Luka 18:14 - Tedim Bible Revision 2017

¹⁴ Keʼn kong cih in ah, hih mipa pen Pasian tawh a kilem sa-in a inn ah ciah a, a khat pa pen tua bangin ciah lo hi. Bang hang hiam cih leh a kiliansakte pen kiniamkhiat suk dinga, a kiniamkhiatte pen a lianin kibawl ding hi,” a ci hi.

Tedim Bible

¹⁴ Ke’n kong cih-inah, hihpa in mawhmaisakna ngahin innah a ciah hi. Farisaipa in ahih leh, mawhmaisakna a ngah kei hi. Bang hang hiam na cih uh leh, amah leh amah a kiphat mi khempeuh in niamkhiatna a ngah ding hi. A kiniamkhiatte in minphatna a ngah ding uh hi,’” a ci hi.

Luka 18:14 Referans Kwoze

Luka 14:11

Bang hang hiam cih leh a kiliansakte khempeuh in niamkhiatna thuak ding uh a, a kiniamkhiatte khempeuh a lianin kibawl ding hi,” a ci hi.

Luka 16:15

Jesu in amaute kiangah, “Mite in note a man penin hong ngaihsut theih nadingin na om uh a, ahi zongin Pasian in na lungsim tawng uh a hong thei hi. Bang hang hiam cih leh mihingte in a manpha mahmah in a ngaihsutte pen Pasian in bangmahin sim lo hi.

Jeim 4:10

Topa mai ah kiniamkhiat un. Tua hileh amah in hong lian bawl ding hi.

Mattiu 23:12

A kiliansakte khempeuh in niamkhiatna thuak ding uh a, a kiniamkhiatte khempeuh a lianin kibawl ding hi.

Paunak 29:23

A kiphasakte in niamkhiatna thuak dinga, a kiniamkhiatte in pahtawina ngah ding hi.

Jeim 4:6

Lai Siangtho in, “Pasian in a kihisakte nial a, a kiniamkhiatte a hehpih hi,” a cih mah bangin Pasianʼ hong hehpihna lian zaw hi.

Luka 1:52

Kumpi vangliante, a tokhom panun khia suk a, mi neute, mi lianin a bawl hi.

Late 138:6

Bang hang hiam cih leh Topa lian mahmah napi-in amah in a neute don a, a kiphasakte ahihleh amah in gamlapi panin mu thei veve hi.

Mattiu 5:3

“Kha thu lamah zawngkhal a kisate sungah vantung ki-ukna thu om ahih manin thupha ngah mi ahi uh hi.

Isaiah 57:15

Bang hang hiam cih leh a sang, a lian, a nungta tawntung Pa, ama min Siangtho ahi pa in hih bangin ci hi: “Kei pen a sangna mun le a siangtho munah ka om a, a kiniamkhiat miteʼ lungsim le a kisik miteʼ lungsim a thakhauhsakkik dingin kisikna le kiniamkhiatna lungsim a neite tawh zong kei ka om khawm hi.

Paunak 3:34

Amah in mi kihisakte bangmahin sim lo a, a kiniamkhiatte tungah maipha a pia hi.

JOB (Job) 25:4

Pasianʼ muhna ah kua dik zo dinga, siangtho zo ding ahi hiam?

Galati 2:16

Ahi zongin Jesu Khris upna hang bek tawh Pasian tawh kipawl theihna kingahin, Thukham zuihna hang tawh kingah ngei lo hi, ci-in ka thei uh hi. Kote mahmah in zong, Khris hangin Pasian tawh ka kipawl theih nadingun Jesu Khris ka um uh a, Thukham deihna ka zuihna hang uh tawh hi lo hi. Bang hang hiam cih leh Thukham zuihna hang tawh kuamah in Pasian tawh kipawl theihna ngah zo lo hi.

ROM (Romans) 4:5

Ahi zongin Pasianʼ maipha ngah nadingin nasepna suang loin upna a suang mipa pen Pasian in mimawh kimlai midik hi, ci-in sang ahih manin, amah tawh a kipawl theih nadingin Pasian in tua mipaʼ upna thupi san hi.

ROM (Romans) 3:20

Thukham in mihingte a mawhna kilangsak thei bek ahih manin thukham zuihna hangin kuamah in Pasian tawh kipawl theihna ngah zo lo hi.

Luka 10:29

Ahi zongin Thukham hilh siapa amah kitangsak nuam ahih manin Jesu kiangah, “Ka veengte i cih kuate ahi hiam?” ci-in a dong hi.

Paunak 18:12

A kiniamkhiatte in zahtakna ngah uh a, a kihisakte pen siat ding a manawh hi ta hi.

Paunak 15:33

Topa zahtakna pen pilna mah hi pah a, kiniamkhiatna in pahtawina hong ngahsak hi.

JOB (Job) 22:29

Pasian in mi kiphasakte niamkhiat a, miniamte a hon hi.

1 SAMUEL MASA 1:18

Tua ciangin numei in, “Nangma mitah na nasem nu maipha hong musak in,” a ci hi. Tua ciangin tua numei pai-in an ne a, dahmai pua nawn lo hi.

Paikhiatna 18:11

Topa pen pasian dang khempeuh sangin a liatzawkna tu-in ka thei hi. Bang hang hiam cih leh mite tungah kiphatsakna tawh Egypt mite a gamtat laitakin amah in Egypt miteʼ khutnuai panin mite khah khia hi,” a ci hi.

ROM (Romans) 8:33

Pasian in mawh lo hi, ci-in a gen khit sa ahih manin, Pasianʼ teel sa mite tungah kua in mawhna guan thei nawn ding ahi hiam?

ROM (Romans) 5:1

Tu-in upna hangin Pasian tawh kipawl khinta ihih manin i Topa Jesu Khris hangin Pasian tawh a kilemkik ta ihi hi.

Daniel 4:37

Tu-in keimah Nebukhadnezzar in Vantung Kumpipa phatin, zahtakin a min ka thangsak hi. Ama bawlna khempeuh a man hi. Amah a tawntungin thuman a, a kiphasakin a gamtate a neusak hi,” a ci hi.

Isaiah 53:11

Amah in a gimna thaman mu-in a lungdam ding hi. A mawk thuak ahih lohna thei-in a thuman ka nasem pa in mi tampi tak a dik suaksak dinga, amah in amauteʼ mawhnate pua ding hi.

Isaiah 45:25

Israel suanlekhakte khempeuh, Topa’ hangin gualzo-in a kisial ding uh hi.

JOB (Job) 9:20

Kei ka dik hangin keima kam mah siksanin kei hong man dinga, mawhbaang lo ka hih hangin keima kampau hong leh heisak ding hi.

Habakkuk 2:4

Tua a hong tung ding thu pen ‘A gilo mite suakta lo dinga, thuman mite ahihleh Pasian tungah a cihtak manun nungta ding hi,’” a hong ci hi.

Thuhilh-sia 9:7

An ne-in lungdam inla, zu ne-in lungnuam in. Na gamtatna peuhpeuh Pasian in hoih a sa hi.

Late 143:2

Na nasem pa, thu hong sit kei in. Bang hang hiam cih leh nangma mai ah mihing a dik zo kuamah om lo hi.

Isaiah 66:2

Hih nate khempeuh keima bawl sa ahih manin hih nate khempeuh keima-aʼ ahi hi, Topa in ci hi. Ahih hangin kiniamkhiatin, lungsim a kitamzan mipa, keima thu ah lau-in a liing kelkel pa, keima deih mipa ahi hi.

Paunak 25:7

Uliante a awn dingin hua lai ah va tu suk in, hong kicih sangin hih lai ah hong tu to in, hong kicih ding hoih zaw hi.