panin note ading kamsang khat hong sawl ding hi,’ a ci pa ahi hi.

Luka 22:37

Bang hangin hih bangin hong gen ka hi hiam cih leh, Lai Siangtho in, ‘Mawhneite lakah amah kihelsak hi,’ ci-in keima thu a genna pen hong tung ding hi,” a ci hi.

Luka 21:22

Bang hang hiam cih leh Lai Siangtho sungah a kigelh mah bangin, ‘Gim Piak Ni,’ ahi hi.

Luka 9:44

“Mihingteʼ khut sungah Mihing Tapa kipia ding ahihna thu mangngilh het kei un,” a ci hi.

Mattiu 26:56

Ahi zongin Lai Siangtho sungah kamsangteʼ thugente a tun theih nadingin hih bangin a hong gamta na hi uh hi,” a ci hi. Tua ciangin a nungzuite khempeuh in Jesu nusia-in a taisan uh hi.

Mattiu 26:54

Tua bangin kivaikhak hi zenzen leh Lai Siangtho in tu-a bangin a pian nading a gen pen bangci tun theih ding ahi hiam?” a ci hi.

Mattiu 16:21

Tua hun a kipanin Jesu in a nungzuite kiangah, “Jerusalem khua ah ka pai ding hi. Upate, siampi liante le Thukham hilh siate tung panin gimna tampi ka thuak ding hi. Kei hong kithat dinga, ni thum ni-in hong kihingkiksak ding hi,” ci-in teltakin gen a kipan hi.

Amos 9:11

Tua ciangin inn tawh kibangin a sia sa David ukna gam keimah in ka puahkik dinga, a vang teng hu-in, a sia teng ka puahkik dinga, a nidang a a ngeina lui mah uh ka bangsakkik ding hi.

1 PETER MASA 1:11

Khris in gimna thuakin, tua khit ciangin minthanna a ngah nading thu Kha Siangtho in a gen ciangin, amaute sungah a om tua Khrisʼ Kha Siangtho in kua a cihna hi a, bang hun ciang hi ding hiam, ci-in a kankan uh pen tu hun thu a gen ahi hi.

Sawltak 3:18

Ama Khris in a thuak nading thu, Pasian in tanglai pekin kamsangte khempeuh tungtawnin gen khol a, tu-in hih bangin a thugen kholhna a hong tungsak ahi hi.

Marka 9:31

Bang hang hiam cih leh a nungzuite kiangah thu hilh a, “Mihing Tapa, mihingteʼ khut sungah kipia-in amaute in that ding uh a, ahi zongin ni thum khit ciangin hingkik ding hi,” a ci hi.

Mattiu 1:22

Topa in kamsang pa tungtawnin a gen sa thu a tun theih nadingin hih thute a piang ahi hi. Tua a genna ah,

Sawltak 2:27

Bang hang hiam cih leh misiteʼ gamah kei nong nusiacip kei dinga, na nasem keimah muatna nong thuaksak kei ding hi.

Sawltak 13:40

Tua ahih manin kamsangte in, ‘Pasian a thusim lo mite aw, lamdang sa lua-in na si ding uh hi. Na nuntak sungun note lakah ka sepkhiat ding uh thu pen mi khatpeuh in hong gen hileh na up het loh ding uh thu ahi hi,’ ci-in a gen uh thute, note tungah hong pian khak loh nadingin kidawm un,” a ci hi.