Luka 23:34 - Tedim Bible Revision 2017

³⁴ Ahi zongin Jesu in, “Pa aw, amaute in bang hih ihi hiam cih thei lo uh ahih manin a mawhna uh na maisak in,” a ci hi. Tua ciangin amauʼ ngah ding ciat a theih nadingun aisanin a puante a hawm uh hi.

Tedim Bible

³⁴ Zeisu in, “Pa aw, amau in bang ahih uh cih thei lo ahih uh ciangin amau mawhna na maisak in,” a ci hi. Amau in lai aisaan-in a puante a hawm uh hi.

Luka 23:34 Referans Kwoze

Mattiu 5:44

Ahi zongin keʼn note kiangah kong genin ah: Na galte uh na it unla, no hong bawlsiate adingin thu na ngetsak un.

Sawltak 7:60

Tua ciangin amah kunin nakpi takin kiko a, “Topa aw, hih miteʼ mawhna na maisak in,” a cih khit ciangin a si ta hi.

1 PETER MASA 3:9

Hong bawlsiate siatna tawh thukkik loin hong samsia mite samsiakik kei unla, Pasian in note a hong sap lai-in thupha a hong piak dingin hong ciam sa ahih manin, hong siat bawlte thupha tawh na thuk zaw un.

ROM (Romans) 12:14

No a hong bawlsia mite, Pasian in thupha a piak nadingin thu ngetsak unla, tua bang mite samsia loin thupha pia zaw un.

1 KORIN MASA 2:8

Hih leitung a uk mite kuamah in hih pilna thu thei lo uh hi. Thei hi le-uh, a minthang Topa pen singlamteh tungah na that lo ding uh hi.

Late 22:18

Amaute in ka puante hawm uh a, ka puan a hawm nadingun lai ai a san uh hi.

Piancilna 50:17

‘Josef kiangah hih bangin ci un: Na sanggamteʼ thupalsatna le a khialhna na maisak in, kong thum hi. Bang hang hiam cih leh nangʼ tungah amaute in siatna hong bawl uh hi,’ ci hi. Tua ahih ciangin tu-in nangʼ tungah kong thum uh hi. I paʼ Pasianʼ nasemteʼ thupalsatna hong maisak in,” a ci uh hi. Amaute in ama kiangah tua bangin thu a gen ciangun Josef a kap hi.

Isaiah 53:12

Tua ahih ciangin amah pen mi liante tawh nate ka hawmsak dinga, amah in mihatte tawh nate a hawm ding hi. Bang hang hiam cih leh amah in sihna dongin a nuntakna pia khia a, khialhna a nei mite tawh a kisim khawm hi. Ahih hangin amah in mi tampiʼ mawhna pua a, khialhna a neite adingin a thumsak hi.

1 TIMOTI MASA 1:13

A beisa hunah amah gensia-in, simmawh bawlin, ama mite a bawlsia pa ka hih ngei tei hangin ama thu ka up nai loh manin theih lohna tawh a gamta ka hih manin Pasian in kei hong hehpih hi.

Sawltak 3:17

“Tua ahih ciangin sanggamte aw, note le na makaite uh hih bangin Jesu tungah na gamtatna uh na theih lohna hang uh hi, ci-in ka thei hi.

1 KORIN MASA 4:12

Koteʼ nektawm ding ka thatang mahmah uh tawh nakpi takin ka sem uh hi. Hong kisamsiat ciangin thupha ka lehpiak uh a, hong kibawlsiat ciangin ka gumthuak uh hi.

Mattiu 11:25

Tua ciangin Jesu in, “Vantung le leitung Topa ahi ka Pa aw, mipilte le misiamte tungah na ip hih thute, bangmah a thei lo hih mite tungah lak na hih manin ka nuam hi.

Johan 19:11

Jesu in, “Pasian in nang tungah hong pia lo hileh kei tungah thu na nei het kei ding hi. Tua ahih manin nangma khut sungah kei hong apteʼ mawhna lian zaw hi,” ci-in a dawng hi.

Marka 15:24

Tua ciangin singlamteh tungah amah khai uh a, a puante kua in a koi ngah ding cih a theih nadingun suang lawnin ai san uh a, amauteng in a puante a hawm uh hi.

Mattiu 11:26

Pa aw, hih pen nangma deihna le na lungkimna bangin na hih ahi hi.

Luka 22:42

“Pa aw, nangma ngaihsutna bang ahih khak leh hih ka thuak ding gimna tawh hong kipelhsak in. Ahi zongin kei deihna bang hi loin nangma deihna bang hi tahen,” a ci hi.

Johan 17:9

“Amaute adingin thu ka hong ngetsak hi. Leitung mite adingin a hong ngetsak hi loin keima khut sungah na hong piak mite nangma mi ahih manin tua mite adingin a hong ngetsak ka hi hi.

Sawltak 16:28

Ahi zongin a aw neihzah tawh Paul kiko a, “Bangmah kicih kei in! Ka vekpi-un kim ung!” a ci hi.