Luka 13:34 - Tedim Bible Revision 2017

³⁴ “Jerusalem, Jerusalem aw, kamsangte na that a, Pasianʼ hong sawl kamtaite na deng lum hi. Akpi in a kha tawh a note a huai mah bangin na mite ka huai nuam tawntung a, ahi zongin na ut kei hi.

Tedim Bible

³⁴ “Pasian’ kamsangte that a, na kiangah hong kisawlte zong suang tawh a deeng Jerusalem, Jerusalem khuapi aw, akpi in a nongeekte a kha nuai-ah a khop bangin, na tate tamveipi ka khawm nuam zo a; nang na ut kei hi.

Luka 13:34 Referans Kwoze

Sawltak 7:52

I pu i pate in kamsang a bawlsiat loh khat beek om lo hi. Pasianʼ deihna bangin a gamta a Nasem pa a hong pai nading thu a gen khol Pasianʼ kamtaite na that uh a, tu-in note in tua nasem pa leh hekin na that leuleu uh hi.

Isaiah 30:15

Bang hang hiam cih leh Israel-teʼ Siangtho Pa, Topa Pasian in, “Kiheikikna le khawlna bek tawh note in suahtakna na ngah ding uh hi. Daitakin omna le muanna pen nomauʼ thahatna hi ding hi,” a ci hi. Ahih hangin note na tua ci kei uh a,

Luka 23:28

Jesu zong amaute lamah kihei a, “Jerusalem khua numeite aw, kei hong kah kei unla, note le na tate uh adingin kap un.

Luka 19:44

Nang le na kulh sunga om mi khempeuh hong sumai ding uh a, a omna ngei munah suang khat zong om nawn lo ding hi. Hih bang a pianna pen nang a hu dingin Pasian hong pai lam na phawk lohna hang ahi hi,” a ci hi.

Zekhariah 1:4

Na pu na pate uh bang nawn kei un. Nidang a kamsangte in amaute kiangah ka thu gen uh a, gamtat sia gamta loin, a mawh nawn loh nading hilh uh hi. Ahi zongin amaute in ka thu ngai nuam loin, ka thu hong mang lo uh hi.

Hosea 11:7

Ka mite in kei kiang panin pial ding ngaihsun tawntung uh a, a sangna lam ah a kiko khop uh hangin kihon khia lo ding hi.

Hosea 11:2

Amaute kilim sap semsem leh ka maitang pan gamla pai semsem hi. Ka mite in Baal tungah biakna pia uh a, milim biakna-in paknamtui a hal uh hi.

Jeremiah 6:16

Topa in mite tungah, “Lam ka bomah ding unla khuadak un. Lam hoih ahi lampi luite dong unla tawn un. Tua hileh na tawldam ding uh hi,” a ci hi. Ahih hangin amaute in, “Ka tawn kei ding uh hi,” a ci uh hi.

Jeremiah 2:30

Na tate uh thuhilhin ka sat hangin a mawkna suak zo ta hi. Amaute kibawl pha tuan lo uh hi. Humpinelkai hawk bangin na namsaute un na kamsangte uh a that khinzo uh hi.

Late 36:7

Pasian aw, na itna kip manpha mahmah hi. Mihing tate na kha liim ah bu uh hi.

Ruth 2:12

Topa in na gamtatna sate a pha tawh hong thuk a, a liim nuai beel dinga na paina Israel-teʼ Pasian, Topa in thaman a cingin hong pia ding hi,” a ci hi.

Mattiu 22:6

a dangte in a nasemte manin a na sat gawp khit uh ciangin a na that uh hi.

Mattiu 22:3

Mopawi siim dingin a khoh sa mite a sam dingin a nasemte sawl a, ahi zongin kuamah pai lo hi.

Kah la 1:16

Tua ahih manin ka mit pan khitui a dimletin a luang hi. Hong hehnem ding le a hong hanthawn ding kuamah om lo hi. Galte in hong zo khin a, ka mite a cimawh uh hi.

Isaiah 50:2

“Kong pai ciangin bang hangin mi khat zong om lo ahi hiam? Kong sap ciangin bang hangin hong dawng ding khat zong om lo ahi hiam? Hong hon zo lo zah dingin ka khut hat lo lua ahi hiam? Tua ahih kei leh zong note khah khiatna ding vangliatna nei lo ka hi hiam? Keima taina tawh tuipi ka keusak a, gunte pen sehnel gam ka suaksak hi. Tui om loh manin a ngasate dangtakin si-in a uih gawp hi.

Late 91:4

Amah in a khate tawh nang hong tuam dinga, ama khateʼ nuai ah bukna ding na mu ding hi. Ama thumanna in nang hong dalin hong hu ding hi.

Late 81:13

Ka mite in ka thu hong ngai-in, keima deih bangin Israel a gamta hileh!

Late 57:1

Kei hong hehpih in Pasian aw, nang hong bel ka hih manin kei hong hehpih in. Siatna huihpi a ven mateng na kha liim ah kong bu ding hi.

Nehemiah 9:30

Kum tampi sung lungduaina tawh amaute na thuak a, na kamsangte tungtawnin amaute na hilh hi. Ahi zongin amaute in ngai nuam lo uh hi. Tua ahih ciangin gamdang miteʼ khut sungah amaute na pia hi.

Jeremiah 35:14

Rekhabʼ tapa Jonadab in a suanlekhakte tungah leenggahzu a dawn loh nading uh a thupiakna amaute in zui uh a, tu ni ciang dong bangmah a dawn kei uh hi. Bang hang hiam cih leh amaute in a pu uhʼ thupiakna a mang uh hi. Keimah in note kong hopih tawntung hangin ka thu nong mang kei uh hi.

Jeremiah 26:23

amau in zong Egypt gam panin Uriah manin kumpi Jehoiakim kiangah a puak uh hi. Amah in tua pa namsau tawh thatin a luanghawm mi mawkmawkteʼ kivuina munah a paai hi.

Late 149:2

Amah a Bawlpa tungah Israel lungdam henla, amauʼ Kumpipaʼ tungah Zion mite kipak tahen.

Nehemiah 9:26

“‘Ahi zongin amaute in demnopna lungsim nei-in nang hong lehdo uh hi. Amaute in na thukham nungngat uh a, nangma lamah hong ciahkik nadingun amaute a hilh na kamsangte that uh a, amaute in gendai mawhna lianpi bawl uh hi.

Thu-hilhkikna 32:29

Amaute a pil hileh, hih thu thei tel ding uh a, amauʼ thu tawpna mu ding uh!

Thu-hilhkikna 5:29

Amaute le a suan a khakte uh a nopsak tawntung theih nadingun keimah zahtak ding le ka thupiak khempeuh zuih ding hih bang ngaihsutna nei tawntung le-uh ka deih ahi hi.

Mangmuhna 11:8

singlamteh tungah amauteʼ Topa a kithahna mun Sodom ahih kei leh Egypt minkhem a pua khuapi kongzing ah a luanghawm uh kipaidak ding hi.

Sawltak 8:1

Hih Stefen thahna thu ah Saul in zong thukimpih hi. Tua ni a kipanin Jerusalem khua-a om pawlpite in nakpi takin bawlsiatna thuak ding kipan uh hi. Sawltakte sim loh, thu um midang khempeuh, Judea gam le Samaria gamah kithehthang gawp uh hi.

Sawltak 7:59

Tua bangin suang a khiat thuahthuah laitakun Stefen in thu ngen a, “Topa Jesu aw, ka kha hong la in,” a ci hi.

Luka 15:28

A ta u zaw pen a heh suak mahmah ahih manin inn sungah zong hong tum nuam lo hi. Tua ahih manin a pa va pusuakin, a ta hong sung tum nadingin a zol hi.

Joel 2:23

“Zion mite aw, kipak unla, Topa na Pasian uh tungah lungdam ta un. Note in an na hauh theih nadingun nidang a bangin khuapi guah, tuk guah le phalbi guah, a hoihbek zah hong zusak hi.

Kah la 4:13

Kamsangte le siampite in mawhna a bawl manun mi siangtho midikteʼ sihna a hong piang ahi hi.

Late 17:8

Kei a hong su gawp migilo, kei a hong umcih a kihtakhuai mahmah ka galte kiang panin mitnauta bangin hong kem inla, na kha liim ah hong seel in.

Jeremiah 35:17

Tua ahih manin keimah Topa Vanglian Pasian in kong genin ah: En un, Judah mite le Jerusalem khua ah a teeng mi khempeuh tungah a tung dingin ka genkhiat sa khempeuh ka tungsak ding hi. Bang hang hiam cih leh amau tungah ka gen hangin amaute in ka thu hong ngai lo uh a, amaute ka sap hangin hong dawngkik lo uh hi, ci hi, ci-in va gen in,” a hong ci hi.