Luka 20:13 - Tedim Bible Revision 2017

¹³ Tua ciangin leenggah lo nei pa in, ‘Bang cih ding ka hi hiam? Ka it mahmah ka tapa ka sawl ding hi. Amaute in amah na zahtak bawl kha ding uh hi,’ a ci hi.

Tedim Bible

¹³ Tua ciangin lo neipa in, ‘Bang ka ci hih ding hiam? Ka it mahmah ka tapa ka sawl ding hi. Amaute in ka tapa a zahtak kha ding uh hi,’ a ci hi.

Luka 20:13 Referans Kwoze

Mattiu 3:17

Tua sung mahin vantung panin aw khat hong ging a, “Hih pen ka it mahmah ka Tapa hi a, ama tungah ka lungkim mahmah hi,” a hong ci hi.

Jeremiah 36:7

Topaʼ tungah amaute thumin a vekpi-un a hoih lohna uh panin a kihei thei kha ding uh hi. Bang hang hiam cih leh hih miteʼ tungah Topa in tunsak dingin a gen sa a hehna le a thangpaihna lian mahmah hi,” ka ci hi.

Jeremiah 36:3

Judah mite in amauʼ tungah tunsak dingin ka ngaihsut siatna khempeuh za-in, mi khempeuh in a siatna uh panin kiheina-in nei kha thei ding uh a, keimah in zong amauʼ khialhna le amauʼ mawhnate ka maisak thei kha ding hi,” a hong ci hi.

Galati 4:4

Ahi zongin a hun a cin ciangin eite khempeuh Pasianʼ tate i suah theih nadingin Thukham nuai ah a om mite a hong tan khia dingin Pasian in a Tapa hong paisak a, tua Tapa pen leitung ngeina bangin numei sung panin hong suakin, Jew Thukham sungah hong nungta hi.

ROM (Romans) 8:3

Mihingte thahat lo ihih manin Thukham in ahih zawh loh thute Pasian in a hih zo hi. Mawhna a beisak theih nadingin mihingte sunga om mawhna tungah thu a khenna-in ama Tapa hong sawl a, amah pen mihingteʼ mawhna lungsim mah a nei-in a hong pai hi.

Johan 1:34

Tua ahih manin hih mipa pen Pasianʼ Tapa hi, ci-in thei ka hih manin teci ka pang hi,” a ci hi.

Luka 9:35

Tua ciangin meii lakah aw khat hong ging a, “Hih pa, ka Teel sa ka Tapa ahi hi; ama thu na ngai un,” a ci hi.

Mattiu 17:5

Tua bangin a pau laitakun meii ngo hong kaai vatin amaute hong khuh a, tua meii lak panin aw khat hong ging vatin, “Hih pa pen ka it, ka lung a kim mahmahna ka Tapa ahi hi. Ama thu na ngai un,” a hong ci hi.

Hosea 11:8

Israel mite aw, bangci-a hong nusia thei dinga, bangci-a hong paidak thei ding ka hi hiam? Admah khua ka suksiat bangin kong susia nuam kei a, Zeboiim khua ka bawl bangin kong bawl nuam kei hi. Note hong khasiat mahmah ka hih manin tua ci banga hih ding ka lungsimah om lo hi.

Hosea 6:4

Israel le Judah aw, note bang hong cih thei nawn ding ka hi hiam? Noteʼ hong itna pen zingsang meii lum bangin theng pak a, a mangthang pak daitui tawh kibang lel hi.

Isaiah 5:4

Ka leenggui lo adingin ka hih nai loh ka hih ding a kilawm bang om lai ahi hiam? Leenggah hoih gah ding ka lamet laitakin bang hangin gam leenggah hong gah mawk ahi hiam?

Ezekiel 12:3

Ezekiel aw, tu-in galtai dingteʼ gamtat bangin na van puak ding guang inla, suntangpi-in paikhia in. Na omna panin na paikhiat lam mi khempeuh musak in. A lehdo thei mi ahih tei hangun a thu theithei kha ding uh hi.

Luka 18:2

“Khuapi khat sungah Pasian a zahtak lo, mi zong a don lo thukhen mang khat a om hi.

Luka 18:4

Tawl khat sung thudon loin om a, ahi zongin a nung ciangin, ‘Pasian zahtak loin, mite zong ka don nop khol loh hangin,

Luka 20:12

Tua ciangin a thum veina dongin a nasem dang khat mah sawl leuleu a, lo khawhlawhte in amah zong na liamsak gawpin na sawn khia uh hi.

Luka 20:14

Ahi zongin lo khawhlawhte in a tapa a muh uh ciangin khatlekhat in, ‘Hih pa, a gamhluah ding pa ahi hi. Ama gamhluah ding teng i ngah theih nadingin amah that ni,’ a ci uh hi.